Aiyeya 45 - The Keyagana NT and 25 OT books

Ala kava neʼmoʼa Sailasiʼmo aliʼyaʼamo alisiyafeʼmo uvelimo lakino ateʼniya gemae

¹ Ala kava neʼmoʼa uvelimo lakino ateʼniya vekamo Sailasifeʼmo ina gemo huno ha paiʼniye. Ala kava neʼmoʼa Sailasiʼmo alu nofi vayaʼeʼmo kamemo huno aeno apakasege kini vayaʼmogi lokiyaʼapimo alino hano huno atalege hisiyafeʼmo lamaga ayatetiʼmo atafauʼniye. Ala kava neʼmoʼa taonile kegiʼyale lokiya kitamo okisayafeʼmo yaki maleʼnisigeno Sailasiʼmo uno haino taonimo aligiye.

² Ala kava neʼmoʼa ha painoʼaeʼmo, Nagaemo kagaeteʼmo uʼna hogoteteʼna ave koʼmo amagiʼna anaku paeʼna aliʼna otu koʼmo hamaleʼna ategauve. Nagaemo kegiʼyale alopa haesa aeni kitamo amagiʼna aliʼna lo aeʼna ataleteʼna kitale aeniʼmo vasagaliʼna atalegauve.

³ Nagaemo kagaemo nagaiʼnigeʼmo Ala kava neʼmo maiʼnove, huka nagesanafeʼmo ani vayaʼmogimo moniʼe alopa moniletiʼmo miya nefaiya alagepa yaʼapiʼeʼmo oʼagesaya agufa hanipiʼmo fala ki maleʼnayanageʼna aliʼna kamisugekaeʼmo kagaemo agetekaeʼmo Isaleli vayaʼmogi Gotiʼapimokeʼmo nagaefeʼmo nagi aeno ge huʼniye, huka agegane.

⁴ Nagaemo aliʼyaʼnimo neʼaliya vayaʼmo Yekopuʼmo lekana paiʼna ateʼnova aginagomo alu agiʼamo Isaleli aginago vayaʼamo hapa maesuvafeʼmo kagimo aeteʼna alopa napamo kamiʼnove. Kagaemo oʼnageʼnanaʼmonanafa nagaemo ala kagikamo kamiguve.

⁵ Nagaemo Ala kava neʼmo maiʼnove. Magoʼe huno alu gotiʼa oʼmaiʼnifa nagaiʼnigeʼmo maiʼnove. Kagaemo oʼnageʼnanaʼmonanafa aliʼyaʼnimo alisanafeʼmo kukena yaʼmo aliʼna vaiʼna kategauve.

⁶ Muki ma mopafi vayaʼmo yegemo haine neʼeya kotega vayaʼmogiʼe yegemo uno lamino nefaleya kotegamo maiʼnaya vayaʼmogiʼeʼmo nageʼa aeto hisayafeʼmo ani kavaʼmo huguve. Nagaemo magokeʼageʼmo Ala kava neʼmo maiʼnogeno magoʼe huno alu gotiʼmo oʼmaiʼniye, huʼa nagegae.

⁷ Nagaekeʼmo ge nehugenoʼaekeʼmo aeno ha leteno hani hugiye. Nagaekeʼmo magokepiʼmo alagepa huʼa maisaya afinaʼmo alo huge alopa kana yaʼmo alisaya afinaʼmo alo huge nehuve. Nagaemo muki ani kavaʼmo nehugenoʼaeʼmo afole neʼaiye.

⁸ Gotiʼa hunoʼaeʼmo, Kokuʼnaʼmogae, huno, Anagatiʼmo koʼmo aiyo. Alopa koʼmo aigekana huno kokuʼnapatiʼmo fatago kavaʼmo lamigiye. Ma mopamo aika akaka vaegenoʼao mopafatiʼmo apakufamo alino katino apatesiya kavaʼe fatago kavaʼapiʼeʼmo magokepatiʼmo hageno. Nagaemo Ala kava neʼapimoʼnamo ani kavaʼmo alo huʼnove.

⁹ Mago vekamoʼmo alo huno ateʼniya vekaeʼmo ge nehaisiyaʼmoʼmo ani vekaleʼmo kage kage kavaʼmo afole aigiye.

¹⁰ Mago mafaʼnemoʼmo itaʼamofeʼmofi afoʼamofeʼmofi hunoʼaeʼmo, Na agufa kavaʼmo higeka alika nateʼnanageʼnaeʼmo mani kavaʼmo huʼna maiʼnove, huno nehisiyana kana yaʼmo alitenoʼaeʼmo kage kage hugiye.

¹¹ Ala kava neʼmo Isaleli vayaʼmogi aote Gotiʼa alo huno apateʼniya Gotiʼapimoʼmo ina gemo hunoʼaeʼmo, Lapakaemo ve mafaʼneʼnilegamo afole aisiya kavafeʼmo ge hutapa nafi geyo. Nafigegayaʼmonanafa alo huʼna apateʼnova mafaʼneʼnilegamo hisuva kavafeʼmo huvo, hutapa naha nepaifiye.

¹² Nagaekeʼmo ma mopamo alo huteʼna ani mopaleʼmo maisaya vayaʼeʼmo alo huʼna apateʼnove. Nagaemo nayatetiʼmo kokuʼnaʼmo aliʼna api aiʼna aliʼna yatala huteʼna kokuʼnate yaʼmo yegelenagi kailenagi kanefi anagatenagi huʼna yagaiʼna apateʼnove.

¹³ Nagaemo kini vekamo Sailasiʼmo fatago kavaʼniletiʼmo aliʼna he tiʼna ateʼnovanageʼna muki visiya kaʼmo aliʼna kanale huʼna valiʼna ategauve. Agaemo halate nagae taonimo kige vayaʼnimo afaʼa visayafeʼmo hatu maeno apatege hisiyafeʼmo miyaʼamo oʼaligiye. Asole vayaʼaiteʼmo yagaiʼna apateʼnova Ala kava neʼmoʼnamo mani gemo alagi huve.

Ala kava neʼmo magokeʼamogeʼmo vayaʼai apakufamo alino katino neʼapateya vekaeʼmo ava gemo huʼniya gemae

¹⁴ Ala kava neʼmoʼa ina gemo hunoʼaeʼmo, Isipi vayaʼmogi aliʼyaʼapilefeʼmo moniʼapimo alige Kusi vayaʼmogi kagemi yaʼapimo alige hutapa maisageʼa Sepiyani kotega yatala vayaʼmogimo aliʼyatapimo aligae. Apakaemo seliletiʼmo kiʼa apatesageʼa lapakame huʼa eʼa apaleʼyamo faiʼneʼapaeʼmo, Lama gemo hutaeʼmo, Gotiʼa lapakaepiʼmo maiʼniye. Agaemo magokeʼageʼmo alagi Gotiʼa maiʼnigeno magoʼe huno alu gotiʼmo oʼmaiʼniye, huʼa nunumuʼmo hugae.

¹⁵ O Isaleli vayaʼmogi Gotiʼapimogamo apakufamo alika katika neʼapatana Gotigae, huʼna, Lama gemo huʼnaeʼmo, Kagaikamo alika fala kika nekatane.

¹⁶ Aigofe gotigi apauneʼamo alo nehaya vayaʼmogimo hosu apakiʼapimo aliteʼa apavagage hugiye. Apakaemo mukiʼamogimo magokepiʼmo ikaika huʼa alu apakesa alu apakesamo afigae.

¹⁷ Afigayaʼmonanafa Ala kava neʼmoʼa Isaleli vayaʼmogi apakufamo alino katino apatesigeʼa alagepa huʼa maige maige huʼa maigae. Lapakaemo hosu lapakitapimo alige lapavagage huge hutapa oʼmaigafa muki afinaʼaeʼmo alagepa hutapa maige maige hutapa maigae.

¹⁸ Ala kava neʼmoʼa kokuʼnaʼe mopaʼeʼmo alo huʼniya Gotiʼa alino lokiya vaino ateʼniye. Vayaʼmo oʼmaisageno kaʼme koʼmo hanesiyafeʼmo alo osuʼnifa vayaʼmo ma mopafiʼmo maisayafeʼmo alo huʼniye. Agaemo hunoʼaeʼmo, Ala kava neʼmo magokeʼageʼmo maiʼnigeno magoʼe huno alu gotiʼmo oʼmaiʼniye.

¹⁹ Nagaemo fala kiʼna afagitega hani huʼniya kotegatiʼmo ge osuʼnove. Nagaemo Yekopu aginago vayaʼaifeʼmo huʼnaeʼmo, fiku kahauya hutapa nageyo, huʼna hapa opaiʼnofa lapa maesuvafekeʼmo kahauya hutapa nageyo, huʼna hapa paiʼnove. Ala kava neʼmoʼnamo fatago gemo huʼnaeʼmo, lama gemo nehuve.

²⁰ Alu nofi vaya alu nofi vayaʼaitegatiʼmo faitapa kasalo paetapa eʼnaya vayane, huʼna, eta alita anupa hutetapa nahaopaleʼmo eyo. Apakaemo afaʼa hapa oʼmaesaya aigofe gotiʼapimogifeʼmo nunumuʼmo huteʼa aigofe gotiʼapimogimo yosaletiʼmo alo huʼnaya apauneʼamo aliniʼa neʼaya vayaʼmogimo alagepa huʼa oʼafiʼnae.

²¹ Lapakaemo eta agotileʼmo getapimo aeta hakalo hiyo. Magokepiʼmo maiʼnetapaeʼmo ge huge afige hutapa maiyo. Ina laʼmo afole aisiya kavafeʼmo akeyavilagamo aeno hakalo huʼniye. Nagaiʼnigeʼmo aeʼna hakalo huʼna hapa paiʼnofiye. He, alu gotiʼmo oʼmaiʼniye. Nagaemo fatago kavaʼageʼmo nehuva Gotiʼnamo apakufamo aliʼna katiʼna neʼapatova Gotiʼnamo maiʼnove. Alu gotiʼa alagi oʼmaiʼniye.

²² Ma mopafi muki haopalegamo maiʼnaya vayane, huʼna, nagaemo Gotiʼnamo maiʼnogeno mago alu gotiʼmo alagi oʼmaiʼniyaʼmofeʼmo aulu nahaetapa nagegeʼnao lapakufamo aliʼna katiʼna lapategauvanagi, huno huʼniye.

²³ Nagaemo nagiʼniletiʼmo nagoʼyamo ataleteʼna ina gemo huʼnaeʼmo, Fatago gemo nehuva geleʼmo halate mago alu gemo osuguve. Muki vayaʼmogimo nagaetegamo eʼa apaleʼyamo faiʼneʼa apagoʼyamo ataleteʼa polomasi gemo hugae.

²⁴ Apakaemo huʼapaeʼmo, Lama gemo nehune, huʼa, Ala kava nepiʼmo maiʼnetaeʼmo fatago kavaʼamo aliteta himamuʼamo aliʼnone. Muki vayaʼmo agaetegamo egae. Agaefeʼmo apaipamo leʼa ateʼnaya vayaʼmo apavagage hugiye.

²⁵ Muki Isaleli aginago vayaʼmogi Ala kava nepiʼmo maiʼnayanageno Gotiʼa hunoʼaeʼmo, Lapakaemo naulagaleʼmo fatago vayaʼmo maiʼnae, huno hapa paisigeʼapaeʼmo apamogaga aiteʼa ala nagiʼnimo namigae.