Aiyeya 5 - The Keyagana NT and 25 OT books

Nofi hoyaeʼmo yokemo huʼniya gemae

¹ Hemenimo nateʼnegeʼnao lusi kava huno nahau nayamopafiʼmo nahauʼniya vekaeʼmo yokemo huguve. Lusi kava huno nahau nayamopafiʼmo nahauʼniya vekamo nofi hoyaʼaeʼmo yokemo huguve. Nahau nayamopafiʼmo nahauʼniya vekamoʼmo aise aveleʼmo alagepa lanitani mopafiʼmo nofi hoyamo vai maleʼniye.

² Agaemo aiʼyu aiteno muki yafaʼmo alino ataleteno alagepa nofi akopamo kali maleʼniye. Hoya folagapiʼmo yatala noʼmo hoyaleʼmo yagaisaya vayaʼmogi noʼmo ki maleʼniye. Agaemo nofi alagamo aeʼa lata paisaya kelimo kafi maleʼniye. Huʼniyaʼmofeʼmo agesamo afinoʼaeʼmo, Alagepa nofi alagamo aegaiye, huno agesamo afiʼniyaʼmonanafa kahaufilaga hosu nofiʼmoʼa afaʼa neʼaeya agufa nofi alagamo aeʼniye.

³ Hosu nofi alagamo aeʼniyaʼmofeʼmo O Yulusalemu kote maiʼnaya vayaʼmogitapaʼe Yuta vayaʼmogitapaʼene, huʼna, lahapao ke hovanagi, nagae kavaʼe hoyaʼnifatiʼmo afole aiʼniya kavaʼeʼmo agoti hutapa alita fako hiyo.

⁴ Nagaemo magoʼe huʼna mago kavaʼmo hisuva kavaʼmo haneʼniyana nagaemo osuʼnofiye. Alagepa nofi alagamo aegaiye, huʼna nagesamo afiʼnovana na agufa kavaʼmo higenoʼaeʼmo kahaufilaga hosu nofiʼmoʼa afaʼa neʼaeya agufa nofi alagamo aeʼniye.

⁵ Lahapaoke hove. Hoyaʼnifiʼmo hisuva kavafeʼmo nagesamo afiʼnova kavafeʼmo lapa paiguvanagi afiyo. Nagaemo hoyaʼnileʼmo haneʼniya kegiʼyamo heʼna yakina ataleteʼna afaʼa ateʼnisugeno atamo lesigeʼa apaiyaletiʼmo aeʼa latapaigae.

⁶ Nagaemo hoyamo aliʼna hosu huʼna ataleteʼna afaʼa ategauve. Nagaemo nofiʼmo hatagauʼna aliʼna alagepa osuge aiʼyumo oʼaige huguve. Atesugeno kahaumo aesigeno aufe kahaumoʼmo ani hoyamo aeno ati kaegaiye. Nagaemo ani hoyafiʼmo koʼmo oʼaisiyafeʼmo haʼao, huʼna huguve.

⁷ Isaleli vayaʼmo asole vayaʼaiteʼmo yagaino neʼapateya Ala kava neʼmo nofi hoyaʼagana huʼa maiʼnae. Yuta vayaʼmo Ala kava neʼmoʼa amuse nehiya nofigana huʼa maiʼnae. Agaemo vayaʼaitegamo fatago kavaʼmo hisayafeʼmo apakava maiʼniyaʼmonanafa vayaʼaitegamo hosu kavakeʼmo huʼa kana yaʼmo aliʼa apamiʼnae. Apakaemo alagepa huʼa aliʼa fako hisayafeʼmo apakava maiʼniyaʼmonanafa hosu kavaʼmo huʼnageʼapaeʼmo laha mao, huʼa keya aeʼa ge nehae.

Hosu kavaʼmo nehaya vayaʼmo hosu yaʼmo aligae, huno huʼniya gemae

⁸ Lapakaemo lapaopaleʼmo maiʼnaya vayaʼmo hapafaita apataletetapa noʼapimo alige mopamo faitapa katita alige hutapa maiʼnae. Lapakaemo muki mopamo alisageʼapaeʼmo alu vayaʼmo maisaya yaʼmo ohaneʼniyaʼmofeʼmo mopamo folagapiʼmo lapakaitapigeʼmo neʼmaiya vayanagi ehetapiye.

⁹ Nagaemo afiʼnogeno Ala kava neʼmoʼa asole vayaʼaiteʼmo yagaino neʼapateya vekamoʼmo ina ge huno huʼniye, Lama gemo huʼnaeʼmo, Asole noʼmo afaʼa hanesigeʼa vayaʼmo oʼmaigae. Alopa nonagi kanale nonagi huno afaʼa hanegaiye.

¹⁰ Apakaemo alopa nofi hoyamo aliʼa vai malegayana asole nofi alagamo oʼaesigeʼa aise nofi alagafati aniʼatomo alo hugae. Apakaemo teniʼa viti avina kuʼmo fai malegayana neʼyaʼamo magoke kuʼatomo aliʼa aigae.

¹¹ Lokiya aniʼmo neteʼa negi nagi hisayafeʼmo gotilamiyapiʼmo he netiya vayaʼmogi lokiya aniʼmo neme neme neʼvisageno haniʼilaga folaguʼmo hugiyaʼmofeʼmo lusi kava huʼa kage kage hugae. Neme neme uʼa negi nagi hugae.

¹² Neʼyaʼmo yagita huʼapaeʼmo nofi alagafati aniʼmo neʼneʼapaeʼmo alu agufa gita amagige feliyopa huge yaveʼya amagige nehayaʼmonanafa Ala kava neʼmo aliʼyaʼamo neʼaliya kavafeʼmo apakesamo oʼafige nehiya kavafeʼmo apakesa afifi osuge nehae.

¹³ Nehayaʼmofeʼmo Ala kava neʼmoʼa hunoʼaeʼmo, vayaʼnimogi kavaʼnimo ageʼa aeto osuʼnayaʼmofeʼmo kame vayaʼapimogimo apavaleliʼuʼa alu kotegamo kalavusi huʼa apateʼnae. Ala apaki vayaʼamo lusi kava huno apaka teʼnigeʼa ve aʼnemo anifeʼmo nefaliye.

¹⁴ Ani hosu kavaʼmo huʼa maiʼnayaʼmofeʼmo apakaemo alino nakaisiyafeʼmo kanoluʼapimo alopa avayamo haneʼnigeno aka huteno alo huno maiʼniye. Apamogaga neʼaiya vayanagi hogote vayanagi muki afaʼa maiʼnaya vayaʼenagi huʼa kanolufiʼmo uʼa lamigae.

¹⁵ Mukiʼamogi afepilagamo uʼa lamigae. Ala kava neʼmoʼa muki vayaʼmo alino afepiʼmo apategaiye. Apakaiʼapimo aliʼa asaga huʼa neʼapataya vayaʼmo alino afepiʼmo apategaiye.

¹⁶ Alino afepiʼmo apategaiyaʼmonanafa asole vayaʼaiteʼmo yagaino neʼapateya Ala kava neʼmoʼa fatago kavaʼaletiʼmo ala agiʼamo aligiye. Aote Gotiʼa fatago kavaʼaletiʼmo naote Gotiʼnamo maiʼnove, huno alino apave ligiye.

¹⁷ Ani afinaʼmo aikeli sipisipi anagaʼmogi koʼaletiʼmo kahaumo negae. Alu kotega vayaʼmo eʼa kagemiyaʼapiʼe vayaʼmogi mopamo aliʼa hosu huʼa atalegae.

¹⁸ Apakaemo hosu kavaʼmo hisayafeʼmo nofitetiʼmo aeʼa avayu nehaya kava huʼa alu hosu alu hosu kavaʼapiletiʼmo apakaetegamo hosu kavaʼmo aeʼa avayu huliʼa neʼaya vayaʼmo lusi kana yaʼmo aligae. Vayaʼmogimo lokiya nofitetiʼmo talalamo aeʼa avayu huliʼa neʼvaya kava huʼa hosu kavaʼmo aeʼa avayu huliʼa neʼae.

¹⁹ Apakaemo ina gemo huʼapaeʼmo, Ategenoʼao aliʼyaʼamo agesunafeʼmo agaemo malage huno aliʼyaʼamo alino. Afaʼa agesunafeʼmo Isaleli vayaʼmogi aote Gotiʼapimoʼmo ategenoʼao hisiya kavafeʼmo aipa agesamo laulagaleʼmo afole aino.

²⁰ Hosu kavafeʼmo huʼapaeʼmo, alagepa kavane, huʼa huge alagepa kavafeʼmo huʼapaeʼmo, hosu kavane, huʼa huge ha le yafeʼmo huʼapaeʼmo, hani yane, huʼa huge haga nehiya yafeʼmo atu neheya yane, huʼa huge atu neheya yafeʼmo huʼapaeʼmo, haga nehiya yane, huʼa huge nehaya vayaʼmogimo alopa kana yaʼmo aliteʼapaeʼmo lusi kava huʼa kage kage hugae.

²¹ Apakaiʼapi apaulagaleʼmo apakeʼapaeʼmo, afiteta ageʼnona vayaʼmo maiʼnone, huʼa huge alagepa laipa lagesa afi yaʼmo haneʼnigeta alagepa kavaʼmo nehuna vayane, huʼa apakesamo afige nehaya vayaʼmogimo lusi kava huʼa kage kage hugae.

²² Nofi alagafati aniʼmo neʼnaya kavatefeʼmo lokiya vayane, huʼa ala agimo amiʼnaya vayaʼmogimo lusi kava huʼa kage kage hugae.

²³ Apakaemo agoti gemo afiteʼapaeʼmo kutulu monimo alisayafeʼmo hosu kavaʼmo huʼnaya vayaʼaifeʼmo, fatago vayane, huʼa nehae. Apakaemo fatago vayaʼmogimo hosu kavaʼmo huʼa agoti nehae.

²⁴ Hosu kavaʼmo nehayaʼmofeʼmo atamoʼmo vaiʼniya kahaufiʼmo malage huno leno hano huno neʼataleya kava huno hosu kavaʼmo apakaeteʼmo afole aigiye. Asole vayaʼaiteʼmo yagaino neʼapateya Ala kava neʼmo keʼaepa geʼamo oʼafiʼa apakameʼyamo amiteʼa Isaleli vayaʼmogi aote Gotiʼapimo geʼaeʼmo, afa gemo haneʼniye, huʼa huʼnayaʼmofeʼmo hapafuʼyaʼapimo ago kasalisigenoʼaeʼmo haitaʼapimo hali huno asagauno aigiye.

²⁵ Ani kavaʼmo huʼnayaʼmofeʼmo Ala kava neʼmoʼa vayaʼaeʼmo aipamo leno apateʼniye. Agaemo ayaʼmo alino asagauteno ago apamagiʼniye. Apamagiʼnigenoʼaeʼmo avemoʼmo kanage kanage huʼnigeʼapaeʼmo faliʼnaya vayaʼmogi apakufaʼamo taoni kateʼmo ina kava huno atupa yakana huno haneʼniye. Agaemo ani kavaʼmo huʼniyaʼmonanafa aipamo neleya kavaʼamo alino hano huno oʼataleʼniye. Apamagisiyafeʼmo ayaʼmo alino asagaunoʼageʼmo maiʼniye.

²⁶ Ala kava neʼmoʼa afagi kotegatiʼmo ami vayaʼmo eʼa vayaʼaʼeʼmo kamemo hisayafeʼmo kalahuʼmeʼmo alino asai maleteno foʼme hisigeʼa ma mopamo atupalegatiʼmo nagu nagu huʼa egae.

²⁷ Muki ani ami ati vayaʼmo lokiya vayaʼageʼmae. Magoke vekaʼapimoʼmo aiyafatiʼmo alaga haesigeno asagauno oʼaige aumiʼmi osuge ohavaege hugiye. Magoke vekamo mapaluʼamo aino hatu oʼmaegaiye. Magoke vekamo suʼamo oʼatalagaugiye.

²⁸ Keveʼapimoʼmo magoʼe huno akoʼya huʼnigeʼa hapaesayafeʼmo alo huʼa yagailiʼa egae. Hosiʼapimogi apaiya apayaʼmo apakinagomoʼmo lokiya yafakana huno hanege kame hisaya talalaʼapimoʼmo lusi kava huno nagu nagu huteno talala aiyaʼamoʼmo alino vego vego nehiya yasigana huno aino vego vego huge huʼniye.

²⁹ Laiyonimogimo kaekae nehaya kava huʼa ani ati vayaʼmogimo kaekae hugae. Apakaemo aikeli afumogi kaekae huteʼa hapaeʼa haniliʼa neʼvaya kava huʼa hapaeʼa aliniʼa visagenoʼaeʼmo mago vekamoʼmo apayapatiʼmo hapa ofalegaiye.

³⁰ Ani kavaʼmo afole aisiya afinaʼmo ati vayaʼmogi eʼa alopa solovala aniʼmoʼa aino holakau holakau huteno age neʼaiya kava huʼa alopa gefatiʼmo hugae. Ina kava huʼa asole asole ati vayaʼmo solovala anikana huʼa eʼa aeʼa apaka segae. Vayaʼmogimo mopamo aulu heʼa agesayana ani koʼmo hosuʼnisigeno hani huge vayaʼmo kana aliʼa hapau huge anupa hiyaʼmoʼa yegeleʼmo aino ati kaege hugiye.