Aiyeya 50 - The Keyagana NT and 25 OT books

Goti aliyaʼamo neʼaliya vekaeʼmo huʼniya gemae

¹ Ala kava neʼmoʼa Isaleli vayaʼaifeʼmo ina gemo huno hapa painoʼaeʼmo, Lapakaemo lapakesamo afitapaeʼmo, Nagaemo vayaʼmogimo aʼapimo alagi hapafaiʼa neʼapatalaya agufa kavaʼmo huʼna itatapimoʼmo alagi ha faiʼna ataleʼnove, hutapa lapakesamo neʼafifiye. Ha faiʼna ataleʼnovesinana ha faiʼna ataleʼnova gemo haneʼniya apepamo haneʼniesine. Lapakaemo lapakesamo afitapaeʼmo, Nagaemo vayaʼmogimo mafaʼneʼapimo anonaʼapilefeʼmo kalavusi aliʼyaʼmo alisayafeʼmo maketi nehaya kavaʼmo huʼna lapakaemo lapataleʼna uʼna maketi nehaya kavaʼmo huʼnove, hutapa lapakesamo neʼafifiye. Haʼao, nagaemo mago vekalegamo anonaʼnimo ohaneʼniye. Lapakaitapimo hosu kavaʼmo huʼnayaʼmofeʼmo kame vayatapimogimo kalavusi huʼa lapateteʼa lapavaleliʼa uʼnae. Lapakaemo hosu kavatapilefeʼmo kalavusi aliʼyaʼmo alisayafeʼmo lapakaitapimo maketi nehaya agufa kavaʼmo huʼnae. Lapakaemo hosu kavaʼmo huʼnayaʼmofeʼmo itatapimoʼmo hafaiʼna ataleʼnove.

² Nagaemo lapakaemo lapa maesuvafeʼmo lapakaetegamo uʼnovana na kava higetapaeʼmo ge afitapa oʼnavaleʼnae. Nagaemo lapakaefeʼmo keya aeʼna ge huʼnovana na kava higetapaeʼmo geʼnileʼmo aetapa atagaina hutapa ge osuʼnae. Lokiyaʼnimo ohaneʼniyaʼmofeʼmo afaʼa miya faiʼna hatu maeʼna olapategaufiye. Hosu yategatiʼmo lapavaleliʼna visuva himamuʼnimo ohaneʼnifiye. Nagaemo ge nehugenoʼaeʼmo solovala aniʼmo alagi nelane. Nagaemo ge nehugenoʼaeʼmo alopa aniʼmoʼa kahaepa koʼmo alino hamaleʼnigeno noyame anagaʼmo faliʼnagenoʼaeʼmo atu neʼaiye.

³ Nagaemo muki kokuʼnaʼmo kukenamo vaiʼna ategekana huʼna anupa yaʼmo aliʼna afole aiʼna neʼatove. Kogu aʼnemogi neʼvaiya agufa kukenagana huʼna vaiʼna neʼatove.

⁴ Ala kava neʼmo Gotiʼa nagaemo alagaʼmo nehapaeya vayaʼaifeʼmo hapa maesiya gemo hapa paisuvafeʼmo sukulu nehaya vayaʼmogi apavayagana agufa navayamo namiʼniye. Agaemo muki nateʼaʼe nateʼaʼeʼmo naupatiʼmo alino he tino neʼnate. Alagepa huʼa sukulu huʼnaya vayaʼmogimo alagepa huʼa afiʼnaya kava huʼna afisuvafeʼmo nagesamo alino halo neʼaiye.

^5-6 Ala kava neʼmo Gotiʼa geʼamo afisuvafeʼmo nagesamo alino halo aiʼnigeʼnaeʼmo geʼamo amagiʼna oʼataleʼna aliʼyaʼaletiʼmo ataleʼna aiʼna afe leʼna oʼuʼnove. Mago vayaʼmogimo neʼnamagigeʼnaeʼmo namagisayafeʼmo nakameʼyamo apamige navenanapa nayokaʼmo aliʼa faige apaviʼnamo heʼa natege huʼnageʼnaeʼmo navagage hisiyafeʼmo naugosamo aliʼna fala okiʼnove.

⁷ Ala kava neʼmo Gotiʼa maigiyaʼmofeʼmo aeʼa oʼnagasesageno ala nagiʼnimo afaʼa hanegaiye. Hanegaiyaʼmofeʼmo naipamo aliʼna lokiya vaiʼna ateʼnove. Ago afiʼnovana navagage osugiye.

⁸ Agaemo agotileʼmo nahaopaleʼmo maiʼneno. Naulagaleʼmo fatago vekamo maiʼnane, huno nehiya vekamo maiʼniye. Ina laʼmo agoti huno nategaiye. Agotileʼmo magokepiʼmo afaʼa he tiguʼae. Ina laʼmo kameʼnimo maiʼniye. Nahaopaleʼmo afaʼa egaiye.

⁹ Lama gemo huʼnaeʼmo, Ala kava neʼmo Gotiʼa naha maegaiye. Ina laʼmo agoti huno natetenoʼaeʼmo, Hosu vekamo maiʼnane, huno hugiye. Agoti huʼa natesaya vayaʼmo alagi hano hugae. Kafamoʼmo hatagauʼnisiya kukena yaʼmoʼa atalagauno hano hisiya agufa kavaʼmo huʼa hano hugae.

¹⁰ Lapakaepatiʼmo ina laʼmo Ala kava nefeʼmo koli nehiye. Ina laʼmo aliʼyaʼamo neʼaliya vekamo geʼamo neʼafiye. Ina laʼmo lusi hani huʼniya yapiʼmo umenitata nehiye. Agaemo Ala kava neʼmo agiʼalefeʼmo alino amufa aminoʼaeʼmo naha maegaiye, huno ge hugiye.

¹¹ Hugiyaʼmonanafa muki vayaʼmo atamo nekaya vayaʼmogitapae, huʼna, hanipiʼmo kaʼmo agesayafeʼmo kani aenagenoʼaeʼmo leno apalo atino lelino uneno huno aino vego huno neʼapate. Lapakaemo kae maleʼnaya ataleʼmo kaegenoʼao aeno ha lesiyategamo umenitata hiyo. Uta havaesageʼnaeʼmo Ala kava neʼmoʼnamo nayapatiʼmo alopa lapakafumo kisiya yaʼmo lapamiguve.