Aiyeya 1 - The Keyagana NT and 25 OT books

¹ Mani mukufiʼmo Aiyeyaʼmo Emoyi mafaʼnemoʼmo Uyaiyaʼagi Yotamiʼagi Ehayiʼagi Heyekaiyaʼagi huʼa Yuta vayaʼai kini vayaʼmo maiʼnaya afinaʼmo Yuta nofi vayaʼe Yulusalemu taonifiʼmo maiʼnaya vayaʼefeʼmo Gotiʼa alino aveliʼnigeno ageʼniya kavafeʼmo avoʼmo kaeʼniye.

Yuta nofi vayaʼmogi hosu kavaʼapieʼmo huʼniya gemae

² Ala kava neʼmoʼa hunoʼaeʼmo, Kokunapi vayanagi ma mopafi vayanagi hutapa geʼnimo afiyo. Ala kava neʼmoʼnamo nagemo aiʼna gemo ago hu maleʼnovaʼmofeʼmo afiyo. Nagaemo mafaʼneʼnimo alagepa huʼna yagaiʼna apateʼnovaʼmonanafa yagaiʼna apateʼnova vekamoʼna geʼnimo oʼafiʼnae.

³ Pulumakamogimo afoʼapimoʼmo ago ageʼnae. Nokimogimo afoʼapimoʼmo neʼyaʼmo neʼapamiya yuvapamo ago ageʼnae. Ageʼnayaʼmonanafa Isaleli vayaʼmogi nagaemo nageʼa aeto osuʼnae. Vayaʼnimo maiʼnayaʼmonanafa nagaefeʼmo apakesamo noʼafiye.

⁴ Apakaemo hosu kavaʼmo nehaya nofi vayane. Apakaemo hosu kavaʼapilefeʼmo alopa vaiʼmo aliʼnae. Hosu kavaʼmo nehaya mafaʼne anagaʼmo maiʼnae. Aliʼa hosu huʼa neʼapataya mafaʼne anagaʼmo maiʼnae. Apakaemo Ala kava neʼmo ataleʼa uʼnae. Apakaemo Isaleli vayaʼai Aote Vekamoʼmo aipamo leno apatesiya agufa kavaʼmo huʼnae. Geʼamo amagiʼa ataleteʼa aiʼa atagineʼa hosu kavategamo uʼnae.

⁵ Haiya kava hinageʼnaeʼmo nagaemo magoʼe huʼna lapamagiguve. Yagaiʼna neʼapatova vekamoʼna geʼnimo magoʼe magoʼe hutapa amagita atalegae. Isaleli vayaʼmogitapae, huʼna, lapakenopafiʼmo kaitamo havaiteʼniye. Muki apaipamoʼmo lokiyaʼamo alagi ohaneʼniye.

⁶ Apaiya agusafatiʼmo kaitaʼmo aepa faiteno hapaulino apakenopafiʼmo uno haiʼniye. Apakufamoʼmo magokayaga hapaopaʼamo alagepa huno ohaneʼniye. Muki apakufaʼafiʼmo hanageke yaʼmo aliʼnageno kola huge apamagino kofino apatege apamuʼmo apaleteno oʼmo huge huʼniye. Hayaeʼa oʼapatege fakaniʼa oʼapatege malasini faleʼa oʼapatege huʼnae.

⁷ Kame vayatapimogimo eʼa kotapimo aliʼa hosu huʼa ataleteʼa taonitapimo ata kaegae. Lapakaemo apaketapa maiʼnisageʼapaeʼmo muki hoyatapifatiʼmo neʼyaʼmo aligae. Alu kotega vayaʼmogimo eʼa kotapileʼmo haneʼniya yaʼmo aliʼa hosu huʼa ataleʼnageno mopatapimo afaʼa haneʼniye.

⁸ Nofi hoyafiʼmo hiyato noʼmo haneʼniya kava huʼa Yulusalemu taonifi vayaʼmo maiʼnae. Kono hoyafiʼmo aigofe noʼmo nekiya noʼmo haneʼniya kava huʼa Yulusalemu taonifi vayaʼmo maiʼnae. Apakaemo kame vayaʼmogimo eʼa faiʼa vego huʼnaya taonigana huʼa maiʼnae.

⁹ Aiyeyaʼa hunoʼaeʼmo, Ala kava neʼmoʼa asole vayaʼaiteʼmo yagaino apateʼniya Gotiʼa aise aise huno logufaʼa vayaʼmo olateʼniyesinana Satomi taonifi maiʼnaya vayakana huta maige Gomola taonifi maiʼnaya vayakana huta maige huʼnonesine, huno huʼniye.

¹⁰ Yulusalemu koteʼmo yagaiʼnaya vayaʼmogitapae, huʼna, Satomi koteʼmo yagaiʼnaya vayakana hutapa maiʼnayanagi Ala kava neʼmo geʼamo afiyo. Yulusalemu taonifiʼmo maiʼnaya vayaʼmogitapae, huʼna, Gomola taonifiʼmo maiʼnaya vayakana hutapa maiʼnayanagi Gotitimo keʼaepa geʼaeʼmo alagepa hutapa lapaketafo hiyo.

¹¹ Ala kava neʼmoʼa hunoʼaeʼmo, Na agufa kavatefeʼmo asole ofalini afumo amagita neʼnamiye. Lapakaemo afayaʼaʼe pulumakamo amagitapa afayaʼamo namige ve sipisipimo amagitapa atafiʼmo kaeta namige huʼnageʼnaeʼmo alagi haiʼmo aliʼnove. Nagaemo ve pulumakamo kolafeʼmofi sipisipimo kolafeʼmofi mememo kolafeʼmofi huʼna amuse nosuve.

¹² Lapakaemo naulagaleʼmo he tisayafeʼmo eʼnaya afinaʼmo mono no kumaʼnileʼmo umenitata hutapaeʼmo alita hosu hutapageʼmo neʼatae. Ina laʼmo ani kavaʼmo hiyo, huno lapa paiʼniye.

¹³ Magoʼe hutapa afa ofalinimo alinitetapa oʼnamiyo. Mono nehutapaeʼmo alagepa atumo neʼaiya yaʼmo nekaya kavafeʼmo alagi oʼnahaiye. Lapakaemo saufa kaileʼmo mono huge Sapati afinaʼmo mono huge alita anupa hutapa maige nehaya kavaʼmo magoʼe hutapa hisayafeʼmo alagi oʼnahaiye. Mono nehutapaeʼmo hosu kavaʼmo nehayaʼmofeʼmo alagi oʼnahaiye.

¹⁴ Nagupi mafaʼnemoʼmo saufa kaile mono kavafenagi aote afinaʼmo lekana pai maleʼnaya mono kavafenagi huno alagi oʼnahauʼniye. Nagaemo ani mono kavaʼamoʼmo kana yaʼmo alino namiʼnigeno alagaʼmo neʼnahaeye.

¹⁵ Lapayaʼmo alita asaga huliʼnetapaeʼmo nunumuʼmo hisageʼnaeʼmo naulagaleʼmo aiʼna ati kaeteʼnaeʼmo olapakegauve. Vayaʼmogi kolaʼapimo lapayateʼmo haneʼniyaʼmofeʼmo asole nunumuʼmo hisageʼnaeʼmo oʼafiguve.

¹⁶ Lapakaitapimo sese huta lapateyo. Yaveyave apaipa vayaʼmo alita hamaletapa apateyo. Naulagaleʼmo hosu kavatapimo alita ataleyo. Magoʼe hutapa osuta ataleyo.

¹⁷ Alagepa kavaʼmo hisayafeʼmo aliʼna lapaya malesuva gemo afiyo. Alagepa hutapa agoti hisayafeʼmo he tita lokiya vaitapa maiyo. Aliʼa afepiʼmo neʼapataya vayaʼaifeʼmo ge hapaiyo. Megusa mafaʼnemo hapa maeyo. Lapakaemo hutapaeʼmo, Lahapao ke hone, Kogu aʼnemo alagepa huʼa maisayafeʼmo hapa maeyo, hutapa hapa paiyo.

¹⁸ Ala kava neʼmoʼa hunoʼaeʼmo, Lapakaemo nagaetegamo egetao nagaeʼeʼmo ge huge afige huta maigune. Hosu kavatapimoʼmo haesa yakana huno aeno kamaeʼniyaʼmonanafa yave yaveʼage huno hanegaiye, huno hapa paiʼniye.

¹⁹ Lapakaemo alagepa kavaʼmo hisayafeʼmo lahapauge geʼnimo akame huge hisayana hoyatapifatiʼmo kanale neʼyaʼmo afole neʼaiya neʼyaʼmo negae.

²⁰ Negayaʼmonanafa lapakaemo olapauʼnigetapa geʼnimo amagita atalesayaʼmoʼmo inagi kame vayatapimogimo eʼa kamitimo lapaesagetapa faligae. Nagaemo Ala Kava neʼmoʼnamo ani gemo ago huʼnovaʼmofeʼmae.

Hosu taonieʼmo ava gemo huʼniya gemae

²¹ Yulusalemu taoniyo, huno, akeyaʼvilagamo alagepa huka geʼnimo afiʼnanaʼmonanafa hemenimo mago kumai a kanomo hamaleʼnane. Kagaemo agoti gemo alagepa huʼa afiʼnaya vayaʼe fatago vayaʼeʼmo havaiteʼnayaʼmonanafa hemenimo kagaemo kamitimo hapaenageʼa faliʼnaya vayaʼmogimo kili paeʼnae.

²² Akeyaʼvilagamo alagepa siluva yafakamo haneʼniyaʼmonanafa hemenimo aliʼa yaga auʼa neʼatalaya yafakana huka hamaleʼnane. Nofi alagafati anikamo anilafaʼeʼmo haneʼniye.

²³ Neʼyagaiya vayakamogimo gemo noʼafiya vayane. Apakaemo kumayaʼmo neʼaliya vayaʼeʼmo magokepi lokaeʼa neʼmaiye. Muki neʼyagaiya vayaʼmogimo kutulu yaʼmo hisaya monieʼmo hapauʼniye. Monimo fiku alisayafeʼmo vegala neʼae. Apakaemo megusa mafaʼne anagaʼmo hapa noʼmae. Kogu aʼne anagaʼmogi geʼapimo alagepa huʼa oʼafiʼa aliʼa kanale huʼa noʼapatae.

²⁴ Nehayaʼmofeʼmo Yulusalemu vayane, huno, Ala kava neʼmoʼa muki vayaʼaiteʼmo yagaino neʼapateya vekamo Isaleli vayaʼmogi lokiyaʼaʼe Gotiʼapimoʼmo ina ge huno huʼniye. Nagaetegamo kame hisaya vayaʼmo hapa faiʼna apatalegauve. Kame vayaʼnimo anonaʼapilefeʼmo kayoʼmo apamiguve.

²⁵ Nagaemo nayatetiʼmo aliʼna alagepa huʼna lapategauve. Siluva yafaʼmo atafiʼmo kaeʼnageno oʼaniyaʼamo leno kalo paeno neʼataleya agufa kavaʼmo huʼna hosu kavatapimo alagi aliʼna ataleteʼna muki oʼaniyatapimo aeʼna kalo paeʼna atalegauve.

²⁶ Nagaemo halate alagepa huʼa yagaisaya vayaʼe agoti gemo afisaya fatago vayaʼeʼmo akeyaʼvilagamo kagaeteʼmo maiʼnaya agufa vayaʼmo aliʼna afole aiʼna apategauve. Henagaʼamo vayaʼmogimo kagaefeʼmo ina gemo huʼapaeʼmo, Fatago kavaʼmo haneʼniya taoniye, huʼa, kagi aege Goti geʼamo oʼataleno akame nehiya taoniye, huʼa kagi aege hugae.

²⁷ Ala kava neʼmoʼa Saiyoni vayaʼmo agoti huno apateteno fatago kavaʼaletiʼmo miya faino hatu maeno apategaiye. Apaipamo aliʼa afe lesaya vayaʼmo fatago kavaʼaletiʼmo miya faino hatu maeno apategaiye.

²⁸ Ani afinaʼmo Goti geʼamo amagiʼa neʼatalaya vayaʼe hosu kavaʼmo nehaya vayaʼeʼmo alagi alino hano huno apatalegaiye.

²⁹ Lapakaemo mono huʼnaya yosamo alopa yosalefeʼmo lapavagage hugiye. Monoʼmo hisaya hoyamo alita vaitetapaeʼmo monoʼmo huʼnaya hoyaeʼmo lapau hutetapa lapavagage hugiye.

³⁰ Na kava hinagetapaene. Lapakaemo alopa yosamo alagi vaiʼniya yosamoʼmo vaiʼniya haitaʼaʼeʼmo haneʼniya yosagana huta maigae. Lapakaemo hoyafiʼmo aniʼmo ohaneʼnigeno hosuʼniya hoyakana huta maigae.

³¹ Kahaumo ago vaiʼnigenoʼaeʼmo malage huno atamo neleya agufa kavaʼmo huno Yulusalemu vayapatiʼmo lokiya vayaʼaiteʼmo magoke agufa kavaʼmo afole aigiye. Aliʼyaʼapimo masisigana huno haneʼnisigeno apakaeʼe aliʼyaʼapiʼeʼmo malage huno magokepiʼmo atamoʼmo leno apasagalisigenoʼaeʼmo mago hapa maesiya vekamo oʼmaigiye.