Aepa Gemae 40 - The Keyagana NT and 25 OT books

Yosefeʼa alagamuna gemo aepaʼamo hana paiʼniya gemae

¹ Mani kavaʼmo afole aiʼniya afinaʼmo ago utegeʼanaeʼmo kini vekamoʼmo nofi alagafati aniʼaleʼmo neʼyagaiya vekagi kini vekamo peleti mayamo nekaya nopiʼmo yagaiʼniya vekagi huʼana kini vekamoʼmo ohauʼniya agufa kavaʼmo huʼnaʼae.

² Kini vekamo Feloʼa aliʼyaʼaleʼmo neʼyagaiʼa vekalaʼanifeʼmo aipa leno anateteno Yosefeʼa kalavusi huno ateʼniya nopiʼmo

³ kalavusi huno anateʼnigeno ami vayaʼaiteʼmo yagaino neʼapateya vekamoʼmo yagaino anateʼniye.

⁴ Ami vayaʼaiteʼmo yagaino neʼapateya vekamoʼa Yosefefeʼmo, lole vekalaʼaniteʼmo yagaika anato, huno huʼnigeno yagaino anateʼnigeʼana kalavusifiʼmo aise afinaʼmo maiʼnaʼae.

⁵ Kini vekamo aliʼyaʼaleʼmo yagaiʼnaʼa vekalaʼmoganimo magoke haniʼilagamo alagamuna ageʼnaʼana magoke agufa aepaʼamo ohaneʼniyaʼmonanafa alu aepa alu aepaʼamo haneʼniya agufa alagamunamo ageʼnaʼae.

⁶ Netepiʼmo Yosefeʼa eno anaketenoʼaeʼmo lole vekalaʼmo kana yaʼmo aliʼnaʼae, huno anakeʼniye.

⁷ Anakaefeʼmo loka huno ge huno anafinoʼaeʼmo, Na kava higetanaeʼmo hemenimo kana yaʼmo aliʼnaʼa lanaugosa nekaliʼae, huno anafi geʼnigeʼanaeʼmo

⁸ Laʼagaemo alagamuna ageʼnoʼa kavafeʼmo aepaʼamo laʼahapaisiya vekamo oʼmaiʼniye, huʼana ha paiʼnaʼageno Yosefeʼa hunoʼaeʼmo, Gotikeʼmo alagamunamo aepaʼamo alino apave neliye. Lahanaoke hovanagi, alagamunamo ageʼnisaʼa kavafeʼmo naha paiʼao, huno huʼniye.

⁹ Inagi nofi alagafati aniteʼmo neʼyagaiya vekamoʼmo alagamuna ageʼniya kavafeʼmo hunoʼaeʼmo, Alagamuna ageʼnovana mago nofiʼmo ageʼnove.

¹⁰ Ani nofiʼmoʼa loleʼe magoʼe akopamo aeteno ause heteno alagamo aeno afu leʼnigeʼna ageʼnove.

¹¹ Inagi kini vekamo Felo kapuʼamo nayapiʼmo haneʼnigeʼna nofi alagamo aliʼna lapaiʼna kapufiʼmo lakiteʼna kini vekamo ayapiʼmo amiʼnove.

¹² Yosefeʼa hunoʼaeʼmo, alagamunakamo aepaʼamo loleʼe magoʼe akopamo haneʼniya kava huno loleʼe magoʼe felugamae.

¹³ Loleʼe magoʼe felugamo utesigeno kini vekamoʼa hatu maeno kateteno alino asagauno kategaiye. Kagaemo hogoteka huʼnana kava huka nofi alagafati aniʼmo lakika kini vekamo amigane.

¹⁴ Alagepa huka maikaeʼmo kahaoke hovanagi, nagaefeʼmo kagesamo afiteka naha maeka kini vekaeʼmo ha paigenoʼao kalavusifatiʼmo hatu maeno nategaiye.

¹⁵ Hogoteʼapa vayaʼmogimo Himulu vayaʼai mopaletiʼmo kumaya navaleliʼa mani koteʼmo eʼnae. Mani koteʼmo eʼna maiʼnova afinatetiʼmo kalavusi huʼa natesaya agufa hosu kavaʼmo alagi osuʼnove, huno ha paiʼniye.

¹⁶ Peleti mayamo nekaya nopi neʼyagaiya vekamoʼmo ani alagamunamo aepaʼamo alagepa kavaʼmo afole aisiya kavafeʼmo afitenoʼaeʼmo Yosefefeʼmo hunoʼaeʼmo, Nagaemo alagamuna ageʼnova kavaʼmo nagaiʼniʼeʼmo maiʼneʼna ageʼnove. Ageʼnovana nagae nagenopaleʼmo loleʼe magoʼe yaveyave hona yuvapamo haneʼnigeʼna ageʼnove.

¹⁷ Anaga agotofuʼaleʼmo haneʼniya hona yuvapafiʼmo muki alu peleti mayamo kini vekamo Feloʼmo nesiya peleti mayamo haneʼnigeno nama anagaʼmogimo eʼa ani nagenopaleʼmo haneʼniya yuvapafatiʼmo neʼnae, huno ha paiʼniye.

¹⁸ Yosefeʼa ha painoʼaeʼmo, Ani ageʼnana alagamuna gemo aepaʼamo loleʼe magoʼe hona yuvapamo haneʼniya kava huno loleʼe magoʼe felugamae.

¹⁹ Loleʼe magoʼe felugamo utesigeno kini vekamo Feloʼa kalavusifatiʼmo kavalelino uno lamino yosaleʼmo kaneʼmu aeno asai maleʼnisigeʼa nama anagaʼmogimo haleli eʼa kagufaʼamo negae, huno ha paiʼniye.

²⁰ Loleʼe magoʼe felugamo ago utegeno kini vekamo Feloʼmo itaʼamo alino ateʼniya afinaʼmo afole aiʼnigeno aliʼyaʼamo neʼaliya vayaʼmo alopa neʼyaʼmo yagita huno apateʼniye. Huteno nofi alagafati aniteʼmo neʼyagaiya vekaʼe peleti mayamo nekaya nopiʼmo neʼyagaiya vekaʼeʼmo hatu maeno anateteno anavalelino eno vayaʼai apaulagaleʼmo alino he tino anateʼniye.

²¹ Anatetenoʼaeʼmo nofi alagafati aniteʼmo neʼyagaiya vekaeʼmo hunoʼaeʼmo, halate aliʼyakamo aliyo, huno ha paiʼnigeno Felo kapuʼamo alino aniʼmo lakino amiʼniye.

²² Amiʼniyaʼmonanafa kini vekamoʼa peleti mayamo nekaya nopiʼmo neʼyagaiya vekamo yosaleʼmo aneʼmu aeno asaiʼniye. Yosefeʼa ani alagamuna ageʼnaʼa kavaʼmo aepaʼamo hana paiʼniya kavaʼmo anakaetegamo afole aiʼniye.

²³ Afole aiʼniyaʼmonanafa nofi alagafati aniteʼmo neʼyagaiya vekamoʼa Yosefeʼmo ha paiʼniya geeʼmo ago age kaniʼniye.