Apa 11 - The Keyagana NT and 25 OT books

Pitaʼa uno Yulusalemu siosi vayaʼaifeʼmo hapa paiʼniya gemae

¹ Alu nofi vayaʼmogi Goti geʼamo afiteʼa aliʼa apaipafiʼmo maleʼnae, huʼa huʼnaya gemo apa vayaʼe Yutiya kotega konaga vayaʼmogiʼeʼmo afiʼnae.

² Pitaʼa Yulusalemu taonifiʼmo uno avaʼyi huʼnigeʼapaeʼmo mago vayaʼmogi huʼapaeʼmo, lapakufamo lagaiyo, huʼa nehaya vayaʼmogi Pitafeʼmo ge hauʼapaeʼmo,

³ Kagaemo uka alu nofi vayaʼmo apakufamo nolagaya vayaʼai nopiʼmo uka haika apakaeʼeʼmo magokepi maiʼneka neʼyaʼmo neʼnane, huʼa ge hauʼnae.

⁴ Inagi Pitaʼa aepa faino hapa paiʼniya afinatetiʼmo afole aite afole aite huʼniya kavafeʼmo ava gemo huno hapa paiʼniye.

⁵ Hapa painoʼaeʼmo, Yopa taonifiʼmo nunumuʼmo huʼna maiʼneʼnaeʼmo alagamuna agegekana huʼna mago kavaʼmo ageʼnove. Ageʼnovana kokuʼnapatiʼmo mago latapa kenaleʼmo loleʼe loleʼe atupaleʼmo nofi aeteno ataleʼnigeno nahaopaleʼmo emineʼniye.

⁶ Aulu heʼna agovana muki agufa afugi afela afugi nagaloʼyavegi afela namagi huʼa maiʼnageʼna ageʼnove.

⁷ Ageteʼna afiʼnogenoʼaeʼmo mago gemo naha painoʼaeʼmo, Pitao, huno, He tika amagika kaeka no, huno naha paiʼnigeʼnaeʼmo

⁸ Ala kava nene, huʼna, haʼao. Lagaefeʼmo Yu mono keʼaepa gemoʼa hunoʼaeʼmo, alu hosu afumo ameʼamo oʼneyo huno huʼnigeʼna mosiʼnova yane, huʼna ha paiʼnogenoʼaeʼmo

⁹ halate naha painoʼaeʼmo, Gotiʼa alino auleno apateʼniya yafeʼmo hosu yane, huka osuvo, huno naha paiʼniye.

¹⁰ Loleʼe magoʼe afinaʼmo ani gemo huteno muki yaʼamo kokuʼnapiʼmo halate alino vayu hulino uno haiʼniye.

¹¹ Neʼagogeʼapaeʼmo loleʼe magoʼe vayaʼmo Sisaliya taonifatiʼmo alino apateʼnigeʼa eʼnaya vayaʼmo maiʼnova noteʼmo eʼa avaʼyi huʼnae.

¹² Goti Aunemeʼamoʼmo hunoʼaeʼmo, Lole kagesamo oʼafika apakaeʼeʼmo afaʼa uvo, huno naha paiʼniye. Nagaeʼe Yopa taonifi vayaʼmo sigisiʼa konagaʼnimogiʼeʼmo magokepi lokaeta uta Sisaliya taonifiʼmo uta agae nopiʼmo uta haita maiʼnone.

¹³ Agaemo hunoʼaeʼmo, Noʼnifiʼmo maiʼneʼna ageʼnovana mago enisole vekamo he tino maiʼnenoʼaeʼmo, Kagaemo mago vayaʼmo alika apategeʼa uʼa Saimoni Pitafeʼmo ge hisageno eno.

¹⁴ Eno mago gemo lapa paisigetapa kagaeʼe muki konaga vayakaʼeʼmo ani gemo afisageno Gotiʼa geʼaletiʼmo lapakufamo alino katino lapategaiye, huno naha paiʼniye, huno naha paiʼniye.

¹⁵ Nagaemo aepa faiʼna gemo hapa nepaugenoʼaeʼmo Goti Aunemeʼamo hogoteno lagaeteʼmo emineʼniya kava huno apakaeteʼmo emineʼniye.

¹⁶ Ageteʼnaeʼmo Ala kava neʼmoʼa hunoʼaeʼmo, Yoniʼa aniʼaletikeʼmo faleno apateʼniyaʼmonanafa nagaemo Goti Aunemeʼaletiʼmo faleʼna lapategauve, huno laha paiʼniya geʼaeʼmo nagesa afiʼna ho huʼnove.

¹⁷ Lagaemo Yesu Kalaisi Ala kava nefeʼmo lagesamo afita fatago huʼnonagenoʼaeʼmo Gotiʼa Aunemeʼamo lamiʼniya kava huno alu nofi vayaʼmo apamiʼniyaʼmofeʼmo nagaemo ina agufa vekamogeʼna Goti kaʼmo afaʼa akaniʼna oʼategauve, huno hapa paiʼniye.

¹⁸ Ani gemo afiteʼapaeʼmo mago gemo osuʼa Goti agiʼalekeʼmo aliʼa asaga huteʼapaeʼmo, Gotiʼa alu nofi vayaʼmo ofaliʼa afaʼa maisayafeʼmo apaipamo aliʼa afe lesaya kavaʼmo alino apamiʼniyanageʼa afaʼa maigae, huʼa huʼnae.

Atiyoki taonifiʼmo siosimo afole aiʼniya gemae

¹⁹ Sitiveniʼa faliʼniya afinatetiʼmo Goti vayaʼalegamo lusi hanageke kavaʼmo afole aiʼnigeʼapaeʼmo ataleʼa atagu faeʼuʼeʼa huʼnae. Mago vayaʼmo Finisiya kotegamo apaune heʼuʼa maige Saipalasi kotegamo apaune heʼuʼa maige Atiyoki taonifiʼmo apaune heʼuʼa maige huʼneʼapaeʼmo Goti geʼamo Yu vayaʼaifekeʼmo aeʼa hakalo huʼa hapa paiʼnae.

²⁰ Hapa paiʼnayaʼmonanafa mago vayaʼmo Saipalasi kotegati vayaʼe Sailini kotegati vayaʼeʼmo uʼa Atiyoki taonifiʼmo Galiki apakemo neʼaiya vayaʼaifeʼmo Yesuʼa Ala kava neʼmo ava gemo aeʼa hakalo huʼa hapa paiʼnae.

²¹ Gotiʼa lokiya vaino apateʼnigeʼapaeʼmo asole vayaʼmogimo ani gemo afiteʼa apakesamo afiʼa fatago huteʼa Ala kava netegamo aiʼa afe leʼa eʼnae.

²² Ani kavafeʼmo ava gemo aino atagu faeno uneno huʼnigeʼa Yulusalemu siosi vayaʼmogi ani gemo afiteʼapaeʼmo Manamasiʼa aliʼa ateʼnageno Atiyoki taonifiʼmo uʼniye.

²³ Uno apakeyana Gotiʼa fiku hapa maeno apamiʼnigeno apaketenoʼaeʼmo lusi kava huno amogaga aiteno hapa painoʼaeʼmo, alagepa hutapa lapakesamo afitetapa lokiya vaita maiʼnetapaeʼmo Ala kava neʼmo akame huteta oʼatalegaune, hutapa hiyo, huno apaipa apakesamo alino lokiya vaino apateʼniye.

²⁴ Manamasiʼa alagepa vekamo Goti Aunemeʼamoʼmo aipafiʼmo havai teʼnigeno lokiya vaino agesa afino fatago huʼniya vekamoʼmo asole vayaʼmo apayate alinino Ala kava netegamo eʼniye.

²⁵ Inagi Manamasiʼa apatalenuno Solofeʼmo kahauya huno agesiyafeʼmo Tasasi taonifiʼmo uno

²⁶ ageteno avalelino Atiyoki taonifiʼmo eʼniye. Anakaemo mago kafugamo siosi vayaʼeʼmo aliʼana anupa huʼana maiʼneʼanaeʼmo asole vayaʼmo aliʼana apaya maleʼnaʼae. Atiyoki taonifi vayaʼmogimo geʼamo neʼafiya vayaʼaifeʼmo apakiʼapimo Kalisitini vayane huʼa hogote afinaʼapimo apakimo apateʼnae.

²⁷ Ani afinaʼmo mago vayaʼmo Gotitegati gemo alini eʼa aeʼa hakalo huʼa hapa nepaiya vayaʼmo Yulusalemu taonifatiʼmo eʼa Atiyoki taonifiʼmo avaʼyi huʼnae.

²⁸ Ani vayapatiʼmo mago vekamo agiʼamo Agamasiʼa he tino Goti Aunemeʼaletiʼmo mago gemo hapa painoʼaeʼmo, Muki haopalegamo kafu kavaʼmo afole aigiye, huno hapa paiʼniye. Ala vekamo Kilotiyasiʼa vayaʼaiteʼmo yagaino neʼapateya afinaʼmo ani agufa kafu hu kavaʼmo afole aiʼniye.

²⁹ Geʼamo neʼafiya vayaʼmogimo ani gemo afiteʼapaeʼmo, Yutiya kotega maiʼnaya konagatimogi hapa maeta na magi monimo maleʼnopigeta ani kavaʼmo huta magoke magoke huta apamigune, huʼa huʼnae.

³⁰ Ani kavaʼmo huteʼa Manamasiʼe Soloʼeʼmo monimo anamiʼnaʼageʼana alini uʼana Yulusalemu taonifi Goti mafaʼneʼaiteʼmo yagaiʼa neʼapataya vayatama vayaʼmo apamiʼnaʼae.