Aiyeya 35 - The Keyagana NT and 25 OT books

Saiyoni taonimoʼmo ha le konali yaʼamo hanesiya kavafeʼmo huʼniya gemae

¹ Kaʼme koʼmoʼa amogaga aigiye. Hau huʼniya koʼmoʼa amogaga aisigeno kahaumoʼmo ausemo hegaiye.

² Ani kotega muki kahaumoʼmo ausemo hesigeno amogaga aigiye. Amogaga aige yokemo huge huno hanegaiye. Lemanoni aveleʼmo ha le konali yaʼamo haneʼniya kava huno ha le konali yaʼamo afole aigiye. Kamo koʼe Saloni koʼeʼmo alagi kanale kotalaʼmo haneʼniya kava huno hau huʼniya koʼmo alagi kanale koʼmo alino hamalegaiye. Muki vayaʼmogi ani kavaʼmo ageteʼapaeʼmo Ala kava neʼmo Gotitimoʼmo kanale ha le konali yaʼaʼe kanale alagepa kavaʼaʼeʼmo agegae.

³ Lapayaʼmoʼmo alagaʼmo nehaegeno lapaiyamoʼmo atete nehiyanagi alitapa lokiya vaita ateyo.

⁴ Lapakaemo apaipafiʼmo koli nehaya vayaʼaifeʼmo hutapaeʼmo, Koli osuta lokiya vaitapa maiyo. Afiyo, hutapa, Gotitapimoʼmo emineno hosu kavaʼmo anonaʼapilefeʼmo apamigiyaʼmonanafa lapakufamo alino katino lapategaiye.

⁵ Ani afinaʼmo apaulagamo ali huʼniya vayaʼmo ageʼa ayakege apakesamo akaniʼniya vayaʼmogimo gemo alagepa huʼa afige hugae.

⁶ He, ani afinaʼmo apaiyamo hosuʼniya vayaʼmo afela afugana huʼa aeʼa hailo hailo huge apake noʼaiya vayaʼmogimo yokemo huge hugae. Mopamo aeno apalo tisigeno aniʼmo kaʼme kotegamo lusi kava huno aino atagu faegaiye. Aniʼmo ohaneʼnisiya kotegamo alopa aniʼmo uno lamigiye.

⁷ Hau huʼniya mopaleʼmo ani kotuʼmo malegaiye. Ani aniʼmo ohaneʼniya kotega mopafatiʼmo meti ani koʼmo aeno latino hainegaiye. Afela afu anagaʼmo nehavaya mopafatiʼmo lanitani kahauʼe akepaʼeʼmo lagigiye.

⁸ Ani haopalegamo mago alopa kaʼmo aote kaʼmo hanegaiye. Vayaʼmogimo ani kafeʼmo agi aeʼapaeʼmo, apaote vayaʼmogi kane, huʼa agi aegae. Hosu kavaʼapimo aeʼa kalo opaeʼnaya vayaʼmo ani kateʼmo oʼugayaʼmonanafa alu vayaʼmogimo ani kateʼmo afaʼa ugae. Ani kateʼmo neʼvaya vayaʼmo negi vayaʼmo maiʼnisayana kafeʼmo ika huteʼapaeʼmo ataleʼa alu kateʼmo oʼugae.

⁹ Mago Laiyoni anagaʼmo ani kateʼmo oʼmaigae. Vayaʼmo nehapaya afela afumo ani kateʼmo oʼugae. Vayaʼmogimo ani agufa afu anagaʼmo ani kotegamo oʼapakegae. Oʼmaigayaʼmonanafa miya faino hatu maeno apateʼniya vayaʼmogimo ani kateʼmo umenitata hugae.

¹⁰ Ala kava neʼmoʼa miya faino hatu maeno apateʼniya vayaʼmogimo yokemo nehuʼapaeʼmo aiʼa atagi neʼa Saiyoni taonifiʼmo egae. Muki afinaʼaeʼmo apamogaga aiʼa maigae. Apakaemo magoʼe huʼa kana yaʼmo oʼalige magoʼe huʼa yulagefamo oʼaige huteʼa alagepa huʼa maige maige huʼa maigae.