Aepa Gemae 39 - The Keyagana NT and 25 OT books

Yosefeʼa Potifa aliʼyaʼmo aliʼniya gemae

¹ Yosefeʼmo avaleliʼa Isipi kotegamo uʼa lamiʼnageno Potifaʼmo kini vekamo Felo ami vayaʼaleʼmo yagaino neʼapateya vekamoʼmo ani Isameli vayaʼaitetiʼmo miya faiʼniye.

² Ala kava neʼmoʼa Yosefeʼeʼmo lokaeno maiʼniyaʼmofeʼmo Yosefeʼa muki huʼniya kavaʼamo alagepa kavaʼageʼmo afole aiʼniye. Aliʼyaʼmo afoʼamoʼmo Isipi nofi vekamo nopiʼmo maiʼniye.

³ Aliʼyaʼmo afoʼamoʼmo ageʼniyana Ala kava neʼmoʼa Yosefeʼeʼmo lokaeno maiʼneno ha maeʼnigeno muki huʼniya kavaʼamo alagepa kavaʼageʼmo afole aiʼnigeno ageʼniye.

⁴ Agae aulagaleʼmo Yosefekeʼmo alagepa vekamo maiʼnigeno agaiʼa nopiʼmo aliʼyaʼmo aliteno muki yaʼaleʼmo yagaino atesiyafeʼmo ateʼniye.

⁵ Ina kava huno Yosefeʼa noʼafi yatenagi muki yaʼalenagi huno yagaisiyafeʼmo ateʼniya afinatetiʼmo Ala kava neʼmoʼa Yosefetetiʼmo aepa faino Potifa afamo anagaʼalegamo alagepa kava huʼnigeno muki noʼafi haneʼniya yaʼe hoyaʼafiʼmo haneʼniya yaʼeʼmo alino auleno ateʼniye.

⁶ Agaemo muki yaʼmo alino Yosefe ayapiʼmo maleteno mago yafeʼmo agesamo oʼafige oʼagege huteno neʼyaʼmo nesiya afinaʼmo neʼyafekeʼmo ageʼniye. Yosefeʼa alagepa agufamo haneʼnigeno apaulagaleʼmo alagepa augosa agufaʼe vekamo maiʼniye.

⁷ Inagi mailiʼa neʼeʼapaeʼmo ani kavaʼmo henagaʼamo Potifa aʼmoʼa Yosefeʼeʼmo havaesiyafeʼmo ageno haʼye huteno, egetaʼao nagaeʼeʼmo lokaeta havaegauʼae, huno huʼniye.

⁸ Yosefeʼa aliʼyaʼmo afoʼamoʼafeʼmo ha painoʼaeʼmo, Haʼao, ala vekaʼnimoʼa muki noʼafi haneʼniya yaʼmo oʼageno muki yaʼaleʼmo yagaisuvafeʼmo alino nagae nayapiʼmo maleʼniye.

⁹ Noʼafiʼmo mago vekamo aeno naga seʼniya vekamo oʼmaiʼnigeʼna muki yaʼe vayaʼaiteʼeʼmo nagaiʼnigeʼmo yagaiʼnove. Muki yaʼamo alino namiʼniyaʼmonanafa kagaemo aʼamo maiʼnanaʼmofeʼmo kavaleno oʼnamiʼniye. Haiya kava huʼna ani alopa hosu kavaʼmo Gotitegamo huguve, huno ha paiʼniye.

¹⁰ Ina kava huno muki afinaʼaeʼmo Yosefeʼa agaeʼeʼmo lokaeno maige magokepi lokaeno havaege hisiyafeʼmo Yosefefeʼmo ge huno afi ge afi ge huʼniyaʼmonanafa geʼamo oʼafiʼniye.

¹¹ Mago afinaʼmo ani kavaʼmo afole aiʼniye. Yosefeʼa nopiʼmo aliʼyaʼmo alisiyafeʼmo uno haiʼniya afinaʼmo ani nopiʼmo aliʼyaʼmo neʼaliya vayaʼmo mago vekamo alagi oʼmaiʼniye.

¹² Inagi Potifa aʼmoʼa Yosefe kukenaleʼmo atafauʼneno, Egetaʼa nagaeʼeʼmo lokaeta havaegauʼae, huno huʼnigeno Yosefeʼa kukenaʼamo aeno asagino ayapi ateno ataleno aune hetaleno kumategamo lamiʼniye.

¹³ Ani kava huno Yosefe kukenaʼamo alino asagino ayapi ateno ataleno aune hetaleno kumatega uno lamiʼniye.

^14-15 Ani akanomoʼa noʼafiʼmo aliʼya neʼaliya vayaʼaifeʼmo ge huʼnigeʼa eʼnageno hapa painoʼaeʼmo, Ageyo, huno, anauʼnimoʼa ani Himulu nofi vekamo noʼnifiʼmo avaleno ateʼniya vekamoʼmo lagaemo alino afepiʼmo latesiyafeʼmo huʼniye. Agaemo nagaeʼeʼmo magokepi lokaeno havaesiyafeʼmo eno haineʼniyaʼmonanafa nagaemo alopa gefatiʼmo keya aeʼna ge huʼnogeno afitenoʼaeʼmo kukenaʼamo nagaepiʼmo aeno asagino ateno aune hetaleno kumatega uno lamiʼniye, huno hapa paiʼniye.

¹⁶ Inagi kukenaʼamo alino maleteno anauʼamoʼmo eno agesiyafeʼmo agava maiʼniye.

¹⁷ Inagi anauʼamoʼmo eʼnigenoʼaeʼmo anauʼamofeʼmo magoke agufa gemo huno ha paiʼniye. Kagaemo Himulu nofi vekamo notifiʼmo avaleka ateʼnana vekamoʼmo alino afepiʼmo latesiyafeʼmo nagaetegamo eʼniye.

¹⁸ Ina kava huno eʼnigeʼnaeʼmo nagaemo alopa gefatiʼmo keya aeʼna ge huʼnogenoʼaeʼmo kukenaʼamo nagaepiʼmo aeno asagino ateno aune heno kumategamo uno lamiʼniye, huno ha paiʼniye.

¹⁹ Yosefe aliʼyaʼmo afoʼamoʼmo aʼamoʼmo muki huʼniya gemo afitenoʼaeʼmo aipale kavaʼmo afole aiʼniye.

²⁰ Agaemo avalelino uno kalavusi huno ateʼnigeno kalavusifiʼmo maiʼniye. Ani kalavusifiʼmo kini vekamoʼa kalavusi huno apateʼnigeʼa maiʼnaya vayaʼeʼmo maiʼnae.

²¹ Kalavusifiʼmo maiʼniyaʼmonanafa Ala kava neʼmoʼa agaeʼeʼmo lokaeno maiʼneno hau huno ateteno ha maeʼniye. Ala kava neʼmoʼa kalavusi nopiʼmo neʼyagaiya vekamoʼmo Yosefefeʼmo hausiya agufa aipa agesamo amiʼniye.

²² Kalavusi nopiʼmo neʼyagaiya vekamoʼmo Yosefefeʼmo ha painoʼaeʼmo, muki kalavusifi maiʼnaya vayaʼaiteʼmo yagaika apato, huno huʼnigeno Yosefeʼa muki kalavusi nopi kavaʼaleʼmo yagaiʼniye.

²³ Ala kava neʼmoʼa Yosefeʼmo ha maeʼnigeno muki aliʼniya aliʼyaʼamoʼmo alagepa aliʼyaʼageʼmo afole aiʼniyaʼmofeʼmo kalavusifiʼmo neʼyagaiya vekaʼmoʼmo muki Yosefe ayapiʼmo haneʼniya yaʼalefeʼmo agesamo oʼafiʼniye.