Aiyeya 32 - The Keyagana NT and 25 OT books

Kini vekamoʼmo fatago kavaʼaletiʼmo yagaino apatesiya kavafeʼmo huʼniya gemae

¹ Afiyo, huno, Mago kini vekamoʼmo fatago kavaʼaletiʼmo yagaino apatesigeʼa ala vayaʼmogiʼeʼmo alagepa huʼa aliʼa fako huʼa yagaiʼa apategae.

² Yasimo neʼaliya afinaʼmo yafa kapiʼmo uʼa fala nekiya yafa kaʼapigana huno mago vekamo maigiye. Agaemo lusi kava huno lokiya yasimo alige ko aige hisigeʼapaeʼmo hapa maesiyafeʼmo uʼa fala kisaya koʼapigana huno maigiye. Agaemo hau huʼniya kotegamo alopa aniʼmo uno nelamiya anikana huno maige alagaʼmo nehapaeya kotega alopa yafaʼmo auneʼagana huno maige hugiye.

³ Ageʼnisaya vayaʼmogi apaulagamo ali osisigeʼa agege afiʼnisaya vayaʼmogi apakesamo aino halo aisigeʼa alagepa huʼa gemo afige hugae.

⁴ Malage huʼa hosu apakesamo afiʼnisaya vayaʼmogi apakesamo afi yaʼmo aino halo aiʼnisigeʼa muki yaʼmo aliʼa kanale huʼa fako hugae. Gemo hisayafeʼmo apavayamoʼmo kana nehisiya vayaʼmogimo gemo aliʼa alagepa huʼa hugae.

⁵ Vayaʼmogimo negi vayaʼaifeʼmo magoʼe huʼa huʼapaeʼmo fiku hapa maeʼa neʼapamiya vayane, huʼa osugae. Ina kava huʼa hosu vayaʼaifeʼmo, Alagepa vayane, huʼa osugae.

⁶ Gotifeʼmo mono nosaya agufa kavaʼmo huge Ala kava netegamo aigofe gemo huge hisayafeʼmo negi vekamoʼmo negi nagi gemo huge hosu kavaʼmo hisiyafekeʼmo aipafiʼmo lusi kava huno agesa afige hugiye. Agaemo kafu nehaya vayaʼmo apaka tege aniʼapimo hano huʼniya vayaʼmo anifeʼmo hapauge hisiyafeʼmo hosu kavaʼmo hugiye.

⁷ Hosu kavaʼmo hisiyafeʼmo agesa afifi nehiye. Kagemiyaʼapimo ohaneʼniya vayaʼmo aigofe geletiʼmo alino hosu huno apatesiyafekeʼmo agesa afifi nehiye. Kafu huʼnaya vayaʼmogi fatago gemo nehaya afinaʼeʼmo alino hosu huno apatesiyafekeʼmo nehiye.

⁸ Nehiyaʼmonanafa fiku hapa maeno neʼapamiya vekamoʼmo fiku hapa maeno apamisiyafeʼmo agesamo neʼafiye. Agaemo ani alagepa kavaʼaletiʼmo alagepa huno he tino maigiye.

Aʼne anagaʼmogimo hapau huʼa aviʼyaʼmo hiyo, huno huʼniya gemae

⁹ Yulusalemu aʼne anagane, huʼna, hosu kavaʼmo afole aisiyafeʼmo koli osuʼnayaʼmofeʼmo alo osuta afaʼa neʼmaiye. He titapa geʼnimo afiyo. Afaʼa neʼmaune, hutetapa fiku neʼmaiya aʼne anagaʼmogitapae, huʼna, Lapaketafo huʼnetapa geʼnimo afiyo.

¹⁰ Hemenimo fiku neʼmaiyaʼmonanafa mago kafugamo utesigeno nofi hoyatapiʼe olivi yosatapimoʼeʼmo magoʼe huno alagamo oʼaegaiyaʼmofeʼmo alopa hanagekeyaʼmo aligae.

¹¹ Afa aʼne anaganagi atete hiyo. Afole aisiya kavafeʼmo lapakesamo noʼafiya aʼne anaganagi lapaipamoʼmo kana hino. Kukena yatapimo asagitapa maleteta kogu kukenamo alita vaiyo.

¹² Vayaʼmogimo hapaifiʼyaleʼmo apamagiteʼa hogote alagepa hoyaʼapiʼe hogote alagepa alagamo neʼaeya nofi hoyaʼapieʼmo yulagefaʼmo aigae.

¹³ Aufe nofiʼmoʼe hosu kahaumoʼeʼmo vayaʼnimogi mopaleʼmo ago aeno ati kaege apamogaga neʼaiya noʼapimo mopamoʼmo aeno ati kaege hugiye.

¹⁴ Apakaemo kini vekamo alopa noʼamo ataleʼa visageno afaʼa hanegaiye. Asole vayaʼmo taonifiʼmo lusi kava huʼa maiʼnayaʼmonanafa ataleʼa visageno afaʼa hanegaiye. Ati vayaʼmo maiʼnaya noʼe kava yagaiʼa neʼmaiya yatala noʼeʼmo afaʼa haneʼneno hosuʼnigeʼa afela noki anagaʼmogimo ani afaʼa haneʼniya nopiʼmo apamogaga aiʼa maisageʼa sipisipi anagaʼmogimo eʼa kahaumo negae.

Ala kava neʼmoʼa vayaʼamo alagepa huʼa maisaya yaʼmo apamigiye, huno huʼniya gemae

¹⁵ Ani agufa hosu kavaʼmo haneme haneme neʼvisigenoʼaeʼmo Ala kava neʼmoʼa anaga kotegatiʼmo Aunemeʼamo anikana huno lakitalesigeno lagaetegamo eminegaiye. Eminesigeno kahaepa koʼmoʼa alagepa mopamo alino hamalesigeno alu neʼya alu neʼyaʼmo afole aigiye. Afole aigiyaʼmonanafa asole neʼyaʼmo afole neʼaiya hoyaeʼmo huʼapaeʼmo, yahaofilagamo haneʼniye, huʼa hugae.

¹⁶ Ani afinaʼmo Gotiʼa yahaofilagamo fatago kavatetiʼmo vayaʼai kavaʼapimo alino fako hume hume ugiye. Goti vayaʼamogi fatago kavaʼapimo asole neʼyaʼmo afole neʼaiya hoyafiʼmo magoʼe huno hanege hanege huno hanegaiye.

¹⁷ Goti fatago kavaʼamoʼmo aliʼyaʼmo alisigeʼa vayaʼamo alagepa huʼa maisageno apaipamoʼmo falu hugiye. Fatago kavaʼmo nehaya vayaʼmogi muki afinaʼmo apaipamoʼmo falu huge muki afinaʼmo Gotiʼe vayaʼeʼmo alagepa huʼa magokepi lokaeʼa maige huteʼapaeʼmo, alagepa huta maigune, huʼa apakesamo afigae.

¹⁸ Ala kava neʼmoʼa ina gemo hunoʼaeʼmo, Vayaʼnimo alagepa huʼa maiteʼa koʼapileʼmo maiʼa hagalegae. Alagi alagepa huʼa maisageʼa kame vayaʼapimogi eʼa aeʼa apaka osegae.

¹⁹ Koʼmopa koʼmo aiteno yahaomo amagino alino hosu huno ataleteno taonifiʼmo maiʼnaya vayaʼmo alino afepiʼmo apategaiyana vayaʼnimo afaʼa maigae.

²⁰ Lapakaemo avina yatapimo muki lanitani aniʼmo haneʼniya mopafiʼmo hakalege aliʼyaʼmo neʼaliya ve pulumaka anagatapiʼmogiʼe noki anagatapiʼmogiʼeʼmo uʼa aliʼyaʼmo alisayafeʼmo afaʼa apatalege nehisaya vayaʼmogitapae, huno, aulena vayaʼmo maiʼnae, huno huʼniye.