Aiyeya 49 - The Keyagana NT and 25 OT books

Goti aliʼyaʼamo neʼaliya vekamoʼmo malaga alu nofi vayaʼmogi hale yaʼapimo maigiye, huno huʼniya gemae

¹ Lapakaemo solovala ani haigifiʼmo maiʼnaya vayaʼmogitapaʼe afagitegamo maiʼnaya vayaʼmogitapaʼeʼmo geʼnimo afiyo. Itanimoʼmo alino oʼnateʼniya afinaʼmo Ala kava neʼmoʼa lekana paino nateteno nagiʼnimo nateʼniye.

² Agaemo navayamo alino aluga alugaʼatiʼmo aveʼmo neʼneya naipegana huno hamaleno nategaiye. Agaemo nagaemo ayapiʼmo alino fala kino nateʼniye. Agaemo nagaemo akoʼya kevemo aino nateteno kevemo kuʼafiʼmo ku aino fala kino nateʼniye.

³ Agaemo naha painoʼaeʼmo, O Isaleliyo, huno, Kagaemo aliʼyaʼnimo neʼalina vekaʼnimo maiʼnane. Aliʼyaʼmo alisanageʼna ala nagiʼnimo aliguve.

⁴ Huno naha paiʼnigeʼnaeʼmo ina gemo huʼnaeʼmo, Aliyaʼmo aliʼnovaʼmonanafa nahaise vose huʼna aliʼnova kavaʼnimo afaʼa lageso huʼnigenoʼaeʼmo neʼyaʼamo afole oʼaiʼniye. Oʼaiʼniyaʼmonanafa Ala kava neʼmoʼa aliʼnova aliʼyaʼnimo ageʼniyanageno ani aliʼyatetiʼmo alagepa miyaʼnimo namigiye, huʼna huʼnove.

⁵ Ala kava neʼmoʼa aliʼyaʼamo aliteʼna Isaleli vayaʼmo apavaleliʼna esugeʼa agaetegamo aiʼa atagi neʼa esayafeʼmo itaʼnimo aipafiʼmo maiʼnova afinaʼmo alo huno nateʼniye. Nagaemo Ala kava neʼmo aulagaleʼmo ha le konali vekamo maisugeno agaiʼageʼmo lokiyaʼnimae.

⁶ Ala kava neʼmoʼa ina gemo huno naha painoʼaeʼmo, Kagaemo Yekopu nofi vayaʼmo alika he tika apatesanageʼa halate lokiya vaiʼa maige yagaiʼna apateʼnogeʼa afaʼa maiʼnaya Isaleli vayaʼmo alika alagepa huka apatesanageʼa halate alagepa huʼa maige hisayafeʼmo ani aise aliʼyaʼmo afaʼa alisanana kanale osugiye. Ani aliʼyaʼe magoʼe huʼna alu aliʼyaʼeʼmo kamiguve. Nagaemo ma mopafi muki haopalegamo maiʼnaya vayaʼmogi apakufamo alika katika apatesanafeʼmo ani malaga nofi vayaʼmogi ha le yaʼapigana huka maigane, huʼna aliʼna kateʼnove, huno huʼniye.

⁷ Ala kava neʼmoʼa Isaleli vayaʼmo miya faino hatu maeno neʼapateya aote Gotiʼapimoʼmo vayaʼmogimo alagi ohapauʼniya vekamo agae nofi vayaʼmogi alagi ohapauʼniya vekamo yagaiʼnaya vayamogi aliʼyaʼapimo neʼaliya vekaeʼmo ina gemo huno ha painoʼaeʼmo, Kini vayaʼmogimo kageteʼapaeʼmo kaulagaleʼmo he tigae. Ala vayaʼmogiʼeʼmo kagaefeʼmo mono hugae. Ala kava neʼmo Isaleli vayaʼmogi aote Gotiʼapimoʼmo aliʼyaʼamo oʼataleno fatago kavaʼmo nehiya Gotiʼa lekana paino kateʼniyaʼmofeʼmae.

⁸ Ala kava neʼmoʼa ina gemo hunoʼaeʼmo, Fiku hapa maeʼna apamisuva afinaʼmo gekamo afiʼnove. Apakufamo aliʼna katiʼna apatesuva afinaʼmo kaha maeʼnove. Nagaemo alagepa huʼna yagaiʼna kateteʼna kagaetetiʼmo vayaʼeʼmo kotalakemo hu maleteʼna ma mopamo aliʼna kanale huʼna atesugeʼa vayaʼnimogi kaʼme kotega mopamo aligae.

⁹ Kagaemo kalavusifiʼmo maiʼnaya vayaʼaifeʼmo afaʼa viyo, huka huge hanipiʼmo maiʼnaya vayaʼaifeʼmo lapakesayafeʼmo ha le yateʼmo eyo, huka huge hisanafeʼmo ani kavaʼmo huguve. Apakaemo visaya kategaʼe kahau kotega aveleʼeʼmo sipisipigana huʼa alagepa huʼa neʼyaʼmo negae.

¹⁰ Hau huno neʼapateya vekamoʼmo alagepa huno yagaino apateteno apavalelino visigeʼa kanale meti aniʼmo haneʼniyategamo sipisipi anagagana huʼa ugae. Apakaemo neʼyaʼe aniʼeʼmo kafu osisageno amuko yegemoʼe yasimoʼeʼmo apakufaleʼmo oʼapalegaiye.

¹¹ Nagaemo alo hu maleʼnova avemo amagiʼna naku paeʼna aliʼna kanale huʼna kale kaʼmo anagamo aliʼna ha maleʼna ategauve.

¹² Inagi lama gemo huʼnaeʼmo, Vayaʼnimo afagi kotegatiʼmo ege lamaga haopalegatiʼmo ege yegemo uno lamino nefaleya haopalegati ege Saina kotegatiʼmo ege hugae.

¹³ Ala kava neʼmoʼa agaiʼa vayaʼamogi apaipamo alino falu huno apateʼniye. Apakaemo lusi kava huʼa asole kana yaʼmo aliʼnayaʼmonanafa hau huno apategaiyaʼmofeʼmo kokuʼnamogae, huʼna, yokemo huvo. Mopamogae, huʼna kamogaga aiyo. Avemogitapae, huʼna, lapamogaga aita yokemo hiyo.

Gotiʼa Saiyoni vayaʼaifeʼmo agekanino oʼapatalegaiye, huno huʼniya gemae

¹⁴ Ala kava neʼmoʼa hapa maeʼniyaʼmonanafa Saiyoni a kanomoʼmo ina gemo hunoʼaeʼmo, Ala kava neʼmo nataleno uʼniye. Ala kava nenimoʼa nagaefeʼmo ago agekaniʼniye, huno huʼniye.

¹⁵ Mago a kanomoʼmo nute mafaʼneʼaeʼmo age kanigifiye. Alino ateʼniya mafaneʼaeʼmo hau ayamopafiʼmo ohaugifiye. He, afaʼa apake kanigiyaʼmonanafa nagaemo lapakaefeʼmo nage okanigiye.

¹⁶ Ageyo, huʼna, Nagaemo kagikamo lole nayatalapiʼmo avoʼmo kae maleʼnove. Muki afinaʼmo nagaemo yafa kegiʼyakalefeʼmo naipafiʼmo ageteʼnaeʼmo kagaefeʼmo nagesamo neʼafuve.

¹⁷ Ve mafaʼne anagakamo malage huʼa eʼa taoniʼapimo halate kigae. Yulusalemu taonimo heʼa halagape vaiʼa ataleʼnaya vayaʼmo kataleʼa ugae.

¹⁸ Alika maku huka maiʼneka aulu heka agelika ugeka huka apako. Muki ve mafaʼne anagakamo magokepi aliʼa anupa huteʼa kagaetegamo neʼae. Ala kava neʼmoʼa agoʼyamo ataletenoʼaeʼmo, Alagi lama gemo huʼnaeʼmo, A kanomoʼmo veleʼmo maisiyafeʼmo kanale konalimo aliteno amogaga neʼaiya agufa kava huka mafaʼne anagakamo apavaleka kamogaga aigane.

¹⁹ Mafaʼne anagakamo eʼa kilipaesageno noʼatufa kaʼme koteʼmo aliʼa hosu huʼa ateʼnaya mopakamoʼmo kanale huno oʼapategaiye. Mopamo aliʼa hosu huʼa ateʼnaya vayaʼmogi mopakaleʼmo afaʼa oʼmaiʼa afagitegamo maigae.

²⁰ Afela heʼnaya mafaʼne anagakamo apaimuʼyaleʼmo eʼa maisaya mafaʼne anagakamogi eʼa kaha paiʼapaeʼmo. Mani mopamo aisetoʼageʼmo haneʼniye. Maita kali opaisuna agufa mopamo lamiyo, hutapa hugae.

²¹ Ani gemo hisagekaeʼmo kaipafiʼmo hukaeʼmo, Mafaʼne anagaʼnimo afela heʼnayanageʼna magoʼe huʼna afaʼa aliʼna oʼapategauve. Kame vayaʼmogimo kalavusi huʼa nateteʼa navaleliʼa uʼnae. Ina laʼmo nagaetefeʼmo ani mafaʼne anagaʼmo alino apateʼniye. Nagaiʼnimo magokeʼageʼmo maiʼnovaʼmonanafa ani mafaʼne anagaʼmo haiya haopalegatiʼmo eʼnae, huka hugane.

²² Ala kava neʼmo Gotiʼa hunoʼaeʼmo, Ageyo, huʼna, Nagoʼyamo ataleteʼnaeʼmo muki nofi vayaʼaifeʼmo alagi lama gemo huguve, huʼna hapa paiteʼna apakaemo esayafeʼmo kalahuʼmeʼmo aliʼna asai malesugeʼa ageteʼa kagae mafaʼne anagaʼmo apavaleliʼa egae. Apakaemo ve mafaʼne anagakamo hapaifiʼyaleʼmo apavalege a mafaʼne anagakamo apakiʼnaleʼmo apavalege huliʼa egae.

²³ Kini vayaʼmogiʼe kuvini aʼnemogiʼeʼmo itaʼapi afoʼapimogigana huʼa maiʼneʼa kagae mafaʼne anagaʼaiteʼmo yagaiʼa apategae. Apakaemo kagaetegamo eʼa kaiyafiʼmo mopafiʼmo ape huʼa apaleʼyamo faiʼneʼa ala kagikamo kamigae. Nagaemo hapa maesuvafeʼmo nagava neʼmaiya vayaʼmo afaʼa nagava maige apavagage huge huʼa oʼmaigayaʼmofeʼmo kagaemo nagaefekeʼmo Ala kava neʼmo maiʼniye, huka nagegane.

²⁴ Lokiya vayaʼmogi kame huteʼa mago yaʼmo alige vayaʼmo apavalege huʼnisayaʼmoʼmo magoʼamogi apayapatiʼmo alisafiye. Lokiya apaipa vayaʼmogi apayapatiʼmo kalavusi huʼa apateʼnisaya vayaʼmo hatu maeʼa apatesafiye, huʼa apafi geʼnae.

²⁵ Apafi geʼnayaʼmonanafa Ala kava neʼmoʼa hunoʼaeʼmo, Nagaemo lokiya vayaʼmogi kalavusi huʼa apateʼnaya vayaʼmogi apayapatiʼmo apavalegauve. Nagaemo lapakaeʼeʼmo kamemo huʼnaya vayaʼeʼmo kamemo huguvaʼmofeʼmo lokiya apaipa vayaʼmogi apayapatiʼmo mafaʼne anagakamo apavaleʼna apakufamo aliʼna katiʼna apategauve.

²⁶ Nagaemo kana yaʼmo nelapamiya vayaʼmo vayaʼapimogimo apakufamo nesayafeʼmo apavaleʼna apamiguve. Apakaemo apakaiʼapi vayaʼapiʼeʼmo kamemo huteʼa apakaiʼapi kolaʼmo neteʼa negi nagi huʼa maigae. Muki ma mopafi vayaʼmogimo ani nagaemo hisuva kavaʼmo ageteʼapaeʼmo Ala kava neʼmoʼa apakufamo alino katino neʼapateya vekamoʼmo miya faino hatu maeno apateʼniya vekamo maiʼniye. Agaemo Yekopu alagi lokiya vekaʼamo maiʼniye, huʼa hugae.