Aepa Gemae 34 - The Keyagana NT and 25 OT books

Sekemiʼa Yekopu a mafaʼnemo Nainategamo hosu kavaʼmo huʼniya gemae

¹ Nainaʼmo Yekopuʼe Liyaʼeʼmo a mafaʼnemoʼmo ani kotega maiʼnaya a mafaʼne anagaʼmo apakesiyafeʼmo uʼniye.

² Hamoʼa Hivi nofi vekamo yagaino neʼapateya vekamo mafaʼnemo Sekemiʼa Nainaʼmo agetenoʼaeʼmo avalelino uno agaeʼeʼmo magokepi lokaeno havaeteno hosu kavaʼmo huʼniye.

³ Sekemiʼa Yekopu a mafaʼnemo Nainafeʼmo lusi kava huno hau ayamopafiʼmo hauʼniyaʼmofeʼmo hausifi agufa gemo ha paiʼniye.

⁴ Inagi Sekemiʼmo afoʼamo Hamofeʼmo, mani a mafaʼnemo avaleka namisanageʼna alisuvafeʼmo nahauʼniye, huno huʼniye.

⁵ Yekopuʼmo a mafaʼneʼamo Nainategamo Sekemiʼa hosu kavaʼmo huʼniya kavafeʼmo ava gemo afiʼniye. Afiʼniyaʼmonanafa mafaʼne anagaʼamo sipisipileʼmo yagaisayafeʼmo ago uʼnayaʼmofeʼmo Yekopuʼa mago gemo osuno mafaʼne anagaʼamo esayaʼaeʼmo apakava maiʼniye.

⁶ Sekemi afoʼamoʼmo Hamoʼa Yekopuʼeʼmo kege hisaʼafeʼmo eʼniye.

⁷ Yekopu mafaʼne anagaʼamo sipisipileʼmo yagaiʼa maiʼnayategatiʼmo ani gemo afiteʼapaeʼmo apaipamo leʼnigeno hosu apaipa apakesamo afole aiʼnigeʼa eʼnae. Sekemiʼa huʼniya kavaʼmo Isaleli vayaʼai apaulagaleʼmo alagi lusi hosu kavaʼmo haʼao, huʼa huʼnaya hosu kavaʼmo alagi osisiya agufa kavaʼmo huʼniyaʼmofeʼmae.

⁸ Huʼniyaʼmonanafa Hamoʼa apakaefeʼmo hapa painoʼaeʼmo, Mafaʼneʼnimo Sekemiʼa a mafaʼnetapiyeʼmo haʼye huʼniye. Lapaoke hovanagi afaʼa avaletapa amigeno alino.

⁹ Alitesigetapa lagae a mafaʼnemo alige lapakae a mafaʼnemo alige hugune. Lapakaemo a mafaʼnetapimo apavaletapa lamisageta alige lagaemo ani kava huta a mafaʼnetimo apavaleta lapamisunagetapa alige hugune.

¹⁰ Hugunanagetapa lapakaemo lagaeʼe magokepi lokaeta maisunafeʼmo haiya mopaeʼmo lapauʼnisifigetapa ani mopaleʼmo afaʼa maigae. Lapakaemo maiʼnetapaeʼmo aliʼyaʼmo alitetapa kagemi yatapimo apamisageʼa lapamisagetapa hutapa maigae, huno huʼniye.

¹¹ Inagi Sekemiʼa Naina afoʼamofenagi asaʼamogifenagi huno hapa painoʼaeʼmo, fikumo naha maetapa namisaya kavaʼmo ageteʼnaeʼmo na agufa yafeʼmo lapauʼnisifi afaʼa lapamiguve.

¹² Lapakaemo mani a mafaʼnelefeʼmo miyaʼaeʼmo agi aetapa naha paiyo. Alopa miyaʼmo aligune, hutapa hisageʼnaeʼmo afaʼa lapamiguvanagi ani a mafaʼnemo aʼnimo maisiyafeʼmo avaletapa namiyo, huno hapa paiʼniye.

¹³ Ani gemo huʼniyaʼmonanafa Sekemiʼmo apasaʼapimoteʼmo hosu kavaʼmo huʼniyaʼmofeʼmo Sekemiʼe afoʼamoʼmo Hamoʼeʼmo humi apasayafekeʼmo ani gemo huʼnae.

¹⁴ Apakaemo huʼapaeʼmo, Lagaemo ani agufa kavaʼmo afaʼa osugune. Lasatimoʼmo afaʼa atesunageno mago agufamo olagauʼnisiya vekaleʼmo oʼmaigiye. Ani agufa kavaʼmoʼa lavagage hugiye.

¹⁵ Hugiyaʼmonanafa mani kavafeʼmo lagaemo lapakaefe hutaeʼmo, hogotetapa magoke agufa kavaʼmo lagaekana hutapa lapakufamo lapaugae.

¹⁶ Lagaemo a mafaʼnetimo lapamisunagetapa lapakaemo alige lapakaemo a mafaʼnetapimo lamisageta lagaemo alige huteta magokepi lokaeta magoke vayaʼmo maigune.

¹⁷ Inagi lapakaemo getimo akame hutapa lapakufamo olagausayana lagaemo mani koʼmo ataleta lasatimoʼmo avalelita ugune, huʼa hana paiʼnae.

¹⁸ Inagi Hamoʼe mafaʼneʼamo Sekemiʼeʼmo ani geleʼmo amuse huʼnaʼae.

¹⁹ Sekemiʼa Yekopu a mafaʼneeʼmo hauʼnigeno amogaga aiʼniyaʼmofeʼmo ani kavaʼmo malage huno akame huno huʼniye. Agae agimoʼmo afoʼamo vayaʼmogi apakimo ago aeno apaka seno ala agi vekamo maiʼniye.

²⁰ Hamoʼe mafaʼneʼamo Sekemiʼeʼmo taonimo lafi kegiʼya kipateʼmo uʼana taonifiʼmo maiʼnaya vayaʼaifeʼmo hapa paiʼanaeʼmo,

²¹ Ani vayaʼeʼmo alagepa huta magokepi lokaeta maiʼnone. Lagaemo afaʼa apatesunageʼa mopatileʼmo maiʼneʼa hapauʼnisiya aliʼyaʼmo afaʼa aligae. Mopatimo alopa mopamo haneʼniyaʼmofeʼmo afaʼa maigae. Apakae a mafaʼnemo lagaemo alisunageʼa lagae a mafaʼnemo apakaemo afaʼa alisageta huta maigune.

²² Ani kavatetikeʼmo he, huʼa hugae. Lagaemo hogoteta apakaemo nehaya agufa kavaʼmo huta lagufamo lagausunageʼapaeʼmo kanalene, huʼa hugae. Ani kavaʼmo osisunana apakaemo lagaefeʼmo, magoke vayaʼmo hamaleteta magokepi lokaeta maigune, huʼa osugae.

²³ Sipisipiʼapigi pulumakaʼapigi muki yaʼapigi huno lagaeʼeʼmo magoke yatimo afaʼa ohanesifiye. Lagaefeʼmo ge huʼa lafi geʼnaya kavatefeʼmo he, huta hisunana lagaeʼeʼmo afaʼa alagepa huʼa magokepi lokaeʼa maigae, huʼana hapa paiʼnaʼae.

²⁴ Muki taonifiʼmo maiʼnaya vayaʼmogimo Hamoʼe mafaʼneʼamo Sekemiʼeʼmo huʼnaʼa gelefeʼmo he, kanalene, huʼa huteʼa muki ve anagaʼamogimo apakufamo lagauʼnae.

²⁵ Apakufamo lagauteʼa loleʼe magoʼe afinaʼmo maiʼnayana apakafukeʼmo kige kige huno maiʼniye. Yekopu mafaʼnelaʼmo Simiyoniʼe Livaiʼeʼmo Naina asaʼalamoganimo naipeʼanimo aliteʼana taonifiʼmo uʼa haiʼana muki ani taonifiʼmo fikumo maiʼnageʼana muki ve anagaʼmo naipeletiʼmo kamitimo apaiʼageʼa faliʼa hano huʼnae.

²⁶ Anakaemo Hamoʼe mafaʼneʼamo Sekemiʼeʼmo anainaʼageʼana falitaʼageʼanaeʼmo Sekemi nopatiʼmo uʼa haiʼana Nainaʼmo avaleliʼana uʼnaʼae.

²⁷ Yekopu mafaʼne anagaʼmogigeʼmo muki ani taonifi faliʼnaya vayaʼai kagemi yaʼapimo aliʼnae. Apasaʼapimotegamo hosu kavaʼmo huʼniya kavatefeʼmo huʼnae.

²⁸ Apakaemo sipisipi anagaʼapigi pulumaka anagaʼapigi noki anagaʼapigi ani taonifiʼmo muki haneʼniya yanagi malaga haneʼniya yanagi huʼa aliʼnae.

²⁹ Apakaemo muki kagemi yaʼapimo aliteʼa mafaʼne anagaʼapigi aʼne anagaʼapigi huʼa kalavusi huʼa apateʼnae. Muki noʼapifi haneʼniya kagemi yaʼeʼmo aliʼnae.

³⁰ Inagi Yekopuʼa Simiyoniʼe Livaiʼefeʼmo hana painoʼaeʼmo, lanakaemo lusi kana yaʼmo alitana namiʼnaʼanageʼna muki mani kote vayaʼai apaulagaleʼmo hosu atumo neʼaiya yakana huʼna maiguve. Lagaemo aise vayaʼmo maiʼnonaʼmofeʼmo Kenani vayaʼe Pelesi vayaʼeʼmo aliʼa anupa huteʼa nagaeʼe afamo anagaʼniʼeʼmo kamemo lahaegae, huno huʼnigeʼanaeʼmo

³¹ anakaemo huʼanaeʼmo, Agaemo laʼasatiʼamotegamo kumai a kanogana agufa kava huʼniyana kanale kavaʼmo huʼnifiye, huʼana ge huʼana afi geʼnaʼae.