Aiyeya 6 - The Keyagana NT and 25 OT books

Gotiʼa agaetegatiʼmo gemo alininuno aeno hakalo huno hapa paisiyafeʼmo Aiyeyafeʼmo keya aeno ge huʼniya gemae

¹ Nagaemo ala kini netimo agiʼamo Uyaiyaʼmo faliʼniya kafugamo ageʼnovana Ala kava neʼmoʼa yagaino neʼapateya siyaʼaleʼmo fai maiʼnigeʼna ageʼnove. Alino asagauno ateʼnigeno muga anaʼaleʼmo fai maiʼnigeno yatala kukena atupaʼamoʼmo alopa mono nopiʼmo alagi havaiteʼnigeʼna ageʼnove.

² Ata vaikana huʼa neʼmaiya enisole vayaʼmogi apakiʼapimo Selafemi vayaʼmogimo siyaʼaleʼmo fai maiʼniya vekamo agofetuleʼmo he tiʼa maiʼnae. Apakaemo magoke magokeʼamogimo sigisiʼa hapakumo haneʼniye. Lole hapakulatetiʼmo apaugosafiʼmo aiʼa ati kaege lole hapakulatetiʼmo apaiyaleʼmo aiʼa ati kaege lole hapakulatetiʼmo haleliʼa uge nehae.

³ Mago enisole vekamoʼmo alu enisole vayaʼaifeʼmo hunoʼaeʼmo, Ala kava neʼmoʼa asole vayaʼaiteʼmo yagaino neʼapateya vekamo aote vekamo maiʼniye, aote vekamo maiʼniye, aote vekamo maiʼniye. Ha le konali yaʼamoʼmo muki ma mopafiʼmo aino atagu faeno uneno huno havai teʼniye, huno hapa paiʼnigeʼa alu enisole vayaʼmogi afiteʼa ani gemo huʼa hapa paige huʼnae.

⁴ Alopa gefatiʼmo nehagenoʼaeʼmo kipateʼmo lole posilaʼmoʼa uti uti aiʼnigeno halinamoʼmo ani nopiʼmo havai teʼniye.

⁵ Nagaemo huʼnaeʼmo, Nagaemo oʼaniʼya navayamo haneʼnigeʼna oʼaniʼya apavayamo haneʼniya vayaʼmogi folagapiʼmo maiʼnovaʼmofeʼmo lusi kava huʼna kage kage huteʼnaeʼmo, alagi afela heʼnove. Faliʼnova vekamo maiʼnove. Naulagafatiʼmo Ala kava neʼmo asole vayaʼaiteʼmo yagaino neʼapateya kini vekaʼapimo ago ageʼnovaʼmofeʼmo faliʼnova vekamo maiʼnove.

^6-7 Inagi mago enisolemoʼmo uno afumo amagiʼa nekaya ofalini hiʼyalamutetiʼmo ata neleya hokanufamo halutaletiʼmo huno aliteno nagaetegamo halelineno navayaleʼmo maleʼnenoʼaeʼmo, Afiyo, huno, kavayaleʼmo maleʼnogenoʼaeʼmo hosu kavaʼmo anonakamo alino ataleteno hosu kavakamo aeno kalo paeno ataleʼniye, huno naha paiʼniye.

⁸ Nagaemo Ala kava neʼmoʼa ge huʼnigeʼna afiʼnove. Ina gemo hunoʼaeʼmo, Ina laʼmo aliʼna atesugeno ugiye. Ina laʼmo laha maeno geʼnimo alinino ugiye, huno huʼnigeʼna afiteʼnaeʼmo, Nagaemo manileʼmo maiʼnovanagi alika nategeʼna vino, huʼna ha paiʼnove.

⁹ Huʼnogeno Ala kava neʼmoʼa naha painoʼaeʼmo, Uka ani vayaʼaifeʼmo ina gemo huka hapa paiyo. Lapakaemo ani gemo muki afinaʼmo afime afime viyo. Afigayaʼmonanafa afita aeto osugae. Lapakaemo agege agege hutapa maigayaʼmonanafa ageta aeto osugae, huka hapa paiyo.

¹⁰ Kagaemo oʼafisaya apaipamo alika kalika apato. Apakesamo alika akaniteka apaulagamo alika ali huvo. Fiku yanageʼa apaulagafatiʼmo agege apakesafatiʼmo afige aliʼa apaipafiʼmo malege huteʼa nagaetegamo aiʼa atagineʼa esageʼna aliʼna alagepa huʼna apategauve, huno naha paiʼniye.

¹¹ Inagi nagaemo ge huʼna afiʼnaeʼmo, Ala kava nene, huʼna, Nagaemo ani aliʼyaʼmo alime uʼna hainu afinaʼmo atalegauve, huʼna ge huʼna afi geʼnogenoʼaeʼmo geʼnileʼmo ina ge huno aeno atagaina hunoʼaeʼmo, Kagaemo aliʼyakamo alime alime neʼugeʼao muki taoniʼamo heʼa halagape vaisageno noʼageʼmo afaʼa hanesigeʼa vayaʼmo oʼmaige muki mopaʼamo hosuge huno hanegaiye.

¹² Ala kava neʼmoʼnamo muki vayaʼmo koʼapiletiʼmo aliʼna hapa faiʼna apatalesugeʼa afagi kotegamo uʼa maigae. Ani afinaʼmo asole koʼmo ataleʼa visaya koʼmo hanegaiye.

¹³ Ataleʼa ugayaʼmonanafa ani mopaleʼmo aise nofi vayaʼmo maigae. Apakaemo aiʼa atagineʼa eʼa maigayaʼmonanafa kayoʼmo apamiguve. Apamiguvaʼmonanafa ani koteʼmo henagaʼamo nagaemo yosamo heʼya aiʼnaya atufafatiʼmo saufa ausisimo neʼaeya agufa kavaʼmo huʼna nagae apaote vayapatiʼmo saufa nofi vayaʼmo aliʼna afole aiʼna apategauve.