Aepa Gemae 33 - The Keyagana NT and 25 OT books

Yekopuʼa uʼnigeʼana Isoʼeʼmo fotu huʼnaʼa gemae

¹ Yekopuʼa neʼunoʼaeʼmo alino aulu heno ageyana Isoʼmo fo hataletiʼa vayaʼaʼeʼmo eʼnageno apakeʼniye. Apaketenoʼaeʼmo mafaʼnetapimo alitapa lokaete lokaete hiyo, huno hapa paigeʼa Liyaʼmo ani kavaʼmo huʼnigeno Lesoʼmo ani kavaʼmo huʼnigeno aliʼyaʼamo neʼaliʼa atalaʼmoganimo ani kavaʼmo huʼnaʼageʼa huʼnae.

² Yekopuʼa aliʼyaʼamo neʼaliʼa atalanagi mafaʼne anagaʼanigi huno alino hogoteno apateteno apakae apakamelegamo Liyaʼe mafaʼne anagaʼaʼeʼmo apateteno anileʼmo Lesoʼe mafaʼneʼamo Yosefeʼmo henagamo alino anateteno viyo, huʼniye.

³ Yekopuʼa uno hogoteteno seveniʼa kanaleʼmo ape hute hute hulino uno nepuʼamo haopaleʼmo avaʼyi huʼniye.

⁴ Huʼniyaʼmonanafa Isoʼa nagu nagu huno eno anu kiteno haeno neʼnigeʼana aviʼyaʼmo huʼnaʼae.

⁵ Isoʼa alino aulu heno ageyana aʼne mafaʼneʼamo eʼnageno apaketenoʼaeʼmo Yekopufeʼmo, Apakaemo ina lagimo kagaeʼeʼmo maiʼnae, huno ge huno afi geʼnigenoʼaeʼmo, kagae aliʼyakamo neʼaliya vekamo Gotiʼa fikumo naha maeno namiʼniya mafaʼne anagaʼmae, huno ha paiʼniye.

⁶ Inagi aliʼyaʼmo neʼaliʼa atalaʼe mafaʼne anagaʼaniʼeʼmo eʼa ape huʼnae.

⁷ Liyaʼe mafaʼne anagaʼaʼeʼmo eʼa ape hutageʼanaeʼmo Lesoʼe Yosefeʼeʼmo eʼana ape huʼnaʼae.

⁸ Isoʼa Yekopufeʼmo, Na kavatefeʼmo muki vayaʼe yuna afuʼeʼmo alika apateʼnanageʼa nagaetegamo eʼnae, huno ge huno afi geʼnigenoʼaeʼmo, Ala vekaʼniye, huno, Alagepa kaipamo kalika natesanafeʼmae, huno ha paiʼniye.

⁹ Isoʼa, Naganaʼnimogae, huno, nagaemo ago alagi haiʼmo aliʼnove, huno huʼniye. Kagaetegamo haneʼniya yaʼmo kagaikageʼmo aliyo, huno ha paiʼniye.

¹⁰ Yekopuʼa hunoʼaeʼmo, Haʼao, kahaoke hovanagi, alagepa huka kaipamo namisanaʼmoʼmo inagi fikumo nekamuva yaʼmo afaʼa aliyo. Nagaemo Goti augosafiʼmo agegekana huʼna kagae kaugosafiʼmo kageʼnove. Kagaemo nagaefeʼmo amuse huʼnisanaʼmoʼmo afaʼa aliyo.

¹¹ Gotiʼa fikumo naha maeno namiʼnigeʼna muki yaʼaʼnimo alagi haiʼmo haneʼniyaʼmofeʼmo kahaoke hovanagi, fikumo nekamuva yaʼmo afa aliyo, huno lokiya gefatiʼmo huʼnigeno Isoʼmo aliʼniye.

¹² Henagaʼamo Isoʼa hunoʼaeʼmo, Inagi lagaemo ugune. Nagaemo uʼna hogotegauve, huno huʼnigeno

¹³ Yekopuʼa hunoʼaeʼmo, Ala vekaʼniye, huno, ago afiʼnane, mafaʼne anagaʼmo lokiyaʼapimo ohaneʼniye. Nagaemo sipisipi anagaʼaifenagi alu afu alu afu anagaʼaifenagi nu neʼnaya apanaʼau anagaʼaifenagi huʼna nagesamo afuve. Magoke felugamo apavalelita visunana ago faligae.

¹⁴ Kahaoke hovanagi, kagaemo uka hogotetegeʼna nagaemo kakame huʼna vino. Muki yuna afu anagaʼmo uʼa hogotetesageʼna nagaemo vase vase huʼna visugeʼa apanaʼau anagaʼmo ani kava huʼa visayaʼmoʼmo afaʼa alagepa huʼa ugae. Ani kavaʼmo huliʼna uʼna Siya kotegamo ala vekaʼnilegamo avaʼyi huguve, huno ha paiʼniye.

¹⁵ Isoʼa hunoʼaeʼmo, lapakaeʼeʼmo magokepi visayafeʼmo mago nagaeʼeʼmo eʼnaya vayapatiʼmo apategauve, huno huʼnigeno Yekopuʼa hunoʼaeʼmo, Ala vekaʼniye, huno, na agufa aliʼyaʼapimo haneʼniye. Kagaemo amuse hisanana kanalene, huno ha paiʼniye.

¹⁶ Inagi Isoʼa ani afinaʼmo Siya kotegamo aino atagineno uʼniye.

¹⁷ Yekopuʼa Sukoti kotegamo uno noʼamo kige pulumaka anagaʼamogi yege noʼapimo kige muki afuʼamogi yege noʼapimo kige huʼniye. Ina kavaʼmo huʼniyaʼmofeʼmo ani koʼmo agiʼamo Sukoti kone, huʼa ateʼnae. Ani agimo aepaʼamo yege noʼmae.

¹⁸ Yekopuʼa Sukoti kotegatiʼmo ataleno Kenani kotega Sekemi taonifiʼmo hanageke yaʼmo oʼalino alagepa huno eno avaʼyi huʼniye. Agaemo ani afinaʼmo Patani Alami kotegatiʼmo ataleno Sekemi taonifiʼmo eno ani taonimo haopaleʼmo seli noʼamo alino ataleno alino he tino ateʼniye.

¹⁹ Ani mopamo Sekemi afoʼamo Hamo mafaʼne anagaʼmogi mopamo vani hataleti siluva agufa moniletiʼmo miya faiʼniye.

²⁰ Miya faiteno Gotiʼmo ofalini amisiya yafa hiʼyalamuʼmo huteno agiʼamo E Eyohe Isaleliʼae huno ateʼniye.