Aepa Gemae 31 - The Keyagana NT and 25 OT books

Yekopuʼa Lepanitegatiʼmo ataleno aune hetaleno uʼniya gemae

¹ Lepani mafaʼne anagaʼamogi huʼapaeʼmo, Yekopuʼa muki afotimo yaʼmo aliʼniya kavatetiʼmo asole kagemi yaʼamo haneʼniya vekamo hamaleʼniye, huʼa huʼnaya gemo Yekopuʼa ago afiʼniye.

² Yekopuʼa Lepaniʼmo ageyana hogoteno alagepa augosamo kaliʼnigeno ageʼniya kava osuʼnifa hosu augosamo kaliʼnigeno ageʼniye.

³ Inagi Ala kava neʼmoʼa Yekopufeʼmo hunoʼaeʼmo, halate uka afokamo kotegamo nofi vayakaʼeʼmo maiʼnegeʼna kagaeʼeʼmo magokepi lokaeʼna maino, huno ha paiʼniye.

⁴ Inagi Yekopuʼa Lesoʼe Liyaʼeʼmo eʼana agesaʼafeʼmo ge huʼnigeʼana eʼnaʼageno hana painoʼaeʼmo,

⁵ Nagaemo ageʼnovana afotanimoʼmo nagaefeʼmo hosu augosa kaliʼnigeʼna ageʼnove. Ageʼnovaʼmonanafa afoʼnimo Gotiʼamoʼmo nagaeʼeʼmo magokepi lokaeno maiʼniye.

⁶ Lanakaemo ago nageʼnaʼageʼna afotanimoteʼmo muki lokiyaʼniletiʼmo aliʼyaʼamo aliʼnove.

⁷ Aliʼnovaʼmonanafa aigofe gemo huteno naya loleʼa afinaʼmo miyaʼnimo alino fala kiteno alu miyakeʼmo namiʼniye. Namiʼniyaʼmonanafa Gotiʼa afaʼa ataleʼnigeno nagaetegamo hosu kavaʼmo osuʼniye.

⁸ Agaemo naha painoʼaeʼmo, lopale tapale memegi sipisipigi huno miyakamo haneʼniye, huno naha paiʼnisiyaʼmoʼmo meme anagapatiʼe sipisipi anagapatiʼeʼmo lopale tapale memegi sipisipigi huʼa maleʼnae. Agaemo naha painoʼaeʼmo, kalono yaʼapimo haneʼnisiya memegi sipisipigi huʼa miyakamo haneʼniye, huno naha paiʼnisiyaʼmoʼmo meme anagapatiʼe sipisipi anagapatiʼeʼmo kalono yaʼapimo haneʼnisiya memegi sipisipigi huʼa maleʼnae.

⁹ Gotiʼa ani kavaʼmo huʼniya kavatetiʼmo afotanimo memefatiʼe sipisipifatiʼeʼmo apavaleno namiʼniye.

¹⁰ Ina kava huno moko aliʼnaya afinaʼmo alagamuna ageʼnovana lopale tapale ve sipisipimogiʼe kalono yaʼapimo haneʼnisiya ve sipisipimogiʼeʼmo aeto aeto apakufaʼe apakufaʼe sipisipi anagaʼmogimo moko aliʼnageʼna ageʼnove.

¹¹ Ageʼnogenoʼaeʼmo Goti enisole vekaʼamoʼa naha painoʼaeʼmo, Yekopuo, huno huʼnigeʼna, ove maiʼnove, huʼna hugenoʼaeʼmo naha painoʼaeʼmo.

¹² Alika maku huka ago. Nagaemo Lepaniʼa kagaetegamo nehiya kavaʼmo ageʼnovaʼmofeʼmo muki ve sipisipimogimo lopale tapale ve sipisipimogiʼe kalono yaʼapimo haneʼnisiya ve sipisipimogiʼeʼmo moko aligae.

¹³ Nagaemo Meto kotegamo kagaetegamo afole aiʼnova Gotiʼnamo maiʼnove. Ani koteʼmo mago yafaʼmo faika ateteka uvelimo lakika atetekaeʼmo kagoʼyamo ataleteka polomasi gemo naha paiʼnane. Hemenimo kagaemo mani kotetiʼmo ataleka kokalegamo halate uvo, huno naha paiʼniye, huno hana paiʼniye.

¹⁴ Lesoʼe Liyaʼeʼmo geʼaleʼmo aeʼana atagaina huʼana ha paiʼanaeʼmo, afotiʼamotegatiʼmo magoʼe yatiʼamo oʼaliguʼae.

¹⁵ Agaemo, alu kotega vekaleʼmo maiʼnaʼae, huno agesamo afiʼniye. Laʼagae laʼagufaletiʼmo miyaʼmo ago aliʼniyaʼmonanafa muki aliʼniya yaʼmo ago ataleno hano huʼniye.

¹⁶ Gotiʼa afotiʼamo muki yaʼamo ago hafaleno kamiʼniyaʼmofeʼmo laʼagaeʼe muki mafaʼne anagatiʼaʼeʼmo lagaiti yaʼmo haneʼniye. Hemenimo Gotiʼa kaha paiʼniya kavaʼmo afaʼa hugane, huʼana ha paiʼnaʼae.

¹⁷ Yekopuʼa he tino mafaʼne anagaʼagi aʼalanagi huno kamoluleʼmo apasagauno faino apateʼniye.

¹⁸ Agaemo muki sipisipi anagaʼagi meme anagaʼagi kagemi yaʼagi muki Mesopatemiya kotegatiʼmo aliʼniya yanagi huno aliteno apavalelino Kenani kotega afoʼamoʼmo Aisakiʼa maiʼniya mopaleʼmo uʼniye.

¹⁹ Ugefe huʼnaya afinaʼmo Lepaniʼa sipisipi anagaʼai apayokaʼmo lagauno apatesiyafeʼmo uʼniye. Uʼnigenoʼaeʼmo Lesoʼa afoʼamo aigofe gotiʼamo auneʼaʼeʼmo kumaya alinino uʼniye.

^20-21 Yekopuʼa Siliya vekamo Lepanifeʼmo ha opaino kesi katetiʼmo muki yaʼamo alinino aune heno uʼniye. Agaemo Lepani kotetiʼmo ataleno aniʼmo lakaeno Giliyati avelegamo uʼniya kateʼmo uʼniye.

Lepaniʼa Yekopuʼmo vegala aelinuno atafauʼniya gemae

²² Lole afinaʼmo ago utegeʼa Lepanifeʼmo ha paiʼapaeʼmo, Yekopuʼmo ago aune heno uʼniye, huʼa ha paiʼnae.

²³ Ha nepaigenoʼaeʼmo konaga vayaʼamo apavaleteno seveniʼa agufa afinaʼmo vegala aeliʼuʼa Yekopuʼmo Giliyati aveleʼmo uno maiʼnigeʼa atafauʼnae.

²⁴ Atafauʼnayaʼmonanafa Gotiʼa haniʼilagamo alagamuna kategamo Siliya kotega vekamo Lepanifeʼmo ha painoʼaeʼmo, ehekae, huno, Yekoputegamo mago alagepa gemo osuge hosu gemo osuge huvo, huno ha paiʼniye.

²⁵ Yekopuʼa seli noʼamo ani aveleʼmo alino ataleno alino he tino ateʼnigeʼa Lepaniʼe konaga vayaʼaʼeʼmo eʼa atafauteʼa apakaemo seli noʼapimo ani aveleʼmo aliʼa ataleʼa aliʼa he tiʼa ateʼnae.

²⁶ Lepaniʼa Yekopufeʼmo ina ge huno afi geʼniye. Na kava higekaeʼmo naha opaika a mafaʼneʼnilaʼmo naipeletiʼmo kalavusi huʼa neʼapataya agufa kavaʼmo huka kesi katetiʼmo anavalelika visanafeʼmo eʼnane.

²⁷ Na kava higekaeʼmo naha opaika kesi katetiʼmo kaune heka ugefeʼmo huʼnane. Naha paiʼnanesinana hogoteta gita amagita lamogaga aita yoke huta kavalelita eʼnonesine.

²⁸ Kagaemo a mafaʼneʼnilaʼmo hanaeʼna nege nagiyoʼnimogimo hapaeʼna nege hisuvafeʼmo nagava oʼmaiʼnane. Ika ika kavaʼmo huʼnane.

²⁹ Nagaemo kagaetegamo hosu kavaʼmo hisuva himamuʼnimo haneʼniyaʼmonanafa hemeni haniʼilagamo afokamo Gotiʼamoʼmo naha painoʼaeʼmo, ehekae, huno, mago alagepa gemo osuge hosu gemo osuge huvo, huno naha paiʼniye.

³⁰ Nagaemo afiʼnovana afokamo koʼalegamo visanafeʼmo ala ya huno kahauʼnigekaeʼmo nagaemo nataleka ugefeʼmo eʼnanaʼmonanafa na kava higeka gotiʼnimogimo kumaya alinika eʼnane, huno huʼniye.

³¹ Yekopuʼa hunoʼaeʼmo, Nagaemo kagaefeʼmo koli huʼnovaʼmofeʼmo kesi katetikeʼmo ugefeʼmo eʼnove. Kagaemo fiku yanageka a mafaʼnekalaʼmo himamukaletiʼmo anavalegane, huʼna nagesa afiʼnove.

³² Gotikamogimo ina laʼmo aliʼnisigeka agesapi afaʼa ategeno oʼmaino. Alagi kamiti amagigeno falino. Konagatimogi apaulagaleʼmo muki yakamo ageka alagepa huka alinika uvo, huno ha paiʼniye. Yekopuʼa Lesoʼmo kumaya aliʼniye, huno oʼageʼniyaʼmofeʼmo ani gemo huʼniye.

³³ Inagi Lepaniʼa Yekopu seli nopiʼmo uno haino aulaga halino agegeno ataleno uno Liya seli nopiʼmo uno haino aulaga halino agegeno ataleno uno aliʼyaʼamo neʼaliʼa atalaʼani nopiʼmo aulaga halino ageyana mago oʼageʼniye. Agaemo Liya seli nopatiʼmo ataleno uno Leso seli nopiʼmo uno haino aulaga halino ageʼniye.

³⁴ Lesoʼmo afoʼamo aigofe gotiʼamogimo kumaya alino kamoluleʼmo maleteno faino maiʼniya kuʼmo afepiʼmo maleteno fai maiʼniye. Lepaniʼa noʼafiʼmo aulaga halino ageʼniyana oʼageʼniye.

³⁵ Lesoʼa afoʼamofeʼmo hunoʼaeʼmo, kahaoke hovanagi, ge oʼnahauvo. Aʼne anagaʼmo nehapaiya kaitaʼmo neʼnahaiyaʼmofeʼmo he otiguve, huno huʼnigeno afoʼamoʼmo kahauya huʼniyanagi alagi oʼageʼniye.

³⁶ Inagi Yekopuʼa aipa leʼnigeno Lepanifeʼmo ge haunoʼaeʼmo, Nagaemo na agufa hosu kavaʼmo kagaetegamo huge na agufa kavaʼnimo agetekaeʼmo navegala aelika eʼnane.

³⁷ Muki yaʼaʼnifiʼmo ago ageka ageʼnanagi na agufa yaʼmo kagae yaʼmo haneʼnigeka ageʼnane. Konagakamogi apaulagalenagi nagae konagaʼmogi apaulagalenagi huka alika afole aigeʼa kavatiʼamo afaʼa aliʼa fako hiyo.

³⁸ Nagaemo tuvetiʼa kafugamo aliʼyakamo aliʼnogeʼapaeʼmo a sipisipi anagakamogiʼe a meme anagakamogiʼeʼmo alagepa huʼa apanaʼaumo maleʼnae. Nagaemo mago ve sipisipikamo amagiʼna oʼneʼnove.

³⁹ Kahaufilaga afela afumoʼmo sipisipikamo hapaege memekamo hapaege huʼnigeʼnaeʼmo mago alininuʼna kave oliʼnove. Nagaiʼnimo ani haeʼniya afumo aimuʼyaleʼmo aeʼna kamiʼnove. Muki afinaʼmo lokiya gemo hukaeʼmo, haniʼilagamo kumaya apavalege felugamo kumaya apavalege hisagekaeʼmo miya faigane, hukageʼmo huʼnane.

⁴⁰ Felugamo yege nalege haniʼilagamo yasi nahauge huʼnigeʼna alagepa huʼna nauʼmo okaleʼnove.

⁴¹ Kagaeʼeʼmo tuvetiʼa kafugamo maiʼneʼnaeʼmo lole a mafaʼnekalaʼmo alisuvafeʼmo fotiniʼa kafugamo aliʼyakamo aliteʼna sipisipikafatiʼmo apavalesuvafeʼmo sigisiʼa kafugamo aliʼyakamo aliʼnove. Aliʼnovaʼmonanafa naya lole afinaʼmo aliʼnova aliʼyatefeʼmo miyaʼnimo oʼnamika alu miyaʼmo namiʼnane.

⁴² Naginago vekamo Emalehamu Gotiʼamoʼe afoʼnimo Aisaki Gotiʼamoʼeʼmo nagaeʼeʼmo magokepi lokaeno oʼmaiʼniyesinana ago alika natalesanageʼna nagufaʼageʼmo uʼnovesine. Gotiʼa nagaemo naipa kana huʼniya kavaʼnimo ago nagege lokiya aliʼyaʼmo aliʼnova kavaʼmo agege hutenoʼaeʼmo ega haniʼilagamo kagaefeʼmo lokiya ge huno ge kahauʼniye, huno ha paiʼniye.

Yekopuʼe Lepaniʼeʼmo kotalakemo huʼnaʼa gemae

⁴³ Lepaniʼa Yekopu geʼaleʼmo aeno atagaina huno ha painoʼaeʼmo, mani lole a mafaʼnelaʼmo nagae a mafaʼnelane. Mani mafaʼne anagaʼmo nagae mafaʼne anagane. Mani sipisipi anagaʼe meme anagaʼeʼmo nagae yane. Mani muki ageʼnana yaʼamo nagaiʼni yaʼageʼmo haneʼniye. Haneʼniyaʼmonanafa nagaemo a mafaʼneʼnilategaʼe mafaʼne anagaʼanilegaʼeʼmo na agufa kavaʼmo huguve.

⁴⁴ Inagi egetaʼao. Laʼagaemo kotalakemo hu malegauʼae. Hu maletetaʼaeʼmo mago yafaʼalumo alitaʼa ai malesuʼageno kotalakemo hu malesuʼa getiʼaeʼmo faigoko gemo huno kagaefeʼmo kaha paige nagaefeʼmo naha paige hugiye, huno ha paiʼniye.

^45-46 Yekopuʼa mago yatala yafaʼmo alino faino atetenoʼaeʼmo konagaʼamogifeʼmo hapa painoʼaeʼmo, asole yafaʼmo alinitetapa alu aigetao, huno hapa paiʼnigeʼa yafaʼmo alini eʼa alu aiʼa maleʼnae. Apakaemo uʼa ani yafa aluleʼmo maiʼneʼa neʼyaʼmo neʼnae.

⁴⁷ Lepaniʼa ani yafaʼalumo agiʼamo Yega Sahanuta yafa aluve, huno ateʼniyaʼmonanafa Yekopuʼa Galeti yafa aluve, huno agi ateʼniye.

⁴⁸ Lepaniʼa hunoʼaeʼmo, Mani yafa alumo mani kotalakemo alagena yaʼamogeno faigoko gemo hugiye, huno huʼniyaʼmofeʼmo ani yafa alumo agiʼamo Galeti yafa aluve, huno ateʼniye.

⁴⁹ Lepaniʼa hunoʼaeʼmo, Ala kava neʼmoʼa laʼaote laʼaote hutaʼa maisuʼa afinaʼmo kavatiʼaleʼmo alagepa huno yagaiʼneno laʼagegaiye, huno huʼnigeʼa mago alu agiʼamo Misipa yafa aluve, huʼa ateʼnae.

⁵⁰ Lepaniʼa magoʼe gemo hunoʼaeʼmo, kagaemo a mafaʼneʼnilaʼmo hanageke yaʼmo anamisapi alu aʼmo alisapi hisanaʼmoʼmo mago vekamoʼmo laʼagaeʼeʼmo lokaeno maiʼneno oʼagegaiyaʼmonanafa Gotiʼa kavatiʼamo neʼageyanageno faigoko gemo hisiya vekamo maiʼniye.

⁵¹ Lepaniʼa Yekopufeʼmo magoʼe gemo hunoʼaeʼmo, Mani yafaʼaluʼe yatala yafaʼmo faiʼna ateʼnova yafaʼeʼmo laʼagae folagapiʼmo maleʼnove.

⁵² Mani yafaʼaluʼe yatala yafaʼeʼmo hanesigetaʼaeʼmo nagaemo aeʼna aga seʼna uʼna kagaetegamo hosu kava osuge kagaemo aeka aga seka eka nagaetegamo hosu kavaʼmo osuge hisuʼafeʼmo faigoko gemo hisiyafeʼmo folagatiʼafiʼmo haneʼniye.

⁵³ Emalehamuʼagi Nehoʼagi afoʼnimoʼagi huno huʼnigeno Gotiʼapimoʼmo laʼagae kavaʼmo alino fako huno laʼategaiye, huno huʼnigeno Yekopuʼa afoʼamo Aisakiʼmo koli huʼneno mono huʼniya Gotiʼamo agiʼaletiʼmo agoʼya ataleteno polomasi gemo huʼniye.

⁵⁴ Yekopuʼa ani avefiʼmo ofalinimo amiteno nofi vayaʼaeʼmo ge huʼnigeʼa eʼa neʼyaʼmo neteʼa ani haniʼilagamo ani avefiʼmo havaeʼnae.

⁵⁵ Gotilamiyapiʼmo Lepaniʼa he tino a mafaʼneʼalaʼe agiyoʼamogiʼeʼmo hapaeno neteno alino auleno apateteno apataleno atagineno koʼalegamo uʼniye.