Aiyeya 42 - The Keyagana NT and 25 OT books

Ala kava neʼmo aliʼyaʼamo neʼaliya vekaeʼmo huʼniya gemae

¹ Ala kava neʼmoʼa ina gemo hunoʼaeʼmo, Ageyo, huno, Ha neʼmaogeno aliʼyaʼnimo neʼaliya vekamae. Nagupi mafaʼnemo lekana paiʼna ateʼnova vekaeʼmo namogaga neʼauve. Nagaemo agaeteʼmo nauneʼnameʼmo ago maleʼnovanageno muki malaga vayaʼmo alu nofi vaya alu nofi vayaʼaifeʼmo fatago kavafeʼmo ava gemo aeno hakalo huno hapa paigiye.

² Agaemo alopa gefatiʼmo osuge agemo afisayafeʼmo taoni kateʼmo he tino alopa gefatiʼmo osuge hugiye.

³ Hopamo aiseʼamo aino lo aeʼniya hopa kayoʼmo alino lo oʼaegaiye. Lamufi vikimoʼmo hokanufaʼageʼmo haneʼnigeno halinamo neʼaiya vikimo alino yu osegaiye. Agaemo lama geʼaletiʼmo fatago kavaʼmo alino afole aino ategaiye.

⁴ Agaemo aliʼyaʼalefeʼmo aipamoʼmo kana hisigeno haino me otalegaiye. Haino me otalegaifa aliʼyaʼamo alime alime neʼvisigeno muki ma mopafiʼmo fatago kavaʼmo afole aigiye. Afagi kotega vayaʼmogimo keʼaepa geʼamo alino apaya malesiyafeʼmo agava maigae.

⁵ Ala kava neʼmo Gotiʼa kokuʼnaʼmo alo huteno palaketimo aliʼa api aiteʼa aliʼa yatala nehaya kava huno kokuʼnaʼmo alino api aiteno alino yatala huʼniye. Agaemo ma mopamo alo huteno muki ma mopafiʼmo maiʼnaya vayaʼe haneʼniya yaʼeʼmo alo huʼniye. Agaemo ma mopafiʼmo maiʼnaya vayaʼaina apavamusaʼmo apamige umenitata nehaya vayaʼmo apauneʼapameʼmo apamige nehiye. Ani Gotiʼa aliʼyaʼamo neʼaliya vekaeʼmo ina gemo huno ha painoʼaeʼmo.

⁶ Nagaemo Ala kava neʼmoʼnamo fatago kavatetiʼmo kagaefeʼmo keya aeʼna ge huʼnovanageʼna kayateʼmo aliguve. Nagaemo yagaiʼna kateteʼna Isaleli vayaʼmogi kotalake gemo aepa vekamae, huʼna kateteʼna Yu vayaʼmo oʼmaiʼa malaga vayaʼmogi hale yaʼapimo maisanafeʼmo kategauve.

⁷ Kagaemo apaulagamo ali huʼnisiya vayaʼmo alika ayakeka apatege kalavusifiʼmo maiʼnaya vayaʼmo hatu maeka apatege kalavusifiʼmo hanipiʼmo fai maiʼnisaya vayaʼmo apavalelika ege hisanafeʼmo kategauve.

⁸ Nagaiʼnigeʼmo Ala kava neʼmae. Ani nagimo nagiʼnimae. Nagaiʼni hale konali yaʼnimo mago vekamo oʼamiguve. Vayaʼmogimo ala nagiʼnimo neʼnamiya agufa kava huʼa yosaletiʼmo alo nehaya aigofe gotigi ala apakiʼapimo apamisayafeʼmo he, huʼna osuguve.

⁹ Ageyo, huʼna, Nagaemo akeyaʼvilagamo afole aigiye, huʼna huʼnova kavaʼmo ago afole aiʼniye. Hemenimo nagaemo henagaʼamo afole aisiya kavafeʼmo lapa nepauve.

Ala kava neʼmo agiʼaleʼmo alita asaga hiyo, huno huʼniya gemae

¹⁰ Lapakaemo Ala kava nefeʼmo saufa yokemo hiyo. Muki ma mopafi vayaʼmogitapamo ala agiʼamo amiyo. Solovalapiʼmo sipifiʼmo neʼvaya vayaʼmogitapamo ala agiʼamo amiyo. Muki solovalapiʼmo maiʼnaya yaʼmogitapamo ala agiʼamo amiyo. Afagi kotegatiʼe ani kotegamo maiʼnaya vayaʼmogitapaʼeʼmo ala agiʼamo amiyo.

¹¹ Hau huʼniya kaʼme kotegatiʼe ani kotega muki haneʼniya taonifiʼmo maiʼnaya vayaʼmogitapaʼeʼmo ala agiʼamo amiyo. Kiʼna nofi vayaʼmogitapamo ala agiʼamo amiyo. Sila taonifiʼmo maiʼnaya vayaʼmogitapamo yokemo hiyo. Apakaemo avefatiʼmo he tiʼa alopa gefatiʼmo hiyo.

¹² Apategeʼapao afagi kotega maiʼnaya vayaʼmogimo hale konali agiʼamo amige ala agiʼaleʼmo aliʼa asaga huʼa atege hiyo.

¹³ Ala kava neʼmo lokiya ati vekagana huno kamemo hisiyafeʼmo ayamukiki huno ugiye. Agaemo ati vayaʼmogimo nehaya gemo huno alopa gefatiʼmo huteno kame vayaʼaʼeʼmo kamemo huteno alagi huno aeno apaka segaiye.

¹⁴ Ala kava neʼmoʼa ina gemo hunoʼaeʼmo, Alagi akeyaʼvilagamo nagaemo ge osuʼna afaʼa maiʼnove. Nagaiʼnimo natafauʼna nateteʼna afaʼa maiʼnove. Afaʼa maiʼnovaʼmonanafa hemenimo nagaemo a kanomoʼmo mafaʼnemo alino atesiyafeʼmo agafu kiʼnigenoʼaeʼmo kage kage nehiya kava huʼna kage kage huteʼna ha ha huʼna naya mukiki huʼna navamusamo aliguve.

¹⁵ Nagaemo avemo aliʼna hosu huʼna ataleteʼna kahauʼe yosaʼeʼmo aliʼna falu teʼna ategauve. Nagaemo alopa aniʼe ani kotuʼeʼmo alagi aliʼna laneʼna atalegauve.

¹⁶ Nagaemo apaulagamo ali huʼniya vayaʼmogi uʼeʼa nosaya kateʼmo apavaleliʼna egauve. Oʼageʼnaya kateʼmo apavaleliʼna uguve. Nagaemo hani yaʼmo aliʼna ataleteʼna hale yaʼmo apamisugeʼa hale yategamo umenitata hugae. Kayagi kayaga kaʼapimo aliʼna api aiʼna kaʼmo valiguve. Nagaemo hapa maesuvafeʼmo ani kavaʼmo huteʼnaeʼmo apataleʼna oʼuguve.

¹⁷ Yosaletiʼmo alo huʼnaya gotiʼapimogifeʼmo aliʼa amufa neʼapamiya vayaʼmo alino aino atagineno apatesigeʼa aiʼa atagineʼa ugae. Aeniletiʼmo alo huʼnaya gotiapimogifeʼmo, Gotitimogitapae, huʼa nehaya vayaʼmo apavagage hugiye.

Isaleli vayaʼmo apakesa akanige apaulagamo ali huge huʼniya vayaʼmo maiʼnae, huno huʼniya gemae

¹⁸ Ala kava neʼmoʼa ina gemo hunoʼaeʼmo, Lapakesamo akaniʼniya vayane, huno, Afiyo. Lapaulagamo ali huʼniya vayane, huno, Agesayafeʼmo ageyo.

¹⁹ Isaleli vayaʼmo aliʼyaʼnimo neʼaliya vayaʼmo maiʼnayaʼmonanafa ina lagimo ani vayakana huʼa maiʼnageno apaulagamo alagi ali huʼniye. Isaleli vayaʼmo aliʼna apateʼnogeʼa apa vayaʼnimo maiʼnayaʼmonanafa ina lagimo apakesamo akaniʼniya Isaleli vayakana huʼa maiʼnae. Apakaemo nagaeʼeʼmo alagepa huʼa maisaya kotalakemo hu maleʼnayaʼmonanafa apaulagamo ali huʼniye. Ina lagimo apakaekana huʼa maiʼnageno apaulagamo alagi ali huʼniye. Ala kava neʼmo aliʼyaʼamo neʼaliya vayaʼmo apaulagamo ali huʼniya kava huʼa ina lagimo ani kava huʼa maiʼnae.

²⁰ Vayaʼnimogimo asole kavaʼmo ageʼnayaʼmonanafa ageʼa alagepa osuʼnae. Apakesamo aino halo aiʼniyaʼmonanafa gemo noʼafiye.

Isaleli vayaʼmogimo gemo amagiʼa ataleʼnaya kavafeʼmo huʼniya gemae

²¹ Ala kava neʼmoʼa fatago kavaʼamoʼmo alagepa huno afole aigiyaʼmofeʼmo amuse nehiye. Agaemo Goti keʼaepa geʼamo magoʼe huno alino alopa huno ateteno ala agimo amigiye.

²² Amigiyaʼmonanafa hemenimo ani vayaʼmo alagepa huʼa oʼmaiʼnageʼapaeʼmo kame vayaʼapimogi eʼa muki yaʼapimo kumaya aliniʼa uʼnae. Mukiʼamo yafa kapiʼmo maige kalavusi huʼa apateʼnageʼa maige huʼnae. Kame vayaʼapimogi eʼa kame hapaeʼnagenoʼaeʼmo apayapatiʼmo apavalesiya vekamo oʼmaiʼniye. Kame vayaʼapimogi kumaya aliʼnaya yafeʼmo mago vekamoʼmo halate afaʼa apamiyo, huno nosiye.

²³ Inagi lapakaepatiʼmo ina laʼmo geʼnimo agetafo huʼneno afigiye. Ina laʼmo aepa faino geʼnimo afigiye.

²⁴ Ina laʼmo huʼnigeʼapaeʼmo kame vayaʼmogi eʼa aliʼa hosu huʼa ataleteʼa lagaemo Isaleli vayaʼmogita yaʼmo aliʼnae. Ala kava neʼmoʼa huʼnifiye. He, agaemo Ala kava neʼmokeʼmae. Lagaemo agaetegamo hosu kavaʼmo huʼnone. Lagaemo agaefeʼmo lakameʼyamo amiteta kaʼaleʼmo visunafeʼmo olahauʼniye. Ina kava huta keʼaepa geʼamo amagita ataleʼnone.

²⁵ Huʼnonaʼmofeʼmo aipamo leno nelateya kavaʼmo alopa anikana huno lagaeteʼmo lakiʼniye. Agaemo kame vayaʼmo alino apateʼnigeʼa eʼa lagaemo kamemo lahaeʼnae. Aipamo leno nelateya kavaʼamo ina kava huno atagana huno laleʼniye. Atamo laleʼniyaʼmonanafa alita olamalagiʼnone. Ageta alagepa osuʼnonaʼmofeʼmo kavatimo oʼataleʼnone.