Aiyeya 43 - The Keyagana NT and 25 OT books

Ala kava neʼmoʼa vayaʼamo Isaleli vayaʼmo miya faino hatu maeno neʼapateya vekaeʼmo huʼniya gemae

¹ Isaleli vayaʼmogitapae, huʼna, Ala kava neʼmoʼa alo huno lapateteno alino magoke nofi vayaʼmo hamaleno lapateʼniya vekamoʼmo hemenimo ina gemo huno lapa painoʼaeʼmo. Nagaemo miya faiʼna hatu maeʼna lapateʼnovaʼmofeʼmo koli osiyo. Nagaemo lapakitapimo lapateteʼnaeʼmo lapakaefeʼmo nagaiʼni vayane, huʼna huʼnove.

² Lapakaemo aniʼmo lakaesaya afinaʼmo lapakaeʼeʼmo magokepi lokaeʼna maiguve. Alopa aniʼmo lakaesayaʼmoʼmo aeno lapati okaegaiye. Lapakaemo atafatiʼmo faitapa kasalo paesaya afinaʼmo leno lapasaga olisigeno ata vaiʼmoʼa lapaleno lapafo osugiye.

³ Nagaemo Ala kava neʼmo Gotiʼtapimoʼnamo Isaleli vayaʼmogi naote vekaʼapimoʼnamo apakufamo aliʼna katiʼna neʼapatova vekamo maiʼnovaʼmofeʼmo ani kavaʼmo lapakaetegamo afole oʼaigiye. Nagaemo miya faiʼna hatu maeʼna lapatesuvafeʼmo Isipi vayanagi Itiyopiya vayanagi Sima vayanagi huʼna miyatapilefeʼmo afaʼa apataleʼnove.

⁴ Lapakaemo naulagaleʼmo hogote kanale vayaʼmo maiʼnayaʼmofeʼmo lapakaefeʼmo nahau nayamopafiʼmo nahauʼnigeʼna ala lapakitapimo lapamiʼnove. Lapamiʼnovaʼmofeʼmo lapakaemo ofalitapa alagepa huta maisayafeʼmo lapakae lapaimuʼyaleʼmo mago vayaʼmo aliʼna apatalegauve.

⁵ Nagaemo lapakaeʼeʼmo magokepiʼmo maiʼnovaʼmofeʼmo koli osiyo. Nagaemo lapakinago vayaʼmo yegemo haine neʼeya haopalegatiʼmo apavaleliʼna ege yegemo uno lamino nefaleya haopalegatiʼmo apavaleliʼna ege huʼna aliʼna anupa huʼna apategauve.

⁶ Nagaemo lamaga haopalega vayaʼaifeʼmo huʼnaeʼmo, Apatalegeʼa eyo, huʼna huge hoga haopalega vayaʼaifeʼmo huʼnaeʼmo, kaʼmo akanita oʼapateyo, huʼna huge huguve. Lapakaemo afagitegatiʼmo ve mafaʼne anagaʼnimo apavalelita eyo. Muki ma mopamo agiʼnalegatiʼmo a mafaʼne anagaʼnimo apavalelitapa eyo, huʼna hapa paiguve.

⁷ Apakaemo nagiʼnimo aliʼnageʼapaeʼmo vayaʼmogi apakaefeʼmo nagi neʼae. Nagaemo ala nagiʼnimo alisuvafeʼmo ani vayaʼmo alo huʼna apateʼnove. Apakufamo apamiteʼnaeʼmo, he, huteʼna, alo huʼna apateʼnove.

⁸ Lapakaemo apaulagamo ali huʼniyaʼmonanafa apaulagamo haneʼniya vayaʼe apakesamo akaniʼniyaʼmonanafa apakesamo haneʼniya vayaʼeʼmo apavalelitapa eyo.

⁹ Apategeʼa muki nofi vayaʼmo aliʼa anupa huʼa maiyo. Apakaepatiʼmo ina lagimo ani afole aiʼniya kavafeʼmo hogoteʼa laha paiʼnae. Ina lagimo afole aisiya kavafeʼmo laha paigae. Apakaemo hapa maesaya faigoko gemo hisaya vayaʼapimo afaʼa apavaleliʼa esageʼapaeʼmo he tiʼa laha paisayaʼmoʼmo, Fatago vayaʼmo maiʼnae, huʼa hisafiye. Faigoko gemo hisaya vayaʼmo oʼmaiʼnisayaʼmoʼmo apakaemo afaʼa geʼnimo afiteʼapaeʼmo, Gotiʼa lama gemo nehiye, huʼa hugae.

¹⁰ Ala kava neʼmoʼa hunoʼaeʼmo, Lapakaemo faigoko gemo hisaya vayaʼnimo faigoko geʼnimo hutapa hapa nepaiya vayaʼmo maiʼnae. Lapakaemo nagetetapaeʼmo nagaefeʼmo lapakesamo afita fatago hutetapaeʼmo, agaemo alagi Gotikeʼmo maiʼniye, hutapa hisayafeʼmo nagaemo lekana paiʼna lapateʼnogetapa aliʼyaʼnimo neʼaliya vayaʼmo maiʼnae. Gotiʼnamo maiʼnovaʼmofeʼmo hogoteno naulagaleʼmo alu gotiʼa oʼmaiʼniyanageno henagaʼamo nakamelegamo oʼmaigiye.

¹¹ Nagaiʼnigeʼmo nagaemo Ala kava neʼmo maiʼnove. Alu gotiʼa apakufamo alino katino neʼapateya gotiʼa alagi oʼmaiʼniye.

¹² Nagaemo gemo aeʼna hakalo huteʼna lapakufamo aliʼna katiʼna lapateʼnove. Mago gotiʼa alu kotegatiʼmo eʼnigetapa lapakaemo oʼageʼnaya gotiʼa oʼmaiʼniye. Oʼmaiʼniyaʼmofeʼmo lapakaemo ani kavafeʼmo faigoko gemo hisaya vayaʼnimo maiʼnae.

¹³ Akeyaʼvilagamo hogote afinaʼmo Gotiʼnamo maiʼnovanageʼna Gotiʼnamo maige maige huʼna maiguve. Nagaemo apatafauʼnisuva vayaʼmo mago vekamoʼmo nayapatiʼmo afaʼa alino hapa faino oʼapatalegaiye. Nagaemo aliʼyaʼnimo neʼaluvanageno haiya vekamoʼmo aliʼyaʼnimo afaʼa atafauno ateteno alu aliʼyaʼmo aligiye.

¹⁴ Ala kava neʼmoʼa miya faino hatu maeno lapateʼniya Gotitapimoʼmo Isaleli vayaʼmogi aote Gotiʼapimoʼmo ina gemo hunoʼaeʼmo, Nagaemo lapakaemo vayaʼnimo lapa maesuvafeʼmo ati vayaʼmo aliʼna apatesugeʼa uʼa Mamiloni vayaʼeʼmo kamemo hugae. Kamemo hapaesageʼapaeʼmo Mamiloni vayaʼmo ani apamogaga neʼaiya sipikopiʼmo uʼa haiteʼa koʼapimo ataleʼa apaune hegae.

¹⁵ Nagaiʼnigeʼmo Ala kava neʼmo naote Gotiʼtapimoʼnamo maiʼnove. Nagaemo Isaleli vayaʼmo aliʼna magoke nofi vayaʼmo ha maleʼna lapateteʼnaeʼmo nagaemo kini vekatapimo maiʼnove.

¹⁶ Akeyaʼvilagamo nagaemo Ala kava neʼmoʼnamo solovala aniʼmo folagapiʼmo kaʼmo valiʼnove. Lokiya solovala anipiʼmo kaʼmo valiʼna lapateʼnove.

¹⁷ Nagaemo asole kame vayanagi kame nehaya talalagi hosi anaganagi huʼna ani kateʼmo apavaleliʼna uʼnogeʼa uʼnayategamo alagi hosu yaʼmo aliʼnae. Magokepi alagi asagauʼa aiʼnayanageʼa halate he otigae. Vayaʼmogimo lamumo fu huʼa yu nehaya agufa kava huʼa apakaemo alagi hano huʼnae.

¹⁸ Ani kavaʼmo huʼnovaʼmofeʼmo lapakaemo ani akeyaʼvilaga kavafeʼmo lapakesamo afige hogoteno afole aiʼniya kavafekeʼmo lapakesa afifi hutapa maige osiyo.

¹⁹ Afiyo, huʼna, Nagaemo saufa kavaʼmo huguve. Hemenimo afole aigiye. Lapakaemo oʼagesafiye. Nagaemo kaʼme kotegamo kaʼmo valiguve. Nagaemo hau huʼniya kotegamo meti aniʼmo afole aiteno uno lamisiya kavaʼmo huguve.

²⁰ Nagaemo kaʼme kotegamo aniʼmo afela afu anagaʼmo apamiguvaʼmofeʼmo ala nagiʼnimo namigae. Lekana paiʼna apateʼnova vayaʼnimogimo aniʼmo nesayafeʼmo hau huʼniya kotegamo alopa meti aniʼmo afole aisiya kavaʼmo huguve.

²¹ Nagaemo ani vayaʼmo nagaiʼni vayaʼnimo aliʼna ha maleʼna apateʼnovanageʼa apakaemo ala nagiʼnieʼmo aeʼa hakalo hugae.

Agaemo geʼamo noʼafiya Isaleli vayaʼaifeʼmo hapaoke oseʼniya gemae

²² Gotiʼa hunoʼaeʼmo, Ani kavaʼmo huʼnovaʼmonanafa O Yekopu vayaʼmogitapae, huʼna, nagaefeʼmo keya aeta ge osuʼnae. O Isaleli vayaʼmogitapae, huʼna, nagaefeʼmo alagaʼmo lahapaeʼniye.

²³ Lapakaemo atamoʼmo leno saga lisiya sipisipi ofalinimo alinitapa nagaetegamo oʼmeʼnae. Ofalinimo neʼnamiya kavatetiʼmo ala nagiʼnimo oʼnamiʼnae. Nagaemo viti ofalinimo namiyo, huʼna lapa paiteʼnaeʼmo kana yaʼmo olapamiʼnove. Nagaemo alagepa atumo neʼaiya ofalinimo namisayafeʼmo alagaʼmo lahapaesiya kavaʼmo osuʼnove.

²⁴ Lapakaemo yofemo miya faitapa ofalinimo oʼnamiʼnae. Afayaʼe ofalinimo oʼnamiʼnayaʼmonanafa hosu kavatapimoʼmo naipa kana yaʼmo namiʼniye. Keʼaepa gemo amagitapa neʼatalaya kavatapimoʼmo alagaʼmo neʼnahaeya kavaʼmo alino neʼnamiye.

²⁵ Nagaiʼnilefeʼmo nagaiʼnimo keʼaepa gemo amagitapa ataleʼnaya kavatapimo aeʼna kalo paeʼna ataleʼnove. Nagaemo hosu kavatapieʼmo nagesamo oʼafiʼna nage kaniʼna atalegauve.

²⁶ Nage okanisigeʼna halate nagesa afisuvafeʼmo akeyaʼvilaga kavafeʼmo nagesamo huta halo aiyo. Gemo higetao magokepiʼmo gemo huta fako hugune. Nagaemo lapakaefeʼmo huʼnaeʼmo, fatago vayaʼmo maiʼnae, huʼna hisuvafeʼmo gemo hutapa lahapau vaisaya gemo huta naha paiyo.

²⁷ Hogote lapakinago vekamoʼmo hosu kavaʼmo huʼnigeʼapaeʼmo geʼnimo aliʼa lapaya maleʼnaya vayaʼmogiʼeʼmo nagaetegamo hosu kavaʼmo huʼnae.

²⁸ Huʼnayaʼmofeʼmo nagaemo mono huʼa nelapataya vayatapimo hosu apakiʼapimo apamige Yekopu nofi vayaʼmo lifana huʼna apatege Isaleli vayaʼmo afaʼa apateʼnisugeʼa huʼa faipa huʼa apatege hugae.