Aiyeya 63 - The Keyagana NT and 25 OT books

Ala kava neʼmoʼa kame vayaʼamo kayoʼmo apamige agaiʼa vayaʼmo apakufamo alino katino apatege hisiya kavafeʼmo huʼniya gemae

¹ Ina laʼmo Inomu kotega Mosala taonifatiʼmo ataleno neʼe. Kukena yaʼamo aluga aluga atupaleʼmo haesa yaʼmo haneʼniya vekamae. Agaemo alagepa ha le konali kukena yaʼmo vaiʼniya vekamo ami vekagana huno lokiyaʼaletiʼmo neʼe. Nagaemae. Nagaemo fatago kavafeʼmo ge huʼna apakufamo aliʼna katiʼna apatesuva lokiyaʼnimo haneʼniye.

² Na agufa kavaʼmo higenoʼaeʼmo kagae kukena yaʼmoʼa haesaʼage huteno nofi alagafati aniʼmo alo hisiyafeʼmo tekifiʼmo uno haino nofi alagamo aeno lata nepaiya vekagana huka maiʼnane.

³ Nagaemo nofi alagamo aeno lata paiʼniya vekagana huʼna aeʼna lata paiʼnogenoʼaeʼmo muki vayapatiʼmo mago naha maesiya vekamo oʼmaiʼniye. Nagaemo naipamo leʼnigeʼna lusi kava huʼna ge hapauteʼnaeʼmo apakaemo lokiya vaiʼna aeʼna lata paiʼnogenoʼaeʼmo kolaʼapimoʼmo aino lakino kukena yaʼnileʼmo aeno kamaeʼniye.

⁴ Hosu kavaʼmo anonaʼapilefeʼmo kayoʼmo apamisuva afinafeʼmo nagesamo neʼafuve. Nagaemo vayaʼnimo miya faiʼna hatu maeʼna apatesuva afinaʼeʼmo ago afole aiʼniye.

⁵ Nagaemo ina kava huʼna ageʼnovana naha maesiya vekamo oʼmaiʼniye. Ina kava huno lokiya vaino natesiya vekamo oʼmaiʼniyaʼmofeʼmo nahau aiʼnove. Aiʼnovaʼmofeʼmo nagaiʼni naipamo leʼniya kavatetiʼeʼmo lokiya vaino nateʼnigeʼna lokiyaʼniletiʼe nagaiʼnilefeʼmo apakufamo aliʼna katiʼna apateʼnove.

⁶ Nagaemo lusi kava huno naipamo neleya kavatetiʼmo muki nofi vayaʼmo aeʼna lata paiʼnove. Nagaemo naipamo neleya kapufatiʼmo aniʼmo nesaya kavaʼmo huʼnogeʼa neteʼapaeʼmo negi nagi huʼnae. Nagaemo lokiyaʼapimo aliʼna hano huʼna alagi ataleʼnove.

⁷ Nagaemo Ala kava neʼmoʼa hau ayamopafiʼmo hauʼniya kavafeʼmo ava gemo aeʼna hakalo huteʼna ala agiʼamo amiguve. Ala kava neʼmoʼa fikumo lamiteno Isaleli vayaʼmogitaeʼmo hau huno lateteno lusi kava huno hau ayamopafiʼmo hauʼnigeno muki afinaʼaeʼmo fiku laha maeʼniye. Muki ani alagepa kavaʼalefeʼmo ala agiʼamo amiguve.

⁸ Ala kava neʼmoʼa ina gemo hunoʼaeʼmo, Ani vayaʼmo alagi nagaiʼni vayanageʼa humi nateteʼa aigofe gemo osugae, huno huʼniye. Inagi apakufamo alino katino apatesiya vekamo hamaleʼniye.

⁹ Apakaemo muki kana yaʼmo aliʼnagenoʼaeʼmo ani kana yaʼmo aipafiʼmo asagauno aiʼnigeno agaeʼeʼmo aliʼniye. Goti aulagaleʼmo maiʼniya enisole vekamoʼmo apakufamo alino katino apateʼniye. Hau ayamopafiʼmo hauʼnigeno hau huno apateteno miya faino hatu maeno apateʼniye. Akeyaʼvilagamo muki afinaʼae afinaʼaeʼmo apasagauno apavalelino uʼniye.

¹⁰ Hapa maeʼniyaʼmonanafa aiyafiʼmo oʼmaigune, huʼa huteʼa Aote Aunemeʼamo aipa kana yaʼmo amiʼnayaʼmofeʼmo Gotiʼa aino afe leno kame vekaʼapigana huno maiʼneno kame huno apateʼniye.

¹¹ Gotiʼa kame huno apateteno akeyaʼvilagamo Moseseʼe vayaʼamogiʼeʼmo geʼapimo huʼapaeʼmo, Haiyaʼalegamo sipisipiʼaleʼmo yagaiʼniya vekaʼe Isaleli vayaʼeʼmo solovala anipatiʼmo apakufamo alino katino apateʼniya Gotiʼmo maiʼniye, huʼa huge, Haiyaʼalegamo Aunemeʼamo alino apakaepiʼmo ateʼniya Gotiʼa maiʼniye, huʼa huge huʼnaya geʼapieʼmo halate agesamo afiʼniye.

¹² Gotiʼa Mosese lamaga ayatetiʼmo apavalelino uʼniye. Gotiʼa hanege hanege huno hano osuno hanesiya agiʼamo alisiyafeʼmo ha le konali ayatetiʼmo solovala aniʼmo folagapatiʼmo alino akaka vaeʼniye.

¹³ Hosimogimo kaʼme koteʼmo kanale huʼa neʼvaya kava huʼa vai lamino hapaisigeʼa asagauʼa oʼaisayafeʼmo alopa anipatiʼmo alagepa huno apavalelino uʼniye.

¹⁴ Pulumakamogi kagoʼmufilagamo uʼa lamiʼa maiʼa falu nehaya kava huʼa maiʼa haga lesayafeʼmo apavaleliʼa neʼvaya kava huno Goti Aunemeʼamoʼmo Goti vayaʼamo maiʼa haga lesayafeʼmo apavalelino ugiye. Kagaemo ha le konali kagikamo alisanafeʼmo ani kavaʼmo huka apavalelika uʼnane.

Isaleli vayaʼmogimo Ala kava neʼmoʼa hau huno apateteno hapa maesiyafeʼmo nunumuʼmo huʼnaya gemae

¹⁵ Ala kava nene, huʼa, kagaemo kaote kokamo ha le konali kokuʼnapiʼmo maiʼneka afepilagamo aulu lahaeka lago. Kagaemo na agufa kavaʼmo higekaeʼmo kayamukiki nehana kavakagi lokiyakagi kahau kayamopafiʼmo kahauʼniya kavakagi kahau huka nelatana kavakagi huka alika lave noline. Kaipamo alika akani maleʼnapiye.

¹⁶ Huʼnanaʼmonanafa kagaemo afotimogamo alagi maiʼnane. Emalehamuʼmo hemenimo olageʼnigeno Isaleliʼmo gemo laha nopaiyaʼmonanafa kagaemo O Ala kava neʼmogae, huta, afotimogamo maiʼnane. Alagi akeyaʼvilagamo miya faika hatu maeka nelatana Gotigae, huta kagi neʼaone.

¹⁷ O Ala kava nene, huta, kagaemo na agufa kavaʼmo higekaeʼmo lateʼnanageta kakamo ataleta uʼnone. Kagaemo na agufa kavaʼmo higekaeʼmo laipa lagesamo alika akani maleʼnanageta kagaefeʼmo koli huteta kaiyafiʼmo oʼmaiʼnone. Kagaemo lagaetefeʼmo aliʼyakamo neʼaluna vayaʼmogitalegamo aika atagineka eno. Lagaemo kagae nofi vayaʼmo hetamakamo maiʼnone.

¹⁸ Aupa afinaʼmo laote vayakamogitamo aote kokaleʼmo maiʼnone. Kame vayatimogimo eʼa mono nokamo aeʼa latapaiʼnae.

¹⁹ Lagaemo akeyaʼvilagamo maiʼnaya vayaʼmo alagi yagaika oʼapateʼnana agufa vayakana huta hamaleʼnone. Kagaemo apakaeteʼmo kagikamo oʼmaleʼnane.