Aiyeya 52 - The Keyagana NT and 25 OT books

Ala kava neʼmoʼa Saiyoni vayaʼmogi apakufamo alino katino apatesiya gemae

¹ Agaemo Yulusalemu vayaʼaifeʼmo hunoʼaeʼmo, O Saiyoniyo, huno, Aupatiʼmo hauneyo, aupatiʼmo hauneyo, Kagaemo he tika lokiya vaiyo. O Yulusalemu kaote taoniyo, huno, Kagaemo kanale kanale konali kukenakamo alika vaiyo. Apakufaleʼmo Goti alagena yaʼamo oʼaliʼnisaya vayaʼe oʼaniʼya faiʼniya vayaʼeʼmo kagaetegamo magoʼe huʼa oʼmegae.

² Kagaemo he tika kaigopalegatiʼmo mumusopamo alika kalo paeka ataleteka uka kini siyateʼmo fai maiyo. Saiyoni a mafaʼneo, huno, Kalavusifiʼmo maiʼnanaʼmonanafa lugokafiʼmo aeno kateʼniya seli nofiʼmo alika hatu maeka atalo.

³ Ala kava neʼmoʼa hunoʼaeʼmo, Kagaemo kalavusi aliʼyaʼmo alisanafeʼmo miya ofaiʼnaya kava huʼna miyakamo oʼaliʼna fiku hatu maeʼna kategauve.

⁴ Ala kava neʼmoʼa ani kavatefeʼmo hunoʼaeʼmo, Akeyaʼvilagamo vayaʼnimogi aise afinaʼmo maisayafeʼmo Isipi kotegamo uʼnae. Apakaiʼapimo Isipi kotegamo maisayafeʼmo hapauʼnigeʼa uʼnayaʼmonanafa henagaʼamo Asiliya vayaʼmogi vayaʼnimo fiku kavaʼmo huʼa kana yaʼmo apamiʼnae.

⁵ Hemenimo mago vayaʼmogi halate vayaʼnimo afaʼa apavaleliʼuʼa kalavusi huʼa apateʼnayaʼmofeʼmo na agufa kavaʼmo hisuve. Yagaiʼa neʼapataya vayaʼmogi alopa kana yaʼmo neʼapamigeʼa vayaʼnimogi lusi kava huʼa kage kage huʼa yulagefa neʼaiye. Apakaemo muki afinaʼae afinaʼaeʼmo naginileʼmo aliʼa afepiʼmo nateteʼa huʼa faipa huʼa neʼnatae.

⁶ Ani kavaʼmo nehayaʼmofeʼmo vayaʼnimogimo nagiʼnimo alagepa huʼa afigae. Inagi afole aisiya afinaʼmo apakaemo nageʼa aeto hugae. Nagaemo, nageyo, huʼna, nagaiʼnigeʼmo maiʼnove, huʼna hisugeʼa huʼapaeʼmo, ge nehiya vekamo agaiʼageʼmo maiʼniye, huʼa nagegae.

⁷ Alagepa faigoko geʼaletiʼmo alino nanu aeno neʼapateya gemo aliniʼeʼa aeʼa hakalo huʼa hapa nepaiya vayaʼai apaiyamo aveleʼmo neʼaya vayaʼai apaiyamo alagepa laulagamo neʼagona apaiyamo haneʼnigeʼa aliniʼa neʼae. Apakaemo apakufamo alino katino apatesiya kavafeʼmo ava gemo afiteʼa apamogaga aisayafeʼmo aliniʼa neʼae. Apakaemo Saiyoni vayaʼaifeʼmo huʼapaeʼmo, Gotitapimoʼa kini vekamo maiʼnenoʼaeʼmo yagaiʼniye, huʼa nehae.

⁸ Ala kava neʼmoʼa Saiyoni taonifiʼmo kalavusi huʼa apateʼnaya vayaʼmo hatu maeno apateteno halate apavalelino esigeʼa taonifiʼmo yagaiʼnaya vayatapimogi alagepa huʼa apaketeʼapaeʼmo mukiʼamogimo magokepiʼmo lusi kava huʼa apamogaga aiteʼa alopa gefatiʼmo hugae.

⁹ Yulusalemu noʼatufa kote vayane, huno, mukiʼamogitapamo lapamogaga aitetapa magokepiʼmo alopa gefatiʼmo yokemo hiyo. Ala kava neʼmoʼa eno vayaʼamo apaipamo alino falu huno apateʼniyaʼmofeʼmae. Agaemo Yulusalemu vayaʼmo miya faino hatu maeno apateʼniye.

¹⁰ Ala kava neʼmoʼa muki alu nofi vayaʼe alu nofi vayaʼmogi apaulagaleʼeʼmo aote lokiyaʼamo alino apave liʼniye. Gotitimoʼmo lagufamo alino katino latesigeʼa muki ma mopafi vayaʼmogimo agegae.

¹¹ Ataleta viyo. Ataleta viyo. Oʼaniʼya faiʼniya yateʼmo ame oʼalitapa ani taonimo folagapatiʼmo ataletapa viyo. Ala kava neʼmo aliʼyaʼamo neʼaliya vayaʼmogitapae, huʼna, yaveyave vayaʼmo maiyo.

¹² Hogoteta Isipi kotegatiʼmo malage hutapa lapaune heʼnayaʼmonanafa ani afinaʼmo lapaune osegae. Ala kava neʼmoʼa lapakaeteʼmo uno hogotege Isaleli vayaʼmogita Gotitimoʼmo lapakame huno eteno yagaino lapatege hugiye.

Ala kava neʼmo aliʼyaʼamo neʼaliya vekamoʼmo kana yaʼmo aliteno ala agiʼamo aligiye, huno huʼniya gemae

¹³ Ala kava neʼmoʼa ina gemo hunoʼaeʼmo, Ageyo, huno, aliʼyaʼnimo neʼaliya vekamoʼmo alagepa huno afiteno ageʼnenoʼaeʼmo aliʼyaʼamo neʼalisigeno alagi afole aigiye. Vayaʼmogimo ala agiʼamo amiteʼapaeʼmo aliʼa asaga huliʼa anagamo uʼa haisageno hogote vekamo maigiye.

¹⁴ Vayaʼmogimo agaemo amagiʼa aliʼa hosu huʼa ateʼnageʼapaeʼmo agufaʼaʼe augosaʼaʼeʼmo alagi hosu apaulagamo ageteʼa hapau aiʼnae. Amagiʼnayaʼmofeʼmo ageteʼa agaefeʼmo mago vayane, huʼa oʼageʼnae. Amagiʼapaeʼmo agufaʼaʼe augosaʼaʼeʼmo alagi aliʼa hosu huʼa ateʼnae.

¹⁵ Ani kavatetiʼmo agaemo asole nofi vayaʼaiteʼmo aino fuli fuli huno hosu kavaʼapimo aeno kalo paeno atalegaiye. Kini vayaʼmogimo oʼafiʼnaya gemo afige hapa opaiʼnaya gemo afiteʼapaeʼmo apakesa afifi huge huʼa maigayaʼmofeʼmo lusi kava huʼa agaefeʼmo hapau aiteʼapaeʼmo ge osugae.