Aepa Gemae 36 - The Keyagana NT and 25 OT books

Iso aginago vayaʼai apakiʼapimo haneʼniya gemae

¹ Isoʼa alu agiʼamo Iʼnomi aginago vayaʼai apakiʼapimo haneʼniye.

² Isoʼa Kenani nofi vayaʼai a mafaʼnemo aliʼniye. Agaemo Aʼnaʼmo Eloniʼa Hiti nofi vekamo a mafaʼnemo alite Aholimaʼmo Ana a mafaʼnemo Hivi nofi vekamo Yimiyoni a mafaʼnemo alite

³ Masematiʼmo Isameli a mafaʼnemo aganaʼamoʼmo Nemayotiʼmo alite huno aliʼniye.

⁴ Isoʼa Anapatiʼmo Elifasiʼmo alino atege Masematipatiʼmo Leyuveliʼmo alino atege

⁵ Aholimapatiʼmo Yeyusiʼagi Yalamiʼagi Kolaʼagi huno alino apatege huʼniye. Isoʼa Kenani kote maiʼniya afinaʼmo ani mafaʼne anagaʼamo alino apateʼniye.

⁶ Henagaʼamo Isoʼa muki aʼne mafaʼneʼagi muki vayaʼagi muki afu anagaʼagi Kenani kote maiʼnenoʼaeʼmo aliʼniya kagemi yaʼagi huno aliteno Yekopuʼmo ataleno alu haopalegamo uʼniye.

^7-8 Iso afu anagaʼmogiʼe Yekopu afu anagaʼmogiʼeʼmo ani maiʼnaʼa mopaleʼmo kili pageʼana magokete lokaeʼana maisaʼaʼfeʼmo ohauʼniyaʼmofeʼmo ataleno Siya avefiʼmo uno haiʼniye. Afu anagaʼmogimo nesaya kahaumo ohaneʼniyaʼmofeʼmae. Iso alu agiʼamo Iʼnomiʼae.

⁹ Isoʼa Iʼnomi nofi vayaʼai afoʼapimoʼmogeʼa Siya avefiʼmo maiʼnae.

¹⁰ Iso mafaʼne anagaʼmogi apakiʼapimo Aʼnapatiʼmo alino ateʼniya mafaʼnemo Elifasiʼe Masematipatiʼmo alino ateʼniya mafaʼnemo Leyuveliʼeʼmo maiʼnaʼae.

¹¹ Inagi Elifasi mafaʼne anagaʼmogi apakiʼapimo Temaniʼagi Omaʼagi Yefoʼagi Gatamuʼagi Kenasiʼagi huʼa maiʼnae.

¹² Iso mafaʼnemo Elifasi napa tu aʼamo Timanapatiʼmo Amalekiʼmo alino ateʼniye. Ani vayaʼmo Isoʼa Aʼnapatiʼmo alino anateʼniya vekalapati nofi vayaʼmae.

¹³ Leyuveli mafaʼne anagaʼmogi apakiʼapimo Nahatiʼagi Yelaʼagi Samaʼagi Misaʼagi huʼa maiʼnae. Ani vayaʼmo Isoʼa Masematipatiʼmo alino apateʼniya nofi vayane.

¹⁴ Isoʼa Aholimapatiʼmo Yeyusiʼagi Yalamuʼagi Kolaʼagi huno alino apateʼniye. Aholima itaʼamoʼmo Anaʼmo maiʼnigeno Ana afoʼamoʼmo Yimiyoniʼmae.

^15-16 Iso mafaʼne anagapatiʼmo yahauve vayaʼmo maiteʼa yagaiʼa apateʼnaya vayaʼai apakiʼapimo haneʼniye. Iso yege mafaʼneʼamo Elifasiʼa alino apateya mafaʼne anagaʼmogi yahauve maiteʼa yagaiʼa apateʼnaya vayaʼai apakiʼapimo Temaniʼagi Omaʼagi Sefoʼagi Kenasiʼagi Kolaʼagi Gatamuʼagi Amalekiʼagi huʼa Iʼnomi kotega vayaʼapileʼmo yagaiʼa apateʼnae. Isoʼa Aʼnapatiʼmo alino ateʼniya mafaʼnefatiʼmo vayaʼmae.

¹⁷ Iso mafaʼnemo Leyuveliʼa alino apateʼniya mafaʼne anagaʼmogi yahauve vayaʼmo maiteʼa yagaiʼa apateʼnaya vayaʼai apakiʼapimo Nahatiʼagi Yelaʼagi Samaʼagi Misaʼagi huʼa vayaʼapileʼmo yagaiʼa apateʼnae. Isoʼa Masematipatiʼmo alino apateʼniya mafaʼne anagaʼmae.

¹⁸ Isoʼa Aholimapatiʼmo alino apateya mafaʼne anagaʼmogi yahauve vayaʼmo maiteʼa yagaiʼa apateʼnaya vayaʼai apakiʼapimo Yeyusiʼagi Yalamuʼagi Kolaʼagi huʼa yagaiʼa apateʼnae. Aholima itaʼamoʼmo Anaʼae.

¹⁹ Muki mani vayaʼmo Iso nofi vayapatiʼmo yahauve vayaʼmo maiʼneʼa yagaiʼa apatesaya vayaʼmo hamaleʼnae. Iso alu agiʼamo Iʼnomiʼae.

Siya nofi vayaʼmogi apakiʼapimo haneʼniya gemae

^20-21 Siyaʼa Holi nofi vekamo ani Iʼnomi kotegamo maiʼnenoʼaeʼmo alino apateʼniya mafaʼne anagaʼmogi apakiʼapimo Lotaniʼagi Somaliʼagi Yimiyoniʼagi Anaʼagi Nisoniʼagi Esaʼagi Nisaniʼagi huno alino apateʼniye. Mani mafaʼne anagaʼmo Siya mafaʼne anagaʼmo maiʼneʼa Holi nofi vayaʼaiteʼmo yahauve vayaʼmo maiteʼa yagaiʼa apateʼnae.

²² Lotani mafaʼnelaʼani anakiʼanimo Holiʼe Hemaniʼeʼmo alino anateʼniye. Lotani asaʼamoʼmo Timanaʼmae.

²³ Somali mafaʼne anagaʼmogi apakiʼapimo Alavaniʼagi Manahatiʼagi Emaliʼagi Sefoʼagi Onamiʼagi huʼa maiʼnae.

²⁴ Yimiyoni mafaʼnelaʼani anakiʼanimo Ayaʼe Anaʼeʼmo maiʼnaʼae. Anaʼa afoʼamoʼmo Yimiyoni nokileʼmo kaʼme kotega yagaino maiʼneno mago ani kotuʼmo ageʼniya vekae.

²⁵ Ana mafaʼnelaʼani anakiʼanimo Nisoniʼe Aholimaʼeʼmo maiʼnaʼae. Ana aʼmafaʼneʼamo Aholimaʼmo maiʼniye.

²⁶ Nisani mafaʼne anagaʼmogi apakiʼapimo Hemananiʼagi Esamaniʼagi Italaniʼagi Kelaniʼagi huʼa maiʼnae.

²⁷ Iye mafaʼne anagaʼmogi apakiʼapimo Milihaniʼagi Savaniʼagi Akaniʼagi huʼa maiʼnae.

²⁸ Nisani mafaʼnelaʼani anakiʼanimo Usiʼe Alaniʼeʼmo maiʼnaʼae.

^29-30 Holi nofi vayaʼaiteʼmo yagaiʼa apateʼnaya yahauve vayaʼai apakiʼapimo Lotaniʼagi Somaliʼagi Yimiyoniʼagi Anaʼagi Nisoniʼagi Esaʼagi Nisaniʼagi huʼa yagaiʼnae. Mani vayaʼmogi Siya koteʼmo yahauve vayaʼmo maiʼneʼa aliʼa yagaiʼa apateʼnae.

³¹ Isaleli nofi vayaʼaiteʼmo mago kini vayaʼmo oʼmaiʼnaya afinaʼmo mani vayaʼmogimo Iʼnomi koteʼmo yagaiʼa apateʼnae.

³² Hogoteno yagaino apateʼniya kini vekamo Melaʼa Meyo mafaʼnemoʼmo Iʼnomi koteʼmo yagaino apateʼniye. Agaemo Niniyama taonifiʼmo maiʼniye.

³³ Melaʼa falitegenoʼaeʼmo Mosala kotega vekamo Yela mafaʼnemo Yomamiʼa agae aimuʼyaleʼmo maiteno yagaino apateʼniye.

³⁴ Yomamiʼa falitegenoʼaeʼmo Temani nofi vekamo Husamiʼa agae aimuʼyaleʼmo maiteno yagaino apateʼniye.

³⁵ Husamiʼa falitegenoʼaeʼmo Menani mafaʼnemo Hatatiʼa agae aimuʼyaleʼmo maiteno yagaino apateʼniye. Agaemo Movapu kotega Mitiyani nofi vayaʼeʼmo kame huteno aeno apaka seʼniye. Agaemo Aviti taonifiʼmo maiʼniye.

³⁶ Hatatiʼa falitegenoʼaeʼmo Masaleka vekamo Samalaʼa agae aimuʼyaleʼmo maiteno yagaino apateʼniye.

³⁷ Samalaʼa falitegenoʼaeʼmo ani haigifiʼmo haneʼniya taonifiʼmo Lihamoti vekamo Soloʼa agae aimuʼyaleʼmo maiteno yagaino apateʼniye.

³⁸ Soloʼa falitegenoʼaeʼmo Akamo mafaʼnemo Meli Hananiʼa agae aimuʼyaleʼmo maiteno yagaino apateʼniye.

³⁹ Akamo mafaʼnemo Meli Hananiʼmo falitegenoʼaeʼmo Hetaʼa agae aimuʼyaleʼmo maiteno yagaino apateʼniye. Agaemo Pau taonifiʼmo maiʼniye. Aʼamo agiʼamo Mehetameliʼae. Itaʼamoʼmo Mataletiʼae. Mataleti itaʼamoʼmo Mesahapiʼae.

^40-43 Iso nofi vayapatiʼmo yagaiʼa apateʼnaya vayaʼai apakiʼapimo Timanaʼagi Alavaʼagi Yetetiʼagi Aholimamaʼagi Elaʼagi Pinoniʼagi Kenasiʼagi Temaniʼagi Mimasaʼagi Makatiyeliʼagi Ilamuʼagi huʼa maiʼnae. Ani vayaʼamogimo Iʼnomi nofi vayaʼaiteʼmo yagaiʼa apateʼnae. Isoʼa Iʼnomi nofi vayaʼai afoʼapimoʼmo maiʼniye.