Aepa Gemae 45 - The Keyagana NT and 25 OT books

Yosefeʼa nepuʼamogifeʼmo, Nagaemo Yosefeʼnamo maiʼnove, huno hapa paiʼniya gemae

¹ Yosefeʼa haopaleʼmo he tiʼa maiʼnaya vayaʼmo Isipi vayaʼai apaulagaleʼmo agaiʼamo atafauno atesiya kavaʼmo osuʼniyaʼmofeʼmo alopa gefatiʼmo hunoʼaeʼmo, mukiʼamo alitapa apatalegeʼa kumategamo uta lamiyo, huno hapa paiteno agaiʼageʼmo nepuʼamogiʼeʼmo maiʼnae. Mago vayaʼmo agaeʼeʼmo oʼmaiʼnagenoʼaeʼmo Yosefeʼa nagaemo Yosefeʼmae, huno hapa paisiyafeʼmo agaiʼamo maiʼniye.

² Yosefeʼa lusi kava huno aviʼyaʼmo huʼnigeʼa Isipi vayaʼmogi afige Felo nopiʼmo maiʼnaya vayaʼmogimo afige huʼnae.

³ Yosefeʼa nepuʼamogifeʼmo hapa painoʼaeʼmo, Nagaemo Yosefeʼmae. Afoʼnimoʼmo ofalino afaʼa maiʼnifiye, huno ge huno apafi geʼnigeʼapaeʼmo nepuʼamogimo agaefeʼmo koli huteʼa ge osuʼnae.

⁴ Inagi Yosefeʼa hunoʼaeʼmo, Lapaoke hovanagi nahaopaʼaleʼmo eyo, huno huʼnigeʼa eʼnagenoʼaeʼmo, nagaemo Yosefeʼnamo lapakanatapimoʼnamo maiʼnove. Lapakaemo hogotetapa nagaemo navaletapa kagemi yaʼapimo haneʼniya vayaʼaiteʼmo maketi huʼnageʼa miya faiʼa navaleliʼa Isipi kotegamo eʼnae.

⁵ Gotiʼa lapakufamo aliʼna katiʼna lapatesuvafeʼmo hogoteno alino nateʼnigeʼna eʼna maiʼnovaʼmofeʼmo nagaemo navaleta maketi huʼnaya kavafeʼmo lapaipamoʼmo kana osinageno lapakaitapieʼmo lapaipamo oleno.

⁶ Lole kafugamo mani koteʼmo kafu kavaʼmo ago afole aiʼnigeno faefuʼa kafugamo afa haneʼniyaʼmofeʼmo hoyamo aiʼyu oʼaige hoyafatiʼmo neʼyaʼmo oʼalige hugae.

⁷ Gotiʼa alopa kavatetiʼmo lapa maesigetapa mafaʼnetapimo afaʼa maige lapakaemo ofalige hisayafeʼmo nagaemo hogoteno ago alino nateʼnigeʼna eʼna maiʼnove.

⁸ Ani kavaʼmo huʼniyaʼmofeʼmo lapakaemo alitapa nateʼnageʼna oʼmeʼnofa Gotikeʼmo alino nateʼnigeʼna eʼna maiʼnove. Gotiʼa Felo hisiya kavafeʼmo ha paisuva vekamo maisuvafeʼmo alino hamaleno nateʼnigeʼna noʼafi yateʼmo yagaiʼna atege muki Isipi koteʼmo yagaiʼna apatege nehuve.

⁹ Hemenimo lapakaemo malage hutapa afoʼnimotegamo uta haitapa ha paitapaeʼmo, nagaemo Yosefeʼnamo mafaʼnekamoʼnamo ani gemo huʼna kaha paiʼnove. Gotiʼa Isipi vayaʼaiteʼmo yagaiʼna apatesuva vekamo alino hamaleno nateʼniye. Ani koteʼmo oʼmaika nagaetegamo malage huka emikeno.

¹⁰ Kagaemo emikeka Goseni koteʼmo nahaopaleʼmo maigane. Kagaikagi mafaʼne anagakagi mafaʼne anagaʼapigi sipisipikagi pulumakakagi hutapa maigae. Muki yatapimo lapakaeʼeʼmo hanegaiye.

¹¹ Anile maiʼnisanageʼna yagaiʼna kategauve. Ani lusi kafu kavaʼmo magoʼe huno faefuʼa kafugamo afaʼa haneʼniyaʼmofeʼmo kagaikagi afamo anagakagi muki yakaʼenagi hutapa kafu osisayafeʼmo yagaiʼna lapategauve. Mani gemo alinitutapa afotimofeʼmo ha paiyo.

¹² Yosefeʼa nepuʼamogifeʼmo hapa painoʼaeʼmo, Lapakaemo nagaemo nagege naganaʼnimoʼmo Menisameniʼmo nagege hutapa nageʼna nagaemo navayafatiʼmo lapa nepauve.

¹³ Nageʼnageʼna utapa afoʼnimofeʼmo ala nagiʼnieʼmo ha paige muki ageʼnaya kavafeʼmo ha paige hutetapa malage hutapa afoʼnimoʼmo manileʼmo avalelitapa emiteyo, huno hapa paiʼniye.

¹⁴ Yosefeʼa ani ge huno hapa paiteno aganaʼamoʼmo Menisemeni anu kiʼneno aviʼyaʼmo huʼnigeno Menisemeniʼeʼmo ani kava huno anu kiʼneno aviʼyaʼmo huʼnaʼae.

¹⁵ Yosefeʼa muki nepuʼamogimo magoke magoke huno apanukiʼneno aviʼyaʼmo huteno hapaeno neʼniye. Hutegeʼapaeʼmo agaeʼeʼmo gege huʼnae.

¹⁶ Ani kavafeʼmo kini vekamo Felo nopiʼmo huʼapaeʼmo, Yosefe konagaʼamogimo ago eʼnae, huʼa hapa paiʼnageʼa Feloʼe aliʼyaʼamo neʼaliya vayaʼeʼmo apamogaga aiʼnae.

¹⁷ Kini vekamoʼa Yosefefeʼmo ha painoʼaeʼmo, Nepukamogifeʼmo ani kavaʼmo hiyo, huka hapa paiyo. Ani kavaʼmo hutapa nokitapimo alo hutetapa Kenani kotegamo viyo.

¹⁸ Afotapimoʼe afamo anagatapiʼeʼmo apavalelitapa nagaetegamo eyo. Nagaemo Isipi koteʼmo kanale hogote mopamo lapamisugeno ani mopafatiʼmo asole neʼyaʼmo afole aisigetapa negae.

¹⁹ Kagaemo magoʼe gemo hapa paikaeʼmo, ani kavaʼmo hiyo, huka hapa paiyo. Aʼnetapigi mafaʼnetapigi afotapimoʼagi hutapa apavalelita esayafeʼmo Isipi kotetiʼmo mago talalamo halaulitapa ugae.

²⁰ Kagemi yatapieʼmo afaʼa lapakesamo oʼafiyo. Isipi kote kanale hogote kagemi yaʼmo lapakae yaʼmo hanegaiye, huka hapa paiyo, huno ha paiʼniye.

²¹ Inagi Isaleli mafaʼne anagaʼmogimo ani kavaʼmo huʼnae. Yosefeʼa kini vekamo ha paiʼniya kavaʼmo huno talalamo apamiʼniye. Apamiteno kategamo nesaya neʼyaʼeʼmo apamiʼniye.

²² Yosefeʼa nepuʼamogimo magoke magoke huno kukenamo alu afina alu afinaʼmo vaisayafeʼmo huno apamiteno Menisameniʼmo faefuʼa afinaʼmo vaisiyafeʼmo kukenamo amiteno tali hataleti siluva monimo amiʼniye.

²³ Yosefeʼa Isipi kotetiʼmo alagepa yaʼageʼmo teniʼa nokimogi apagotofule maleteno afoʼamoʼmo kategamo enoʼaeʼmo nesiya neʼyaʼmo vitigi peleti mayagi alu neʼya alu neʼyanagi huno alino maleteno alino apateʼnigeʼa uʼnae.

²⁴ Yosefeʼa nepuʼamogifeʼmo hapa painoʼaeʼmo, kategamo neʼutapaeʼmo lapakaitapimo ge oʼvaiyo, huno hapa paiteno alino apateʼnigeʼa uʼnae.

²⁵ Apakaemo Isipi kotetiʼmo ataleʼa Kenani kotega afoʼapimo maiʼniya koteʼmo uʼa haiʼa avaʼyi huʼnae.

²⁶ Apakaemo afoʼapimofeʼmo ha paiʼapaeʼmo, Yosefeʼa ofalino afaʼa maiʼneno muki Isipi koteʼmo yagaino neʼapate, huʼa ha paiʼnageno Yekopuʼa ani gemo afitenoʼaeʼmo agesa alaʼamo afiteno lama ge nehae, huno agesamo oʼafiʼniye.

²⁷ Inagi oʼafiʼniyaʼmonanafa muki Yosefeʼa huʼniya gemo ha paiʼnageno afige Yosefeʼa alino apamiʼniya talalamo agege hutenoʼaeʼmo ani yaʼmo ageteno aipa agesamo he tiʼniye.

²⁸ Isaleliʼa he tino hapa painoʼaeʼmo, Alagi haiʼmae. Mafaʼneʼnimo Yosefeʼmo afaʼa maiʼniyanageʼna afaʼa uʼna ageteʼna faliguve, huno huʼniye.