Aiyeya 66 - The Keyagana NT and 25 OT books

Lama ge mono kavaʼe aigofe mono kavaʼefeʼmo huʼniya gemae

¹ Ala kava neʼmoʼa ina gemo hunoʼaeʼmo, Kokuʼnapiʼmo fai maiʼneʼna yagaiʼna neʼapatova naimuʼyamo haneʼniye. Ma mopafiʼmo naiyamo aeʼna neʼmauva mopamo haneʼniye. Lapakaemo haiya agufa noʼnimo kigae. Haiyaʼalegamo maiʼna haga lesuva yaʼmo hanegaiye.

² Nagaemo ma mopaʼe kokuʼnaʼeʼmo alo huʼnogeno muki ani yaʼmo nagaiʼni yaʼmo haneʼniyaʼmonanafa haiya agufa vekaeʼmo ageʼna alagepa huʼna amuse huguve. Haneʼniyaʼmonanafa nagaemo ani vekamo naunenametefeʼmo ageʼna oʼmaleʼnove, huno huge hosu kavaʼaeʼmo aipamo kana huteno geʼnimo afiteno atete huge nehiya vekamo alagepa huʼna ageʼna amuse huguve.

³ Ani agufa vayaʼaifeʼmo amuse huʼna apategauvaʼmonanafa mago vayaʼmogimo apakaiʼapimo hapauʼniya kavaʼapikeʼmo akame nehae. Apaipamoʼmo hosu kavaʼapieʼmo alagi hauʼniye. Nagaemo muki nehaya ofalini kavaʼaeʼmo alagi noʼnahaiyaʼmofeʼmo apakaemo ve pulumakamo amagiʼa ofalinimo hisageʼnaeʼmo ina kava huʼa vayaʼmo apamagiʼnae, huʼna agegauve. Apakaemo sipisipi anaʼaumo ofalinimo hisageʼnaeʼmo nagaemo ina kava huʼna kalamo amagiʼa ofalinimo nehae, huʼna agegauve. Apakaemo vitigana agufa yaʼmo ofalinimo hisageʼnaeʼmo nagaemo ina kava huʼna afumo kolaʼmo ofalini nehae, huʼna agegauve. Apakaemo alagepa atumo neʼaiya ofalinimo hisageʼnaeʼmo nagaemo ina kava huʼna mago aigofe gotitefeʼmo ofalinimo nehae, huʼna agegauve.

⁴ Nagaemo alisaya agufa kana yaʼapimo lekana paiʼna apamiguve. Apakesamo afiteʼa koli nehaya agufa kavaʼmo apakaeteʼmo aliʼna afole aiʼna ategauve. Nagaemo apakaefeʼmo keya aeʼna ge huʼnogeʼapaeʼmo geʼnileʼmo aeʼa atagaina huʼa ge osuʼnayaʼmofeʼmae. Nagaemo apakaefeʼmo geʼnimo aeʼna hakalo huʼnovaʼmonanafa alagi oʼafiʼa naulagaleʼmo hosu kavaʼmo huʼnae. Apakaemo alagi oʼnahauʼniya kavakeʼmo lekana paiteʼa huʼnae.

⁵ Aiyeyaʼa hunoʼaeʼmo, Ala kava neʼmo geʼamo afitetapaeʼmo atete nehaya vayane, huʼna, Ala kava neʼmo geʼamo afiyo. Lapakaemo nagiʼnilefeʼmo geʼnimo akame nehayaʼmofeʼmo lapakaefeʼmo apaini nehaya vayatapimogimo lahapafaiʼa lapataleteʼapaeʼmo, Lapakaemo afaʼa lataletapa vigenoʼao Ala kava neʼmoʼa ala agiʼamo alino, huʼa nehayaʼmonanafa lapakaemo agaemo lahapa maesiyafeʼmo agetetapaeʼmo lapamogaga aisageno apavagage hugiye.

⁶ Alopa gefatiʼmo taonifatiʼmo keya neʼaya gemo afiyo. Alopa mono nopatiʼmo alopa agemo afiyo. Ala kava neʼmoʼa age aiteno kame vayaʼamogi hosu kavaʼmo anonaʼapilefeʼmo kayoʼmo neʼapamiye.

⁷ Agaemo Siosi kavafeʼmo hunoʼaeʼmo, A kanomoʼmo mafaʼnemo alino atesiyafeʼmo agafu okiʼniyaʼmonanafa mafaʼnemo alino ateʼniye. Hogoteno agafu okiʼnigeno ve mafaʼnemo alino ateʼniye.

⁸ Mago vekamoʼmo ani agufa kavafeʼmo ava gemo afiʼnifiye. Haʼao, mago vekamoʼmo oʼafiʼniye. Mago vekamoʼmo ani kavaʼmo ageʼnifiye. Haʼao, mago vekamoʼmo oʼageʼniye. Mago koteʼmo vayaʼmo oʼmaiʼnaya koteʼmo magoke afinaʼatomo asole vayaʼmo afole aiteʼa ani koteʼmo afaʼa maiʼa kili paesafiye. Mago oʼmaiʼnaya nofi vayaʼmo magoke felugamo malage huʼatomo asole vayaʼmo afaʼa afole aiteʼa mago saufa nofi vayaʼmo maisafiye. Haʼao, afaʼa afole oʼaigayaʼmonanafa Saiyoni taonimo a kanogana huno aepa faino agafu kiʼniya afinaʼmo malage hunoʼatomo mafaʼne anagaʼamo alino apateʼniye.

⁹ Ala kava neʼmoʼa ina gemo hunoʼaeʼmo. Nagaemo mafaʼnemo alino atesiya afinaʼmo aliʼna afole aiʼna ateteʼnaeʼmo mafaʼnemo alino atesiyafeʼmo afaʼa oʼategaufiye. Mafaʼnemo alino atesiyafeʼmo afaʼa atesuvaʼmoʼmo aipaleʼmo atafauʼna ategaufiye, huno ani gemo Gotitapimoʼmo huʼniye.

¹⁰ Yulusalemu taonieʼmo lahapauʼniya vayane, huʼna, agaeʼeʼmo magokepiʼmo lapamogaga aiyo. Agaefeʼmo yulagefa neʼaiya vayane, huʼna, agaeʼeʼmo magokepiʼmo lapamogaga aiyo.

¹¹ Agaemo alagepa huno maiʼnisigetapa lusi kava huta nuʼamo netetapa alagepa huta maiʼnetapa ha le konali yafeʼmo lapamogaga aiteta amuse hutapa ategae.

¹² Ala kava neʼmoʼa ina gemo hunoʼaeʼmo, Afiyo, huno, Alopa aniʼmo uno nelamiya kava huʼna alagepa huta maisaya yaʼmo mafaʼne anagaʼamo lapamiguve. Aniʼmo uno nelamiya kava huʼna malaga vayaʼmogi kagemi yaʼapimo lapamiguve. Ani afinaʼmo nuʼaleʼmo neʼnesageno lapanu kilino ugiye. Agaemo lapavaleno aluteʼmo lapateteno alino alagepa huno lapategaiye.

¹³ Itaʼamoʼmo mafaʼneʼamo aipamoʼmo falu hisiyafeʼmo nehiya kava huʼna lapaipamoʼmo falu hisiya kavaʼmo huguve. Hisugetapaeʼmo lapakaemo Yulusalemu taonifi vayane, huno, lapaipamoʼmo falu huʼninagetapa taonifiʼmo maigae.

¹⁴ Ani afinaʼmo lapakaemo nagaemo lapakaetegamo ani hisuva kavaʼmo agetetapaeʼmo lapaipafiʼmo lapamogaga aisageno lokiyatapimo magoʼe huno afole aigiye. Ani afinaʼmo Ala kava neʼmo aliʼyaʼamo neʼaliya vayaʼmo hapa maesiya lokiyaʼamo agegayaʼmonanafa kame vayaʼamogimo aipamo neleya kavaʼamo agesayafeʼmo alino apave ligiye.

¹⁵ Afiyo, huʼna, Ala kava neʼmoʼa atamo aeno alisigeno asole talalaʼamoʼeʼmo lokiya yasimo aligekana huno nagu nagu huno emineno ayamukiki huno aipamo neleya atamoʼmo kame vayaʼamo alagi apaleno hano huno apatalegaiye.

¹⁶ Ala kava neʼmoʼa ataletiʼe naipeʼaletiʼeʼmo agoti huno apateteno apamagigiye. Asole vayaʼmo kamitimo apamagisigeʼa faligae.

¹⁷ Ala kava neʼmoʼa hunoʼaeʼmo, Nagaemo vayaʼmogi apakaiʼapimo aliʼa apaote apateʼneʼa sese huʼa apateteʼa aigofe gotigitefeʼmo mono hisayafeʼmo hoyaʼapilegamo uʼa alagi oʼnahauʼniya ameʼamo nege afu ameʼamo nege kafamo nege nehuʼapaeʼmo magoʼe huʼa naulagaleʼmo hosu yaʼmo nege nehaya vayaʼmo magokepiʼmo aliʼna hano huʼna apatalegauve.

¹⁸ Nagaemo ani vayaʼmogi kavaʼapiʼe apakesa neʼafiya kavaʼeʼmo ageʼnovaʼmofeʼmo aliʼna hano huʼna apatalegauvaʼmonanafa muki nofi vayaʼe muki apakemo neʼaiya vayaʼeʼmo apavaleʼna aliʼna anupa huʼna apatesugeʼa eʼa ha le konali yaʼnimo agegae.

¹⁹ Nagaemo lokiyaʼnimo agesayafeʼmo apakae folagapiʼmo mago alagena kavakana huno maiʼniya vekamo aliʼna afole aiʼna ategauve. Ani vayapatiʼmo mago vayaʼmo aliʼna hano huʼna oʼapataleʼna afagi kotega maiʼnaya vayategamo faiʼa kasalo paeʼnaya vayaʼmo aliʼna apatesugeʼa uʼa ala nagiʼnimo oʼafige ha le konali yaʼnimo oʼagege huʼnaya vayaʼaitegamo ugae. Nagaemo Sapeni kotegagi Lipiya kotegagi Litiya kotegagi atimo nehaya kavaʼmo ageʼnaya vayaʼaitegagi Tuma vayaʼaitegagi Galiki vayaʼaitegagi mago afagi kotegagi huʼna aliʼna apatesugeʼa uʼa malaga vayaʼaifeʼmo ha le konali kavaʼnieʼmo ava gemo aeʼa hakalo hugae.

²⁰ Inagi apakaemo muki nofi vayaʼaitegatiʼmo hapafaiʼa apataleʼnaya konagatapimo apavaleliʼa Yulusalemu taonimo nagae aote aveleʼmo egae. Apakaemo afaʼa apatesageʼa hosileʼmo fai maige nokileʼmo fai maige kamoleʼmo fai maige talalafiʼmo fai maige hiʼyopaleʼmo fai maige hutesageʼa apavaleliʼa egae. Isaleli vayaʼmogitapamo viti ofalinimo sese hu maleʼnaya yuvapafiʼmo maleta alinita Ala kava neʼmoʼna notegamo neʼaya agufa kavaʼmo huʼa apavaleliʼa egae.

²¹ Nagaemo ani vayapatiʼmo mago vayaʼamo lekana paiʼna apatesugeʼa mono huʼa neʼapataya vayaʼmo maige Livai nofi vayaʼmo maige hugae.

²² Ala kava neʼmoʼnamo ina gemo huʼnaeʼmo, Saufa kokuʼnaʼe mopaʼeʼmo alo hisugeno muki afinaʼaeʼmo nagae naulagaleʼmo hanege hanege huno hanesiya kava huʼa lapakinago mafaʼne anagatapiʼe lapakitapiʼeʼmo hanege maige hugae.

²³ Muki alopa hopa afinanagi saufa kailenagi muki Sapati afinanagi huʼa muki ma mopafi vayaʼmo eʼa naulagaleʼmo mono hisayafeʼmo maigae.

²⁴ Apakaemo uʼa apakesayana geʼnimo amagiʼa ataleʼnaya vayaʼmogi apakufaʼamo agegae. Apakufamo neʼnaya kanagi anagaʼmo ofaliʼa afaʼageʼmo maiʼnisageno atafiʼmo maiʼnaya atamo yu osegaiye. Muki vayaʼmogimo apaketeʼapaeʼmo apakaefeʼmo alagi ohapaugiye.