Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Aepa Gemae 32 - The Keyagana NT and 25 OT books


Yekopuʼa uno Isoʼeʼmo fotu hisaʼafeʼmo alo huʼniya gemae

1 Inagi Yekopuʼa neʼvigeʼapaeʼmo Goti enisole vayaʼamo agaetegamo neʼageʼapaeʼmo fotu huʼnae.

2 Agaemo apaketenoʼaeʼmo, lole alulaʼmo Goti ami vayaʼae, huno huteno ani mopamo agiʼamo Mehaneyemi mopae huno ateʼniye. Ani agimo aepaʼamo lole alulaʼmo ami vayaʼmae.

3 Yekopuʼa mago apa vayaʼmo alino apateʼnigeʼa Siya kotega Itomi nofi vayaʼai mopalegamo Yekopu nepuʼamoʼmo Isotegamo uʼa hogoteʼnae.

4 Agaemo hapa painoʼaeʼmo, ala vekaʼnimo Isofeʼmo ina ge hutapa ha paiyo. Aliʼyakamo neʼaliya vekamo Yekopuʼa hunoʼaeʼmo, Nagaemo kalaga hageʼna eʼna kalaga vekamoʼna Lepaniʼeʼmo lokaeʼna maiteʼna hemenimo neʼove.

5 Nagaemo pulumaka anagaʼnigi noki anagaʼnigi sipisipi anagaʼnigi meme anagaʼnigi aliʼyaʼnimo neʼaliya ve aʼnegi huʼa maiʼnae. Alagepa kaipamo kalika atesanafeʼmo mani gemo huteno alino lateʼnigeta kagaetegamo one, hutapa ha paiyo, huno hapa paiʼniye.

6 Apa vayaʼmo ago eʼa Yekopufeʼmo ha paiʼapaeʼmo, Huʼnana gekamo uta nepukamoʼmo Isofeʼmo ha paiʼnonageno agaeʼe fo hataletiʼa vayaʼeʼmo neʼayanageta uta fotu hugune, huʼa ha paiʼnae.

7 Yekopuʼa ani gemo afitenoʼaeʼmo lusi kava huno koli huge agesa alaʼamo afige huteno muki vayaʼagi muki yaʼagi huno alino fako huno apateʼnigeʼa lole agufa aluʼmo aiʼa maiʼnae.

8 Agaemo agesa afinoʼaeʼmo, Isoʼa eno lole aluʼmo aiʼa maiʼnaya vayapatiʼmo mago vayaʼeʼmo kame nehisigeʼapaeʼmo mago vayaʼmo ataleʼa apaune hegae, huno agesa afiʼniye.

9 Yekopuʼa ina ge huno nunumuʼmo huʼniye. O Gotiyo, huno, Emalehamuʼa naginago vekamo Gotiʼamogaʼe afoʼnimo Aisaki Gotiʼamogaʼeʼmo Ala kava neʼmogamo naha paikaeʼmo, halate kokalegaʼe vayakalegaʼeʼmo uka mainegeʼna alagepa huʼna yagaiʼna kateno, huka naha paiʼnane.

10 Kagaemo aliʼyakamo neʼaluva vekamoʼnaeʼmo kahau huka natege naha maege lama gemo alika nave lige huʼnana kavapiʼmo uʼna haiʼna metaleʼnove. Nagaemo hogoteʼna Yoneni aniʼmo lakaeʼna uʼnova afinaʼmo mago yaʼnimo oʼaliʼnovaʼmonanafa hayopa kayoʼnigeʼmo aliniʼna uʼnove. Aliniʼna uʼnovaʼmonanafa hemenimo halate eʼnova afinaʼmo lole alulaʼmo afole aiʼnone.

11 Nagaemo nunumuʼmo huʼnaeʼmo nepuʼnimoʼmo Isofeʼmo koli nehuvanagi ayapatiʼmo nagufamo alika katika natesanafeʼmo yagaika nato. Fiku yanageno enoʼaeʼmo nagaeʼe afamo anagaʼniʼeʼmo kamemo lahaegaiye.

12 Hogoteka naha paikaeʼmo, kagaeteʼmo alagi alagepa kavatetiʼmo yagaiʼna kateʼnisugeʼa kaginago vayaʼmo ani kahaepagana vayaʼmo afaʼa lekana opaisana agufa vayaʼmo afole aigae, huka naha paiʼnane, huno nunumuʼmo huʼniye.

13 Yekopuʼa ani haniʼilagamo havaeteno egaʼamo agaemo apavalelino eʼniya yapatiʼmo nepuʼamoʼmo Isoʼmo fikumo amisiya yaʼmo lekana paino ateʼniye.

14-15 Lekana paino ateʼniya afu anagaʼmo tu hataletiʼa a memegi tuvetiʼa ve memegi tu hataletiʼa a sipisipigi tuvetiʼa ve sipisipigi tetiʼa kamolu anagaʼmogi nuʼapifatiʼmo anuʼamo lapaiʼa nesaya kamolu anaganagi apanaʼauʼaʼenagi fotiʼa a pulumakagi teniʼa ve pulumakagi tuvetiʼa a nokigi teniʼa aikeli nokigi huno lekana paino ateʼniye.

16 Apavaleno aliʼyaʼamo neʼaliya vayaʼmo apamitenoʼaeʼmo, alita fako hutapa apaote apaote hutapa apateyo. Magokepi apavalelita oʼutapa alita fako hutapa afagite afagite hutapa apavalelitutapa hogoteyo.

17 Uno hogotesiya vekaeʼmo ha painoʼaeʼmo, Nepuʼnimoʼmo Isoʼa eno kagaeʼeʼmo fotu nehunoʼaeʼmo, kagaemo ina la aliʼyaʼmo neʼalina vekamae. Haiyaʼalegamo ugefe nehane. Mani apavalelika neʼana afu anagaʼmo ina la afue, huno ge huno kafi gesigekaeʼmo,

18 Kagaemo aliʼyakamo neʼaliya vekamo Yekopu afumo maiʼnayana Yekopuʼmo ala vekaʼamogamo fikumo kaha maeno kamiʼniya afue. Yekopuʼmo henaga neʼe, huka ha paiyo, huno ha paiʼniye.

19 Yekopuʼa napa tu vekaenagi napa tali vekaenagi huno Isoʼmo agetetapaeʼmo mani gemo hutapa ha paiyo, huno hapa paiʼniye.

20 Magoʼe gemo huta ha paitapaeʼmo, Aliʼyakamo neʼaliya vekamo Yekopuʼmo lakame huno neʼe, hutapa ha paiyo, huno hapa paiʼniye. Yekopuʼa ani kavatetiʼmo aipamo aliʼna falu huguve, huno agesa afiʼniye. Afiteno augosafiʼmo neʼagesugenoʼaeʼmo aipamoʼmo falu huʼninageno afaʼa navalesifi, huno agesa afiʼniye.

21 Muki fikumo amisiya yaʼamo ago uno hogotetegeno agaiʼamo ani haniʼilagamo vayaʼaʼeʼmo maiʼniye.


Yekopuʼe Gotiʼeʼmo anukiliʼneʼana lusi kava huʼana alino havaeno atetegeno alino havaeno atetegeno huʼnaʼa gemae

22 Ani haniʼilagamo Yekopuʼa he tino lole aʼalanagi aliʼyaʼamo neʼaliʼa atalanagi leveniʼa ve mafaʼne anagaʼagi huno apavaletegeʼa uʼa Yomoki aniʼmo lakaeʼnae.

23 Apavalelino uno aniʼmo lakaeno uno mugagayaga faligamo apateteno halate eno muki aliʼyaʼamo neʼaliya vayaʼmo alino apateʼnigeʼa muki yaʼamo aliteʼa aniʼmo lakaeʼa uʼnae.

24 Inagi ago utageno Yekopuʼa agaiʼageʼmo maiʼnigenoʼaeʼmo mago vekamo eʼnigeʼana agaeʼeʼmo anu kiliʼneʼana alino havaeno atetegeno alino havaeno atetegeno lusi kava huʼana anayamukiki huʼana huliʼana neʼvaʼageno kotiʼniye.

25 Ani vekamo agenoʼaeʼmo, aeʼna oʼaga seʼnove, huno ageʼniyana anayamukiki huʼna ategamo aumiʼyamo haino aeno hapaiʼniya ayamufamo amagino aino hatu maeno atalegeno aumiʼyamo vayu huʼniye.

26 Ani vekamoʼmo Yekopufeʼmo hunoʼaeʼmo, ago kotigefeʼmo huʼniyanagi natalo, huno huʼnigenoʼaeʼmo, Yekopuʼa ha painoʼaeʼmo, kagaemo alika auleka oʼnatesanana okatalegauve, huno huʼnigeno

27 ani vekamoʼmo Yekopufeʼmo hunoʼaeʼmo, kagikamo ina lagae, huno ge huno afi geʼnigeno, nagiʼnimo Yekopuʼnae, huno ha paiʼniye.

28 Inagi ani vekamoʼmo hunoʼaeʼmo, hemenimo Yekopugae kagimo magoʼe huno ohanegaiye. Kagaemo neʼyagaina vekamo maiʼneka Gotiʼeʼmo kayamukiki nananageka vayaʼaina ago aeka apaka seganaʼmofeʼmo saufa kagikamo Isaleligae huʼa aegae. Isaleliʼae agimo aepaʼamo yagaino apateʼniya vekamae.

29 Yekopuʼa, kahaoke hovanagi kagikamo aeka naha paiyo, huno ge huno afi geʼnigenoʼaeʼmo, na kava higekaeʼmo nagiʼnieʼmo nafi nekane, huno huteno alino auleno ateʼniye.

30 Yekopuʼa ani kotefeʼmo agiʼamo Pinaiyo kone huno ateʼniye. Ani agimo aepaʼamo Goti augosafiʼmo ageʼnove. Yekopuʼa hunoʼaeʼmo, nagaemo Goti augosafiʼmo ageʼnovaʼmonanafa ofaliʼna afaʼa maiʼnove, huno huʼniye.

31 Yekopuʼa Pinaiyo kotetiʼmo ataleno neʼvigenoʼaeʼmo yegemo haineniʼgeno aumiʼyamo aino hatu maeʼniyaʼmofeʼmo laku taka hulino uʼniye.

32 Ani kavaʼmo huʼniyaʼmofeʼmo Isaleli aginago vayaʼmogimo afumo aumiʼyaleʼmo nehaneya ameʼamo oʼneʼa maime maime eʼa hemeniʼeʼmo noʼnae. Ani vekamoʼmo Yekopu aumiʼya ayamufaleʼmo amagiʼniyaʼmofeʼmo noʼnae.

© 2013, Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ