Aiyeya 11 - The Keyagana NT and 25 OT books

Yesi aginago vekamoʼmo kini vekamo maiʼneno yagaisiya kavafeʼmo huʼniya gemae

¹ Yesiʼmo mago heʼya aiʼniya yosamo hafuʼyafatiʼmo saufa ausisimo aegaiye.

² Ala kava neʼmo Aunemeʼamoʼmo agaeteʼmo emineno maigiye. Ageteno neʼafiya kavanagi afino aeto nehiya kavanagi alino apaya neʼmaleya kavanagi lokiyaʼagi afisiya kavanagi Ala kava nefeʼmo koli huteno akame nehiya kavanagi huno alino amisiya Aunemeʼamo agaeteʼmo maigiye.

³ Goti Aunemeʼamoʼmo amisigeno agaemo Ala kava nefeʼmo koli huteno akame hisiyafeʼmo amogaga aigiye. Aulagafatiʼmo neʼageya kavatefeʼmo alino fako osuge agesafatiʼmo neʼafiya gelefeʼmo ge osuge hugiyaʼmonanafa

⁴ agaemo fatago kavaʼaletiʼmo kagemi yaʼapimo ohaneʼniya vayaʼmo alino fako huno apategaiye. Agaemo lama geʼaletiʼmo hunoʼaeʼmo himuʼnamu kavaʼmo osuʼa yagu yaga kavaʼmo nehaya vayaʼmo hapa maegaiye. Agaemo avayafatiʼmo uʼniya kayotetiʼmo ma mopafi vayaʼmo apamagigiye. Avamusatetiʼmo hosu vayaʼmo kamitimo apamagigiye.

⁵ Fatago kavaʼmo mapalugana huno afafaleʼmo aegaiye. Ina kava huno aliʼyaʼamo oʼataleno alagepa huno alime alime visiya kavaʼamoʼmo mapalugana huno aegaiye.

⁶ Lokiya afela kala anagaʼmogimo aikeli sipisipi anagaʼeʼmo magokepi lokaeʼa maigae. Lokiya afela pusi anagaʼmogimo aikeli meme anagaʼeʼmo magokepi lokaeʼa havaegae. Aikeli laiyoni anagaʼmogiʼe afayaʼe aikeli pulumaka anagaʼeʼmo magokepi lokaeʼa maiʼneʼa neʼyaʼmo negae. Aise mafaʼnemoʼmo yagaino apategaiye.

⁷ Pulumaka anagaʼe meya anagaʼeʼmo kahaumo negae. Aikeli pulumaka anagaʼe meya aikeli anagaʼeʼmo magokepi lokaeʼa havaegae. Pulumakamogi kahaumo neʼnaya kava huʼa laiyoni anagaʼmogi kahaumo negae.

⁸ Nute mafaʼnemoʼmo vayaʼmo nehapaeya nakaloʼyavemo kelileʼmo yokalo legaiye. Nuʼmo mosiʼniya mafaʼnemoʼmo nakaloʼyavemo anopiʼmo ayaʼmo vaisiyana ohaegaiye.

⁹ Vayaʼmogimo naote aveʼnileʼmo muki kotegamo kaveta osuge aliʼa hosu huʼa oʼapatege huteʼa alagepa huʼa maigae. Aniʼmoʼa muki solovala aniteʼmo aino ati nekaeya kava huno Ala kava nefeʼmo ava gemo afiʼnaya gemoʼmo muki haopalegamo hanegaiyaʼmofeʼmo muki vayaʼmogi aliʼa hosu huʼa oʼapatege oʼapamagige huteʼa alagepa kavaʼage huʼa magokepiʼmo lokaeʼa maigae.

¹⁰ Ani afole aisiya afinaʼmo Yesi hafuʼyaʼafatiʼmo afole aisiya aginago vekaʼamoʼmo kalahuʼmekana huno maiʼneno he tisigeʼa vayaʼmogi agaetegamo eʼa aliʼa anupa huʼa maigae. Malaga nofi vayaʼmogimo kahauya huʼa ageteʼa agaetegamo egae. Agaemo fiku hapa maeno apamisigeʼa ha le konali noʼafiʼmo maiʼa hagalegae.

¹¹ Ani afinaʼmo Ala kava neʼmoʼa napa tu afinaʼmo lokiyaʼamo alino apave litenoʼaeʼmo logufa vayaʼamo noʼapilegamo apavalelino egaiye. Agaemo Asiliya kotegatinagi Isipi kotegatinagi Patalasi kotegatinagi Kasi kotegatinagi Ilami kotegatinagi Saina kotegatinagi Hemati kotegatinagi afagi kotegatinagi huno apavalelino egaiye.

¹² Agaemo kalahuʼmeʼmo alino asai maleteno hapa faiʼa apataleʼnaya Isaleli vayaʼe hapa faiʼa apataleʼnageʼa atagu faeʼa uʼeʼa huʼnaya Yuta vayaʼmogiʼeʼmo ma mopamo loleʼe loleʼe atupaletiʼmo apavalelino eno alino anupa huno apategaiye.

¹³ Ani afinaʼmo Ifalemi nofi vayaʼmogimo magoʼe huʼa apaipa kafa ohapaesageʼa Yuta vayaʼmogimo kamemo vayaʼapimo hapaeʼa hano huʼa apatalegae. Ifalemi vayaʼmogimo Yuta vayaʼaifeʼmo apaipa kafa ohapaesageʼa Yuta vayaʼmogimo Ifalemi vayaʼeʼmo kamemo osugae.

¹⁴ Ani lole nofi vayaʼmogimo hapaesaya namagana huʼa yegemo uno lamino nefaleya kotegamo haleliʼuʼa Filisatini vayaʼmogi apakiʼnaleʼmo hakaleʼneʼa magokepiʼmo yegemo haine neʼeya kotega maiʼnaya vayaʼeʼmo kamemo huteʼa kagemiyaʼapimo aliniʼa ugae. Apakaemo Itomi vayaʼe Movapu vayaʼeʼmo kamemo huteʼa huʼa aeʼa apaka sesageʼa Emoni vayaʼmogimo apaiyafiʼmo maigae.

¹⁵ Ala kava neʼmoʼa Haesa solovala aniʼmo alino laneno atalegaiye. Agaemo lokiya yasimo alino ateʼnigeno alinineno alopa Yufaletisi aniʼmo alino hau huteno alino fako huno aise aise huno seveniʼa ani kapiʼmo uno lamisigeʼa vayaʼmogimo suʼapimo afaʼa vaiʼa alineʼa lakaeʼa ugae.

¹⁶ Isaleli vayaʼmo Isipi kotegatiʼmo eʼnaya afinaʼmo kale kakana agufa kateʼmo eʼnaya kava huʼa Goti vayaʼamo Isaleli vayapatiʼmo logufaʼamo Asiliya kotegatiʼmo hau huʼnisiya kateʼmo egae.