Aiyeya 51 - The Keyagana NT and 25 OT books

Ala kava neʼmoʼa Saiyoni taonifi vayaʼmogi apaipamo alino falu huno neʼapateya gemae

¹ Ala kava neʼmoʼa ina gemo hunoʼaeʼmo, Fatago kavaʼmo akame nehaya vayaʼmogitapae, huʼna, geʼnimo afiyo. Ala kava neʼmo agesayafeʼmo kahauya hutapa neʼmaiya vayane, huʼna, vayaʼmogi alopa yafapatiʼmo aiseʼamo amagiʼa nakupaeʼa aliniʼa ete ete nehaya kava huʼna alopa yafapatiʼmo lapavaleliʼna eʼnova yafafeʼmo lapakesamo afiyo. Ina kava huʼa vayaʼmogimo kelifatiʼmo mopamo kafiʼa aliniʼa eʼnaya kava huʼna mopafatiʼmo kafiʼna lapavaleliʼna eʼnova mopaeʼmo lapakesamo afiyo.

² Lapakaemo afotapimo Emalehamuʼe alino lapateʼniya a kanomo Selaʼefeʼmo lapakesamo afiyo. Nagaemo Emalehamuʼamo lekana paiʼna ateteʼna agaefekeʼmo keya aeʼna ge huteʼna huʼna auleʼna ateteʼnaeʼmo asole kaginago vayaʼmo maigae, huʼna ha paiʼnogeʼa afole aiʼnae.

³ Ala kava neʼmoʼnamo Saiyoni taonifiʼmo maiʼnaya vayaʼmo aliʼna yuna heʼna apategauve. No atufaʼageʼmo ageteʼnaeʼmo nahau huʼna apategauve. Agaemo kaʼme koʼapimo Iteni kokana huʼna aliʼna ha maleʼna ategauve. Kalukalusopa koʼmo Ala kava neʼmo hoyaʼagana huʼna aliʼna ha maleʼna ategauve. Apakaemo Saiyoni taonifiʼmo apamogaga aige Gotifeʼmo haoke hege yokemo huge hugae.

⁴ Vayaʼnimogitapae, huʼna, Geʼnimo afiyo. Yagaiʼna lapateʼnova vayaʼmo magoke nofi vayaʼnimogitapae, huʼna, geʼnimo lapaketafo hutapa afiyo. Nagaemo navayafatiʼmo keʼaepa gemo hapa paiteʼna fatago kavatetiʼmo yagaiʼna apatesuva kavaʼnimoʼmo muki nofi vayaʼmogi ha le yaʼapigana huno hanesiyafeʼmo hu malegauve.

⁵ Fatago kavaʼnilefeʼmo ava gemo muki nofi vayaʼmogi hapaopaleʼmo aino atagu faegaiye. Nagaetegatiʼmo lokiyaʼnimo uʼniyanageʼna vayaʼmogi apakufamo aliʼna katiʼna apategauve. Nagaemo ani lokiyaʼniletiʼmo muki vayaʼamo agoti huʼna apategauve. Afagi kotega maiʼnaya vayaʼmogimo nagava maiʼneʼa lokiya kavaʼnilefeʼmo aliʼa amufa amigae.

⁶ Kokuʼnaʼmo halinagana huno alagi hano hisigeʼa oʼagegayaʼmofeʼmo lapakaemo anaga kokuʼnategamo alita maku hutapa ageyo. Ma mopamo kukena yakana huno atafa hegaiyaʼmofeʼmo lapakaemo afelaga mopafiʼmo aulu heyo. Muki ma mopafi vayaʼmo ani kava huʼa faligayaʼmonanafa nagaemo hanege hanege huno hanesiya fatago kavaʼniletiʼmo vayaʼnimo alagi apakufamo aliʼna katiʼna apatesugeʼa muki afinaʼmo maige maige huʼa maigae. Maisageʼa vayaʼmogi fatago kavaʼnimo aliʼa hano huʼa oʼatalegae.

⁷ Fatago kavaʼnimo alagepa hutapa ageteta keʼaepa geʼnimo lapaipafiʼmo haneʼnisiya vayaʼmogitapae, huʼna, geʼnimo afiyo. Vayaʼmogi lapakaetegamo hosu gemo hisageno lapavagage hisiyafeʼmo koli osiyo. Apakaemo huʼa faipa huʼa lapatesayafeʼmo lapamoʼya oʼaiyo.

⁸ Kafamoʼmo kukena yaʼmo nehatagaiya kava huʼa apakaemo aliʼa hano huʼa apatalegae. Aliʼa hano huʼa apatalegayaʼmonanafa fatago kavaʼnimoʼa hano osuno muki afinaʼmo hanege hanege huno hanegaiye. Apakufamo aliʼna katiʼna neʼapatova vayaʼmogi muki afinaʼmo maige maige huʼa maigae.

⁹ Aiyeyaʼa hunoʼaeʼmo, Ala kava nene, huʼna, Aupatiʼmo hauneyo, hauneyo. Akeyaʼvilagamo huʼnana agufa kavaʼmo huka lokiyakaletiʼmo laha mao. Kagaemo akeyaʼvilagamo lokiyakaletiʼmo Isipi vayaʼmo hatagauʼnana vekamo maiʼnane.

¹⁰ Kagaikageʼmo solovala aniʼmo alika laneʼnanageno miya faika hatu maeka apateʼnana vayaʼmo aniʼmo lakaeʼa visaya kaʼmo afole aiʼniye.

¹¹ Ina kava huʼa Ala kava neʼmoʼa miya faino hatu maeno apateʼniya vayaʼmogimo aiʼa atagi neʼa yokemo nehuʼapaeʼmo Saiyoni taonifiʼmo egae. Muki afinaʼmo apamogaga aige aige huʼa maigae. Apakaemo magoʼe huʼa kana yaʼmo oʼalige yulagefa oʼaige hugayaʼmonanafa alagepa huʼa maige maige huʼa maigae.

¹² Gotiʼa hunoʼaeʼmo, Nagaiʼnigeʼmo lapaipamo aliʼna falu huʼna lapategauve. Ina lagitapamo maiʼnetapaeʼmo falisiya vekaeʼmo koli huge kahaugana huʼa malage huʼa hano hisaya vayaʼaifeʼmo koli huge nehae.

¹³ Lapakaemo alo huʼna lapateʼnova Ala kava neʼmoʼnaeʼmo lapake kaniʼniye. Nagaemo kokuʼnaʼmo aliʼna api aiʼna yatala huge mopamo alo huteʼna aepaʼamo aliʼna lokiya vaiʼna atege huʼnove. Hanagekeyaʼmo nelapamiya vayaʼmogimo aliʼa hano huʼa lapatalesayafeʼmo alo huʼa maiʼneʼa apaipamo leʼa nelapataya kavafeʼmo muki afinaʼaeʼmo koli huʼnae. Koli huʼnayaʼmonanafa apaipamo leʼa nelapataya vayamo hemenimo haiyategamo maiʼnae.

¹⁴ Kalavusi huʼa apateteʼa apavaleliʼa uʼnaya vayaʼmo malage huʼa hatu maeʼa apatesageʼa kalavusifiʼmo ofaliʼa maiʼnaya vayaʼmo hatu maeʼa apatesayafeʼmo koli huʼa apakava maiʼnayaʼmonanafa kalavusifiʼmo ofaligae. Neʼyaʼapimo hano osugiyaʼmofeʼmo afaʼa maigae.

¹⁵ Nagaemo Ala kava neʼmo Gotitapimoʼnamo solovala aniteʼmo ame neʼalugenoʼaeʼmo alopa siʼmo afole aiteno alopa agemo aiteno avamusa gemoʼmo nehiye. Nagaemo nagiʼnimo haneʼniyana asole vayaʼaiteʼmo yagaiʼna neʼapatova Ala kava nene.

¹⁶ Nagaemo kagaemo saufa kokuʼnaʼe saufa mopaʼeʼmo alo huteka Saiyoni vayaʼaifeʼmo hukaeʼmo, lapakaemo vayaʼnimo maiʼnae, huka hapa paisanafeʼmo geʼnimo kavayafiʼmo maleteʼna nagaemo kagufaleʼmo naya auneʼaletiʼmo aiʼna ati kaeʼna kateʼnove, huno ha paiʼniye.

Ala kava neʼmoʼa aipamo leʼniya kavaʼmo atalegaiye, huno huʼniya gemae

¹⁷ Ha paiʼnigeno ina gemo hunoʼaeʼmo, O Yulusalemu vayane, huno, lapaupatiʼmo he tiyo, he tiyo. He titapa lokiya vaiyo. Ala kava neʼmoʼa aipamo neleya kavaʼmo magoke kapufatiʼmo nofi alagafati aniʼmo neteʼa negi nagi nehaya anikana huno lapamiʼnigetapa alagi netetapa negi nagi hutetapa atete huʼnae.

¹⁸ Yulusalemu taonimoʼmo Isaleli vayaʼmo itaʼapimogana huno asole mafaʼnemo alino apateʼniyaʼmonanafa ani mafaʼne anagapatiʼmo magoke ve mafaʼnemoʼmo kaʼmo alino ho huno ateteno ayateʼmo alinino visiyafeʼmo oʼmaiʼniye. Agaeteʼmo asole yagaino neʼapateya mafaʼne anagapatiʼmo mago ha maesiya mafaʼneʼamo oʼmaiʼniye.

¹⁹ Yulusalemu taonieʼmo ha painoʼaeʼmo, Kagaemo lole alopa hanageke yaʼmo aliʼnananageno ina laʼmo hau huno kategaiye. Kame vayaʼmogimo eʼa vayakaʼeʼmo kamemo huteʼa muki yaʼmo aliʼa hosu huʼa ataleʼnae. Lusi kafu hu kavaʼmo kagae mafaʼne anagaʼaiteʼmo afole aiʼnigeʼa hosu kava huʼa maige falige huʼnae. Nagaemo ina latetiʼmo kaipamo aliʼna falu huʼna kategauve.

²⁰ Ve mafaʼne anagaʼmogimo apaumiʼmi huteʼa asagauʼa aiʼa muki taoni kaʼmo atupafiʼmo havaeliʼa uʼeʼa huʼnae. Apakaemo ina kava huʼa afela afumo umenimoʼmo atafauteno neʼmaiya agufa kavaʼmo huʼa maiʼnae. Ala kava neʼmo Gotikamoʼmo apakaefeʼmo gemo hapauteno aipamo leno neʼapateya kavaʼmoʼa apakaeteʼmo asagauno aiʼniye.

²¹ Yulusalemu vayaʼmogitapae, huʼna, lusi kana yaʼmo aliʼnaya vayane, huʼna, lapaoke hovanagi geʼnimo afiyo. Nofi alagafati aniʼmo netetapa negi nagi osuʼnayaʼmonanafa Ala kava neʼmokeʼmo aipamo leno nelapateya kavaʼmoʼa lapakaeteʼmo emineʼnigetapaeʼmo negi nagi agufa kavaʼmo nehae.

²² Ala kava neʼmo vayaʼamo hapau neʼvaiya Gotitapimoʼmo hunoʼaeʼmo, Ageyo, huʼna, Nagaemo ani naipamo leʼna nelapatova kapufi aniʼmo netetapa lusi kava hutapa negi nagi nehaya kapumo lapayapatiʼmo lapa faleʼna malegauve. Halate lapakaemo magoʼe hutapa oʼnegae.

²³ Oʼnegayaʼmonanafa ani kapumo aliʼna hanageke yaʼmo lapamiʼnaya vayaʼai apayapiʼmo malegauve. Apakaemo lapakaemo aliʼa mopafiʼmo havaeʼa lapateʼneʼa aeʼa lata paiteʼa mopalafateʼmo umenitata nehaya agufa kava huʼa lapagotofuleʼmo aeʼa umenitata huʼnae.