Aiyeya 26 - The Keyagana NT and 25 OT books

Gotiʼa vayaʼamo apakufamo alino katino apatesigeʼa yokemo hisaya kavafeʼmo huʼniya gemae

¹ Alopa alagepa afinaʼmo afole aisigeʼapaeʼmo Yuta mopaleʼmo maiʼnaya vayaʼmogimo mani yokemo hugae. Hugayana lagae taonimo lokiya taonimae. Gotiʼa alagepa huno laha maesigeno Gotikeʼmo lagae lokiya yafa kegiʼyatimo maigiye.

² Taonile yafa kegiʼyaleʼmo alopa kitamo yakitapa apategeʼapao fatago nofi vayaʼmogi lama gemo akame nehaya vayaʼmo eʼa haiyo.

³ Kagaefeʼmo lole apakesamo oʼafiʼa magoke apakesamo neʼafiya vayaʼmogimo aliʼa amufa nekamiyaʼmofeʼmo apaipamoʼmo falu hisiyafeʼmo yagaika apategane.

⁴ Yihovaʼmo Ala kava neʼmo lokiya yafakana huno maiʼnigeno muki afinaʼmo lokiyaʼamo hanege hanege huno hanegaiyaʼmofeʼmo Ala kava nefeʼmo muki afinaʼmo alita amufa amiyo.

⁵ Agaemo anagamo haneʼniya taonifiʼmo maiʼnaya vayaʼmo alino afepiʼmo neʼapate. Agaemo anaga lokiya taonimo heno halagape vaiʼnigeno mopafiʼmo alagi asagauno neʼaiye.

⁶ Kagemi yaʼapimo ohaneʼniya vayaʼe kafu nehaya vayaʼeʼmo apaiyaletiʼmo ani taonimo noʼatufaleʼmo uʼa aeʼa latapaigae.

⁷ Fatago vayaʼmogimo api kateʼmo neʼvae. O alagi api Gotigae, huʼna, kagaemo fatago vayaʼmogimo neʼvaya kaʼmo alika api aika neʼatane.

⁸ O Ala kava nene, huta, kagaemo kagesa afiteka huʼnana kavafeʼmo lagesamo afiteta laha maesanafeʼmo kagava neʼmaune. Kagikalefeʼmo lagesamo afige kagaefeʼmo lage okanita lagesamo afige nehutaeʼmo lagupi mafaʼnemoʼmo lusi kava huno hauʼniye.

⁹ Haniʼilagamo nagupi mafaʼnemoʼmo kagaefeʼmo lusi kava huno hauʼniye. He, gotilamiyapiʼmo kagesuvafeʼmo kahauya huʼna kagegauve. Kagaemo alika fako huka apatesanageʼapaeʼmo ma mopafi vayaʼmogi fatago kavafeʼmo afiteʼa agegae.

¹⁰ Gotiʼa hosu vayaʼaina fiku hapa maeno apamisiyaʼmoʼmo fatago kavaʼmo hisaya kavaʼmo oʼagegae. Apakaemo fatago vayaʼmo maiʼnaya koteʼmo hosu kavaʼmo huteʼa Ala kava neʼmo ha le konali yaʼamo oʼagegae.

¹¹ Ala kava nene, huʼna, koli hisayafeʼmo kayaʼmo alika asagauʼnanaʼmonanafa apakaemo oʼagegae. Oʼagegayaʼmonanafa vayakamo hapa maesanafeʼmo kahaʼye nehiya kavaʼmo ageteʼa apavagage hugiye. Kagaemo vayakaeʼmo lusi kava huno kahauʼnigeka hapa neʼmane, huʼa ageteʼa apavagage hugiye. He, kaipamo lesiya kavakamoʼmo kame vayakamo atakana huno apalegaiye.

¹² Ala kava nene, huʼna, alagepa aliʼyatimo lagaepiʼmo alo huʼnanaʼmofeʼmo laha maesanageno laipamoʼmo falu hisigeta alagepa huta maigune.

¹³ O Ala kava neʼmo Gotitimogae, huʼna, kagaeʼe alu vayaʼmo yagaiʼnaya vayaʼmogiʼeʼmo yagaiʼa lateʼnayaʼmonanafa kagaikageʼmo ala kagikamo nekamune.

¹⁴ Ani ala vayaʼmo ago faliʼnae. Afaʼa oʼmaigae. Halate afaʼa oʼmaigae. Afaʼa he otigae. Kagaemo lokiyaʼapimo alika hano huka ataleʼnananageʼa vayaʼmogimo apakiʼapieʼmo magoʼe huʼa apakesamo oʼafigae.

¹⁵ O Ala kava nene, huʼna, Kagaemo kagaika nofi vayaʼmo magoʼe huka alika apateʼnane. He, magoʼe huka alika apateʼnanageʼa magoʼe huʼa vayakamo afole aiʼnae. Ala kagikamo aliʼnane. Kagaemo lagae mopamo hakuʼmo alime alime uteka maleʼnane.

¹⁶ Ala kava nene, huʼna, Vayakamogimo hanageke yaʼmo aliʼneʼapaeʼmo hapa maesanafeʼmo kagaetegamo uʼnae. Kayoʼmo apamiʼnanageʼapaeʼmo nunumuʼmo huʼnae.

¹⁷ Ala kava nene, huʼna, Kagae kaulagaleʼmo lagaemo aʼnemogimo mafaʼnemo aliʼa atesayafeʼmo apakafu kiʼnigeʼa yulagefa neʼaiya kava huta maiʼnone.

¹⁸ Lagaemo mafaʼnemo alita atesunafeʼmo lagafu nekiyaʼmonanafa yasiʼageʼmo alita ateʼnone. Lagaemo vayaʼai apakufamo alita katita oʼapateʼnone. Ma mopafi kame vayatimo asagauʼa oʼaiʼnae.

¹⁹ Kagaemo nofi vayakamo faliʼnayanageʼa he tigae. Isaleli vayaʼmogimo huʼapaeʼmo, lagae lagufamo he tigiye, huʼa huʼnae. Mopafiʼmo kanolufi maiʼnaya vayanagi he tita yokemo hiyo. Na agufa kavatefene. Lao yaʼmo mopaleʼmo asagauno neʼaigenoʼaeʼmo kahaumo nelagiya kava huno Gotiʼa lao yaʼamo alino atesigenoʼaeʼmo faliʼnaya vayaʼaiteʼmo asagauno aisigeʼa he tigae.

Hosu kavaʼmo afole aigiyanagi eta fala kiyo, huno huʼniya gemae

²⁰ Gotiʼa agaemo hapa painoʼaeʼmo, Vayaʼnimogitapae, huno, Notapifiʼmo uta haiʼnetapa kitamo ki maleyo. Aise afinaʼmo fala kitapa maime maime neʼvigenoʼao aipamo leno neʼapateya kavaʼamo hano hugiye.

²¹ Na kava higeʼapaene. Afiyo, Ala kava neʼmoʼa ma mopafi vayaʼmogi hosu kavaʼmo huʼnayaʼmofeʼmo kayoʼmo apamisiyafeʼmo koʼamo ataleno emiʼneʼe. Ma mopamoʼmo magoʼe huno apamagiʼnigeʼa faliʼnaya vayaʼmogi kolaʼapimo aeno ati okaegaiyaʼmonanafa vayaʼmogimo apamagiʼnageʼa faliʼnaya vayaʼmogi kolaʼapimo alagi alino afole aisigeʼa agegae.