Aepa Gemae 4 - The Keyagana NT and 25 OT books

¹ Atamuʼa aʼamo Iviʼeʼmo magokepi lokaeno havaeʼnigeno aʼamoʼmo aipaguʼeʼmo maiteno ve mafaʼnemo alino atetenoʼaeʼmo, Ala kava neʼmoʼa naha maegeʼna ve mafaʼnemo aliʼna atove, huno huʼniye. Huteno ani mafaʼnemo agiʼamo Keniʼae, huno ateʼniye.

² Henagaʼamo Keni aganaʼamoʼmo Evoʼmo alino ateʼniye. Anakaemo ko siteʼanaeʼmo Evoʼa sipisipileʼmo neʼyagaiya vekamo maiʼnigeno Keniʼa hoyamo alino neʼvaiya vekamo maiʼnigeʼana huʼnaʼae.

³ Henagaʼamo Keniʼa hoyaʼafatiʼmo neʼyaʼmo alitenoʼaeʼmo mago neʼyaʼamo alininuno Ala kava neʼmo ofalinimo amiʼniye.

⁴ Inagi Evoʼmo yege aikeli sipisipi amagiteno afayaʼamo alininuno Ala kava neʼmo ofalini amiʼnigeno Evoʼe ofaliniʼaʼefeʼmo amuse huʼniye.

⁵ Amuse huʼniyana Keniʼe ofaliniʼaʼefeʼmo amuse osuʼniye. Keniʼa lusi kava huno aipa leʼnigeno hosu augosa kaliʼniye.

⁶ Inagi Ala kava neʼmoʼa Kenifeʼmo, na kava higekaeʼmo kaipa leʼnigeka hosu kaugosa nekaline.

⁷ Alagepa kavaʼmo hisanageʼnaeʼmo amuse huʼna kateteʼna kavalegauve. Hosu kavaʼmo huʼnisanaʼmoʼmo hosu kavaʼmoʼa katafausiyafeʼmo eno kipateʼmo yagaino maiʼniye. Hosu kavaʼmoʼa yagaino katesiyafeʼmo hauʼniyaʼmofeʼmo kagaemo hosu kavaʼmo aiyafi oʼmaika aeka aga so, huno ha paiʼniye.

⁸ Henagaʼamo Keniʼmo aganaʼamo Evofeʼmo, egetaʼa viʼano, huno huʼniye. Anakaemo uʼana mago yategamo maiʼneʼanaeʼmo Keniʼa aganaʼamoʼmo kamitimo amagiʼnigeno faliʼniye.

⁹ Faliʼnigenoʼaeʼmo Ala kava neʼmoʼa Kenifeʼmo, Kaganakamoʼmo Evoʼmo haiyaʼaleʼmo maiʼniye, huno ge huno afi geʼnigenoʼaeʼmo, nagaemo oʼageʼnove. Naganaʼnimoteʼmo nagaemo yagaiʼna ateʼnova vekamo maiʼnogekaeʼmo nehapiye, huno huʼniye.

¹⁰ Ala kava neʼmoʼa, na agufa kavaʼmo huʼnane. Nagaefeʼmo kaganakamo kolaʼamoʼmo mopafatiʼmo keya aeno ge nehiye.

¹¹ Amagiʼnanagenoʼaeʼmo kaganakamo kolaʼamo mopamoʼmo ago neʼniyaʼmofeʼmo kagaeteʼmo hosu kavaʼmo afole aino, huʼna lifana huʼna katove.

¹² Hoyamo alika vaisanagenoʼaeʼmo hoyakafatiʼmo neʼyaʼmo afole oʼaigiye. Kagaemo kaune heka muki alu kotegamo maiʼnaya vayaʼeʼmo magokepiʼmo lokaeka oʼmaige maika haga olege muki afinaʼmo umenitata huge huge huka maige hugane, huno ha paiʼniye.

¹³ Keniʼa Ala kava nefeʼmo, mani namiʼnana kana yaʼmo alopa kana yakefamo haneʼniyaʼmofeʼmo nagaemo alisuva kana yaʼmoʼa ago aeno naga segaiye.

¹⁴ Hemenimo mani mopaletiʼe kagae kaulagaletiʼeʼmo ago alika naha faika nataleʼnane. Noʼnimo ohanesigeʼna maiʼna haga oleʼna vayaʼai mopalegamo umenitata nehisugeno mago nagesiya vekamoʼmo kamitimo namagigiye, huno huʼniye.

¹⁵ Ala kava neʼmoʼa geʼaleʼmo aeno atagaina huno ha painoʼaeʼmo, Haʼao, huno, mago vekamoʼmo kamitimo kamagisigeʼnaeʼmo seveniʼa afinaʼmo alopa kana yaʼmo amiguve, huno ha paitenoʼaeʼmo vayaʼmogimo alagena yateʼmo ageteʼa oʼamagisayafeʼmo mago alagena yaʼmo agufaleʼmo hu maleʼniye.

¹⁶ Keniʼa Ineni kotetiʼmo Ala kava neʼmo atalenuno mago mopamo agiʼamo Nona kotegamo maiʼniye. Ani mopamo yegemo haine neʼeya haopalegamo haneʼniye.

¹⁷ Keniʼa aʼaʼeʼmo magokepi lokaeʼana havaeteʼana aipaguʼeʼmo maiteno Inokiʼmo alino ateʼniye. Henagaʼamo Keniʼa mago taonimo kitenoʼaeʼmo ani taonimo agimo mafaʼneʼamo agileʼmo ateʼniye.

¹⁸ Inokiʼa mago ve mafaʼnemo alino atetenoʼaeʼmo agiʼamo Ailatiʼae, huno ateʼniye. Ailatiʼmo mago ve mafaʼnemo alino atetenoʼaeʼmo agiʼamo Mehayaeliʼae huno ateʼniye. Mehayaeliʼa mago ve mafaʼnemo alino atetenoʼaeʼmo agiʼamo Metusalaʼae huno ateʼniye. Metusalaʼa mago ve mafaʼnemo alino atetenoʼaeʼmo agiʼamo Lemekiʼae huno ateʼniye.

¹⁹ Lemekiʼa lole atalaʼmo aliʼniye. Mago aʼamo agiʼamo Etaʼae. Mago aʼamo agiʼamo Silaʼae.

²⁰ Etaʼa Yemoʼmo alino ateʼniye. Yemoʼa pulumakaleʼmo neʼyagaiya vayaʼai apakinago vekamo maiʼnigeʼa seli nopiʼmo maiʼnae.

²¹ Yemo aganaʼamoʼmo Yumaʼae. Yumaʼe agae aginago vayaʼmogiʼeʼmo aepa faiʼa gitaleʼmo amagiteʼa feliyopa ketetiʼeʼmo huʼnae.

²² Lemeki alu aʼamo Silaʼa Tumakeniʼmo alino ateʼniye. Tumakeniʼa aepa faino alino apaya maleʼnigeʼa haesa agufaʼe aeniletiʼe afa aeniletiʼeʼmo alu ya alu yaʼmo alo huʼnae. Tumakeni asaʼamoʼmo Namaʼae.

²³ Mago afinaʼmo Lemekiʼa aʼalafeʼmo hana painoʼaeʼmo, Etagaʼe Silagaʼeʼmo geʼnimo afiʼao. Lemeki atalane, huʼna, geʼnimo afiʼao. Mago neya vekamoʼmo neʼnamagigeʼna ago kamitimo amagiʼnogeno ago faliʼniye.

²⁴ Mago vekamoʼmo Keniʼmo amagisiyaʼmoʼmo Ala kava neʼmoʼa seveniʼa afinaʼmo alopa hanageke yaʼmo amigiye. Ani kava huno mago vekamoʼmo namagisiyana magoʼe magoʼe huno hanageke yaʼmo amigiye, huno hana paiʼniye.

Iviʼa magoʼe huno mafaʼnemo alino ateʼniya gemae

²⁵ Henagaʼamo Atamu aʼaʼeʼmo magokepi lokaeno havaeʼnigeno ve mafaʼnemo alino atetenoʼaeʼmo agiʼamo Setiʼae huno ateʼniye. Keniʼa Evoʼmo amagiʼniya vekamo aimuʼyaleʼmo maisiyafeʼmo Gotiʼa ani mafaʼneʼnimo lekana paino ateʼniyaʼmofeʼmae huteno agiʼamo Setiʼae huno ateʼniye. Setiʼae agimo aepaʼamo haneʼniyana lekana paino ateʼniya vekamae.

²⁶ Henagaʼamo Setiʼa mago ve mafaʼnemo alino atetenoʼaeʼmo agiʼamo Inosiʼae huno ateʼniye. Ani afinatetiʼmo aepa faiʼa Ala kava neʼmo agiʼamo aeteʼa agaetefeʼmo mono huʼnae.