Aepa Gemae 35 - The Keyagana NT and 25 OT books

Yekopuʼa Meto taonifiʼmo uno maiʼnigeno Gotiʼa fikumo alino auleno ha maeno atesiya gemo ha paiʼniya gemae

¹ Gotiʼa Yekopufeʼmo ha painoʼaeʼmo kagaemo he tika uka haika Meto taonifiʼmo maiyo. Kagaemo nagaetefeʼmo mono hisanafeʼmo ofalini yafa hiʼyalamuʼmo huvo. Nagaemo Gotiʼnamo nepukamoʼmo Isotegatiʼmo ataleka kaune heʼnana afinaʼmo kagaetegamo afole aiʼnove, huno ha paiʼniye.

² Inagi Yekopuʼa muki afamo anagaʼaenagi muki agaeʼeʼmo magokepi maiʼnaya vayaʼaifenagi huno hapa painoʼaeʼmo, Lapakaemo alu nofi vayaʼmogi muki aigofe gotiʼapimogimo lapakaetegatiʼmo alita ataleyo. Lapakaitapimo alita alagepa hutapa lapatetetapa kukenatapimo asagitapa ataletetapa alu kukenamo alita vaiyo.

³ Inagi alita vaitetapaeʼmo he tita Meto kotegamo vigetao. Gotiʼa nagaemo kana yaʼmo neʼaluva afinaʼmo geʼnileʼmo aeno atagaina huteno naha maege muki uʼneʼna nehuva kotegamo nagaeʼeʼmo lokaeno maige nehiya Gotiʼmo ofalinimo amisuva yafa hiʼyalamuʼmo huguve, huno hapa paiʼniye.

⁴ Inagi apakaemo alu nofi vayaʼmogi muki aigofe gotiʼapimogimo aliʼa Yekopuna amiʼnae. Amiteʼa apakesaleʼmo aeʼa aliʼnaya liniʼeʼmo asagiʼa amigeno Yekopuʼa alino Sekemi kotega alopa yosamo aepafiʼmo keli kafiteno aeno atikaeno ataleʼniye.

⁵ Apakaemo uʼnagenoʼaeʼmo Gotiʼa muki taoniʼafi taoniʼafiʼmo maiʼnaya vayaʼmo koli yaʼmo alino apamigeʼa Yekopu mafaʼne anagaʼmo apavegala oʼaeʼnae.

⁶ Inagi muki Yekopuʼeʼmo lokaeʼa maiʼnaya vayaʼmo Kenani kotega Lusi taonifiʼmo uʼa avaʼyi huʼnae. Ani taonimo alu agiʼamo Meto taoniye.

⁷ Agaemo yafa hiʼyalamuʼmo hu maleteno agiʼamo Elo Meto kone huno ateʼniye. Ani agimo aepaʼamo Meto kotega Gotiʼmae. Nepuʼamotegatiʼmo ataleno aune hetaleno uʼniya afinaʼmo Gotiʼa ani koteʼmo afole aiʼniyaʼmofeʼmae.

⁸ Inagi Lipeka aliʼyaʼamo neʼaliya a kanomo agiʼamo Nemolaʼmo faliʼnigeʼa Meto taonimo afelagaʼmo alopa yosamo aepafiʼmo kiʼa ateteʼa agiʼamo Aloni Makuta yosae huʼa ateʼnae. Ani agimo aepaʼamo aviʼyaʼmo huʼnaya yosamo aepafiʼmae.

⁹ Yekopuʼa Mesopotemiya kotegatiʼmo aino atagineno Kenani kotegamo eʼniya afinaʼmo Gotiʼa halate aulagaleʼmo afole aiteno alino auleno ateʼniye.

¹⁰ Gotiʼa Yekopufeʼmo, Hemenimo Yekopugae, huʼa kagi neʼayaʼmonanafa henagaʼamo halate magoʼe huʼa Yekopugae huʼa kagi oʼaegafa Isaleligae huʼa kagi aegae, huno ha paiteno ani Isaleliʼae huno ateʼniya agimo aeʼniye.

¹¹ Gotiʼa magoʼe gemo ha painoʼaeʼmo, Nagaemo muki lokiyaʼnimo haneʼniya Gotiʼnamo maiʼnove. Asole mafaʼne alika apategane. Kagaemo asole mafaʼnemo alika apatesanageʼapaeʼmo asole kaginago vayaʼmo maige alu nofi alu nofi vayaʼmo afole aiʼa maige kini vayaʼmo maige hugae.

¹² Nagaemo Emalehamuʼe Aisakiʼeʼmo anamiʼnova mopamo hemenimo kagaeʼe kaginago vayaʼeʼmo lapamiguve, huno ha paiteno

¹³ ani ha paiʼniya kotetiʼmo ataleno uno haiʼniye.

¹⁴ Inagi Yekopuʼa ani yateʼmo mago yatala yafaʼmo alino faino ateʼneno nofi alagafati aniʼe uveliʼeʼmo alino ani yafateʼmo ofalinimo lakiʼniye.

¹⁵ Yekopuʼa agaeʼeʼmo Goti gege huʼnaʼa yatefeʼmo agiʼamo Meto kone huno ateʼniye.

¹⁶ Apakaemo Meto kotetiʼmo ataleʼa Efalata taonifiʼmo uʼa avaʼyi hisayafeʼmo uʼa hogo nehuʼapaeʼmo Lesoʼa mafaʼne alino atesiya kavaʼmo huʼniyana afole oʼaiʼnigeno hanageke yaʼmo aliʼniye.

^17-18 Mafaʼnemo alino atesiyafeʼmo huʼnigenoʼaeʼmo ha maesiyafeʼmo maiʼniya a kanoʼeʼmo, Koli osuvo. Hemenimo magoʼe ve mafaʼnemo alika ategane, huno ha paiʼnigeno Lesoʼa afaʼa neʼmaiya yaʼamo ataleno falisiyafeʼmo nehunoʼaeʼmo agiʼamo Meni Oniʼae huno ateʼniye. Ateʼniyaʼmonanafa afoʼamoʼmo Menisemeniʼae huno ateʼniye.

¹⁹ Inagi Lesoʼmo ago faliʼnigeʼa Efalati taonifilaga neʼvaya ka agiʼnaleʼmo kiʼa ateʼnae. Alu agiʼamo Metelehamu taonie.

²⁰ Yekopuʼa Leso kanoluleʼmo alagena kavaʼmo huno yatala yafaʼmo alino faino ateʼniye. Ani yafaʼmo hemenimo afaʼa haneʼniye.

²¹ Isaleliʼa uno yatala noʼmo huno kokuʼnapilaga haiʼniya noʼmo agiʼamo Ita noʼmo aino aga seno aiseʼamo uno seli noʼamo alino ataleno alino he tino ateʼniye.

²² Isaleliʼa ani koteʼmo maigenoʼaeʼmo mafaʼneʼamo Lumeniʼmo afoʼamo napa tu aʼmo Milihaʼeʼmo magokepi lokaeʼana havaeʼnaʼa kavafeʼmo Isaleliʼmo ava gemo afiʼniye. Yekopu mafaʼne anagaʼamo tuolofuʼa ve mafaʼne anagaʼmo maiʼnae.

Yekopu mafaʼne anagaʼai apakiʼapimo haneʼniya gemae

²³ Liya mafaʼne anagaʼai apakimo Yekopu yege mafaʼneʼamo Lumeniʼa maiʼnigeno Simiyoniʼagi Livaiʼagi Yutaʼagi Isakaʼagi Semuluniʼagi huʼa maiʼnae.

²⁴ Leso mafaʼnelaʼmo Yosefeʼe Menesemaniʼeʼmo maiʼnaʼae.

²⁵ Leso aliʼyaʼamo neʼaliya a kanomo Miliha mafaʼnelaʼmo Neniʼe Napataliʼeʼmo maiʼnaʼae.

²⁶ Liya aliʼyaʼamo neʼaliya a kanomo Silipa mafaʼnelaʼmo Gatiʼe Asaʼeʼmo maiʼnaʼae. Yekopuʼa Mesopotemiya kotegamo maiʼnenoʼaeʼmo mani mafaʼne anagaʼamo alino apateʼniye.

Aisakiʼmo faliʼniya gemae

²⁷ Yekopuʼa Aisakitegamo Mamile kotega Kiliyati Ama taonifilagamo uno avaʼyi huʼniye. Ani taonimo alu agiʼamo Hipaloni taonie. Emalehamuʼe Aisakiʼeʼmo hogoteʼana kalaga hageʼana uʼana kalaga vekalaʼmo maiʼnaʼa taoniʼmae.

^28-29 Aisakiʼa vani hataleti eitiʼa kafugamo maiteno kosuna leteno maiʼniya kanaʼamoʼmo magoʼe alaʼamo hanetegeno faliʼnigeʼana lole mafaʼneʼalaʼmo Isoʼe Yekopuʼeʼmo kiʼana ateʼnaʼae.