Aepa Gemae 49 - The Keyagana NT and 25 OT books

Yekopuʼa mafaʼne anagaʼamo afole aisiya kavafeʼmo aune gemo huno hapa paiʼniya gemae

¹ Yekopuʼa mafaʼne anagaʼaeʼmo ge huʼnigeʼa eʼnagenoʼaeʼmo apakaefeʼmo ina ge huno hapa paiʼniye. Lapakaemo etapa nahaopaleʼmo alita anupa hutapa maiʼnigeʼnao henagaʼamo lapakaetegamo afole aisiya kavafeʼmo lapa paiguve, huno huʼniye.

² Yekopu mafaʼne anagaʼmogitapae, huʼna, etapa nahaopaʼaleʼmo alita anupa hutapa maiʼnetapa lapaketafo huʼnetapa nagaemo Isaleliʼnamo afotapimoʼnamo hisuva gemo afiyo.

³ Lumeniyo, huʼna, kagaemo yege mafaʼneʼnimo maiʼnane. Neya vekamo lokiyaʼnimo haneʼnigeʼnaeʼmo aliʼna kateʼnove. Lokiya vekamo maitekaeʼmo ala kagi aliteka aeka apaka seʼnane.

⁴ Kagaemo afokamo aʼeʼmo magokepi lokaeka havaeʼnanaʼmofeʼmo aeka apaka osegane. Anikana huka maiʼnananageka magoke kavaʼmo hisanafeʼmo lokiyakamo ohaneʼniyaʼmofeʼmo aeka apaka osegane. Hipaʼnileʼmo havaeteka alika hosu huka ateʼnanaʼmofeʼmae.

⁵ Lole konagalaʼmo Simiyoniʼe Livaiʼeʼmo vayaʼaifeʼmo hanau huʼana oʼapateʼana kamitimo hapaeʼnaʼa yaʼmo noʼanifiʼmo haneʼniye.

⁶ Anakaemo anaipa leʼnigeʼana kamitimo apamagiʼnaʼaʼmofeʼmo anakae anaipa anakesaeʼmo nagaemo kanalene, huʼna osuguve. Huguʼae, hisaʼa kavaʼmo pulumakamogi apaiyamo heʼana nehatagaʼaʼmofeʼmo nagaemo anakaeʼeʼmo alagi magokepi lokaeʼna oʼmaiguve.

⁷ Anaipamo leʼnigeʼana vayaʼaifeʼmo hanau huʼana noʼapataʼa kavaʼanimo haneʼniye. Gotiʼa geʼaletiʼmo lifana huno anategaiye. Nagaemo Yekopu nofi vayaʼmo aliʼna fako huʼna apaote apaote huʼna apatesugeʼa maigae.

⁸ Yutagaeʼmo muki konagakamogimo kagikaleʼmo aliʼa asaga huʼa kategae. Kame vayakamogi lugoʼapileʼmo apatafaugane. Afokamo mafaʼne anagaʼmogi kagaeteʼmo ape huteʼa ala kagikamo kamigae.

⁹ Yutaʼa mago aikeli laiyonigana huno maiʼniye. Mafaʼneʼnimogae, huʼna, afela afumo uka haeteka aika atagineka eʼnane. Laiyonimoʼa ape huno neʼmaiya kava huno maigiye. Ina laʼmo ha faino atalegaiye.

¹⁰ Kini vayaʼmogimo hayopa kayoʼapiletiʼmo yagaiʼa neʼapataya kava huʼa Yuta nofi vayaʼmogimo yagaiʼa apateme apateme neʼesageno mago vekamo Sailoʼmo egaiye. Sailoʼmo esigeʼapaeʼmo muki vayaʼmogimo aiyafiʼmo maiʼneʼa geʼamo afigae.

¹¹ Agaemo hoyaʼafiʼmo haneʼniya nofi yosaleʼmo noki afuʼamo aeno ategaiye. Agaemo kukenaʼamo nofi alagafati anipiʼmo sese hugiye.

¹² Nofi alagafati aniʼmo anupa aniʼmo haneʼniyaʼmonanafa lole aulagalaʼmoʼmo magoʼe huno anupaʼageʼmo huʼniye. Nu anumo yaveyave yaʼmo haneʼniyaʼmonanafa aveʼmoʼmo magoʼe huno yaveyaveʼageʼmo huʼniye.

¹³ Semuluniʼa solovala ani haigileʼmo maigiye. Agaemo sipimo eʼa maisaya haopalegamo maigiye. Agae mopamo atupamoʼmo uno Saitoni taonileʼmo hanegaiye.

¹⁴ Isakaʼa lokiya noki afugana huno maiʼniye. Agaemo kagemi yaʼmo neʼaiya kutalaʼmo hanetaʼageno folagapiʼmo havaeʼniye.

¹⁵ Agaemo ageʼniyana kanale mopamo alagepa huʼa maisaya agufa mopamo haneʼnigeno agetenoʼaeʼmo ayamukiki huno aliʼyaʼmo aliʼniye. Aliʼniyaʼmonanafa henagaʼamo kalavusi aliʼyaʼmo aliʼniye.

¹⁶ Neniʼa yasi vekamo maiʼneno vayaʼamo alino fako huno apategaiye. Apakaemo alu Isaleli nofi vayaʼmo maigae.

¹⁷ Nagaloʼyavegana huno ka agiʼnaleʼmo maiʼneno hosimo neʼesigenoʼaeʼmo aiyafiʼmo haesigeno hosileʼmo fai maiʼnisiya vekamo akamelegatiʼmo asagauno aigiye.

¹⁸ O Ala kava nene, huʼna, nagaemo nagufamo alika katika natesanafeʼmo kagava maiʼnove.

¹⁹ Asole vayaʼmogimo eʼa Gatiʼmo kamemo nehaesagenoʼaeʼmo henagaʼamo kamemo huno aeno apaka segaiye.

²⁰ Asa mopafatiʼmo alagepa neʼyaʼmo afole aigiye. Kini vayaʼmogimo nehapaiya agufa neʼyaʼmo afole aigiye.

²¹ Nafataliʼa afela memegana huno agaiʼamo hauʼnisiya kateʼmo umenitata huno maigiye. Agaemo alagepa gemo huno hapa nepaiye.

²² Yosefeʼa mago alagepa alagamo neʼaeya nofikana huno maiʼniye. Ani nofiʼmo meti aniʼmo agiʼnaleʼmo haneʼnigeno akopaʼamoʼmo uneno huno yatala huteno kegiʼyaleʼmo kino uno haino alino haleno ataleʼniye.

²³ Atiletiʼmo kamemo nehaya vayaʼmogimo agaefeʼmo apaini huteʼa kamemo haneʼniya keveletiʼmo haeʼnae.

²⁴ Yekopu Gotiʼamoʼmo lokiyaʼaʼe vekamoʼmo lokiya vaino ateʼnigeno Yosefe atiʼamo alagi lokiya vaino haneʼniye. Yosefe ayatalamoʼeʼmo lokiya vaino haneʼniye. Sipisipileʼmo neʼyagaiya vekamo Isaleli vayaʼmogi yafaʼapimo maiʼniyaʼmofeʼmae.

²⁵ Afokamo Gotiʼamoʼmo alagepa huno kaha maegaiye. Lokiyaʼamo haneʼniya Gotiʼa alagepa huka maisanafeʼmo alino auleno kategaiye. Anaga kokuʼnapatiʼmo alagepa huno kaha maesiya yaʼmo kamige afepilagatiʼmo alagepa huno kaha maesiya yaʼmo afole aige aʼne anagatapimogi nuʼapimo alino alagepa huge apaipamo alino alagepa huge husigeʼa asole mafaʼnemo aliʼa apatesageʼa alagepa huʼa maige hugae.

²⁶ Afokamoʼnamo Gotiʼa kaha maesigeka alagepa huka maisana yaʼmo kamuvanageno laginago vayaʼmo Gotiʼa apamiʼniya yaʼmo ago aeno aga seʼniye. Ani yaʼmoʼa magoʼe huno kilino uno haino muki afinaʼmo hanege hanege huno hanesiya avemo kino aino ati kaegaiye. Ani yaʼmoʼa Yosefeʼmo konagaʼamogiʼeʼmo magokepi lokaeno oʼmaiʼnifa aote maiʼniya vekamo agenopaleʼmo asagauno aigiye.

²⁷ Menisameniʼa afela kalamoʼmo aga neteya kalagana huno maiʼniye. Muki afinaʼmo neteʼae neteʼaeʼmo haeʼniya yagagafamo negaiye. Kamemo huno aeno apaka seteno uneʼmo alisiya kagemi yaʼmo alino fako huno apamigiye.

²⁸ Mukiʼamo tuolofuʼa Isaleli nofi vayaʼmogeno afoʼapimoʼmo alino au leno apateteno hapa paiʼniye. Ani gemo huno alu ge alu gemo mukiʼaeʼmo ina kava ina kavaʼmo huta maige huno hapa paiʼniye.

Yekopuʼa faliʼnigeʼa kiʼa ateʼnaya gemae

²⁹ Inagi Yekopuʼa ani kavaʼmo hiyo, huno hapa paitenoʼaeʼmo, hogoʼamo Gotiʼa navalelino uno vayaʼniʼeʼmo alino anupa huno nategaiye. Nagufaʼamo alinitutapa naginago vayaʼmo kiʼa apateʼnaya yafa kapiʼmo Hiti nofi vekamo Efaloni mopaleʼmo kitapa nateyo.

³⁰ Ani yafa kaʼmo Makapeli mopaleʼmo Mamali taonimo haopaleʼmo Kenani koteʼmo haneʼniye. Emalehamuʼa ani yafa kaʼe mopaʼeʼmo Hiti nofi vekamo Efaloni mopamo ago miya fai maleʼniye. Agaiʼa kanoluʼmo hanesiyafeʼmae.

³¹ Ani kanolufiʼmo Emalehamuʼe aʼamo Selaʼeʼmo kiʼa anatege Aisakiʼe aʼamo Lipekaʼeʼmo kiʼa anatege huʼnageʼnaeʼmo nagaemo Liyaʼmo kiʼna ateʼnove.

³² Emalehamuʼa Hiti nofi vayaʼmogi yafa kaʼe mopaʼeʼmo ago miya faiʼniye, huno hapa paiʼniye.

³³ Yekopuʼa ani gemo hapa paitenoʼaeʼmo aiyamo alino aupa hulino uno haino hipaleʼmo maiʼnenoʼaeʼmo avamusaʼmo alinino haiʼneno ataleteno faliʼnigeno Gotiʼa vayaʼaʼeʼmo alino anupa huno ateʼniye.