Aepa Gemae 46 - The Keyagana NT and 25 OT books

Yekopuʼe afamo anagaʼaʼeʼmo Isipi kotegamo uʼnaya gemae

¹ Isaleliʼa muki kagemi yaʼamo aliteno afamo anagaʼaʼeʼmo Isipi kotegamo neʼvaya kateʼmo uʼnae. Apakaemo Miyasima taonifiʼmo uʼa avaʼyi huteʼapaeʼmo Isaleliʼa afoʼamo Aisaki Gotiʼamoʼmo mago ofalinimo amiʼniye.

² Amiʼnigenoʼaeʼmo haniʼilagamo Gotiʼa Yekoputegamo alagamuna agegekana huno afole aiteno, Yekopuvo, Yekopuvo, huno ge huʼnigeno Yekopuʼa hunoʼaeʼmo, ove maiʼnove, huno huʼniye.

³ Gotiʼa hunoʼaeʼmo, Nagaemo Gotiʼnamo afokamo Gotiʼamoʼnamae, huno huteno, Kagaemo Isipi kotegamo visanafeʼmo koli osuvo. Uka maiʼnisanageʼnaeʼmo alopa nofi vayaʼmo aliʼna afole aiʼna lapategauve.

⁴ Nagaemo kagaeʼeʼmo Isipi kotegamo magokepi lokaeʼna uteʼnaeʼmo kagiyokamogi uʼa aliʼa apatesageʼa uʼa aliʼa apatesaya vayaʼmo halate apavaleliʼna egauve. Falisana afinaʼmo Yosefeʼa kaulagamo alino fali kaeno kategaiye, huno ha paiʼniye.

⁵ Inagi Yekopuʼa Miyasima taonifatiʼmo ataleno uʼnigeʼa Isaleli mafaʼne anagaʼamogi afoʼapimoʼagi aʼne anagaʼapigi mafaʼne anagaʼapigi huʼa kini vekamo Feloʼa alino apateʼnigeʼa aliniʼa eʼnaya talalafiʼmo maitageʼa apavaleliʼa uʼnae.

⁶ Apakaemo Kenani mopaleʼmo maiʼneʼapaeʼmo muki aliʼnaya pulumaka anagaʼapigi kagemi yaʼapigi huʼa aliteʼa apavaleliʼa Isipi kotegamo uʼnae. Yekopuʼe muki aginago mafaʼne anagaʼeʼmo uʼnae.

⁷ Yekopuʼa mafaʼne anagaʼagi a mafaʼneʼagi agiyoʼamogiʼenagi huno apavalelino Isipi kotegamo uʼniye.

⁸ Isaleli mafaʼne anagaʼmo Isipi kotegamo uʼnaya mafaʼne anaga vayaʼai apakiʼapimo haneʼniye. Yekopu yege mafaʼneʼamo Lumeniʼae.

⁹ Lumeni mafaʼne anagaʼmogi apakiʼapimo Hanokiʼagi Paluʼagi Hesaloniʼagi Kamiʼagi huʼa maiʼnae.

¹⁰ Simiyoni mafaʼne anagaʼmogi apakiʼapimo Yemuveliʼagi Yaminiʼagi Ohatiʼagi Yakiniʼagi Yohaʼagi Seyuliʼagi huʼa maiʼnae. Seyuli itaʼamoʼmo Kenani nofi a kanomo maiʼniye.

¹¹ Livai mafaʼne anagaʼmogi apakiʼapimo Gesoniʼagi Kohatiʼagi Melaliʼagi huʼa maiʼnae.

¹² Yuta mafaʼne anagaʼmogi apakiʼapimo Eʼagi Onaniʼagi Selaʼagi Pelesiʼagi Yelaʼagi huʼa maiʼnae. Ani kavaʼmo huʼa maiʼnayaʼmonanafa Eʼe Onaniʼeʼmo Kenani koteʼmo maiʼneʼapaeʼmo ago faliʼnaʼae. Pelesi mafaʼnelaʼmogani anakiʼanimo Hesaloniʼe Hamuliʼeʼmo maiʼnaʼae.

¹³ Isaka mafaʼne anagaʼmogi apakiʼapimo Tolaʼagi Puvaʼagi Yopuʼagi Similoniʼagi huʼa maiʼnae.

¹⁴ Yemaluni mafaʼne anagaʼmogi apakiʼapimo Seletiʼagi Eloniʼagi Yaleyoʼagi huʼa maiʼnae.

¹⁵ Mani mafaʼne anagaʼmo Yekopuʼa Mesopatemiya kotegamo maiʼnenoʼaeʼmo Liyapatiʼmo alino apateʼniye. Agaemo magoke a mafaʼnemo Nainaʼmo Liyapatiʼmo alino ateʼniye. Liyaʼa alino apateʼniya mafaʼne anaganagi uʼa aliʼa apateʼnaya mafaʼne anaganagi huʼa mukiʼamo teti taliʼa vayaʼmo maiʼnae.

¹⁶ Gati mafaʼne anagaʼmogi apakiʼapimo Sifiyoniʼagi Hagiʼagi Suniʼagi Esamoniʼagi Eliʼagi Alotiʼagi Aleliʼagi huʼa maiʼnae.

¹⁷ Asa mafaʼne anagaʼmogi apakiʼapimo Yiminaʼagi Isuvaʼagi Isuviʼagi Meliyaʼagi huʼa maiʼnae. Apasaʼapimoʼmo Selaʼmae. Meliya mafaʼnelaʼmogani anakiʼanimo Himaʼe Makiyeliʼeʼmo maiʼnaʼae.

¹⁸ Lepaniʼa aliʼyaʼamo neʼaliya a kanomo Silipaʼmo avaleno a mafaʼneʼamo Liyaʼmo amiʼnigeno Silipaʼa Yekoputeʼmo maiʼnenoʼaeʼmo alino apateʼniya mafaʼne anaganagi uʼa aliʼa apateʼnaya mafaʼne anaganagi huʼa mukiʼamo sikisitiniʼa vayaʼmo maiʼnae.

¹⁹ Yekopu aʼamo Lesopatiʼmo alino anateʼniya mafaʼnelaʼmogani anakiʼanimo Yosefeʼe Menisemaniʼeʼmo alino anateʼniye.

²⁰ Yosefeʼa Isipi kotegageʼmo maiʼnigenoʼaeʼmo aʼamo Asenatiʼmo lole mafaʼnelaʼmo Manasaʼe Ifalemiʼeʼmo alino anateʼniye. Asenatiʼmo mago mono huno neʼapateya vekamo agiʼamo Potifelaʼmo Ono taonifiʼmo maiʼniya vekamo a mafaʼnemo maiʼniye.

²¹ Menisemani mafaʼne anagaʼmogi apakiʼapimo Melaʼagi Mekaʼagi Asameliʼagi Gelaʼagi Nemaniʼagi Ehiʼagi Losiʼagi Mupimiʼagi Hupimiʼagi Atiʼagi huʼa maiʼnae.

²² Ani mafaʼne anagaʼmo Yekopuʼa Lesopatiʼmo alino apateʼniya mafaʼne anaganagi uʼa aliʼa apateʼnaya mafaʼne anaganagi huʼa mukiʼamo fotiniʼa vayaʼmo maiʼnae.

²³ Neniʼa magoke mafaʼnemo agiʼamo Husimiʼmo alino ateʼniye.

²⁴ Nafatali mafaʼne anagaʼmogi apakiʼapimo Yasiyoʼagi Guniʼagi Yesaʼagi Silemiʼagi huʼa maiʼnae.

²⁵ Lepaniʼa aliʼyaʼamo neʼaliya a kanomo Milihaʼmo avaleno a mafaʼneʼamo Lesoʼmo amiʼniye. Ani mafaʼne anagaʼe Yekopuʼa Milihapatiʼmo alino apateʼniya mafaʼne anaganagi aliʼa apateʼnaya mafaʼne anaganagi huʼa mukiʼamo seveniʼa vayaʼmae.

²⁶ Yekopuʼeʼmo Isipi kotegamo magokepi lokaeʼa uʼnaya vayaʼamae. Yekopu aginago vayapatiʼmo afole aiʼnaya vayaʼmo mukiʼamo sigisiti sigisiʼa vayaʼmae. Yekopu mafaʼne anagaʼmogi aʼne anagaʼapieʼmo lekana opaiʼnae.

²⁷ Yosefeʼa Isipi kotegamo maiʼnenoʼaeʼmo lole mafaʼnelaʼmo alino anateʼniye. Inagi Yekopu afamo anaga vayaʼe Yosefe afamo anagaʼeʼmo aliʼa magoke huʼnagenoʼaeʼmo mukiʼamo sevetiʼa vayaʼmo Isipi kotegamo maiʼnae.

Yekopuʼe muki afamo anaga vayaʼaʼeʼmo Isipi kotegamo maiʼnaya gemae

²⁸ Yekopuʼa Goseni kotega uʼniya kateʼmo Yosefeʼmo ave lisiyafeʼmo Yutaʼmo alino ateʼnigeno Yosefetegamo uʼniye. Apakaemo Goseni kotegamo uʼa avaʼyi huʼnae.

²⁹ Yosefeʼa talalaʼamo aliteno afoʼamoʼeʼmo fotu hisaʼafeʼmo Goseni kotegamo uno haiʼniye. Yosefeʼa uno haino afoʼamoʼmo agetenoʼaeʼmo anu kiliʼneno lusi kava huno aviʼyaʼmo huʼniye.

³⁰ Isaleliʼa Yosefefeʼmo ha painoʼaeʼmo, Hemenimo afaʼa maiʼnanageʼna kaugosafiʼmo kageʼnovaʼmofeʼmo afaʼa faliguve, huno ha paiʼniye.

³¹ Inagi Yosefeʼa nepuʼamogifenagi afoʼamo afamo anaga vayaʼaifenagi huno hapa painoʼaeʼmo, Nagaemo hemenimo uʼna Felofeʼmo ha paiʼnaeʼmo, Nepuʼnimogiʼe afoʼnimo afamo anagaʼaʼeʼmo Kenani kotegatiʼmo ataleʼa nagaetegamo eʼa avaʼyi huʼnae.

³² Ani vayaʼmogimo sipisipileʼmo neʼyagaiya vayaʼmo maiʼnayaʼmofeʼmo muki afinaʼmo sipisipileʼe pulumakaleʼeʼmo yagaiʼnae. Apakaemo sipisipi anagaʼapimo apavalege pulumaka anagaʼapimo apavalege muki yaʼapimo alige huteʼa eʼnae, huʼna ha paiguve.

³³ Ani ge huʼna ha paiguvanagi Feloʼa ge hisigetapa esagenoʼaeʼmo, na agufa aliʼyaʼmo neʼaliya vayane, huno ge huno lapafi gesigetapaeʼmo

³⁴ geʼaleʼmo aeta atagaina hutapa ha paitapaeʼmo, muki afotimogimo aliʼnaya agufa aliʼyaʼmo neya vayaʼmo maiʼnona afinatetiʼmo pulumakaleʼe sipisipileʼeʼmo neʼyagauna vayaʼmo maiʼnone, hutapa ha paiyo. Isipi vayaʼmogimo sipisipileʼmo neʼyagaiya vayaʼaifeʼmo alagi ohapauʼnigeʼa hosu aliʼyaʼmo neʼaliya vayane, huʼa apakesamo neʼafiyaʼmofeʼmo ani ge hutapa ha paisagenoʼaeʼmo Goseni kotegamo afaʼa utapa maigae, hutapa ha paigae, huno hapa paiʼniye.