Aiyeya 9 - The Keyagana NT and 25 OT books

⁶ Laha maesiyafeʼmo akanomoʼmo mago mafaʼnemo alino ateʼniye. Afoʼamoʼmo ani mafaʼnemo avaleno lamiʼniye. Agaemo asole vayaʼaiteʼmo yagaino apatesiyafeʼmo kana yaʼmo alino agiʼnaleʼmo kofilino ugiye. Agiʼamo aeʼapaeʼmo, hapau neʼaiya kavaʼmo nehiya vekae, huʼa agi aege gemo huno alino api aino neʼapateya vekae, huʼa agi aege himamuʼage Gotiʼae, huʼa agi aege maige maige huno neʼmaiya Afoʼapimoʼae, huʼa agi aege kini vekamoʼmo alagepa huno yagaino neʼapategeʼa falu apaipa kaliʼa neʼmaiya kavaʼmo aepa vekae, huʼa agi aege hugae.

⁷ Yagaino apatesiya vayaʼmo magoʼe huʼa asole vayaʼmo afole aiteʼa magoʼe huʼa alagepa huʼa maigae. Kini vekamo Neviniʼa yagaino apateʼniya kava huno Nevini aimuʼyaleʼmo maiʼnenoʼaeʼmo vayaʼaleʼmo yagaino apateme apateme uno yagaino apateno hano osuno yagaino apategaiye. Agaemo alagepa huno alino fako huno apateteno yagaino apateme apateme uno muki afinaʼaeʼmo yagaino apategaiye. Ala kava neʼmoʼa asole vayaʼaiteʼmo yagaino neʼapateya vekamoʼmo ayamukiki huno ani kavaʼmo alino afole aino ategaiye.

⁸ Ala kava neʼmoʼa Isaleli vayaʼaitegamo hisiya kavafeʼmo gemo huno atalegeno eʼniye. Ani kavaʼmo Isaleli vayaʼaiteʼmo asagauno aiʼniye.

⁹ Muki vayaʼmogimo agegae. Ifalemi nofi vayaʼmogiʼe Sameliya taonifiʼmo maiʼnaya vayaʼmogiʼeʼmo agegae. Apakaemo apakiʼapileʼmo aliʼa asagauteʼa himuʼnamu gemo huʼapaeʼmo,

¹⁰ Noʼmo kiʼnaya yafaʼmo asagauno aiʼniyaʼmonanafa lagaemo yafaʼmo aeniletiʼmo amagita apalo atita anaʼaitaleta hogote yafatetiʼmo halate kigune. Apakaemo afa yosamo heʼya aiʼnayaʼmonanafa Sita yosamo faigune, huʼa nehae.

¹¹ Ani himuʼnamu gemo nehayaʼmofeʼmo Ala kava neʼmoʼa Siliya vayaʼai kini vekamoʼmo Lesiniʼeʼmo kame vayaʼapimogi kameno hisayafeʼmo alino he tino apategaiye.

¹² Siliya ati vayaʼmogimo Isaleli vayaʼeʼmo kamemo huteʼa aliʼa hano huʼa apatalesayafeʼmo Isaleli vayaʼai apaulagaleʼmo maige Filisatini ati vayaʼmogimo Isaleli vayaʼai apakamelegamo maige huʼnae. Apakaemo Isaleli vayaʼeʼmo kamemo hugayaʼmonanafa Ala kava neʼmoʼa Isaleli vayaʼaifeʼmo aipamo leno neʼapateya kavaʼmo hano osugiye. Kayoʼmo apamisiyafeʼmo alo huno maiʼniye.

¹³ Isaleli vayaʼmogimo apakaemo neʼapamagiya vekalegamo aiʼa atagi neʼa oʼmege asole vayaʼaiteʼmo yagaino neʼapateya vekamo agesayafeʼmo kahauya osuge huʼnae.