Aiyeya 33 - The Keyagana NT and 25 OT booksLusi kana yaʼmo aliʼnaya vayaʼmogi nunumuʼmo huʼnaya kavafeʼmo huʼniya gemae 1 Vayaʼmogi lapakaetegamo kame huʼa lapateteʼa kagemi yatapimo oʼaliʼnayaʼmonanafa lapakaemo kame huta apatetetapa kagemi yaʼapimo aliʼnaya vayane, huʼna, lapakaemo lusi kava huta kage kage hisaya kavaʼmo lapakaetegamo afole aigiye. Vayaʼmogi humi olapateʼnayaʼmonanafa lapakaemo humi neʼapatae. Lapakaemo kame huta apatetetapa kagemi yaʼapimo kumaya oʼalitapa atalesaya afinaʼmo lapakaetegamo kame huʼa lapateteʼa kagemi yatapimo aligae. Magoʼe huta humi apatesaya afinaʼmo humi lapategae. 2 O Ala kava nene, huʼa, Fiku lahamaeka lamiyo. Lagaemo lahamaesanafeʼmo kagava maiʼnone. Muki neteʼaʼe neteʼaʼeʼmo lokiyatimo maiyo. Lagaemo hanageke yaʼmo alisuna afinaʼmo lagufamo alika katika lato. 3 Kagaemo he tika alopa gefatiʼmo nehanageʼapaeʼmo kame vayatimo apaune nehae. He tika kamemo hapaegefeʼmo nehisanageʼapaeʼmo muki alu nofi vaya alu nofi vayaʼmo atagu faeʼa apaune hegae. 4 Apaune heʼapaeʼmo muki kagemi yaʼapimo atalesageʼa malage huʼa asole akenu anagaʼmo haleliʼeʼa aliʼa anupa huteʼa hoyafiʼmo haneʼniya neʼyaʼmo neʼa hano nehaya agufa kavaʼmo huʼa vayaʼmogimo aligae. 5 Ala kava neʼmo anaga koʼaleʼmo maiʼniyaʼmofeʼmo ala agiʼamo amigae. Agaemo lusi kava huno alagepa fatago kavaʼmo huʼnigeʼa Saiyoni taonifi maiʼnaya vayaʼmogi alagepa huʼa aliʼa fako huge fatago kavaʼmo huge nehayaʼmofeʼmo ani agufa kavaʼmo taonifiʼmo havaitegaiye. 6 Ala kava neʼmoʼa afiteno agege muki kavafeʼmo afige nehiya kavatetiʼmo vayaʼmogi apakufamo alino katino apatesigeʼa lokiya vaiʼa alagepa huʼa maigae. Vayaʼmogimo Ala kava nefeʼmo koli hisaya kavatetiʼmo muki ani agufa hogote alagepa kavaʼmo afole aigiye. 7 Mago lokiya Yulusalemu ati vayaʼmogi kateʼmo maiʼneʼa alopa gefatiʼmo keya aegae. Kame nehaya kavaʼmo hano hisigeʼa magokepiʼmo alagepa huʼa maisayafeʼmo aliʼyaʼmo neʼaliya apa vayaʼmogi aviʼyaʼmo hugae. 8 Alopa kaʼmo hosuʼnigeʼa vayaʼmo magoʼe huʼa uʼeʼa nosae. Kame vayaʼaiteʼmo yagaiʼniya vekamoʼmo kotalake gemo amagino ataleʼniye. Agaemo muki taonifi maiʼnaya kame vayaʼaeʼmo, ina agufa vayane, huno agesamo neʼafiye. Muki vayaʼaifeʼmo koli nosiye. 9 Mopamoʼmo yulagefa neʼaigeno lokiyaʼamo hano hume hume neʼviye. Lemanoni aveʼmoʼmo avagage nehigenoʼaeʼmo yosaʼamo vaiʼniye. Seloni kagoʼmu koʼmo yahao kokana huno haneʼniye. Mesani kotega yosamo haitaʼe Kameli avele yosamo haitaʼeʼmo vaiteno hali huno asagauno neʼaiye. Ala kava neʼmoʼa kame vayaʼaifeʼmo hunoʼaeʼmo, Ehetapiye, huno huʼniye gemae 10 Ala kava neʼmoʼa hunoʼaeʼmo, Hemenimo he tiguve. Hemenimo ala nagiʼnimo aliguve. Hemenimo nagiʼnileʼmo aliʼna asaga huguve. 11 Lapakaemo aliʼyaʼmo alisayafeʼmo lapakesamo afigayaʼmonanafa haletiʼya yakana agufa kava huno afole aigiye. Aliʼyaʼmo alisagenoʼaeʼmo afa kahaugeʼmo afole aigiye. Lapavamusaʼmo atagana huno alino hano huno atalegaiye. 12 Lapakaemo yafaʼmo nekaya kava huno alagi leno lapasaga ligiye. Aufe nofiʼmo atafiʼmo alagi kaeʼa hano nehaya kava huno atafiʼmo kaeno hano huno lapatalegaiye. 13 Afagitegamo neʼmaiya vayaʼmogitapae, huʼna, huʼnova kavafeʼmo ava gemo afiyo. Nahaopaleʼmo neʼmaiya vayaʼmogitapae, huʼna, Lokiyakamo haneʼniya Gotigamo maiʼnane, hutapa hiyo, huno hapa paiʼniye. 14 Saiyoni taonifiʼmo maiʼnaya vayapatiʼmo hosu kavaʼmo nehaya vayaʼmogimo koli huʼa maiʼnae. Aigofe vayaʼmogimo hapau aiteʼapaeʼmo apamoʼyamo neʼaiye. Apakaemo huʼapaeʼmo, Lagaepatiʼmo ina lagimo leno pasaga neliya atafiʼmo maige maige huʼa maigae. Lagaepatiʼmo ina lagimo yu oseno lege lege huno neʼmaiya ata koteʼmo maige maige huʼa maigae, huʼa nehae. 15 Haiya vayaʼmogi anaga avefiʼmo lokiya yafapiʼmo alagepa huʼa maigae. Vaiʼmo oʼaliʼa fatago kavaʼmo huge fatago gemo huge hosu kavatetiʼmo afole neʼaiya monimo alisayafeʼmo ohapauge kutulu monieʼmo alagi ohapauge vayaʼmo apamagisaya gemo oʼafige hosu kavaʼmo oʼagesayafeʼmo apaulagamo ali huge hunigeʼa neʼmaiya vayane. 16 He, ani agufa vayaʼmo anaga avefiʼmo lokiya yafapiʼmo alagepa huʼa maigae. Neʼyaʼapimo apamisigeʼa negae. Aniʼapimo hano osuno afaʼa hanegaiye. Alagi alagepa huʼa maisaya kavafeʼmo ava gemo huʼniya gemae 17 Lapakaemo alagepa apaulagamo neʼagaya kini vekamo agegae. Lapakaemo alagi afagitegamo haneʼniya koʼmo agegae. 18 Lapakaemo hosu afinaʼmo lapakaetegamo hogoteno afole aiʼnigetapa lusi kava huta koli huʼnaya kavafeʼmo halate lapakesamo afigae. Lapakesamo afigayaʼmonanafa kame vayatimo avoʼmo nekaya vayaʼmo hemenimo haiyaʼalegamo maiʼnae. Kame vayatimo lagae monimo aliʼa lekana nepaiya vayaʼmo haiyaʼalegamo maiʼnae. Kame vayatimogi lagaeʼeʼmo kamemo hisayafeʼmo kava neʼyagauna yatala nofeʼmo lekana nepaiya vayaʼmo haiyaʼalegamo maiʼnae, hutapa ge hugae. 19 Lapakaemo lokiya vaiʼa kamemo nehaya vayaʼmo magoʼe hutapa oʼapakegae. Lapakaemo alu apakemo oʼafiʼnaya apakemo neʼaiya vayaʼmo magoʼe hutapa oʼapakegae. 20 Oʼapakegayaʼmonanafa Saiyoni taonimo ageyo. Alopa taonimogeta alopa hopa afinaʼmo alita anupa huta mono kavaʼmo huta neʼyaʼmo neʼnone. Lapakaemo agesayana maiʼa haga nelaya taonimo hanege seli noʼmo kayoʼamo alagi aliʼa oʼakaige nofiʼamo aliʼa kapalu aeteʼa aliniʼa oʼuge hugayaʼmonanafa alagepa huʼa maige maige huʼa maigae. 21 Ani taonifiʼmo Ala kava neʼmoʼa laha maesiyafeʼmo lokiya kavaʼmo hugiye. Lagaemo asole alopa aniʼe aise aniʼeʼmo haneʼniya koteʼmo maigunaʼmonanafa kame nehaya sipiʼe alopa sipiʼeʼmo afaʼa oʼmegae. 22 Ala kava neʼmo lagae yasi vekamo maige keʼaepa gemo nelamiya vekamo maige kini vekatimo maige huʼniyaʼmofeʼmo lagufamo alino katino lategaiye. 23 Kame vayaʼmogimo Saiyoni taonimo alisayafeʼmo eʼnayaʼmonanafa sipiʼapimo nofiʼamo afaʼa haneʼnigeno sipileʼmo atafauno haneʼniya seliʼmo yosaʼamoʼmo he tino lokiya vaino ohaneʼniyanageno sipimo afaʼa oʼugiye. Kame vayaʼmogi asole yaʼapimo ataleʼa apaune hesageʼa Saiyoni vayaʼmogimo aligae. Apaiyamo hosuʼnisiya vayaʼmogiʼeʼmo uʼa aligae. 24 Saiyoni taonifi maiʼnaya vayaʼmogimo huʼapaeʼmo, kaitaʼmo nahauʼniye, huʼa osugae. Ala kava neʼmoʼa taonifiʼmo maiʼnaya vayaʼai hosu kavaʼapimo alino atalegaiye. |
© 2013, Wycliffe Bible Translators, Inc. All rights reserved.
Wycliffe Bible Translators, Inc.