Aiyeya 58 - The Keyagana NT and 25 OT books

Gotiʼa neʼyaʼmo oʼneʼa mo nesiya kavafeʼmo hauʼniya gemae

¹ Ala kava neʼmoʼa hunoʼaeʼmo, Kagaemo oʼataleka alopa gefatiʼmo keya ao. Kagaemo pikulimoʼmo age neʼaiya agufa gemo huka alopa gefatiʼmo keya aeka ge huvo. Kagaemo vayaʼnimo Yekopu nofi vayaʼaifeʼmo geʼnimo amagiʼa neʼatalaya hosu kavaʼapieʼmo hapa paiyo.

² Lama ge vayaʼmo oʼmaiʼnayaʼmonanafa muki afinaʼae afinaʼaeʼmo kahauya huʼa nagesayafeʼmo nehae. Apakaemo keʼaepa geʼnimo oʼataleʼa fatago kavaʼmo huʼa akame nehaya vayakana huʼa maiʼneʼapaeʼmo nahauʼniya kavaʼmo huʼa afisayafeʼmo apamogaga neʼaiyaʼmonanafa aigofe vayaʼmo maiʼnae. Apakaemo fatago kavafeʼmo ge huʼa nafi nekae. Nahaopaleʼmo eʼa maisayafeʼmo apamogaga neʼaiye.

³ Apakaemo huʼapaeʼmo, Lagaemo neʼyaʼmo oʼneta mosiʼnonaʼmonanafa na kava higekaeʼmo lageka alagepa osuʼnane. Lagaemo alita afepiʼmo lateʼnonaʼmonanafa na kava higekaeʼmo lageʼnekaeʼmo laha oʼmaeʼnane, huʼa huʼnageno Ala kava neʼmoʼa ina ge huno hapa paiʼniye. Afiyo, huno, lapakaemo neʼyaʼmo oʼneta mosiʼnaya afinaʼmo lapauʼniya kavaʼmo huge aliʼyatapimo neʼaliya vayaʼaina kana yaʼmo apamige huʼnae.

⁴ Lama gemo huʼnaeʼmo, lapakaemo kame huge ge vaige hutapa maisayafeʼmo neʼyaʼmo oʼneta mo siʼnae. Lapayaʼmo alita lagokiliʼnetapa siki kayoʼmo neʼapamiye. Nunumuʼmo hisaya gemo kokuʼnapatiʼmo afisiyafeʼmo neʼyaʼmo mo nosiye.

⁵ Vayaʼmogi apakaiʼapimo aliʼa afepiʼmo apatesayafeʼmo nagaemo neʼyaʼmo mo nesiya kavaʼmo hu maleʼnofiye. Lapakaemo neʼyaʼmo mo siʼnaya afinaʼmo lapau huta yasimoʼmo hopaleʼmo aliʼnigeno aino ape huʼniya agufa kavaʼmo huge yulagefa neʼaiya kukenaleʼmo laʼnefafiʼmo fai maige lapakaitapimo alita afepiʼmo lapatege hutapa maiʼnae. Lapakaemo ani agufa kavaʼmoʼa nagaemo naipamoʼmo kanale hugiye, hutapa lapakesamo afiʼnafiye. Haʼao.

⁶ Nagaemo ani agufa kavafeʼmo oʼnahauʼniye. Neʼyaʼmo mo sisaya afinaʼmo hosu kavatetiʼmo nofi kitapa apateʼnaya vayaʼmo hatu maeta apatege kana yaʼmo alita apamiʼnageʼa aliniʼa neʼvaya vayaʼmo hapa maege aliʼyatapimo neʼaliya vayaʼmo kalavusi huta apateʼnaya vayaʼaifeʼmo, afaʼa ugae, hutapa huge muki ani agufa hosu kavatapimo atalege hisaya kavafeʼmo nahauʼniye.

⁷ Lapakaemo apaka tesiya vayaʼmo neʼyaʼmo apamige kagemi yaʼapimo ohaneʼnisiya vayaʼmo havaesaya noʼmo ohaneʼnisiyaʼmoʼmo apavaleliteta notapifiʼmo apatege kukena yaʼapimo ohaneʼnisiya vayaʼmo kukena yaʼmo apamige lapakaemo magoke kolaʼmogimo kana yaʼmo alisaya afinaʼmo lapakameʼyamo oʼapamita hapa maege hisaya kavafeʼmo nahauʼniye. Hosu kavanagetapa konagatapimogi olapakesayafeʼmo fala kita neʼmaiye.

⁸ Lapakaemo ani kavaʼmo hisagenoʼaeʼmo netepiʼmo yegemoʼmo malage huno neleya kava huno ha le yatapimo malage huno afole aisigetapa alagepa huta maigae. Hagesigetapa malage hutapa he tita maigae. Ani afinaʼmo fatago kavatapimoʼmo hogotesigetapa akame hugae. Ala kava neʼmo hale konali yaʼamoʼmo lapakame huno eno yagaino lapategaiye.

⁹ Ani afinaʼmo lapakaemo Ala kava nefeʼmo keya aeta ge hisageno getapileʼmo aeno atagaina huno lapa paigiye. Lapakaemo alopa gefatiʼmo alopa gefatiʼmo ge hisagenoʼaeʼmo agaemo hunoʼaeʼmo, Maiʼnove, huno hugiye. Lapakaemo vayaʼmo kana yaʼmo oʼapamige vayaʼmo alita afepiʼmo oʼapatege hosu gemo osuge

¹⁰ apaka teʼnisiya vayaʼmo neʼyaʼmo apamige kafu hisaya vayaʼmo fikumo hapa maeta apamige hisayaʼmoʼmo hanipiʼmo hale yatapimo aeno halegaiye. Hani yatapimo alino hano huno ata lesigeno felugagana huno ha le yatapimo afole aigiye.

¹¹ Muki afinaʼmo Ala kava neʼmoʼa alino ho huno lapateteno ko noʼaiya afinaʼmo lokiya vaino lapateteno lapauʼniya yaʼamo alagi lapamigiye. Lapakaemo aniʼmo haneʼniya hoyagana hutapa maige olaneno aeno nelatiya meti anikana hutapa maige huta maigae.

¹² Lapakaepatiʼmo mago vayaʼmogi akeyaʼvilaga noʼatufaleʼmo taonimo halate kigae. Ani noʼatufamo akeyaʼvilagatiʼmo haneme haneme eʼniye. Vayaʼmogimo lapakaefeʼmo huʼapaeʼmo, apakaemo halate taonile kegiʼyamo kame vayaʼmo esaya kaʼmo huʼa akani maleʼnaya vayane. Apakaemo halate taoni kakoʼmo aliʼa kanale huʼnaya vayane, huʼa hugae.

^13-14 Lapakaemo Sapati keʼaepa gemo amagita oʼatalege aote hu maleʼnova afinaʼmo amega lapakufamo amogaga neʼaiya kavaʼmo osuge lapakaemo hutapaeʼmo, Sapati afinafeʼmo lahauʼnigeta lamogaga neʼaune, hutapa huge Ala kava neʼmo aote afinaʼamo ala agiʼamo amige lapakaitapi aliyatapimo oʼalige lapauʼnisiya kavaʼmo kahau aetapa osuge lapamete lapakaitapi gemo osuge hutapa neʼmaisayana Ala kava nefekeʼmo lapamogaga aigae. Nagaemo lapa maesugetapa ala lapaki aliteta alagepa hutapa maiʼnetapaeʼmo afotapimoʼmo Yekopu hetamafatiʼmo aliteta alagepa neʼyaʼmo negae. Ala kava neʼmoʼa ani gemo huʼniye.