Aiyeya 25 - The Keyagana NT and 25 OT books

Goti agiʼaleʼmo aliʼa asaga huʼa atesaya kavafeʼmo huʼniya gemae

¹ O Ala kava nene, huʼna, kagaemo Gotiʼnimogae, huʼna, kagikaleʼmo aliʼna asaga huguve. Kagaemo ageta lahau aiʼnona kavaʼmo huʼnanaʼmofeʼmo ala kagikamo kamiguve. Akeyaʼvilagamo kagaemo kagesa afikaeʼmo, ani kavaʼmo alagi huguve, huka lama gemo huteka ani kavaʼmo huʼnane.

² Kagaemo mago taonimo heka halagape vaika ataleʼnane. Kagaemo lokiya taonimo yafatetiʼmo ki maleʼnaya taonimo alika noʼatufaʼageʼmo haʼmaleka ateʼnane. Alu nofi vayaʼmogi alopa taonimo alagi alika hano huka ataleʼnananageʼa halate okigae.

³ Kagaemo ani kavaʼmo huʼnanaʼmofeʼmo lokiya kame vayaʼmogi ala kagikamo kamigae. Koli yaʼmo aliʼa neʼapamiya nofi vayaʼmogimo kagaefeʼmo koli hugae.

⁴ Kagaemo kagemi yaʼapimo ohaneʼniya vayaʼmo alika lokiya vaika apateʼnane. Kagaemo kafu nehaya vayaʼmo alika lokiya vaika apateʼnane. Kagaemo fala kiʼa maiʼnaya koʼapigana huka maiʼnane. Kana yaʼmo afole aiʼniya afinaʼmo apakaiʼapimo hapa maesiya yaʼmo oʼaliʼnisaya vayaʼmo fala kiʼa maiʼnaya koʼapigana huka maiʼnane. Koli yaʼmo aliʼa neʼapamiya vayaʼmogimo apaipamo neleya kavaʼmoʼa lokiya yasimoʼmo kegiʼyamo alino agoʼya faino neʼataleya yasigana huno haneʼniyaʼmofeʼmo yasi alige ko aige amuko huge huʼniya afinaʼmo aika ati kaeka apateʼnane.

⁵ Kagaemo alu nofi vayaʼmogi apavayaleʼmo aika neʼakanine. Lokiya yegemo neleya afinaʼmo hiyaʼmoʼa yegeleʼmo aino ati kaeʼnigeno yasi nehiya agufa kavaʼmo huka koli yaʼmo aliʼa neʼapamiya vayaʼmo apatafaugane.

⁶ Muki vayaʼaiteʼmo yagaino neʼapateya Ala kava neʼmoʼa muki vayaʼmogi ani aveleʼmo nesaya neʼyaʼmo hogote neʼyanagi hogote nofi alagafati aninagi alagepa ameʼagi huno yagita huʼniye.

⁷ Ala kava neʼmoʼa Saiyoni aveleʼmo muki vayaʼmogi apaugosafiʼmo aino ati kae maleʼniya agufa lavolavomo alino hano huno atalegaiye. Agaemo muki alu nofi vayaʼe alu nofi vayaʼeʼmo aino ati kaeʼniyanageʼa afaʼa oʼagesayategamo alino atalegaiye.

⁸ Agaemo nefaliya kavaʼmo alagi alino hano huno atalegaiye. He, Ala kava neʼmo Gotiʼa apaulagafatiʼmo muki apaunumo alagi alino laneno atalegaiye. Ala kava neʼmoʼa, ani kavaʼmo huguve, huno huʼniyaʼmofeʼmo ma mopafiʼmo muki haopalega maiʼnaya vayaʼmogi apavagage yaʼmo alagi alino hano huno atalegaiye.

⁹ Ani kavaʼmo afole aisiya afinaʼmo vayaʼamogimo huʼapaeʼmo, Ageyo, huʼa, Gotitimoʼmae. Lagaemo agava maiʼnonanageno lagufamo alino katino lategaiye. Agaemo Ala kava neʼmo maiʼnigeta agava maiʼnone. Lagufamo alino katino latesigetaeʼmo lamogaga lamagaga aigune.

¹⁰ Ala kava neʼmoʼa laha maesiyafeʼmo ayaʼmo Saiyoni aveleʼmo malegaiyaʼmonanafa pulumaka anagaʼmogimo kahaumo apakaiʼapi aifafiʼmo aeʼa lata nepaiya kava huno kame vayatimo Movapu vayaʼmo aeno lata paigiye.

¹¹ Vayaʼmogi anipiʼmo lokiya vaiʼa nagosamo ailiʼa neʼvaya kava huʼa Movapu vayaʼmogimo apayamukiki hugayaʼmonanafa Ala kava neʼmoʼa himuʼnamu kavaʼapiʼe humi neʼapataya lokiya kavaʼapiʼeʼmo alino afepiʼmo ategaiye.

¹² Agaemo taoniʼapile lokiya yafa kegiʼyamo alino halagape vaino atalegaiye. Kegiʼyamo anagamo haneʼniyaʼmonanafa agaemo kegiʼyamo mopafiʼmo alagi asagauno aisiya kavaʼmo hugiye.