Aiyeya 40 - The Keyagana NT and 25 OT books

Gotiʼa vayaʼamo apaipamo alino falu huʼniya kavafeʼmo huʼniya gemae

¹ Gotitapimoʼmo hunoʼaeʼmo, Apaipamo alita falu hiyo. He, vayaʼnimogi apaipamo alita falu hiyo.

² Lapakaemo Yulusalemu vayaʼmogi apaipamoʼmo falu hisiya gemo hapa paiyo. Ina gemo hutapa hapa paitapaeʼmo, Atafa kavatefeʼmo kana yaʼmo aliʼnaya afinatapimo ago hano huʼniye. Ala kava neʼmoʼa muki hosu kavaʼmo anonatapilefeʼmo alopa kayoʼmo lapamiteno hosu kavatapimo alino ataleʼniye, hutapa hapa paiyo.

³ Mago vekamo eno kaʼme kotega maiʼneno aeno hakalo hunoʼaeʼmo, Ala kava neʼmo kaʼme kotegamo esiya kaʼmo valitapa ateyo. Esiya kaʼmo Gotitimotefeʼmo alopa alagepa api kaʼmo valita ateyo.

⁴ Muki otufiʼmo aetapa havaitege muki aveʼamo kafitapa naku paetalegeno uno lamige hino. Kayagi kayaga huʼniya kaʼmo kafitapa alita api aita ateyo. Muki kanale osuʼniya kaʼmo aliʼa kanale huʼa ategae.

⁵ Ala kava neʼmo hale konali yaʼamo afole yateʼmo afole aisigeʼa muki ma mopafi vayaʼmogimo agegae. Ala kava neʼmo avayafatikeʼmo mani gemo eʼniyaʼmofeʼmae.

⁶ Mago avayamo ina ge huno huʼniya gemo aeka hakalo huvo, huno huʼnigenoʼaeʼmo, na agufa gemo aeʼna hakalo huguve, huno huʼniye. Agaemo geʼaleʼmo aeno atagaina hunoʼaeʼmo, Muki ma mopafi vayaʼmogi apakufamo kahaugana huʼa maiʼnae. Apakaemo alagepa apaulagamo neʼagaya kavaʼapimoʼa kanale ausegana huno haneʼniye.

⁷ Ala kava neʼmoʼa avamusaʼmo kahauleʼmo aige auseleʼmo aige nehigenoʼaeʼmo kahaumo falu tege auseʼamo hifalige nehiye. Lama gemo haneʼniyana muki vayaʼmo kahaugana huʼa maiʼnae.

⁸ Kahaumo vaige ausemo hifalige nehiyaʼmonanafa Gotitimo geʼamoʼmo muki afinaʼaeʼmo hano osuno afaʼa hanege hanege huno hanegaiye.

⁹ O Saiyoniyo, huʼna, Alagepa faigoko gemo alinika neʼana vekae, huʼna, yatala avefiʼmo uka haiyo. O Yulusalemuo, huʼna, Alagepa faigoko gemo alinika eʼnana vekae, huʼna, Kagaemo alopa gefatiʼmo alagepa faigoko gemo aeka hakalo huvo. Koli osuka Yuta kote taoniʼafi taoniʼafiʼmo maiʼnaya vayaʼaifeʼmo ina gemo hukaeʼmo, Ageyo, Lapakaemo Gotitapiʼmoʼmo ageyo, huka huvo.

¹⁰ Ageyo, huʼna, Ala kava neʼmo Gotiʼa alopa lokiyaʼaʼeʼmo eminegaiye. Agaemo lokiyaʼaletiʼmo yagaino apategaiye. Ageyo, huʼna, miyaʼamo ago aliʼniye. He, aliyaʼalefeʼmo miyaʼamo aulagaleʼmo sipisipiʼamo maiʼnae.

¹¹ Agaemo sipisipileʼmo yagaiʼa neʼapataya vayaʼmogimo sipisipileʼmo alagepa huʼa yagaiʼa neʼapataya agufa kavaʼmo huno ve aʼneʼaleʼmo alagepa huno yagaino apategaiye. Agaemo yagaino neʼapateya vekamoʼmo sipisipi apanaʼaumo apavaleno haifiʼyafiʼmo apateteno apavalelinuneno hugiye. Agaemo vase vase huno neʼunoʼaeʼmo aikeli sipisipiʼeʼmo maiʼnaya sipisipi anagaʼmo visaya kaʼmo alino apave ligiye.

¹² Ina laʼmo ayapiʼmo muki solovala aniʼmo alino maleno agegeʼniye. Ina laʼmo ayatetiʼmo kokuʼnaʼmo maleno agegeʼniye. Ina laʼmo muki mopamo alino samofiʼmo maleno agegeʼniye. Ina laʼmo avemo kanaʼamo maleno agegeʼniye. Ina laʼmo aise avemo alino sigelileʼmo asaiʼniye.

¹³ Ina laʼmo Ala kava neʼmo Aunemeʼamoʼmo aliʼyaʼamo alisiyafeʼmo yagaino ateʼniye. Ina laʼmo oʼageʼniya kavaʼmo alino aya maleʼniye.

¹⁴ Ina laʼeʼmo gemo afisiyafeʼmo ge huge afige huno maiʼniye. Ina laʼmo alino aya maleʼnigeno alagepa kateʼmo uʼniye. Ina laʼmo agaemo muki alagepa agesa afi yaʼe afiteno ageʼniya kavaʼeʼmo alino aya maleʼniye.

¹⁵ Ageyo, huno, muki alu nofi vaya alu nofi vayaʼmo aniʼmo paketifatiʼmo magokeʼatomo lape huno asagauno neʼaiya anikana huʼa maiʼnae. Sigelileʼmo aise mumusopamo haneʼniya kava huno aulagaleʼmo haneʼniye. Ageyo, huno, agaemo aise yaʼmo alino neʼasagaiya kava huno solovala aniʼmo folagapiʼmo muki haneʼniya mopaʼamo alino neʼasagaiye.

¹⁶ Lapakaemo Lemanoni alopa avefiʼmo haneʼniya yahaofatiʼmo muki atamo haletapa alige muki Lemanoni afu anagaʼmo apamagitapa alige hulitetapa ani ofalinimo Gotina amisaya agufa afumo ho okaeʼniye.

¹⁷ Goti aulagaleʼmo muki ma mopafi alu nofi vaya alu nofi vayaʼmo afa ina agufa vayane.

¹⁸ Lapaulagaleʼmo Gotiʼa ina lakana huno maiʼniye. Gotiʼa ina agufa yakana huno maiʼniye, hutapa afaʼa hisafiye.

¹⁹ Afaʼa osugayaʼmonanafa mago vekamoʼmo aigofe goti auneʼamo alo hunigeno goli yafatetiʼmo alu ya alu yaʼmo alo nehiya vekamoʼmo goli yafatetiʼmo faleno aino ati kaeno ateʼnigeno siluva yafatetiʼmo alu ya alu yaʼmo alo nehiya vekamoʼmo siluva yafatetiʼmo seli nofiʼmo alo huteno ani auneʼaleʼmo hayaeʼniye.

²⁰ Kagemiyaʼamo ohaneʼniya vekamoʼmo ani agufa auneʼamo afaʼa alo osugiyaʼmofeʼmo okasalisiya yosamo lekana paiteno gotiʼapimo auneʼamo alo hisiyafeʼmo yosamo lafe hu kavateʼmo ageʼniya vekaeʼmo ge nehiye. Ani vekamoʼmo alo hutenoʼaeʼmo, fiku asagauno aigiye, huteno nofitetiʼmo kino atafauʼniye.

²¹ Lapakaemo oʼagesafiye. Lapakaemo oʼafigafiye. Gotiʼa ma mopamo alo huʼniya afinatetiʼmo lama ge Gotiʼa maiʼniye, hutapa oʼafiʼnafiye. Haiya kava huno ma mopamo afole aiʼnifi hutapa oʼafiʼnafiye.

²² Agaemo Ala kava nekeʼmo anaga kokuʼnapi kini siyateʼmo fai maiʼnigeno ma mopamo afelagamo lufokana huno haneʼnigeʼa ma mopafiʼmo maiʼnaya vayaʼmo akenugana huʼa maiʼnae. Agaemo kokuʼnaʼmo ina kava huno lavolavogana huno alino yaki maleʼneno seli noʼagana huno alino he tino ateʼniye.

²³ Agaemo yagaiʼnaya vayaʼmo alino afepiʼmo apateʼnigeʼa afa vayaʼmo maiʼnae. Agaemo agoti gemo neʼafiya vayaʼmo alino afa vayaʼmo hamaleno neʼapate.

²⁴ Vayaʼmogi neʼyaʼmo fai maleʼnisagenoʼaeʼmo aimuʼyaʼamo uno olamiʼnigeno Gotiʼa avamusaʼmo neʼaigenoʼaeʼmo malage huno vaisigeno yasimoʼmo vaiʼniya yaʼmo alino halelino neʼviya kava huno Gotiʼa ala apaki vayaʼmo alino hano huno apatalegaiye.

²⁵ Aote Gotiʼa hunoʼaeʼmo, Nagaemo ani agufa kavaʼmo nehuvaʼmofeʼmo ina lakana huʼna maiʼnove, hutapa lapakesamo neʼafiye. Nagaeʼe ina laʼeʼmo magoke agufa vekalaʼmo maiʼnoʼae.

²⁶ Lapakaemo anaga kokuʼnategamo kanefiʼmo haneʼniyanagi alita maku hutapa ageyo. Ina laʼmo muki kanefiʼmo afa yatetiʼmo alo huʼniye. Agaemo ami vayaʼaiteʼmo yagaino neʼapateya vekagana huno napaʼapimo lekana paiteno alinino hogoteno neʼviye. Agaemo apakiʼapimo aeteno alopa lokiyaʼaletiʼe lokiya himamuʼaletiʼeʼmo yagaino neʼapateyanageʼa magokeʼageʼmo lageso osuʼniyanageno lageso osugiye.

²⁷ O Yekopu vayane, huʼna, Isaleli vayane, huʼna, Na kava higetapaeʼmo ina gemo hutapaeʼmo, Ala kava neʼmoʼa lagae kana yaʼmo noʼage. Fatago kavaʼmo nehunaʼmonanafa laha noʼmae, hutapa nehae.

²⁸ Lapakaemo afiʼnafi oʼafiʼnae. Mago vayaʼmogimo lapa paiʼnagetapa oʼafiʼnafiye. Ala kava neʼmo maige maige huno neʼmaiya Gotiʼa muki ma mopamo aluga aluga atupalenagi huno alo huʼniya Gotiʼa aunena oʼaige alaga ohaege huʼnigeno neʼmaiye.

²⁹ Agaemo lokiyaʼapimo aiseʼamo haneʼniya vayaʼmo lokiya vaino apatege himamuʼapimo alagi ohaneʼniya vayaʼmo magoʼe huno lokiya vaino apatege nehiye.

³⁰ Neya vayaʼeʼmo alagaʼmo hapaesigeno apaunena aigiye. He, lokiya neya vayaʼeʼmo alagi asagauʼa aigayaʼmonanafa

³¹ Ala kava neʼmoʼa hapa maesiyafeʼmo apakava neʼmaiya vayaʼmo saufamo lokiya vaiʼa maigae. Apakaemo hakiki namagana huʼa haleliʼuʼa haigae. Nagu nagu huʼa visagenoʼaeʼmo alagaʼmo ohapaegaiye. Umenitata nehisagenoʼaeʼmo apaunena oʼaigiye.