Aiyeya 54 - The Keyagana NT and 25 OT books

Gotiʼe vayaʼaʼeʼmo magokepiʼmo alagepa huʼa lokaeʼa maisaya kavafeʼmo kotalakemo hu maleʼniya gemae

¹ Ala kava neʼmoʼa ina ge huno huʼniye. Anamo a kanomo kagafu kiʼnigeka mafaʼnemo alika oʼateʼnana a kanomogamo yokemo huvo. Anauʼamoʼmo ataleʼniya akana huka maiʼnanaʼmonanafa veleʼmo maiʼniya a kanomo ago aeka agaseka asole mafaʼnemo alika apateʼnanaʼmofeʼmo alopa gefatiʼmo yokemo huvo.

² Kagaemo maisana seli noʼmo magoʼe huka alika alopa huteka alika he tika ato. Apategeʼao maisana seli noʼmo aliʼa alopa huʼa ateyo. Nofiʼamo atalegeno uno yatala huʼnisigeka mopafiʼmo muki kayoʼamo aeka alagi hu malo.

³ Kagae mopamoʼmo alino alopa huteno avala aisigeno hakuʼmo lamaga haopalega hanelino ute hoga haopalega hanelino ute hugiye. Kaginago vayakamogimo maiʼa aiʼa atagu faeteʼa alu nofi vayaʼai mopamo aliteʼa maigae. Apakaemo vayaʼmo ataleʼa uʼnaya taonifiʼmo maigae.

⁴ Kagaemo magoʼe huno kavagage osugiyaʼmofeʼmo koli osuvo. Apakaemo vayaʼmogimo kagaefeʼmo magoʼe huʼa huʼa faipa osuge kavagage yaʼmo okamige hugae. Haʼao, kagaemo a mafaʼnemo maiʼnekaeʼmo Isipi kotegamo kalavusi aliʼyaʼmo aliʼnana kavagage kavafeʼmo alagi kagekanika ataleteka maigane. Ina kava huka a kanomo anauʼamoʼmo ataleno uʼniya akanogana huka maige kogu akanogana huka kagaikageʼmo maige huʼnana afinafeʼmo kagekanisigeno magoʼe huno kavagage osugiye.

⁵ Nagaemo Gotiʼnamo kagaemo alo huʼna kateʼnova vekamo anaukamonagana huʼna maiʼnove. Nagaemo nagiʼnimo Ala kava neʼmo muki lokiyaʼnimo haneʼniye. Nagaemo miya faiʼna hatu maeʼna kateʼnova vekamoʼnamo Isaleli vayaʼai aote Gotiʼapimoʼnamo maiʼnove. Muki ma mopafi vayaʼai Gotiʼapimoʼmo maiʼniye, huʼa agi neʼae.

⁶ Gotikamoʼmo ina gemo hunoʼaeʼmo, kagaemo anaukamoʼmo kataleno uʼniya akanogana huka maiʼnanageno kahau kayamopafatiʼmo kagafu kiʼniye. Kagaemo saufa aʼmafaʼnemo veleʼmo maiʼnana akanogana huka maiʼnanageno anaukamoʼmo akameʼyamo kamiʼniye. Maiʼnanaʼmonanafa nagaemo aʼnimo maisanafeʼmo kagaefeʼmo keya aeʼna ge huʼnove.

^7-8 Ala kava neʼmoʼa miya faino hatu maeno kateʼniya vekamoʼmo ina gemo hunoʼaeʼmo, Nagaemo ago kataleʼna aise afinaʼmo maiʼnovaʼmonanafa lusi kava huʼna nahau huʼna kateteʼna nagaetegamo kavaleliʼna eʼna kategauve. Aise afinaʼmo naipamo leteʼnaeʼmo naugosamo aise afinaʼmo aliʼna fala kiʼnovaʼmonanafa nahau huʼna nekateʼnaeʼmo muki afinaʼmo kaha maeʼna kamisuva kavaʼmo hanege hanege huno hano osuno hanegaiye.

⁹ Ani kavaʼmo kagaetefeʼmo nehuva kavaʼmoʼa Novaʼmo maiʼniya afinaʼmo afole aiʼniya agufa kavakana huno haneʼniye. Nagaemo nagoʼyamo ataleteʼna polomasi gemo huʼnaeʼmo, Halate alopa aniʼmo heteno muki ma mopamo aeno ati okaegaiye, huʼna huʼnova agufa kavaʼmo huʼna nagoʼyamo ataleteʼnaeʼmo, Nagaemo halate naipamo leʼna katege ge kahauge osuguve, huʼna huʼnove.

¹⁰ Avemo aino nakupaeno asagauno aige aise avemo alino atalege hisigeno ohanegaiyaʼmonanafa kagaefeʼmo nahau nayamopafiʼmo nahauʼnigeʼnaeʼmo kagaetegamo kanale kavaʼmo huʼnovanageʼna oʼataleʼna huge huge huʼna maiguve. Nagaemo kotalakemo laʼagaemo magokepiʼmo alagepa hutaʼa maisuʼafeʼmo hu maleʼnova kotalakemo alagi hano osugiye, huteʼna nahau huʼna nekatova Ala kava neʼmoʼnamo kaha nepauve.

¹¹ Agaemo Yulusalemu vayaʼaifeʼmo hapa painoʼaeʼmo, O, Yulusalemu taoniyo, huʼna, hanageke yaʼmo neʼaline. Alopa kana yaʼmo aliʼnanaʼmonanafa hapau huʼa kateteʼa kaha maesaya vayaʼmo oʼmaiʼnae. Oʼmaiʼnayaʼmonanafa nagaemo kanale kanale yafaʼageʼmo alopa moniletiʼmo miya nefaiya yafaʼmo aliʼna mopafiʼmo kale kae maleʼneʼna ani yafateʼmo alagi kanale taonimo kiguve.

¹² Nagaemo alu alagepa yafa alu alagepa yafaʼmoʼa lusi kava huno aeno ha neleya yafaʼmo aliʼna mopafiʼmo kale kae maleʼneʼna agotofuleʼmo taonimo kige ani yafateʼmo yatala nokoʼmo kige taonile yafa kegiʼyaleʼmo kipa alo huge kanale konali taonile kegiʼyamo huge huguve.

¹³ Nagaemo Ala kava neʼmoʼnamo muki mafaʼne anagakamo aliʼna apaya malesugeʼa apakaemo alagi alagepa apaipamokaliʼa maigae.

¹⁴ Nagaemo fatago kavaʼniletiʼmo aliʼna lokiya vaiʼna katesugeka alagepa huka maige maige huka maigane. Mago vayaʼmogi eʼa aliʼa afepiʼmo katesageka koli osugane. Lusi kava huka koli hisana kavakamo afole oʼaigiye.

¹⁵ Mago kame vayaʼmogimo eʼa kagaeʼeʼmo kamemo hisayafeʼmo aliʼa anupa huʼa maisayana nagaemo afaʼa aliʼna apatesugeʼa oʼugae. Kagaeʼeʼmo kamemo hisayafeʼmo aliʼa anupa huʼa maisaya vayaʼmo asagauʼa aigae.

¹⁶ Afiyo, huʼna, nagaiʼnigeʼmo vayaʼmo alo huʼna apateʼnogeʼapaeʼmo afiteʼa ageteʼapaeʼmo aeniletiʼmo alu ya alu yaʼmo alo nehae. Apakaemo aenimo atafiʼmo maleʼnagenoʼaeʼmo atamoʼmo lusi kava huno amuko huteno aenimo nele. Apakaemo ani aenimo aliʼa amagiʼa alu ya alu yatetiʼmo kamemo nehaya yaʼmo alo nehae. Nagaemo ati vayaʼeʼmo alo huʼna apateʼnogeʼa ani yatetiʼmo kamemo huteʼa aliʼa hosu huʼa apatege heʼa halagape vaiʼa atalege nehae.

¹⁷ Nehayaʼmonanafa kame nehaya yaʼmo alo huʼnaya yaʼmo aliʼa kame huʼa aeʼa lapaka osegae. Vayaʼmogimo alu ge alu gemo huteʼa aliʼa kagaepiʼmo faiʼa katege katege huʼa maisaya vayaʼmogi geʼapileʼmo afaʼa aeka atagaina huka ge hugane. Aliʼyaʼnimo neʼaliya vayaʼmogimo ani hetamaʼapimo alige fatago kavaʼapimo nagaetegatiʼmo alige hugae, huno Ala kava neʼmoʼa huʼniye.