Apa 19 - The Keyagana NT and 25 OT books

Poloʼa Efasasi taonifiʼmo uno maiʼniya gemae

¹ Apolosiʼa Kolitiyani taonifiʼmo maiʼnigenoʼaeʼmo Poloʼa folagapiʼmo haneʼniya aveleʼmo uteno uno Efasasi taonifiʼmo avaʼyi huteno Goti geʼamo neʼafiya vayaʼmo maiʼnageno apaketenoʼaeʼmo,

² Lapakesamo afita fatago huʼnaya afinaʼmo Goti Aunemeʼamo aote Aunemeʼamo ago aliʼnafiye, huno apafi geʼnigeʼapaeʼmo, Haʼao, huʼa, Goti Aunemeʼamo maiʼniye, huta oʼafiʼnone, huʼa ha paiʼnae.

³ Ha paiʼnagenoʼaeʼmo, Na agufa gelefeʼmo aniʼmo faleʼnae, huno ge huno apafi geʼnigeʼapaeʼmo, Yoniʼa alino apaya maleʼniya geʼageʼmo afiteta ani gelefekeʼmo aniʼmo faleʼnone, huʼa ha paiʼnae.

⁴ Poloʼa hunoʼaeʼmo, Yoniʼa aniʼmo faleno neʼapatenoʼaeʼmo, Lapaipamo alita afe letetapa nagae nakameʼmo huno esiya vekamo Yesu Kalaisifeʼmo lapakesamo afitapa fatago hiyo, huno hapa paiʼniye, huno hapa paiʼniye.

⁵ Ani gemo afiʼnagenoʼaeʼmo Ala kava neʼmo Yesu agiʼaletiʼmo aniʼmo faleno apateʼniye.

⁶ Poloʼa apakufaleʼmo ayatalaʼmo maleʼnigenoʼaeʼmo Goti Aunemeʼamo aote Aunemeʼamo emineno apakaeteʼmo aliʼyaʼmo aliʼnigeʼapaeʼmo alu apake alu apakemo aiteʼa Goti geʼamo aeʼa hakalo huʼa hapa paiʼnae.

⁷ Muki ani vayaʼmo tuolofuʼa vayaʼmo maiʼnae.

⁸ Poloʼa loleʼe magoʼe kaimo maiʼneno Yu vayaʼai mono nopiʼmo uno haino lokiya gemo huno apakesamo alino hapa paisiyafeʼmo alu ge alu geletiʼmo Gotiʼa neʼyagaiya kavafeʼmo ava gemo huno hapa paiʼniye.

⁹ Mago vayaʼamogimo lokiya apaipamo haneʼniyaʼmofeʼmo apakesamo afiʼa fatago osuʼa muki vayaʼai apaulagaleʼmo Ala kava neʼmo kavafeʼmo huʼa faipa huʼa ateʼnagenoʼaeʼmo Poloʼa apataleno uno Goti geʼamo neʼafiya vayaʼageʼmo apavalelino uno Tilanasiʼa sukulumo alino apaya neʼmaleya nopiʼmo muki afinaʼae afinaʼaeʼmo alu ge alu geletiʼmo apakesa alino hapa paiʼniye.

¹⁰ Agaemo lole kafugamo maiʼneno ani kavaʼmo hume hume neʼvigeʼapaeʼmo muki Esiya kotega vayapatiʼmo Yu vayaʼe alu nofi vayaʼmogiʼeʼmo Ala kava neʼmo geʼamo afiʼnae.

Siva mafaʼne anagaʼaifeʼmo huʼniya gemae

¹¹ Gotiʼa Poloʼmo lokiya vaino ateʼnigeno noʼagaya aeto agufa aune kavaʼmo huʼniye.

¹² Apakaemo Poloʼa maleʼniya akasipiʼe lavolavoʼeʼmo alini uʼa kaita hapauʼniya vayaʼai apakufaleʼmo maleʼnageno kaitaʼapimo hapagege hosu apaune vayaʼmo alino hapafaino apatalege huʼniye.

¹³ Mago Yu vayaʼmo nata neʼuʼa maiʼneʼa hosu apaune vayaʼmo aliʼa hapafaiʼa neʼapatalaya vayaʼmogimo Ala kava neʼmo Yesu agiʼaletiʼmo amalageka huʼa hosu apaune vayaʼmo aliʼa hapafaiʼa apatalesayafeʼmo huʼapaeʼmo, ani Poloʼa aeno hakalo huno hapa nepaiya vekamo Yesu agiʼaletiʼmo emitetapa viyo, huʼa ge huʼnae.

¹⁴ Mago vekamo agiʼamo Sivaʼa mono huʼa neʼapataya vayaʼaiteʼmo yagaino neʼapateya vekamo mafaʼne anagaʼamo seveniʼa mafaʼne anagaʼmogimo ani kavaʼmo huʼnae.

¹⁵ Ani gemo huʼnagenoʼaeʼmo hosu aune vekamoʼmo hunoʼaeʼmo, Yesuʼe Poloʼeʼmo anakeʼnovana lapakaemo ina lagitapae, huno hapa paiʼniye.

¹⁶ Hosu aune vekamo aipafiʼmo maiʼniya vekamoʼmo lusi kava huno apamagino apakufamo aino atalagauteno kukena yaʼapimo alino apake aino alino asagino ataleteno aeno apakaseʼnigeʼapaeʼmo noʼafatiʼmo apakufalagaʼageʼmo ataleʼa apaune hetaleʼa uʼnae.

¹⁷ Muki vayaʼmo Efasasi taonifiʼmo maiʼnaya Yu vayanagi alu nofi vayanagi huʼa ani kavafeʼmo ava gemo afiteʼapaeʼmo lusi kava huʼa koli huteʼa Ala kava neʼmo Yesu agiʼaleʼmo aliʼa asaga huʼa ateʼnae.

¹⁸ Asole vayaʼmogi apakesamo afiʼa fatago huʼnayaʼmofeʼmo eʼa muki vayaʼai apaulagaleʼmo hosu kavaʼmo huʼnaya kavaʼapieʼmo aeʼa hakalo huʼa hapa paiʼnae.

¹⁹ Ani vayaʼmogimo analisa hapaege lusa kavaʼmo huge nehaya mukuʼapimo asole vayaʼai apaulagaleʼmo aliniʼeʼa atafiʼmo kaeʼnae. Muki ani kaeʼnaya mukumo miya faiʼnaya monimo lusi moni fifiti tauseni agufa monimo haneʼniye.

²⁰ Ani kavaʼmo huʼnageno Ala kava neʼmo ava gemo magoʼe huno aino atagu faeno uneno huʼniye.

Efasasi vayaʼmogimo Polofeʼmo alopa gefatiʼmo huteʼa apano aeʼnaya gemae

²¹ Henagaʼamo Goti Aunemeʼamoʼmo Poloʼmo agesa afi yaʼmo amiʼnigenoʼaeʼmo, Masetoniya kotegaʼe Akaiya kotegaʼeʼmo aeʼna agaseʼna uʼna Yulusalemu taonifiʼmo avaʼyi huguve. Maigeʼnaeʼmo ataleʼna Lomu taonifiʼmo uʼna agegauve, huno agesamo afiʼniye.

²² Agaemo Timotiʼe Ilasatasiʼeʼmo ha neʼmaʼa vekalaʼmo alino anateʼnigeʼana Masetoniya kotegamo utaʼageno Esiya kotegamo maiʼniye.

²³ Ani afinaʼmo Efasasi taonifi vayaʼmogimo Ala kava neʼmo kavafeʼmo lusi kava huʼa alopa gefatiʼmo huteʼa apano aeʼnae.

²⁴ Mago vekamo agiʼamo Nimitiliyasiʼa lusi moniletiʼmo miya nefaiya siluva yafatetiʼmo mago aise noʼmo nekiya vekamo maiʼniye. Ani kiʼniya gotiʼapimo agiʼamo Atemisi mono nokana noʼmo kiʼnigeʼa ani aliʼyaʼmo neʼaliya vayaʼmogimo lusi monimo alige alige huʼa maiʼnae.

²⁵ Agaemo magoʼe huno ani agufa aliʼyaʼmo neʼaliya vayaʼaifeʼmo ge huʼnigeʼa eʼnagenoʼaeʼmo, Vayaʼnimogitapae, huno, Ago ageʼnayana lagae aliʼyatetiʼmo lusi monimo neʼalune.

²⁶ Lapakaemo Poloʼa nehiya kavaʼmo agetetapa agae kavafeʼmo ava gemo ago afiʼnae. Agaemo mani Efasasi taonifiʼmo maiʼnaya vayaʼageʼmo alino aino atagineno noʼapatefa muki Esiya kotega maiʼnaya vayaʼeʼmo alino aino atagineno apatetenoʼaeʼmo, Vayaʼmogi apayatetiʼmo alo nehaya yaʼmo gotiʼapimogi oʼmaiʼnae, huno hapa paiteno apakesa magoʼe huno alino hapa nepaiye.

²⁷ Vayaʼmogi henagaʼamo lagaemo neʼaluna aliʼyafeʼmo, Hosu aliʼyaʼmo neʼaliye, huʼa hugae. Aliʼyatieʼmo huʼa faipa huʼa atege hogote gotitimoʼae huta nehuna aʼmo mono nofeʼmo huʼa faipa huʼa atege huteʼa agiʼaleʼmo aliʼa afepi ategae. Esiya vayaʼe muki ma mopafi vayaʼmogiʼeʼmo gotitimoʼae huta nehuna afeʼmo mono nehae, huno hapa paiʼniye.

²⁸ Ani gemo afiteʼapaeʼmo lusi kava huno apaipamo leʼnigeʼapaeʼmo alopa gefatiʼmo huʼapaeʼmo, Atemisiʼa Efasasi vayaʼmogita alatimo maiʼniye, huʼa huge huge huʼa maiʼnae.

²⁹ Huʼnageʼapaeʼmo muki taonifiʼmo maiʼnaya vayaʼmogi apano aeʼa apavamusa gemo huʼnigeʼa eʼa Gaiyasiʼe Alitakasiʼeʼmo Masetoniya vekalaʼmo Poloʼeʼmo umenitata nehaʼa vekalaʼmo anatafauʼana apayamukiki huʼa anavaleliʼa aliʼa anupa huʼa neʼmaiya yategamo uʼnae.

³⁰ Poloʼa uno apaulagaleʼmo he tino maiʼneno hapa paigefeʼmo nehigeʼapaeʼmo geʼamo neʼafiya vayaʼmogi huʼa atafauʼa ateʼnae.

³¹ Mago Polo ao vayaʼmogi ani koteʼmo yagaiʼa neʼapataya vayaʼmogimo huʼapaeʼmo, aliʼa anupa huʼa neʼmaiya yategamo oʼuvo, huʼa huʼnaya gemo huʼa atalageno Polotegamo uʼniye.

³² Muki vayaʼmogimo apano aeteʼa alopa gefatiʼmo alu ge alu gemo huʼnae. Asole vayaʼmogimo huʼapaeʼmo, na kava higetaeʼmo neʼopi huʼa apakesamo oʼafiʼnae.

³³ Yu vayaʼmogi Alekesanimo ayate heʼa vayu huliʼuʼa ateʼnageno muki vayaʼai apaulagaleʼmo he tino maiʼniye. Maiʼneno ayaʼmo ataleteno hosu kavaʼmo osuʼnone, huno hapa paisiyafeʼmo huʼnigeʼa

³⁴ ageteʼapaeʼmo Yu vekamo maiʼniye, huʼa huteʼa magokepi alopa gefatiʼmo huʼa aeʼa lago huʼapaeʼmo, Atemisiʼa Efasasi vayaʼmogita alatimo maiʼniye, huʼa yatala afinaʼmo huge huge huʼa maiʼnae.

³⁵ Mago vekamo Efasasi taonifiʼmo maiʼneno avoʼmo nekaeya vekamo he tiʼnigeʼapaeʼmo ageteʼa ge osuʼa maiʼnagenoʼaeʼmo, Efasasi vayane, huno, Muki vayaʼmogi afiʼnayana Efasasi taonifiʼmo ala Atemisi mono noʼe kokuʼnapatiʼmo asagauno aiʼniya yafaʼeʼmo haneʼnigeta yagaiʼnone.

³⁶ Magoke vekamoʼmo ani kavafeʼmo haʼao, huno osugiyaʼmofeʼmo mago kavaʼmo malage huta osutapa afaʼa vase hutapa maiyo.

³⁷ Ani lole vekalaʼmoganimo mono nopatiʼmo kumaya oʼaliʼana gotitapimofeʼmo huʼana faipa huʼana oʼateʼnaʼaʼmonanafa manileʼmo anavalelitapa eʼnae.

³⁸ Nimitiliyasiʼe agaeʼeʼmo neʼaliya agufa aliʼyaʼmo neʼaliya vayaʼeʼmo agoti huʼa anategefe hisayana agotimo hisaya afinaʼmo haneʼniyanageʼa agoti gemo neʼafiya vayaʼmogimo afigae. Agoti afinaʼmo afaʼa aliʼa api aiʼa ategae.

³⁹ Lapakaetegamo magoʼe gemo haneʼnisiyana alita anupa huta maisaya afinaʼmo hisageʼa aliʼa alagepa huʼa ategae.

^40-41 Lano aeʼnonaʼmofeʼmo mago hosu yaʼmo afaʼa aligune. Lapano aeʼnaya kavaʼmo aepaʼamo ohaneʼniyanageʼa loka huʼa lafi gesagetaeʼmo getimo afaʼa ohanegaiye, huno hapa paitenoʼaeʼmo ina gemo huno hapa painoʼaeʼmo, Afaʼa ataletapa viyo, huno hapa paiʼniye.