Aepa Gemae 9 - The Keyagana NT and 25 OT books

Gotiʼa Noaʼeʼmo kotalakemo huʼniya gemae

¹ Gotiʼa ina kava huno Noaʼagi ve mafaʼne anagaʼagi huno alagepa huʼa maisayafeʼmo alino auleno apatenoʼaeʼmo, asole mafaʼnemo alitapa apatesageʼa ma mopafiʼmo maiʼa kili paeyo.

² Muki afumogi yagagafamogi namamogi noyamemogiʼenagi huʼa lapakaefeʼmo kolitapi nehisagetapa yagaitapa apategae. Aliʼna lapayapiʼmo malove.

³ Lapakaemo muki uʼeʼa huʼa maisaya yaʼamo neʼyatapimo hanegaiye. Nagaemo muki yaʼamo lapamiteʼna hegafa talili yaʼeʼmo lapamuvagi afaʼa negae.

⁴ Afaʼa negayaʼmonanafa kolaʼamo haneʼnisiya ameʼamo oʼneyo. Kolaʼmo afaʼa neʼmaiya yaʼmo aepaʼamo haneʼniyaʼmofeʼmae.

⁵ Mago vekamoʼmofi mago afumoʼmofi huno vayaʼmo hapaesageʼnaeʼmo anonaʼalefeʼmo afaʼa falisiya kavaʼmo huguve.

⁶ Ina laʼmo mago vekamo kamiti amagisigeno kolaʼamo hisifi vayaʼmogimo anonaʼalefeʼmo ani vekamo kamiti amagisageno kolaʼamoʼmo hisigeno falino. Gotiʼa vemo agaiʼagana huno alo huʼniyaʼmofeʼmae.

⁷ Lapakaemo asole mafaʼnemo alitapa apatesageʼa asole vayaʼmo ma mopafiʼmo aiʼa atagu faeʼa maiʼa kili paeyo, huno hapa paiʼniye.

⁸ Ina gemo huno hapa paitenoʼaeʼmo magoʼe gemo Noaʼe ve mafaʼne anagaʼaʼefeʼmo hapa painoʼaeʼmo,

⁹ Afiyo, huno, nagaemo lapakaeʼe afole aisaya lapakinago vayaʼenagi huʼna kotalakemo hu malove.

¹⁰ Nagaemo muki afaʼa neʼmaiya yaʼapimo haneʼniya yaʼenagi huʼna hu malove. Muki namagi yagagafagi yuna afugi afela afugi huʼa muki sipifatiʼmo ataleʼa emiʼeʼnaya yaʼaʼeʼmo kotalakemo hu malove.

¹¹ Kotalakeʼnimo haneʼniyana halate magoʼe huʼna alopa aniʼmo aliʼna atesugeno eno muki yaʼmo aeno ati okaegaiye.

¹² Nagaemo kotalakeʼnimo lapakaeʼe muki afaʼa neʼmaiya yateʼefeʼmo hu maleʼnova kotalakeʼnimo alagena yaʼamo muki afinatefeʼmo hu malegauve.

¹³ Nagaemo kotalakeʼnimo muki ma mopafi maiʼnaya yaʼeʼmo hu malova kotalakeʼnimo alagena yaʼmo hiyateʼmo fugagiʼnaʼmo malegauve.

¹⁴ Ina kava huno afole aigiye. Nagaemo hiyaʼmo aliʼna afole aiʼna atesugenoʼaeʼmo ani hiyateʼmo fugagiʼnaʼeʼmo afole aisigeʼa agegae.

¹⁵ Nagaemo kotalakeʼnimo alagi nagesale hanegaiyanageno halate magoʼe huno alopa aniʼmo heteno muki afaʼa neʼmaiya yaʼe vayaʼeʼmo alino hano huno oʼapatalegaiye.

¹⁶ Fugagiʼnaʼmo hiyate afole aisigeʼna ageteʼnaeʼmo muki afaʼa neʼmaiya yatefenagi vayaʼaitefenagi huno hano osisiya geʼnimo hu maleʼnova kotalakeʼnieʼmo nagesa afiguve.

¹⁷ Gotiʼa Noafeʼmo ina ge huno ha paiʼniye. Fugagiʼnaʼmo kotalakeʼnimo alagena yaʼamo ma mopafiʼmo muki afaʼa neʼmaiya yaʼalefeʼmo hu maleʼnova gemo alagena yaʼamo hanegaiye.

¹⁸ Noa mafaʼne anagaʼmo sipifatiʼmo emiʼeʼnaya mafaʼne anagaʼai apakiʼapimo Semiʼagi Hamuʼagi Yafetiʼagi huʼa emiʼeʼnae. Hamuʼa Kenani afoʼamoʼmae.

¹⁹ Mani loleʼe magoʼe mafaʼne anagaʼmo Noa mafaʼnemo maiʼnageʼa apakaepatiʼmo muki ma mopafi vayaʼmo aiʼa atagu faeʼnae.

²⁰ Noaʼa hoyamo alino neʼvaiya vekamo aepa faino maiteno mago nofi hoyamo alino vaiʼniye.

²¹ Mago afinaʼmo ani nofi alagafati aniʼmo neteno negi nagi huteno seli noʼafiʼmo agufalagaʼageʼmo maiʼniye.

²² Hamuʼa Kenani afoʼamoʼmo afoʼamo Noaʼmo ageyana agufalagaʼageʼmo havaeno maiʼnigeno agegeno kumatega uno lamino nepuʼamoʼe aganaʼamoʼeʼmo hana paiʼniye.

²³ Inagi Semiʼe Yefetiʼeʼmo mago kenamo aliʼana anakiʼnaleʼmo male aliteʼana anakamelegatiʼmo vase vase huʼana haiʼana afoʼanimoʼmo kofiʼana ateʼnaʼae. Afoʼanimo avagage yaʼaleʼmo oʼagesaʼafeʼmo aulu ohaeʼana aluyatega anaugosa huʼana maiʼnaʼae.

²⁴ Noaʼa negi nagi huteno havaeno maiʼniyapatiʼmo he tinoʼaeʼmo henaga mafaʼneʼamokeʼmo agaetegamo ani kavaʼmo huʼniye, huno ageʼniye.

²⁵ Inagi agaemo hunoʼaeʼmo, Gotiʼa Kenaniʼmo lifana huno ategaiye. Kenaniʼa konagaʼamogiteʼmo aliʼyaʼapimo alisiya vekamo maigiye.

²⁶ Magoʼe gemo hunoʼaeʼmo, Ala kava neʼmo Semi Gotiʼamoʼmo aulena Gotiʼa maino. Kenaniʼa Semi aliʼyaʼamo alisiya vekamo maino.

²⁷ Gotiʼa Yefetiʼmo ha maenageʼa mafaʼne anagaʼamo asole vayaʼmo afole aiteʼa Semi aginago vayaʼai seli nopiʼmo aiʼa atagu faeʼa maiyo. Kenaniʼa Yefeti aliʼyaʼmo alisiya vekamo maino, huno huʼniye.

²⁸ Alopa aniʼmo hetegeno akamelegaʼamo Noaʼa tali hataleti fifitiʼa kafugamo maiʼniye.

²⁹ Noaʼa muki maiʼniya kafugaʼamo naeni hataleti fifitiʼa kafugamo maiteno faliʼniye.