Aiyeya 55 - The Keyagana NT and 25 OT books

Gotiʼa hunoʼaeʼmo, Alagi alagepa huta maisayafeʼmo nagaetegamo eyo, huno hapa nepaiye, huno huʼniya gemae

¹ Ala kava neʼmoʼa hunoʼaeʼmo, Hae, huno, muki vayaʼmo anifeʼmo lapauʼnisiya vayaʼmogitapae, huno, anitegamo eyo. Monitapimo ohaneʼnisiya vayaʼmogitapamo eta miya faitapa neyo. He, eta nofi alagafati aniʼe pulumakamo nuʼaʼeʼmo moniletiʼmo miya ofaitapa fiku aliyo, huno hapa nepaiye.

² Na kava higetapaeʼmo lapa oʼmaesiya yatefeʼmo monitapimo fiku atalege aliʼyatapilefeʼmo miyatapimo alino falu huno lapatesayafeʼmo apamige nehae. Geʼnilefeʼmo lapaketafo huʼnetapa alagepa huta afiyo. Afigenoʼao lapakupi mafaʼnemoʼmo muki alagepa yaʼmo alitenoʼaeʼmo amogaga aino.

³ Lapaketafo huta afitetapa nagaetegamo eyo. Afiyo, huʼna, lapakupi mafaʼnemo alagepa huno afaʼa maigiyanagi. Nagaemo hano osuno hanege hanege huno hanesiya kotalakemo lapakaeʼeʼmo hu malegauve. Nagaemo kini vekamo Nevinifeʼmo nahau huʼna kategauve, huʼna huʼnova polomasi gemo afaʼa amagiʼna oʼatalesuva agufa gemo ha paiʼnova kava huʼna lapa paiguve.

⁴ Nagaemo lama geleʼmo faigoko huno ha maesiyafeʼmo agaemo avaleʼna vayaʼmo apamiʼnove. Nagaemo gemo nehiya vekamo yagaino lapatesiya vekamo lekana paiʼna ateʼnove.

⁵ Ala kava neʼmo Gotitapimoʼmo Isaleli vayaʼmogi aote Gotiʼapimoʼmo ala lapakitapimo lapamiʼniyaʼmofeʼmo lapakaemo oʼapakeʼnaya nofi vayaʼaifeʼmo keya aeta ge hisageʼa olapakeʼnaya alu nofi vayaʼe alu nofi vayaʼmogiʼeʼmo nagu nagu huʼa lapakaetegamo egae, huno huʼniye.

⁶ Lapakaemo Ala kava neʼmo kahauya hutapa agegefe hisaya afinaʼmo kahauya hutapa ageyo. Lapaopaleʼmo eno maisiya afinaʼmo keya aeta nunumuʼmo hiyo.

⁷ Hosu kavaʼmo nehaya vayaʼmogi hosu kavaʼapimo atalege fatago kavaʼmo nosaya vayaʼmogi apakesamo neʼafiya kavaʼapimo atalege huteʼa Gotitimoʼmo Ala kava netegamo aiʼa atagineʼa eyo. Ala kava neʼmoʼa hau huno apateteno alopa kavaʼmo hunoʼaeʼmo, afaʼa ateyo, huno hapa paigiye.

⁸ Ala kava neʼmoʼa ina gemo hunoʼaeʼmo, nagae naipa nagesamo haneʼniya kava huno lapakae lapaipa lapakesamo ohaneʼniye. Nagaemo nehuva kavaʼnimo haneʼniya kava huno lapakaemo nehaya kavatapimo ohaneʼniye.

⁹ Kokuʼnaʼmo anaga afagiʼaleʼmo haneʼnenoʼaeʼmo ma mopamo lusi kava huno aeno aga seʼniya kava huno nehuva kavaʼnimoʼe naipa nagesamo neʼafuva kavaʼnimoʼeʼmo nehaya kavatapiʼe lapaipa lapakesamo neʼafiya kavatapiʼeʼmo lusi kava huno aeno aga seʼniye.

¹⁰ Koʼmo kokuʼnapatiʼmo asagauno aiteno halate fikumo atagi neno uno nohaiyaʼmonanafa mopamo aniʼmo amiʼnigeno alagepa neʼyaʼmo hoyafatiʼmo afole neʼaigeʼapaeʼmo vayaʼmogimo neʼaliye. Mago neʼyaʼamo aliʼa nege mago avina yaʼamo aliʼa hakalege nehae.

¹¹ Ani agufa kavakeʼmo huno geʼnimo nagaetegamo fikumo atagi neno oʼmegaifa aliyakeʼmo aligiye, huʼna ge huʼnova kava huno nahauʼnisiya kavaʼmo afole aigiye.

¹² Lapakaemo kalavusi huʼa lapateʼnaya koʼmo ataletutapa lapamogaga aisageʼna nagaemo lapavaleliʼna visugeno mago hosu yaʼmo lapakaeteʼmo afole oʼaisigeno lapaipamoʼmo falu huʼnisigetapa ugae. Aise avemogiʼe alopa avemogiʼeʼmo lapaulagaleʼmo yokemo hisageʼapaeʼmo muki yosamogimo apayaʼmo amagiʼa apamogaga aigae.

¹³ Paeni yosamo hosu yosamo aimuʼyaleʼmo lagigiye. Aise kanale yosamo aufe nofiʼmo haneʼniya yapiʼmo lagigiye. Muki afinaʼaeʼmo ani kanale yosamo lagisigeno ani kavaʼmo ina kava huno nagaemo Ala kava neʼmoʼnamo lokiya alagena kavaʼmo nehuva kavakana huno haneʼnisigeʼa vayaʼmogimo ageteʼapaeʼmo ala nagiʼnimo namigae.