Apa 14 - The Keyagana NT and 25 OT books

Apa vekalaʼmo Aikoniyamu kotegamo uʼana maiʼnaʼa gemae

¹ Atiyoki kotegamo afole aiʼniya agufa kavaʼmo huno Aikoniyamu kotegamo afole aiʼniye. Poloʼe Manamasiʼeʼmo Yu vayaʼai mono nopiʼmo uʼana haiʼana alagepa huʼana aeʼana hakalo huʼana hapa paiʼnaʼageʼapaeʼmo asole Yu vayaʼe alu nofi vayaʼmogiʼeʼmo apakesamo afiʼa fatago huʼnae.

² Huʼnayaʼmonanafa mago apakesa afiʼa fatago osuʼnaya Yu vayaʼmogimo apa vekalaʼanifeʼmo alu nofi vayaʼai apakesamo faiteʼa aliʼa he tiʼa apateʼnae.

³ Apa vekalaʼmoganimo koli osuʼana yatala afinaʼmo maiʼneʼana Ala kava nefeʼmo ava gemo aeʼana hakalo huʼana hapa paiʼana maiʼnaʼae. Ala kava neʼmoʼa lokiya vaino anateʼnigeʼana noʼagaya agufa lokiya anaune kavaʼmo huʼnaʼae. Ala kava neʼmoʼa ani kavatetiʼmo fikumo hapa maeno neʼapamiya kavafeʼmo ava geeʼmo lama gemo haneʼniye, huno alino apave liʼniye.

⁴ Ani taonifiʼmo maiʼnaya vayaʼmo aliʼa fako huʼa mago vayaʼamogimo Yu vayaʼai geʼapimo afiʼnageʼapaeʼmo mago vayaʼamogimo apa vekalaʼani geʼanimo afiʼnae.

⁵ Ani afinaʼmo Yu vayanagi alu nofi vayanagi apakaeteʼmo yagaiʼa neʼapataya vayaʼapigi huʼa ge huge afige huteʼapaeʼmo, Anatafauta yafa kayotetiʼmo anamagigune, huʼa huʼnae.

⁶ Apa vekalaʼmoganimo ani gemo afiteʼanaeʼmo anaune hetaleʼana Lisitiya taonifiʼe Nemi taonifiʼeʼmo uteʼanaeʼmo mago ani taonimo haopaleʼmo haneʼniya koʼmo agiʼamo Laikoni kotegamo uʼana maiʼneʼanaeʼmo

⁷ alagepa faigoko gemo aeʼana hakalo huʼana hapa paiʼnaʼae.

Apa vekalaʼmo Lisitiya taonifiʼe Nemi taonifiʼeʼmo uʼana aliʼyaʼmo aliʼnaʼa gemae

⁸ Mago vekamo Lisitiya taonifiʼmo maiʼniya vekamo aiyalaʼmo lokiya oʼvaiʼnigeno ka umenitata nosiya vekamo itaʼamoʼmo alino ateʼniya afinatetiʼmo aiyalaʼmo hosuʼnigeno maime maime eʼniye.

⁹ Ani vekamo maiʼnenoʼaeʼmo Poloʼa huʼniya gemo afiʼnigeno Poloʼa agetenoʼaeʼmo, aliʼna he tiʼna atesuvafeʼmo agesamo afino fatago nehiyaʼmofeʼmo afaʼa aliʼna he tiʼna ategauve, huno agesa afiteno aulu haeno agetenoʼaeʼmo

¹⁰ alopa gefatiʼmo hunoʼaeʼmo, He tika aeka apafe lo, huno ha paiʼnigenoʼaeʼmo malage huno he tino aeno hailo huno uneno huʼniye.

¹¹ Muki vayaʼmogimo Poloʼa huʼniya kavaʼmo ageteʼapaeʼmo Laikoni kotega vayaʼmogi apakeʼapifatiʼmo alopa gefatiʼmo huʼapaeʼmo, mago gotiganimo vayakana huʼana afole aiteʼana lagaetegamo emi eʼana maiʼnaʼae, huʼa huʼnae.

¹² Manamasifeʼmo apakaiʼapi gotiʼapimo agileʼmo Susiʼae huʼa agi ateteʼa Poloʼa hogoteno ge nehiya vekamo maiʼniyaʼmofeʼmo agiʼamo Hemesiʼae huʼa ateʼnae.

¹³ Ani vayaʼai gotiʼapimo agiʼamo Susi mono noʼamo taoni haopaleʼmo haneʼnigeno Susitefeʼmo mono huno neʼapateya vekamoʼmo pulumakamo apavalege konali yaʼmo alige huteno apavalelino taoni kegiʼya hiʼyanaleʼmo eʼniye. Agaeʼe apakaeʼeʼmo pulumakamo amagiʼa ofalinimo anamiteʼana anakaetefeʼmo mono hisayafeʼmo eʼa maiʼnae.

¹⁴ Manamasiʼe Poloʼeʼmo ani kavaʼmo ageteʼanaeʼmo ohanauʼnigeʼana kukenaʼanimo aliʼana apake aiteʼana ani vayaʼai folagapiʼmo nagu nagu huʼana uʼnaʼae.

¹⁵ Alopa gefatiʼmo huʼanaeʼmo, Na kava higetapa ani agufa kavaʼmo hugefe nehae. Laʼagaemo lapakaekana hutaʼa vayalafatalaʼmo maiʼnoʼae. Laʼagaemo lapa paitaʼaeʼmo, Ani agufa kavaʼmo ina agufa kavaʼmo haneʼniyanageno lapa oʼmaegaiyanagi ataletapa Gotiʼa afaʼa maiʼniya vekamoʼmo kokuʼnanagi ma mopagi solovala aninagi muki ma mopafiʼmo haneʼniya yanagi kokuʼnate haneʼniya yanagi huno alo huʼniya Gotitegamo viyo, hutaʼa lapa paitetaʼa alagepa faigoko gemo aetaʼa hakalo hutaʼa lapa nepauʼae.

¹⁶ Akeyaʼvilagamo muki afinaʼmo Gotiʼa afaʼa apakeno apataleʼnigeʼapaeʼmo apakaiʼapimo hapauʼniya kavaʼmo huʼnayaʼmonanafa

¹⁷ Gotiʼa maiʼniye, huʼa apakesamo afisayafeʼmo alagepa kavaʼmo nehiye. Gotiʼa hunoʼaeʼmo, ko aiyo, huno nehigenoʼaeʼmo koʼmo neʼaigeno kanale neʼyaʼmo hoyafatiʼmo alino hageno ateʼnigeʼapaeʼmo aliʼa neteʼa apamogaga neʼaiye, huʼana hapa paiʼnaʼae.

¹⁸ Ani gemo huʼnaʼaʼmonanafa muki vayaʼmogimo pulumakamo amagiʼa ofalinimo anamisayafeʼmo huʼnae. Ani kavaʼmo atalesayafeʼmo kana huʼniyaʼmonanafa hapa paiʼnaʼageʼapaeʼmo afaʼa ataleʼnae.

¹⁹ Inagi mago Yu vayaʼmo Atiyoki taonimo Pisitiya kotegatiʼe Aikoniyamu taonifatiʼeʼmo eʼa ani vayaʼmo apakesa faiʼa hapa paiʼnageʼa geʼapimo afiteʼapaeʼmo yafa kayotetiʼmo Poloʼmo amagiteʼapaeʼmo, ago faliʼniye, huʼa huteʼa heʼa halauli uʼa lamiʼa taoni kegiʼya malagamo ataleʼnae.

²⁰ Ataleʼnageʼapaeʼmo apakesamo afiʼa fatago nehaya vayaʼmogimo eʼa faiʼa vego huʼa ateʼa maiʼnageno he tino atagi nenuno taonifiʼmo havaeʼniye. Egamo agaeʼe Manamasiʼeʼmo Nemi taonifiʼmo uʼnaʼae.

Atiyoki taonimo Siliya kotegamo uʼana maiʼnaʼa gemae

²¹ Poloʼe Manamasiʼeʼmo Nemi taonifiʼmo maiʼnaya vayaʼaifeʼmo alagepa faigoko gemo aeʼana hakalo huʼana hapa paiteʼanaeʼmo asole vayaʼmogi Goti geʼamo alagepa huʼa afiʼnaya vayaʼmo aliʼana hamaleʼana apateʼnaʼae. Apatale uʼana Lisitiya taonifinagi Aikoniyamu taonifinagi Atiyoki taonifinagi huʼana maiʼnaʼae.

²² Goti geʼaletiʼmo muki taoniʼafi taoniʼafiʼmo geʼamo neʼafiya vayaʼmo aliʼana lokiya vaiʼana apateteʼanaeʼmo, Goti geʼaleʼmo atafautapa alagi huʼnetapa lapakesamo afita fatago hume hume utapa maiyo. Lusi hanageke yaʼmo alitetaekeʼmo Gotiʼa neʼyagaiya koteʼmo uta haita maigune, huʼana hapa paiʼnaʼae.

²³ Anakaemo muki siosiʼale siosiʼaleʼmo uʼeʼa huʼana nunumuʼmo huge neʼyaʼmo mosiʼana maige huʼana maiʼneʼanaeʼmo Goti vayaʼaleʼmo yagaiʼa apatesaya vayatama vayaʼmo lekana paiʼana apateʼnaʼae. Apateteʼanaeʼmo Ala kava neʼmoʼa alagepa huno yagaino apatesiyafeʼmo apakesamo afiʼa fatago nehaya Ala kava neʼmo ayamufaʼage vekamo ayapiʼmo apatemale apatemale huʼana umenitata huʼnaʼae.

²⁴ Pisitiya kotegamo aliʼana ataleʼuʼana Pamifiliya kotegamo uʼana avaʼyi huteʼana

²⁵ Pega taonifiʼmo Goti geʼamo aeʼana hakalo huʼana hapa paiteʼana uʼana Ateliya taonifiʼmo solovala aniʼmo haneʼniya yategamo haneʼnigeʼana uʼana avaʼyi huteʼana sipifiʼmo uʼana haiʼana

²⁶ solovala aniʼmo lakaeʼana halate Atiyoki taonifiʼmo eʼnaʼae. Goti vayaʼamogimo ani taonifatiʼmo hogoteʼa Gotiʼa yagaino anatesiyafeʼmo aliʼa ayapiʼmo anateteʼa aliʼa anatageʼana uʼana Goti aliʼyaʼamo aliʼnaʼae. Ani aliʼyaʼmo ago aliʼana hano huteʼana eʼnaʼae.

²⁷ Eʼana Atiyoki taonifiʼmo avaʼyi huteʼana ge huʼnaʼageʼa siosi vayaʼmo eʼa aliʼa anupa huʼa maiʼnageʼanaeʼmo Gotiʼa anakaetetiʼmo muki kavaʼamo huʼniya kavafeʼmo ava gemo huʼana hapa paiʼanaeʼmo Gotiʼa mago saufa kaʼmo alu nofi vayaʼmogi apakesamo afiʼa fatago hisayafeʼmo kitamo ago yakino apateʼniye, huʼana hapa paiʼnaʼae.

²⁸ Anakaeʼe geʼamo neʼafiya vayaʼeʼmo yatala afinaʼmo maiʼnae.