Aiyeya 4 - The Keyagana NT and 25 OT books

¹ Ani afinaʼmo seveniʼa aʼne anagamogimo mago vekamo atafauteʼapaeʼmo ina ge huʼa ha paigae. Lagaemo neʼyatileʼe kukena yatileʼeʼmo lagaitimo afaʼa yagaita lategaunaʼmonanafa anautimogimo oʼmaiʼnageno lavagage nehiyaʼmofeʼmo anautimogagana huka maiyo, huʼa ha paigae.

Ala kava neʼmoʼa Saiyoni taonimo halate alino kanale taonimo hamaleno ategaiye, huno huʼniya gemae

² Ani afinaʼmo Ala kava neʼmo ve mafaʼneʼamoʼmo saufa ausasaʼmo haineno afole aisigeʼa vayaʼamogimo ala apakimo alige ha le konali yaʼapimo alige hisayafeʼmo maigiye. Isaleli vayaʼmo kalavusifatiʼmo ataleʼa uʼnaya vayaʼmogi ani yosamo aepafatiʼmo alagepa neʼyaʼmo afole aisigeʼa ageteʼa hapaʼye hisigeʼapaeʼmo, Alagepa neʼyane, huʼa hugae.

³ Logufaʼa vayaʼe atupa vayaʼeʼmo Saiyoni taonifiʼe Yulusalemu taonifiʼeʼmo maiʼnaya vayaʼaifeʼmo huʼapaeʼmo, Alagepa apaote vayane, huʼa hugae. Ala kava neʼmoʼa ani afaʼa maiʼnaya vayaʼmogi apakimo mukuʼafiʼmo avoʼmo kae maleʼniye.

⁴ Ala kava neʼmoʼa Saiyoni aʼne anagaʼmogi oʼaniʼya faiʼniya hosu kavaʼapimo sese huno ataleteno Aunemeʼaletiʼmo Yulusalemu vayaʼmogi vayaʼmo kamitimo apamagiʼnageno kolaʼmo aino lakiʼniya hosu kavaʼapilefeʼmo agoti huno apateteno hosu kavaʼapimo atafiʼmo kaeno atalegaiye.

⁵ Ani kavaʼmo hutenoʼaeʼmo Ala kava neʼmoʼa afa yatetiʼmo vayaʼamo hapa maesiya yaʼmo alo hugiye. Alo hisigeno felugamo hiyaʼmoʼe halinamoʼeʼmo muki Saiyoni aveleʼmo haneʼniya noteʼmo anagamo hanege aliʼa anupa huʼa maiʼnaya aupiliga anagamo hanege haniʼilagamo ata vaiʼmo hanege hugiye. Ani yaʼmoʼa yugugana huno muki ha le konali yaʼamo agotofuleʼmo hanegaiye.

⁶ Yasi nokana huno hanesigeno kofino apatege lokiya yegemoʼmo apakenopaleʼmo oʼapalesiyafeʼmo aino ati kaeno apatege huʼnisigeʼapaeʼmo alopa koʼmo aige yasimo alige hisiya afinaʼeʼmo alagepa huʼa maigae.