Aiyeya 53 - The Keyagana NT and 25 OT books1 Ina laʼmo aeta hakalo huta hapa nepauna geeʼmo agesamo afino fatago huʼniye. Ala kava neʼmoʼa ina laʼmo agufamo alino katino atesiya himamuʼamo alino ave liʼnigeno ageʼniye. 2 Ala kava neʼmo aliʼyaʼamo neʼaliya vekamoʼmo aulagaleʼmo eno haineno kava faigekana huno kosigiye. Agaemo hafuʼyamo aegekana huno vaiʼniya mopafatiʼmo afole aigiye. Agaemo kanale agufamo ohanege ha le konali yaʼamo agufaleʼmo ohanege huʼniye. Alagepa laulagamo noʼagona vekamo maiʼniyaʼmofeʼmo agaefeʼmo ageta lahaʼye osuʼnone. 3 Vayaʼmogimo huʼapaeʼmo, ina agufa vekamo maiʼniye, huʼa huteʼa apakameʼyamo amiʼnae. Kana yaʼmo neʼaliya vekamo maiʼneno aipafiʼmo agafu kiʼniya kavaʼmo ago ageʼniye. Lagaemo oʼagesunafeʼmo laugosafiʼmo aita ati kaegekana huta maiʼnone. Lagaemo hutaeʼmo, ina agufa vekamo maiʼniye, huta huteta ala agiʼamo oʼamiʼnone. 4 Agaemo laipafiʼmo lagafu kiʼniya kavaʼmo alige aliʼnona kana yaʼmo lagaetefeʼmo alinino uge huʼniyaʼmonanafa lagaemo hutaeʼmo, Gotiʼa kana yaʼmo amige amagige alino afepiʼmo atege huʼniye, huta lagesamo afiʼnonaʼmonanafa. 5 Goti geʼamo amagita ataleʼnona kavatilefekeʼmo amagiʼnagenoʼaeʼmo kolaʼamoʼmo huʼniye. Hosu kavatilefekeʼmo lusi kava huʼa amagiʼnae. Nofi kayotetiʼmo amagiʼnaya kavatetiʼmo Gotiʼeʼmo alino lao yaʼmo huno lateʼniye. Fugaginaʼamoʼmo huʼniya kavatetiʼmo alino lahageno lateʼniye. 6 Lagaemo sipisipigana huta maiʼneta alagepa kaʼmo ataleta atagu faeta uteta huta maiʼnone. Lagaemo ataleta lahauʼniya kateʼmo lamete lamete huta uʼnone. Inagi Ala kava neʼmoʼa mukiʼamogita hosu kavatimo alino anupa huno agaeteʼmo maleʼniye. 7 Yesuʼmo muki anonaʼapilefeʼmo miya faisiyafeʼmo Gotiʼa kana yaʼmo amige vayaʼmogi aliʼa afepiʼmo atege huʼnayaʼmonanafa ge osuno afaʼa maiʼniye. Vayaʼmogimo aikeli sipisipimo amagisayafeʼmo avaleliʼa neʼvaya agufa kava huʼa avaleliʼa uʼnae. Vayaʼmogimo sipisipimo ayokaʼmo lagaunagenoʼaeʼmo age noʼaiya agufa kava huno ge osuno afaʼa maiʼniye. 8 Gotiʼa kanolu kalavusifatiʼe agoti huʼa ateʼnaya kavapatiʼeʼmo alino katino ateʼniye. Apakaemo afaʼa maiʼnaya vayapatiʼmo agaemo agoti huʼa ateteʼa kamiti amagiʼnayaʼmofeʼmo ani vayapatiʼmo ina laʼmo apakesamo afinoʼaeʼmo, Agaemo Goti vayaʼamogi hosu kavaʼapilefekeʼmo kayoʼmo aliʼniye. 9 Apakaemo huʼapaeʼmo, Hosu vayaʼeʼmo kita ategaune, huʼa hu maleʼnayaʼmonanafa falitenoʼaeʼmo kagemi yaʼaʼe vekaʼeʼmo maiʼniye. Agaetegamo hosu kavaʼmo huʼnayaʼmonanafa vayaʼmo oʼapamagige mago aigofe gemo osuge huʼniye. 10 Ala kava neʼmoʼa aliʼyaʼamo neʼaliya vekamo aeno apalisiyafeʼmo hauʼnigeno agafu kiʼniye. Ala kava neʼmoʼa ani vekamo agupi mafaʼnemo ago aliteno hosu kavaʼapilefeʼmo ofalinimo alino hamaleno ateteno aliʼyaʼamo neʼaliya vekamo maisiya afinaʼamo alino yatala huno atesigeno aginago vayaʼmo apakegaiye. Agaemo aliʼyaʼmo alisigenoʼaeʼmo Ala kava neʼmo hauʼniya kavaʼmo alagepa huno afole aigiye. 11 Agupi mafaʼnemoʼmo lusi kava huno kana huʼniya aliʼyaʼmo alisigeno neʼyaʼmo afole aigiyaʼmofeʼmo aipamoʼmo ha gegaiye. Aliʼyaʼnimo neʼaliya fatago vekamoʼmo hosu kavaʼapimo aligiyaʼmofeʼmo agaemo ageʼa alagepa huʼa agesaya kavatetiʼmo asole vayaʼaifeʼmo, naulagaleʼmo fatago vayaʼmo maiʼnae, huno hapa paigiye. 12 Agupi mafaʼnemoʼmo kana huʼniya aliʼyaʼmo aliʼniyaʼmofeʼmo nagaemo asole vayaʼmo apavaleʼna hetamaʼagana huʼna amiguve. Agaemo lokiya vayaʼeʼmo kamemo huteno huno aeno apaka setenoʼaeʼmo kagemi yaʼapimo aligiye. Apakaemo huʼapaeʼmo, Agaeʼe keʼaepa gemo amagiʼa neʼatalaya vayaʼeʼmo magoke agufa vayaʼmo maiʼnae, huʼa apakesamo afiʼnayaʼmonanafa asole vayaʼai hosu kavaʼapimo aliteno hosu vayaʼaifeʼmo nunumuʼmo huno apateʼniye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.