Apa 18 - The Keyagana NT and 25 OT books

Poloʼa Kolitiyani taonifiʼmo uno maiʼniya gemae

¹ Henagaʼamo Poloʼa Atenisi taonifatiʼmo ataleno uno Kolitiyani taonifiʼmo maiʼniye.

² Poloʼa uno ageyana mago Yu vekamo itaʼamoʼmo Ponitasi kotegamo alino ateʼniya vekamo agiʼamo Akuvilaʼa ani taonifiʼmo aiseʼamo akeyaʼvilagamo eno maiʼniya vekamo ageʼniye. Mago muki vayaʼaiteʼmo yagaino neʼapateya vekamo agiʼamo Kilotiyasiʼa Yu vayaʼaifeʼmo hunoʼaeʼmo, Lomu taonifatiʼmo ataletapa viyo, huno hapa paiʼnigeʼanaeʼmo Akuvilaʼe aʼamo agiʼamo Pilisilaʼeʼmo geʼamo afiteʼana ataleʼeʼana Kolitiyani taonifiʼmo maiʼnaʼageno Poloʼa uno anakaeʼeʼmo magokepi lokaeno maiʼniye.

³ Ani yalavelaʼmo mago selimo miya faili uʼa noʼmo kisaya yaʼmo nefakaniʼa yalavelaʼmo maiʼnaʼageno Poloʼa ani agufa aliʼyaʼmo neʼaliya vekamo maiʼniyaʼmofeʼmo anakaeʼeʼmo magokepi ani aliʼyaʼmo lokaeno alino maiʼniye.

⁴ Poloʼa muki sapati afinaʼae afinaʼaeʼmo Yu vayaʼai mono nopiʼmo uno haino Yu vayaʼe Galiki vayaʼmogiʼeʼmo apakesa afiʼa fatago hisaya agufa gemo hapa paiʼnigeʼa ani geʼeʼmo huge afige huʼa maitale maitale huʼnae.

⁵ Sailasiʼe Timotiʼeʼmo Masetoniya kotegatiʼmo Polotegamo eʼana avaʼyi huʼnaʼagenoʼaeʼmo Poloʼa aipamoʼmo kana huʼnigenoʼaeʼmo aipafatiʼmo Yu vayaʼaifeʼmo aeno hakalo huno hapa painoʼaeʼmo, Yesuʼa Kalaisi vekamo maiʼniye, huno hapa paiʼniye.

⁶ Yu vayaʼmogimo geʼamo amagiʼa ataleteʼa huʼa faipa huʼa ateʼnagenoʼaeʼmo kukenaʼaletiʼmo mumusopamo alino kalo paeno ataletenoʼaeʼmo, Oʼafiʼnayaʼmofeʼmo lapakaemo afela hesayaʼmoʼmo nagaemo vaiʼmo oʼaligufa lapakaitapigeʼmo vaiʼmo aligae. Lapataleʼna alu nofi vayaʼaitegamo uguve, huno hapa paiteno apataleno uʼniye.

⁷ Uno mago vekamo Gotifeʼmo mono nehiya vekamo agiʼamo Taitasi Yasiti nopiʼmo uno haino maiʼniye. Noʼamo Yu vayaʼai mono noʼmo haopaleʼmo haneʼniye.

⁸ Ani afinaʼmo Yu vayaʼai monoteʼmo neʼyagaiya vekamo agiʼamo Kilisipasiʼagi afamo anagaʼagi mago Kolitiyani vayanagi huʼa ani gemo afiteʼapaeʼmo apakesamo afiʼa fatago huteʼa aniʼmo faleʼnae.

⁹ Mago haniʼilagamo Poloʼa alagamuna agegekana huno ageteno afiʼniyana Ala kava neʼmoʼa, Koli osuvo.

¹⁰ Kagaeʼeʼmo lokaeʼna maiʼnovaʼmofeʼmo afaʼa oʼmaika geʼnimo aeka hakalo huka hapa paige hapa paige huka maiyo. Asole vayaʼnimo mani taonifiʼmo maiʼnayaʼmofeʼmo mago vekamoʼmo kamagisigeka kagafu yaʼmo oʼaligane, huno ha paiʼniye.

¹¹ Ha paiʼniyaʼmofeʼmo Poloʼa magoke kafugagi sigisiʼa kaigi huno Goti geʼamo alino apaya maleno maiʼniye.

¹² Ani afinaʼmo Akaiya kotega Lomu gamani vekamo agiʼamo Galiyoʼa maiʼnigeʼapaeʼmo Yu vayaʼmogimo magokepi he tiʼa Polofeʼmo kame huʼa ateteʼa agotileʼmo avaleliʼuʼnae.

¹³ Apakaemo huʼapaeʼmo, Ani vekamoʼmo Gotifeʼmo mono hisayafeʼmo keʼaepa gefiʼmo ohaneʼniya kateʼmo apavalelino neʼviye, huʼa huʼnae.

¹⁴ Poloʼa geʼapileʼmo aeno atagaina huno hapa paigefeʼmo aepa faino ge nehigenoʼaeʼmo Galiyoʼa Yu vayaʼaifeʼmo hunoʼaeʼmo, Yu vayaʼmogitapae, huno, Ani vekamoʼmo keʼaepa gemo amagino ataleʼnifi hosu kavaʼmo huʼnifi huʼniyesinana getapimo afaʼa afuvesine.

¹⁵ Hiyaʼmonanafa geʼaletinagi kavaʼaletinagi lapakae keʼaepa getapiletinagi hutapa agoti huta atesayafeʼmo nehisayana lapakaitapi yane.

¹⁶ Getapimo oʼafiguvanagi afaʼa ataletapa viyo, huno hapa paiteno agoti nopatiʼmo alino hapa faino apataleʼniye.

¹⁷ Galiki nofi vayaʼmogi Sosatenisiʼa Yu vayaʼai monoteʼmo neʼyagaiya vekamo agoti no kipateʼmo atafauʼa amagiʼnayaʼmonanafa Galiyoʼa ani kavafeʼmo agesa oʼafino afaʼa maiʼniye.

Poloʼa atagi neno Atiyoki taonifiʼmo eʼniya gemae

¹⁸ Inagi Poloʼa konagaʼamogiʼeʼmo Kolitiyani taonifiʼmo yatala afinaʼmo apakaeʼeʼmo lokaeno maiteno apataleno ugefeʼmo huʼnigenoʼaeʼmo mago yalavelaʼmo Pilisilaʼe Akuvilaʼeʼmo sipifiʼmo magokepi Siliya kotegamo uʼa avaʼyi hisayafeʼmo uʼnae. Ugefeʼmo nehunoʼaeʼmo Senekiliya taonifiʼmo maiʼnenoʼaeʼmo hogoteno Gotifeʼmo huguve, huno ha paiʼniya kavaʼmo akame huno ayokaʼmo lagauʼniye.

¹⁹ Lagautegeʼapaeʼmo uʼa Efasasi taonifiʼmo avaʼyi huteʼa Poloʼa Pilisilaʼe Akuvilaʼeʼmo anatalenuno Yu vayaʼai mono nopiʼmo uno haino hapa paiʼnigeʼapaeʼmo Yu vayaʼeʼmo ani gemo huge afige huʼa maiʼnae.

²⁰ Yu vayaʼmogi huʼapaeʼmo, Lagaeʼeʼmo yatala afinaʼmo maiyo, huʼa ha paiʼnayana, haʼao, huno huteno,

²¹ Na agufa kavaʼmo Yulusalemu kotegamo afole aisifigeʼna uʼna hopa afinaʼmo maisuvafeʼmo ugesuve. Gotiʼa hauʼnisiyana halate atagineʼna eʼna lapakegauve, huno hapa paiteno apataleno Efasasi taonifatiʼmo sipifiʼmo uʼniye.

²² Sisaliya taonifiʼmo uno avaʼyi huteno ataleno uno Yulusalemu taonifiʼmo uno haino siosi vayaʼmo ge apamamaeteno apataleno Atiyoki taonifiʼmo uno lamiʼniye.

²³ Mago afinaʼmo maiteno ataleno uno Galesiya kotegaʼe Filisiya kotegaʼeʼmo umenitata huno muki vayaʼmogi geʼamo afiʼnaya vayaʼmo Goti geʼaletiʼmo alino lokiya vaino apatemale apatemale huʼniye.

Apolosiʼa Efasasi taonifiʼe Kolitiyani taonifiʼeʼmo Goti geʼamo aeno hakalo huno hapa paiʼniya gemae

²⁴ Mago Yu vekamo agiʼamo Apolosiʼa itaʼamoʼmo Alekesani taonifiʼmo alino ateʼniya vekamo eno Efasasi taonifiʼmo maiʼniye. Agaemo Goti mukufiʼmo avoʼmo kae maleʼnaya gemo aepaʼamo alagepa huno afiʼneno alagepa huno aeno hakalo huno hapa paiʼniye.

²⁵ Ala kava neʼmo kafeʼmo ava gemo aliʼa aya maleʼnaya vekamo maiʼneno ayamukiki huno alagepa huno Efasasi vayaʼmo alino apaya maleʼniye. Agaemo Yoniʼa aniʼmo faleno neʼapateya vekamo ava geʼageʼmo afiʼniye.

²⁶ Agaemo Yu vayaʼai mono nopiʼmo aepa faino koli osuno lokiya gemo huno hapa nepaigeʼanaeʼmo Pilisilaʼe Akuvilaʼeʼmo afiteʼanaeʼmo avaleliʼeʼana noʼanifiʼmo oʼafiʼniya agufa gemo magoʼe huʼana Goti kafeʼmo ava gemo alagepa huʼana aliʼana aya maleʼnaʼae.

²⁷ Apolosiʼa hunoʼaeʼmo, Akaiya kotega ugesuve, huno hapa paiʼnigeʼapaeʼmo konagaʼamogimo huʼapaeʼmo, He, kanalene, huʼa huteʼa, Galiki konagaʼapimogi Goti geʼamo neʼafiya vayaʼaifeʼmo mago avoʼmo kaeʼapaeʼmo, Alita falu fala hutapa ateyo, huʼa kaeʼa amiʼnae. Uno avaʼyi hutenoʼaeʼmo Gotiʼa fiku hapa maeno apamiʼnigeʼa apakesamo afiʼa fatago nehaya vayaʼmo alagepa huno hapa maeʼniye.

²⁸ Agaemo he tino vayaʼai apaulagaleʼmo maiʼneno lokiya alagepa geʼaletiʼmo Yu vayaʼai geʼapileʼmo huno aeno ati kaeno hapa painoʼaeʼmo, Yesuʼa Mesaiya vekamo maiʼniye, huno Goti Mukufiʼmo haneʼniya geʼaletiʼmo alino apave liʼniye.