Aiyeya 59 - The Keyagana NT and 25 OT books

Hosu kavaʼapimoʼmo alino fako huno apateʼnigeno Gotiʼa aotemo maiʼnigeʼa apaote maiʼnaya kavafeʼmo huʼniye gemae

¹ Afiyo, huʼna, Ala kava neʼmoʼa ayaʼmo aupa huno oʼmaiʼniyanageno lapakufamo afaʼa alino katino lapategaiye. Agesamo oʼakaniyanageno getapimo afaʼa afigiye.

² Ala kava neʼmoʼa getapimo oʼafisiyafeʼmo agesaleʼmo alino noʼakaniyaʼmonanafa hosu kavatapimokeʼmo Gotitapimoʼe lapakaeʼeʼmo alino fako huno lapateʼniye. Hosu kavatapimoʼmo augosaleʼmo aino ati kaeʼnigeno getapimo noʼafiye.

³ Vayaʼmo hapaeʼnaya kolaʼmo lapayateʼmo haneʼniya kavaʼmoʼa alino hosu huno lapateʼniye. Lapakinagoletiʼmo hosu kavaʼmo huʼnaya lapayaʼmo hosuʼniye. Lapavayafatiʼmo aigofe gemo huʼnae. Lapavenafuʼnaletiʼmo hosu gemo huʼnae.

⁴ Apakaepatiʼmo mago vekamoʼmo, alagepa hutapa alita fako hiyo, huno nosiye. Mukiʼamogi lama gemo afole aisigeno hapa maesiyafeʼmo agoti gefiʼmo alagepa huʼa akame huʼa ge nosae. Apakaiʼapimo hapa maesiyafeʼmo alu ge alu gemo aigofeʼmo nehae. Apakaemo hosu kavaʼmo apaipaguʼeʼmo maiʼneʼa aʼnemogi mafaʼnemo aliʼa neʼataya kava huʼa ani hosu kavaʼmo aliʼa neʼatae.

⁵ Apamupatiʼmo nakaloʼyavemo aino apalo neʼatiye. Apakaemo kakana kafamoʼa kakanaʼmo nekiya agufa kavaʼmo nehae. Ani apamuʼmo nesaya vayaʼmo faligae. Ani apamuʼmo aino apalo atinoʼaeʼmo nakaloyavegeʼmo afole neʼaiye.

⁶ Kakanaʼapimoʼmo kukena yaʼapimo alino ohamalegaiye. Kavaʼapimoʼmo apakufaleʼmo aino ati kaeno oʼapategaiye. Aliʼyaʼapimo hosu aliʼyaʼmo haneʼnigeʼa apayatetiʼmo vayaʼmo nehapae.

⁷ Apakaemo hosu kavaʼmo hisayafeʼmo nagu nagu huʼa neʼvae. Apakaemo mago hosu kavaʼmo osuʼnaya vayaʼmo hapaesayafeʼmo malage huʼa neʼvae. Apakaemo hosu kavakeʼmo hisaya agufa apaipa apakesageʼmo neʼafiye. U eʼa nehayategamo muki yaʼmo aliʼa hosu huʼa atege apakafu yaʼmo aliʼa apamige nehae.

⁸ Alagepa huʼa magokepi lokaeʼa maisageno apaipamoʼmo falu hisiya kaʼmo noʼagae. Apakaemo vayaʼai kavaʼapimo alagepa huʼa aliʼa fako nosae. Apakaemo kaʼapimo kayagi kayaga kaʼmo valiʼnae. Ina lagimo ani kateʼmo visafi alagepa huʼa magokepi lokaeʼa maisaya kavaʼmo oʼagegae.

Gotifeʼmo hosu kavaʼapieʼmo aeʼa hakalo huʼa ha nepaiya kavafeʼmo huʼniya gemae

⁹ Inagi apakaemo ina gemo huʼapaeʼmo, Hosu kavaʼmo huʼnonaʼmofeʼmo kame vayatimo agoti huno apatege laha maege nosiye. Lagaemo ha le yaʼmo agesunafeʼmo lahauʼniyaʼmonanafa hani nehiye. Lokiya yegemo lesiyafeʼmo agava maiʼnonaʼmonanafa alopa hanipikeʼmo umenitata nehune.

¹⁰ Lagaemo apaulagamo ali huʼniya vayaʼmogimo neʼaya agufa kaʼmo aeteta kegiʼyaeʼmo kahauya hulita umenitata nehune. Lagaemo felugamo yegemo leʼnigeta umenitata nehutaeʼmo haniʼilagamo umenitata nehaya vayaʼmogi nehaya agufa kava huta yafapiʼmo laiyamo faita loʼaeteta asagauta neʼaune. Lagaemo hosu koteʼmo maiʼneʼa ago faliʼnaya vayakana hutageʼmo maiʼnone.

¹¹ Lagaemo ani kana yaʼmo afela afu anagaʼmo meyaʼmogimo nagalu nagalu nehaya kava huta alopa gefatiʼmo huge kaugoʼyave nama anagaʼmogimo apake neʼaiya agufa gemo huta yulagefa aige huta maiʼnone. Kagaemo kame vayatimo agoti huka apateteka lagufamo alika katika latesanafeʼmo kagava maiʼnonaʼmonanafa ani kavaʼmoʼa lagaeteʼmo afagiʼaleʼmo haneʼniye.

¹² Gekamo amagita ataleʼnona kavatimoʼmo kaulagaleʼmo magoʼe magoʼe huno afole neʼaiye. Hosu kavatimoʼmo agoti huno nelateyaʼmofeʼmo ani kana yaʼmo aliʼnone. Gekamo amagita ataleʼnona kavatimo laulagaleʼmo haneʼnigeta ani hosu kavatimo ageʼnone.

¹³ Lagaemo kagaetegamo gekamo amagita atalege aigofe gemo huge Gotitimoʼmo ataleta uge lavayafatiʼmo gemo huta alita afepiʼmo apatege gekamo oʼafigune, huta huge huta maiʼnone. Laipafiʼmo lagesamo afiteta laipafatiʼmo aigofe gemo nehune. Apakaemo vayaʼmogi kavaʼapimo alagepa huʼa aliʼa fako huʼa oʼapateʼnagenoʼaeʼmo Ala kava neʼmoʼa agetenoʼaeʼmo alagepa aipamo kalino oʼapateʼniye.

¹⁴ Apakaemo vayaʼai kavaʼapimo aliʼa fako hisayafeʼmo Goti keʼaepa geʼamo akame osuʼnayaʼmofeʼmo alagepa kavaʼmo ago aliʼa hafaiʼa atalegekana kavaʼmo nehae. Fatago kavaʼmoʼa lahaopaleʼmo ohaneʼnifa afagitegamo haneʼniye.

¹⁵ Ani kava huno lama gemoʼa taoni kateʼmo asagauno aiʼniye. Mago vekamoʼmo hosu kavaʼmo magoʼe huno osuno atalesigeʼapaeʼmo vayaʼmogi kana yaʼmo aliʼa amigae.

Ala kava neʼmoʼa vayaʼamo kamemo huno hapa maeʼniya gemae Ala kava neʼmoʼa ageyana vayaʼai kavaʼapimo alagepa huʼa aliʼa fako osuʼnageno agetenoʼaeʼmo alagi ohauʼniye

¹⁶ Ala kava neʼmoʼa vayaʼamo hapa maesiya vekamo oʼmaiʼnigeno ageʼniye. Agaeʼe apakaeʼeʼmo magokepiʼmo alino lokaeno apatesiyafeʼmo folagate vekamo oʼmaiʼnigeno agetenoʼaeʼmo agesa alaʼamo afiʼniye. Oʼmaiʼniyaʼmofeʼmo Ala kava neʼmoʼa agaiʼa lokiyaʼaletiʼmo vayaʼamo apakufamo alino katino apateʼniye. Inagi he tino agaiʼa fatago kavaʼaletiʼmo lokiya vaino he tiʼniye.

¹⁷ Kame nehaya vayaʼmogimo kapa siyotiʼapiletiʼmo hapaifiʼyaleʼmo aiʼa ati nekaya kava huno Ala kava neʼmoʼa fatago kavaʼamo hapino aliʼniye. Agaemo vayaʼamo apakufamo alino katino apatesiyafeʼmo kapa kakolitamo agenopaleʼmo maleno aliʼniye. Agaemo vayaʼamo kame vayaʼapimogi hosu kavaʼapimo anonaʼapilefeʼmo apamisiyafeʼmo kame kukenamo alino vaiʼniye. Agaemo aipamo neleya kavaʼamo yatala kukena yakana huno vaino aliʼniye.

¹⁸ Agaemo hosu kavaʼapilefeʼmo ina kava huno anonaʼapilefeʼmo kayoʼmo apamigiye. Aipamo neleya kavaʼaletiʼmo kame vayaʼamogi hosu kavaʼapimo anonaʼapilefeʼmo alino kanale huno kayoʼmo apamigiye. Agaemo solovala ani haigileʼmo afagiʼaleʼmo maiʼnaya vayaʼmogi hosu kavaʼapimo anonaʼapilefeʼmo lusi kava huno kayoʼmo apamigiye.

¹⁹ Ani kavaʼmo hugiyaʼmofeʼmo yegemo uno lamino nefaleya kotegamo maiʼnaya vayaʼmogi agiʼalefeʼmo koli huge yegemo haine neʼeya kotegamo maiʼnaya vayaʼmogi ha le konali yaʼalefeʼmo koli huge hugae. Aniʼmo hetenoʼaeʼmo mopamo aeno ati nekaeya kava huʼa kame vayaʼamo neʼesagenoʼaeʼmo Goti Aunemeʼamoʼmo kalahuʼmeʼmo alino asai maleteno ha faino atalesigeno aune hegaiye.

^20-21 Ala kava neʼmoʼa ha painoʼaeʼmo, Miya faino hatu maeno neʼapateya vekamo Saiyoni nofi vayaʼaitegamo egaiye. Yekopu nofi vayapatiʼmo hosu kavaʼapieʼmo apakameʼyamo amiteʼa ataleʼnaya vayaʼaitegamo egaiye. Nagaemo apakaeʼeʼmo mani kotalakemo hu maleʼnove. Nauneʼnameʼnimo kagaeteʼmo maiʼnigeʼna nagaemo geʼnimo aliʼna kavayafiʼmo maleʼnove. Ani gemoʼmo kavayafiʼmo hanege mafaʼne anagakamogi apavayafiʼmo hanege kaginago mafaʼne anagaʼmogi apavayafiʼmo hanege hutesigeno ani afinatetiʼmo muki afinaʼaeʼmo hanege hanege huno hanegaiye, huno ha paiʼniye.