Aiyeya 57 - The Keyagana NT and 25 OT books

Isaleli vayaʼmogi aigofe mono kavaʼapiyeʼmo huʼniya gemae

¹ Fatago vayaʼmo nefaliyaʼmonanafa magoke vekamoʼmo hausoli nosiye. Gotiʼa hapau huʼa neʼapataya vayaʼmo ma mopafatiʼmo apavalelino neʼvigeʼapaeʼmo vayaʼmogi huʼapaeʼmo, Hosu kavategatiʼmo apavalelino neʼviye, huʼa apakesa afifi huʼa noʼmaiye.

² Apakaemo koʼapifiʼmo uʼa haiteʼapaeʼmo apaipamoʼmo falu hugiye. Fatago kavaʼmo nehisaya vayaʼmogi fatago kavaʼapimo akame nehuʼapaeʼmo faliteʼa hipaʼapileʼmo havaeʼa maiʼa hagalegae.

³ Ala kava neʼmoʼa ina gemo hunoʼaeʼmo, Lapakaemo analisa a kanomo ve mafaʼne anaganagi kumai kavaʼmo nehiya vekamo kumai kavaʼmo nehiya aʼmo mafaʼne anaganagi hutapa malegamo eyo, huʼna,

⁴ Lapakaemo ina lafeʼmo kigi yokalo gemo nehae. Ina lafeʼmo lapavenafuʼnamo sakani huta ave neliye. Lapakaemo Goti gemo amagiʼa neʼatalaya vayaʼmogi mafaʼne anagaʼe humi neʼapataya vayaʼmogi mafaʼne anagaʼenagi hutapa oʼmaiʼnafiye.

⁵ Kumai kavafeʼmo lapauʼniya kavaʼmoʼa lapaipafatiʼmo lokiya vaino alino he tino lapateʼnigetapa muki hegafa yosamo aepafiʼmo aigofe gotigitefeʼmo mono nehae. Lapakaemo mafaʼnetapimo kagoʼmu kotegamo yatala yafa kapiʼmo apamagita ofalinimo aigofe gotitapimogi neʼapamiye.

⁶ Lapakaemo ani haopalegamo yafaʼmo alitapa gotitapimogikana huta hamaleta neʼapatae. Ani yafakeʼmo gotitapimogimogeta nofi alagafati aniʼmo lakita ofalini huge viti ofalinimo huge nehae. Lapakaemo ani kavaʼmo nehayaʼmofeʼmo naipamoʼmo falu hisifiye.

⁷ Lapakaemo yatala avefiʼmo uta haitapa aigofe monoʼmo hutetapaeʼmo ofalinimo hutetapa kumai kavaʼmo nehae.

⁸ Lapakaemo lapakesamo afisayafeʼmo aigofe gotigi apauneʼamo notapile kitamo akamelegaʼamo maleʼnae. Lapakameʼyamo namitetapa apakaetegamo uta apakaeʼeʼmo kotalakemo hu maletetapa ani aigofe gotigiʼeʼmo kumai kavakana hutapa mono huʼnae. Lapakaemo apakufaʼalagaʼageʼmo apaketetapaeʼmo hipaʼapieʼmo lahapauʼniye.

⁹ Lapakaemo alagepa atumo neʼaiya uvelimo alita lapakufaleʼmo faletetapa uta aigofe gotiʼmo Molekitefeʼmo mono nehae. Lapakaemo aigofe mono kavaʼmo hisayafeʼmo apa vayatapimo afagi kotegamo alita apateʼnageʼa uʼnae. Ani kavatefeʼmo lapakaemo ago faliʼnaya vayaʼmo uʼa lamiʼnaya kotegaʼeʼmo uta lamisayafeʼmo lapakufamo alita afepiʼmo ateʼnae.

¹⁰ Lapakaemo aigofe mono kavaʼmo hisayafeʼmo lapaya mukiki huʼnayaʼmonanafa alagaʼmo olapaeʼniye. Ani aigofe mono kavaʼmoʼa lokiya vaino lapateʼniyaʼmofeʼmo oʼataleʼnae.

¹¹ Lapakaemo ina lafeʼmo koli huʼnayaʼmofeʼmo nagaefeʼmo aigofe gemo naha paiteta nagaefeʼmo lapake kaniʼnigetapa lapaipafiʼmo nagaefeʼmo lapakesamo noʼafiye. Yatala afinaʼmo ge osuʼna afaʼa maiʼnovaʼmofeʼmo nagaefeʼmo koli nosafiye.

¹² Nagaemo na agufa fatago kavatapimo nehafi huʼna hapa paiteʼna aliʼyatapieʼmo aeʼna hakalo huguve. Alagi lapa oʼmaegaiye.

¹³ Lapakaemo hosu yaʼmo alisaya afinaʼmo aigofe gotigifeʼmo keya aesayaʼmoʼmo eʼa lapa maegafiye. Haʼao, aise yasitomoʼmo afaʼa apavalelino ugiye. Apavalelino ugiyaʼmonanafa nagaefeʼmo aliʼa amufa neʼnamiya vayaʼmo apamisuva mopamo aliteʼa nagae aote aveleʼmo maigae.

Gotiʼa hosu kavaʼapimo aliʼa atalesaya vayaʼaina hapa maesiya gemae

¹⁴ Ala kava neʼmoʼa ina gemo hunoʼaeʼmo, Mago vekamoʼmo ina gemo hunoʼaeʼmo, Kaʼmo valiyo, kaʼmo valiyo. Kaʼmo valita apateyo. Lapakaemo muki haneʼniya yateʼmo vayaʼnimo apaiyafiʼmo hapaegaiyanagi alita ataleyo, huno hapa paigiye.

¹⁵ Muga anaga vekamo alino asagauno ateʼniya anaga vekamo muki afinaʼmo maige maige huno neʼmaiya vekamo agiʼamo Aote Vekamoʼmo hunoʼaeʼmo, Nagaemo muga anaga aote kotegamo maiʼneʼna hosu kavaʼapieʼmo apaipamo kana huge apakaiʼapimo aliʼa afepi apatege nehaya vayaʼeʼmo magokepi lokaeʼna maiʼnove. Apakaiʼapimo aliʼa afepi neʼapataya vayaʼaina apauneʼapameʼmo aliʼna he tiʼna apatege hosu kavaʼapieʼmo apaipamo kana nehiya vayaʼai apaipamo aliʼna he tiʼna apatege hisuvafeʼmo apakaeʼeʼmo maiʼnove.

¹⁶ Nagaemo muki afinaʼmo agoti huʼna apatege naipamo leʼna apatege osuguve. Ani agufa kavaʼmo hume hume uvesinana alo huʼna apateʼnova vayaʼmogi apauneʼapameʼmo aʼaunena aiyesine.

¹⁷ Agaemo hosu kavaʼmo huno haʼye huʼniya kavatefeʼmo naipamo leʼniye. Naipamo leʼnigeʼnaeʼmo nagaemo kayoʼmo amiteʼna ataleʼna uʼna fala kiʼna maiʼneʼna naipamo leʼniyaʼmonanafa aipafiʼmo hauʼniya kavaʼmo oʼataleno magoʼe huno hosu kavaʼmo huʼniye.

¹⁸ Nagaemo hosu kavaʼamo ageʼnovaʼmonanafa aliʼna alagepa huʼna ategauve. Nagaemo alagepa kateʼmo avaleliʼna uguve. Halate ha maeʼna aipamo aliʼna falu huʼna ategauve. Ani kava huʼna ani vekamo hosu kavaʼaeʼmo yulagefa neʼaiya vayaʼai apaipamo aliʼna falu huʼna apategauve.

¹⁹ Ala kava neʼmoʼa ina gemo hunoʼaeʼmo, Neʼyaʼmo mopafatiʼmo afole neʼaiya kava huno apavayafatiʼmo gemo afole neʼaiye. Nagaemo apavayafiʼmo gemo alo huʼna neʼmalove. Apavayafatiʼmo ge hisageʼa afagi kotegamo maiʼnaya vayaʼe haopaleʼmo maiʼnaya vayaʼmogiʼeʼmo afiteʼapaeʼmo, aipamoʼmo falu huno nelate, huʼa hisageno apaipamoʼmo falu hugiye. Nagaemo vayaʼnimo aliʼna hapageʼna apategauve.

²⁰ Aliʼna hapageʼna apategauvaʼmonanafa hosu kavaʼmo nehaya vayaʼmo aino apalo neʼatiya solovala anikana huʼa maiʼnae. Solovala aniʼmoʼmo afaʼa ohanegaiyaʼmonanafa aino apalo atino hosu hapaʼe hosu mopaʼeʼmo alino afole aino neʼate.

²¹ Gotiʼnimoʼmo hunoʼaeʼmo, Hosu kavaʼmo nehaya vayaʼmogimo Gotiʼe vayaʼmogiʼeʼmo kavatetiʼmo kamemo nehageno apaipamoʼmo falu nosiye.