Aiyeya 2 - The Keyagana NT and 25 OT books

Ala kava neʼmoʼa Saiyoni vayaʼaiteʼmo yagaino apatesiya kini vekamo maisiya gemae

¹ Aiyeyaʼa Emoyi mafaʼnemo Yuta nofi vayaʼe Yulusalemu taonifiʼmo maiʼnaya vayaʼefeʼmo apava gemo alagamuna ageʼniya kavatetiʼmo afitenoʼaeʼmo ina gemo huʼniye.

² Henagaʼamo atupa afinaʼmo Ala kava neʼmo alopa mono noʼamo haneʼniya avemoʼmo anagaʼamo haneʼneno haino kasaeteno muki aveʼamo alino aiyafiʼmo apategaiye. Aniʼmo uno nelamiya kava huʼa muki alu nofi vaya alu nofi vayaʼmo ani mono notegamo uʼa haigae.

³ Asole vayaʼmogi eʼa huʼapaeʼmo, Egetao, Ala kava neʼmo aote aveleʼmo uta haigune. Yekopu Gotiʼamo mono noʼafiʼmo uta haisunageno hauʼniya kateʼmo visunafeʼmo alino laya malesigeta kaʼaleʼmo uteta hugune. Keʼaepa gemo Saiyoni aveletiʼmo uneno hugiye. Ala kava neʼmo geʼamo Yulusalemu taonifatiʼmo aino atagu faeno uneno hugiye.

⁴ Agaemo alu nofi vayaʼe alu nofi vayaʼeʼmo alino fako huno apateteno maiʼnaya asole vayakoʼmo ge hapaugiye. Inagi apakaemo naipeʼapileʼmo neʼamagisagenoʼaeʼmo aiʼyumo neʼaiya aenimo alino hamalege hayoʼapileʼmo neʼamagisagenoʼaeʼmo nofiʼmo nehatagaya haginamo alino hamalege hugiye. Muki nofi vayaʼmogimo magoʼe huʼa kame osuge kame hisaya kavaʼmo magoʼe huʼa aliʼa apaya oʼmalege hugae.

Ala kava neʼmo afinaʼmo afole aisiya kavafeʼmo huʼniya gemae

⁵ Yekopu aginago vayaʼmogitapae, huʼna, Egetao Ala kava neʼmoʼa aeno ha neleya kavategamo umenitata hugune.

⁶ Ala kava nene, huʼna, Vayakamo Yekopu aginago vayaʼmogi yegemo haine neʼeya haopalegatinagi Filisitiya vayaʼaitegatiʼenagi huʼa analisa kavaʼe lusa agufa kavaʼeʼmo aliteʼa akame nehayaʼmofeʼmo kagaemo vayakamo apataleka uʼnane. Hemenimo kagae vayaʼai apaipafiʼmo ani agufa hosu kavaʼmo havai teʼnigeʼa malaga nofi vayaʼmo aliʼa apao yaʼmo nehae.

⁷ Siluvamoʼmogi golimoʼmogi hosimoʼmogi kame nehaya talalamoʼmogi muki alopa moniletiʼmo miya nefaiya yaʼmoʼagi huno Isaleli mopafiʼmo alagi havai teʼniyanageʼa afaʼa lekana opaigae.

⁸ Ina kava huno aigofe gotigi apauneʼamoʼmo apakae mopaleʼmo alagi havai teʼnigeʼa ani apayatetiʼmo alo huʼnaya yatefekeʼmo monoʼmo nehae.

⁹ Afa vayaʼe ala apaki vayaʼeʼmo aigofe monoʼmo hisayafeʼmo ape nehayaʼmofeʼmo kagaemo hosu kavaʼapimo alika oʼatalo.

¹⁰ Vayaʼmogitapae, huʼna, Ala kava neʼmoʼa ha le konali yaʼaʼe lokiyaʼaʼeʼmo afole aisigeta agetetapaeʼmo lusi kava huta koli hugayanagi lapaune hetaletapa uta yafa kapiʼmo fala kige mopafiʼmo kelimo kafi maleʼnetapa uta haitapa fala kige hiyo.

¹¹ Ala kava neʼmo afole aisiya afinaʼmo ala apakimo neʼaliya vayaʼe apakiʼapileʼmo aliʼa asaga nehaya vayaʼeʼmo alino afepiʼmo apatesigeʼa Ala kava nekeʼmo aliʼa asaga huʼa ategae.

¹² Muki vayaʼaiteʼmo yagaino neʼapateya Ala kava neʼmo afinaʼmo afole aisigeʼapaeʼmo muki vayaʼmogimo apakaiʼapi apakiʼapileʼmo aliʼa asaga nehaya vayanagi ala agi kavanagi ala apaki vayanagi ala agimo haneʼniya yanagi huno alino afepiʼmo apategaiye.

¹³ Agaemo Lemanoni aveleʼmo kanale yatala Sita yosaʼapiʼe Mesani kotega lokiya Oki yosaʼapiʼeʼmo alino afepiʼmo apategaiye.

¹⁴ Agaemo muki yatala aveʼe aiseʼamo yatala hugekana aveʼeʼmo alino afepiʼmo apategaiye.

¹⁵ Agaemo kame vayaʼmogi ohapaesayafeʼmo muki yatala noʼe taonile yatala kegiʼyaʼeʼmo alino afepiʼmo ategaiye.

¹⁶ Agaemo muki Tasisi vayaʼmogi kanale alopa sipiʼapimo alino afepiʼmo ategaiye.

¹⁷ Ala kava neʼmo afole aisiya afinaʼmo ala apakimo neʼaliya vayaʼe apakiʼapileʼmo aliʼa asaga nehaya vayaʼeʼmo alino afepiʼmo apatesigeʼa Ala kava nekeʼmo aliʼa asaga huʼa ategae.

¹⁸ Ategayaʼmonanafa aigofe gotigi apauneʼamo alagi alino hano huno atalegaiye.

¹⁹ Ala kava neʼmoʼa ha le konali yaʼaletiʼe lokiyaʼaletiʼeʼmo emineno he tino maiʼnenoʼaeʼmo mopaleʼmo lusi kava huno alino kanage kanage hisigeʼapaeʼmo aipamo leno apatesiya kavategatiʼmo apaune hetaleʼa uʼa ha le konali yaʼamo ageteʼapaeʼmo yafa kapiʼmo uʼa fala kige mopafiʼmo kelimo kafi maleʼneʼa uʼa haiʼa fala kige hugae.

²⁰ Ani afinaʼmo vayaʼmogimo aigofe gotigi apauneʼalefeʼmo mono nehaya yaʼmo siluvaletiʼe goliletiʼeʼmo alo huʼnaya yaʼmo aliniʼuʼa kafaʼe lapaʼeʼmo neʼmaiya yategamo yaga auʼa atalegae.

²¹ Ala kava neʼmoʼa ha le konali yaʼaletiʼe lokiyaʼaletiʼeʼmo emineno he tino maiʼnenoʼaeʼmo mopaleʼmo lusi kava huno alino kanage kanage hisigeʼapaeʼmo aipamo leno apatesiya kavategatiʼmo apaune hetaleʼa uʼa ha le konali yaʼamo ageteʼapaeʼmo yafa kapiʼmo uʼa fala kige mopafiʼmo kelimo kafi maleʼneʼa uʼa haiʼa fala kige hugae.

²² Lapakaemo mago vekamoʼmo laha maegaiye, hutapa lapakesamo oʼafiyo. Ma mopafi vayaʼmo aupa afinaʼatomo maiteʼa nefaliye. Apakaemo ina agufa yaʼmo maiʼnayaʼmofeʼmo na agufa alagepa yakana huʼa maiʼnae. Haʼao, afa yakana huʼa maiʼnae.