Apa 22 - The Keyagana NT and 25 OT books

¹ Poloʼa hunoʼaeʼmo, Nafaluʼnimogitapaʼe afoʼnimogitapaʼeʼmo geʼnimo afiyo. Nagaefeʼmo huʼapaeʼmo, ani kava nehiye ina kava nehiye huʼa nehaya gelefeʼmo mago gemo hugesuve, huno hapa paiʼniye.

² Yu vayaʼai gefatiʼmo huʼnigeʼa afiteʼapaeʼmo magoʼe huʼa ge osuʼa afaʼa afiʼnae.

³ Poloʼa hunoʼaeʼmo, Yu vekamo maiʼneʼna Silisiya kotega taonimo agiʼamo Tasasi taonifiʼmo itaʼnimoʼmo alino natetegeʼnaeʼmo eʼna mani Yulusalemu taonifiʼmo ko siteʼna maiʼnove. Maiʼnogeno Gameliyeloʼa muki laginago vayaʼai keʼaepa gemo alino naya maleʼnigeʼna alagepa huʼna afiʼnove. Lapakaemo hemenimo nehaya agufa kavaʼmo huʼna Goti kateʼmo nayamukiki huʼna uʼnove.

⁴ Nagaemo saufa mono gemo akame nehaya vayaʼmo faligae, huʼna huteʼna naini huʼna apateteʼna ve aʼnemo kalavusi huʼna apateʼnove.

⁵ Mono huʼa neʼapataya vayaʼaiteʼmo yagaino neʼapateya vekaʼe muki kanisole vayaʼmogiʼeʼmo huʼnova kavaʼnimo ago nageʼnayanageʼa afaʼa nava gemo huʼa lapa paigae. Apakaemo mago avoʼmo kaeʼa namiʼnageʼna alininuʼna Namasakasi taonifiʼmo Yu vayaʼmo apamisuvafeʼmo kaeʼa namiʼnae. Nagaemo ani vayaʼmo kalavusi huʼna apateteʼna Yulusalemu taonifiʼmo apavaleliʼna esugeʼa lusi hosu apakafu yaʼmo alisayafeʼmo uʼnove.

Poloʼa Goti mafaʼnemo hamaleʼnove, huno huʼniya gemae

⁶ Nagaemo Namasakasi taonimo haopaleʼmo neʼugenoʼaeʼmo yegemo haineno felukakuku huʼniya afinaʼmo lusi ha le yaʼmo kokuʼnapatiʼmo nahaopaleʼmo aeno ha leʼnigeʼnaeʼmo

⁷ nagaemo mopafiʼmo asagauʼna aiteʼnaeʼmo afuvana, Solo, Solo, huno, Na kava higekaeʼmo nagaefeʼmo kaini huka neʼnatane, huno nafi geʼnigeʼnaeʼmo,

⁸ Ala kava nene, huʼna, Ina lagae, huʼna afi geʼnogenoʼaeʼmo, Nagaemo Yesuʼnamo Nasalasa taonifi vekamo kaini huka neʼnatana vekamo maiʼnove, huno naha paiʼniye.

⁹ Nagaeʼeʼmo magokepi lokaeʼa uʼnaya vayaʼmogimo ha le yaʼmo ageʼnayaʼmonanafa naha paiʼniya gemo oʼafiʼnae.

¹⁰ Ala kava nene, huʼna, Na kava hisuve, huʼna afi geʼnogeno Ala kava neʼmoʼa naha painoʼaeʼmo, He tika Namasakasi taonifiʼmo ugenoʼao ani taonifiʼmo Gotiʼa ani kavaʼmo hugane, huno lekana paino kateʼniya kavafeʼmo kaha paigiyanagi uvo, huno naha paiʼniye.

¹¹ Ha le yaʼmoʼa nagaeteʼmo aeno ha leʼnigeno naulagalaʼmo aeno ali huʼnigeʼa nagaeʼeʼmo lokaeʼa uʼnaya vayaʼmogi nayate aliniʼa Namasakasi taonifiʼmo uʼa nateʼnae.

¹² Mago vekamo agiʼamo Ananayasiʼa mono vekamo lagae keʼaepa gemo akame nehiya vekamo maiʼnigeʼa muki Namasakasi taonifiʼmo maiʼnaya Yu vayaʼmogi agiʼaleʼmo aliʼa asaga huʼa ateʼnae.

¹³ Agaemo eno nahaopaleʼmo he tiʼnenoʼaeʼmo, Konagaʼnimo Solo, huno, kaulagalaʼmo ageka ayako, huno naha paiʼnigeʼnaeʼmo ageʼna ayakeʼnove.

¹⁴ Agaemo hunoʼaeʼmo, Laginago vayaʼai Gotiʼapimoʼa lekana paino kateʼniye. Gotiʼa hogoteno hunoʼaeʼmo, ani kavaʼmo huguve, huno agesamo afiʼniya kavafeʼmo ava gemo afiteka alagepa kavaʼmo nehiya vekamo ageteka agaiʼa avayafatiʼmo huʼniya gemo afisanafeʼmo lekana paino kateʼniye.

¹⁵ Kagaemo aliʼyaʼamo alikaeʼmo ageʼnana kavaʼe afiʼnana geʼeʼmo muki vayaʼaifeʼmo aeka hakalo huka hapa paigane.

¹⁶ Na kava higeka afaʼa maiʼnane. He tika aniʼmo faleteka Ala kava neʼmo agiʼalefeʼmo ge hugenoʼao hosu kavakamo aeno kalo paeno ataleno, huno naha paiʼniye.

Gotiʼa Polofeʼmo hunoʼaeʼmo, Uka alu nofi vayaʼaifeʼmo aeka hakalo huka hapa paiyo, huno naha paiʼniye, huno hapa paiʼniya gemae

¹⁷ Nagaemo aiʼna atagineʼna eʼna Yulusalemu taonifiʼmo alopa mono nopiʼmo uʼna haiʼna nunumuʼmo nehuʼnaeʼmo alagamuna agegekana huʼna ageʼnove.

¹⁸ Ageʼnovana Ala kava neʼmoʼa hunoʼaeʼmo, Malage huka Yulusalemu taonifatiʼmo ataleka uvo. Apakaemo nagae nava gemo aeka hakalo huka hapa paisana gemo oʼafigayanagi ataleka uvo, huno naha paiʼniye.

¹⁹ Naha paiʼnigeʼnaeʼmo, Ala kava nene, huʼna, Ago afiʼnayana nagaemo uʼna Yu vayaʼai mono nopiʼe nopiʼeʼmo uʼna haiʼna kagaefeʼmo apakesamo afiʼa fatago nehaya vayaʼmo kalavusi huʼna apatete apatete huʼnove.

²⁰ Mago vayaʼmogimo kava gemo aeno hakalo huno hapa nepaiya vekamo agiʼamo Sitiveniʼa amagiʼnaya afinaʼmo apakaeʼeʼmo magokepi maiʼneʼna, he, kanalene, huteʼna amagiʼnaya vayaʼai kukena yaʼapileʼmo yagaiʼna maiʼnove, huʼna ha paiʼnogenoʼaeʼmo

²¹ Ala kava neʼmoʼa hunoʼaeʼmo, Afaʼa uvo. Alu nofi vayaʼaitegamo aliʼna katesugekaeʼmo afaʼa uvo, huno naha paiʼniye, huno hapa paiʼniye.

²² Apakaemo Poloʼa huʼniya gemo afime afime neʼvagenoʼaeʼmo Poloʼa ani gemo hapa paiʼnigeʼa afiteʼa alopa gefatiʼmo huʼapaeʼmo, Ani agufa vekamo ma mopafi oʼmaigiyanagi amagita ataleyo, huʼa huteʼa

²³ apano aeteʼa apaipamo lusi kava huno leʼnigeʼapaeʼmo kukena yaʼapimo aliʼa asagiʼa atalege mumusopamo aliʼa kokuʼnapi yaga auʼa atalege huʼnae.

²⁴ Ati vayaʼaiteʼmo hogote vekamo yagaino neʼapateya vekamoʼmo hunoʼaeʼmo, Lagae yafa nopiʼmo avalelita uta haitapa Yu vayaʼmogi apano aeteʼa amagigefeʼmo huʼnaya gemo aepaʼamo laha paisigeta afisunafeʼmo amagiyo, huno hapa paiʼniye.

²⁵ Hapa paiʼnigeʼa avaleliʼa uʼa haiʼa amagisayafeʼmo nofi kiʼa ateʼnagenoʼaeʼmo Poloʼa mago vekamo haopaleʼmo he tino maiʼniya vekamo ati vayaʼaiteʼmo yagaino neʼapateya vekaeʼmo, Lapakae keʼaepa getapimoʼa lapakaefeʼmo hunoʼaeʼmo, Lomu vayaʼmogi yagaiʼa neʼataya vekamo agoti hutapa oʼateʼnaya vekamo amagiyo, huno lapa paiʼnifiye, huno afi geʼniye.

²⁶ Yagaino neʼapateya vekamoʼmo ani gemo afitenoʼaeʼmo uno hogote vekamo yagaino neʼapateya vekaeʼmo hunoʼaeʼmo, Nehana kavafeʼmo alagepa huka kagesamo afiyo. Ani vekamo Lomu vayaʼmogi yagaiʼa neʼataya vekamo maiʼniye, huno ha paiʼniye.

²⁷ Hogote vekamo yagaino neʼapateya vekamoʼmo uno Polofeʼmo hunoʼaeʼmo, Lomu vayaʼmogi yagaiʼa nekataya vekamo maiʼnapiye, huno afi geʼnigenoʼaeʼmo, He, huno ha paiʼniye.

²⁸ Hogote vekamo yagaino neʼapateya vekamoʼmo hunoʼaeʼmo, yagaiʼa natesayafeʼmo alopa miyaʼmo ago apamiʼnove, huno huʼnigenoʼaeʼmo, Miya faiʼnanaʼmonanafa nagaemo itaʼnimoʼmo alino nateʼniya afinatetiʼmo yagaiʼa neʼnataya vekamo maiʼnove, huno ha paiʼniye.

²⁹ Ati vayaʼmogi loka huʼa afi gesayafeʼmo eʼa maiʼnaya ati vayaʼmogimo ani gemo afiteʼapaeʼmo afaʼa ataleʼnae. Hogote vekamo yagaino neʼapateya vekamoʼmo hunoʼaeʼmo, Vaehae, huno, Lomu vayaʼmogimo yagaiʼa neʼataya vekamo seli nofitetiʼmo kiʼna ateʼnove, huno agesamo afiteno lusi kava huno koli huʼniye.

³⁰ Egaʼamo hogote vekamo yagaino neʼapateya vekamoʼmo Yu vayaʼmogi Polofeʼmo hosu kavaʼmo huʼniye, huʼa huʼnaya gemo aepaʼamo afisiyafeʼmo hunoʼaeʼmo, nofiʼmo hatu maetapa ateyo, huno hapa paiteno mono huʼa neʼapataya vayaʼaiteʼmo yagaiʼa neʼapataya vayaʼe kanisole vayaʼefeʼmo, Etapa alita anupa huta maiyo, huno ge huʼniye. Eʼa aliʼa anupa huʼa maiʼnagenoʼaeʼmo Poloʼa avalelineno apaulagaleʼmo alino he tino ateʼniye.