Aiyeya 12 - The Keyagana NT and 25 OT books

Goti agiʼaleʼmo alino asaga huno huʼniya yokemae

¹ Ani afinaʼmo Goti vayaʼamogi huʼapaeʼmo, O Ala kava nene, huʼa, kaipamo leka lateʼnanaʼmonanafa kaipamo leka nateʼnana kavakamo hano huʼnigekaeʼmo naipamo alika falu huʼnane.

² Afiyo, huʼa, Gotiʼa nagufamo alino katino neʼnateya vekamo maiʼniye. Ala kava neʼmoʼa mago agiʼamo Yamo nagaemo lokiya vaiʼna neʼmauva kavaʼmo nehiyanageʼna agiʼaleʼmo aliʼna asaga hisuva yokemo huguvaʼmofeʼmo nagaemo agaefekeʼmo aliʼna amufa amiʼnaeʼmo koli osuguve. Agaemo nagufamo alino katino neʼnateya vekamo hamaleʼniye.

³ Hamaleʼniyaʼmofeʼmo kagufamo alino katino kateʼniya kavaʼmoʼa ani keli kotugana huno haneʼniye. Kagaemo ani ani kotupatiʼmo aniʼmo he fika netekaeʼmo kamogaga aige aige huka maigane.

⁴ Kagaemo ani afinaʼmo ina gemo hugane. Ala kava neʼmo agiʼaleʼmo alita asaga hiyo. Agaefeʼmo agimo aeta keya aeyo. Muki nofi vayaʼaifeʼmo alopa aliʼyaʼmo neʼaliya kavafeʼmo aeta hakalo hiyo. Ala agiʼamo aliʼniye, hutapa hiyo.

⁵ Agaemo alagi alagepa aliʼyaʼmo aliʼniyaʼmofeʼmo Ala kava nefeʼmo yokemo hiyo. Muki nofi vayaʼmogimo mani gemo afiʼnae.

⁶ Isaleli vayaʼmogi aote Gotiʼa lapakae folagapiʼmo maiʼniya aote vekamo ala agi vekamo maiʼniyaʼmofeʼmo O, Saiyoni taonifiʼmo maiʼnaya vayanagi alopa gefatiʼmo hiyo.