Aiyeya 56 - The Keyagana NT and 25 OT books

Gotiʼa malaga nofi vayaʼmo apakufamo alino katino apatesiya kavafeʼmo ava gemo huʼniya gemae

¹ Ala kava neʼmoʼa ina gemo hunoʼaeʼmo, Vayaʼnimogitapae, huno, Aise afinaʼmo utesigeʼna lapakufamo aliʼna katiʼna lapateteʼna fatago kavaʼnimo aliʼna lapave liguvaʼmofeʼmo lapakaemo vayaʼmogi kavaʼapimo alagepa huta alita fako hutetapa apakaetegamo fatago kavaʼmo hiyo.

² Ani agufa kavaʼmo nehiya vekamo aulena vekamo maiʼniye. Sapati afinaʼmo maiʼa haga nelaya afinaʼmo keʼaepa gemo akame nehaya vayaʼmo aulena vayaʼmo maiʼnae. Apakaemo Sapati afinaʼmo aliʼa hosu huʼa ateteʼa mago agufa hosu kavaʼmo nosae.

³ Alu nofi vekamo Ala kava nepiʼmo haino faleʼnisiya vekamoʼmo hunoʼaeʼmo, Ala kava neʼmoʼa agaiʼa vayaʼafatiʼmo alino fako huno nataleʼniye, huno osino. Ina kava huno anamo vekamoʼmo hunoʼaeʼmo, Nagaemo ago vaiʼniya yosagana huʼna maiʼnovaʼmofeʼmo Goti vekaʼamo afaʼa oʼmaiguve, huno osino.

^4-5 Haʼao, Ala kava neʼmoʼa hunoʼaeʼmo, Anamo vayaʼmogi Sapati afinaʼnimo akame huge nahauʼniya kavaʼmo akame hisayafeʼmo lekana pai maleʼneʼa akame huge kotalake geʼnimo atafau alagi huʼneʼa akame huge nehisaya vayaʼmogi nagaetegatiʼmo ala apakiʼapimo aligae. Nagaemo afamo anaga vayaʼnifiʼmo aliʼna apatesugeʼa ala apakiʼapimo aligae. Ani anamo vayaʼmogi ve mafaʼneʼe aʼmafaʼneʼeʼmo aliʼa apateʼnaesinana ala apakiʼapimo aliʼnaesine. Apakiʼapimo aliʼnaesinaʼmonanafa nagaemo apatesuva apakiʼapimoʼmo aeno aga segaiye. Nagaemo apatesuva apakiʼapimoʼmo muki afinaʼmo hanege hanege huno hanegaiye. Mago vekamoʼmo ani apakiʼapimo apayapatiʼmo alino hapa faleno oʼatalegaiye.

^6-7 Nagaemo apakaemo alu kotega vayaʼmogi mafaʼneʼapimogi Ala kava nefeʼmo mono huteʼa akame huge agiʼalefeʼmo hapau apayamopafiʼmo hapauge aliʼyaʼamo alige huʼa maisayafeʼmo eʼa Ala kava neʼeʼmo magokepi lokaeʼa maisaya vayaʼmo apavaleliʼna egauve. Nagaemo apakaemo Sapati kavaʼmo aliʼa hosu huʼa oʼategayaʼmonanafa nagaemo kotalakemo hu maleʼnova gemo atafau alagi huʼneʼa akame hisaya vayaʼmo nagaemo apavaleliʼneʼna haiʼneʼna nagae aote aveleʼmo apateteʼna apamogaga aisaya yaʼmo apamisugeʼa nunumuʼmo nehaya mono noʼnifiʼmo apamogaga aigae. Vayaʼmogimo noʼnieʼmo, huʼapaeʼmo muki nofi vayaʼmogimo nunumuʼmo hisaya noʼmo haneʼniye, huʼa hugayaʼmofeʼmo apakaemo ofalini nehaya hiʼyalamuʼnileʼmo atafi nekaeya ofalinimoʼe afumo amagiʼnaya ofalinimoʼeʼmo namisageʼna hapao ke heteʼna aliguve.

⁸ Magoʼamogimo Isaleli vayaʼmo aliʼa hapafaiʼa apataleʼnae. Ala kava neʼmo Gotiʼa ani aliʼa hapafaiʼa apataleʼnaya Isaleli vayaʼmo agaetegamo apavalelineno alino anupa huno neʼapateya Gotiʼa Ala kava neʼmoʼa hunoʼaeʼmo, Agaeʼe aliʼa anupa huʼa maiʼnaya vayaʼeʼmo magoʼe vayaʼmo aliʼna anupa huʼna apategauve, huno huʼniye.

Isaleli vayaʼaiteʼmo yagaiʼnaya vayaʼmogi hosu kavaʼapieʼmo huʼniya gemae

⁹ Ala kava neʼmoʼa ina ge huno hapa paiʼniye. Afela afu vayaʼmogitapae, huʼna, etapa hapaeyo.

¹⁰ Isaleli vayaʼaiteʼmo yagaiʼa neʼapataya vayaʼmo apaulagamo fali kaeʼniye. Gemo alagepa huʼa noʼafiye. Apake noʼaiya kalagana huʼa maiʼneʼa hau hau nosae. Havaesayafeʼmo hapauʼnigeʼa apauʼmaiʼmai huʼa maiʼnae.

¹¹ He, apakaemo neʼyaʼmo magoʼe magoʼe huʼa nesayafeʼmo hapaʼye nehiya kalagana huʼa maiʼneʼa muki afinaʼmo magoʼe huno neʼyafeʼmo nehapaiye. Sipisipileʼmo yagaiʼa neʼapataya vayaʼmogi afiʼa aeto nosae. Mukiʼamogimo apakaiʼapi hapauʼniya kavaʼmo huʼa apakaiʼapiekeʼmo apakesamo neʼafiye.

¹² Vayaʼmo aliʼa anupa nehaya afinaʼmo apakaepatiʼmo mago vekamoʼmo ina gemo hunoʼaeʼmo, Nagaemo nofi alagafati aniʼmo aliniʼna esugeta lagaemo alino negi nagi huno latesiya aniʼmo neme neme ugune. Lagaemo egamo ani agufa kavaʼmo huteta magoʼe hutageʼmo negaune, huno hugiye.