Aiyeya 62 - The Keyagana NT and 25 OT books

Gotiʼa hunoʼaeʼmo, Yulusalemu taonimo aliʼna alagepa huguve, huno huʼniya gemae

¹ Gotiʼa hunoʼaeʼmo, Afaʼa oʼmaiʼna Saiyoni taonifiʼmo maiʼnaya vayaʼmo hapa maesuvafeʼmo ge huguve. Nagaemo maiʼna haga oleʼna aliʼyakeʼmo alime alime neʼugenoʼaeʼmo Yulusalemu taonifiʼmo maiʼnaya vayaʼai fatago kavaʼapimoʼmo aeno ha lege apakufamo aliʼna katina apatesuva kavaʼmoʼa lamugana huno aeno ha lege hugiye.

² Yulusalemu vayaʼmogitapae, huʼna, Alu nofi vayaʼmo malaga vayaʼmogi lapamiʼnova fatago kavatapimo agesageʼa kini vayaʼmogimo ha le konali yatapimo agegae. Ala kava neʼmoʼnamo saufa lapakitapimo lapatesugeʼa ani saufa lapakitapimo aegae.

³ Lapakaemo Ala kava neʼmoʼna nayapiʼmo mago kini vekamo konali yaʼamo kakolitagana hutapa maigae.

⁴ Saiyoniyo, huʼna, Apakaemo kagaefeʼmo magoʼe huʼa anauʼamoʼmo ataleʼniya aʼmo maiʼniye, huʼa osugae. Haʼao, kagaefeʼmo saufa kagikamo Gotiʼa hauʼniya aʼmo maiʼniye, huʼa aege kagae mopaeʼmo saufa agimo veleʼmo maiʼniya agufa mopamo aepa vekamoʼa yagaiʼniya mopamo haneʼniye, huʼa aege hugae. Ala kava neʼmoʼa lusi kava huno amuse huno lapatesigeno mopatapimoʼa veleʼmo maiʼniya agufa kavaʼmo huʼa lapakaemo mopatapileʼmo maigae.

⁵ Mago neya vekamoʼmo veʼeʼmo ohavaeʼniya aʼmafaʼnemo neʼaliya kava huʼa mafaʼnekamogimo kagaemo aligae. Aʼmo aliʼniya vekamoʼmo saufa aʼaeʼmo amogaga neʼaiya kava huno Gotitapimoʼmo lapakaefeʼmo amogaga aigiye.

⁶ Yulusalemuo, huʼna nagaemo yafa lafi kegiyakaleʼmo kava yagaisaya vayaʼmo aliʼna apateʼnovanageʼa felugaʼe haniʼilagaʼeʼmo afaʼa oʼmaiʼa apake aigae. Lapakaemo Ala kava nefeʼmo ava gemo nehaya vayaʼmogitapamo afaʼa oʼmaitapa ge hiyo.

⁷ Fiku yanageno maino haga legaiye. Agaefeʼmo keya aeta nunumuʼmo hume hume neʼvagenoʼaeʼmo agaemo Yulusalemu taonimo alino lokiya vaino atesigeʼa ma mopafi vayaʼmogimo taonimo agiʼaleʼmo aliʼa asaga huʼa ategae.

⁸ Ala kava neʼmoʼa agoʼyamo ataleno lokiya lamaga ayatetiʼmo polomasi gemo hunoʼaeʼmo, Nagaemo magoʼe huʼna neʼyatapimo aliʼna kame vayatapimo oʼapamiguve. Nagaemo magoʼe huʼna alu kotega vayaʼmo afaʼa apatesugeʼa eʼa aliʼyatapimo aliteʼa alo hu maleʼnaya nofi alagafati aniʼmo aliʼa oʼnegae.

⁹ Oʼnegayaʼmonanafa lapakaemo ago leʼniya vitimo hatagauʼnaya vayaʼmogitapamo peleti mayamo kaeta negae. Netetapa Ala kava neʼmo ala nagiʼnimo namigae. Lapakaemo nofi hoyaleʼmo yagaiʼnetapa nofi alagamo lagiʼnaya vayaʼmogitapamo nagae noʼmo kegiʼyafiʼmo aliniteta nofi alagafati aniʼmo negae.

¹⁰ Aiyeyaʼa Goti geʼamo hapa painoʼaeʼmo, Kegiʼyamo kipatetiʼmo uta lamiyo, uta lamiyo. Vayaʼmo taonifi eʼa haisaya kaʼmo kafiyo. Kaʼmo valita apateyo. Kapiʼmo haneʼniya yafaʼmo alita ataleyo. Lapakaemo kalahuʼmeʼmo alita asai malegeʼapao vayaʼmo eʼa aliʼa anupa huʼa maiyo.

¹¹ Inagi Ala kava neʼmoʼa muki ma mopafiʼmo maiʼnaya vayaʼaifeʼmo ina gemo huno hapa paiʼniye. Lapakaemo Saiyoni taonifiʼmo maiʼnaya vayaʼaifeʼmo, Lama gemo nehune, hutapa lapakufamo alino katino lapatesiya vekamo egaiye. Afiyo, hutapa, Agaemo aliʼyaʼalefeʼmo miyaʼmo alinino egaiye. Alisiya aliʼyaʼamo aulagaleʼmo haneʼniye, hutapa ha paiyo.

¹² Apakaemo ani vayaʼaifeʼmo ina ge huʼa apaki aegae. Apakaemo apaote vayane, huʼa huge Ala kava neʼmoʼa miya faino hatu maeno apateʼniya vayane, huʼa huge hugae. Apakaemo kagaefeʼmo kagimo aeʼapaeʼmo, Ala kava neʼmoʼa hauʼniya taonimo haneʼniye. Ataleno oʼuʼniya taonie, huʼa hugae.