Aepa Gemae 30 - The Keyagana NT and 25 OT books

¹ Inagi Lesoʼa agenoʼaeʼmo nagaemo Yekoputetiʼmo mago mafaʼnemo aliʼna oʼapateʼnove, huno agetenoʼaeʼmo atoʼamofeʼmo aipa kafa haeteno Yekopufe hunoʼaeʼmo, kagaemo mago mafaʼnemo namiyo. Oʼnamisanana faliguve, huno huʼniye.

² Yekopuʼa Lesofeʼmo aipa leno atetenoʼaeʼmo, Gotiʼa kaipamo alino kalagu ki maleʼnigekaeʼmo mafaʼnemo alika noʼatane. Nagaemo Goti aimuʼyaleʼmo afaʼa oʼmaiguve, huno ha paiʼniye.

³ Lesoʼa hunoʼaeʼmo, Milihaʼmo aliʼyaʼnimo neʼaliya aʼeʼmo magokepi lokaeka havaegenoʼa mafaʼneʼnimo alino atenageno nagaeʼeʼmo mago mafaʼneʼnimo maino, huno ha paiʼniye.

⁴ Inagi Lesoʼa Milihaʼa aliʼyaʼamo neʼaliya a kanomo avaleno Yekopu amiʼnigeʼana magokepi lokaeʼana havaeʼnaʼae.

⁵ Milihaʼmo aipaguʼeʼmo maiteno Yekopu ve mafaʼneʼamo alino ateʼniye.

⁶ Inagi Lesoʼa hunoʼaeʼmo, Gotiʼa kavaʼnimo alino fako huno agetenoʼaeʼmo geʼnimo afiteno mafaʼnemo namiʼniye, huno huʼniye. Huʼniyaʼmofeʼmo agiʼamo Neniʼae huno ateʼniye. Ani agimo aepaʼamo alino fako nehiya vekamae.

⁷ Leso aliʼyaʼamo neʼaliya a kanomo Milihaʼmo halate aipaguʼeʼmo maiteno magoʼe huno Yekopu ve mafaʼneʼamo alino ateʼniye.

⁸ Lesoʼa hunoʼaeʼmo, Nagaeʼe atoʼnimoʼeʼmo anukilinetaʼa alino havaeno natesiyafeʼmo huʼnigeʼna nagaemo aliʼna havaeʼna atesuvafeʼmo huʼnogetaʼa laʼayamufa huʼnoʼaʼmonanafa nagaekeʼmo aeʼna aga seʼnove, huno huteno agiʼamo Napataliʼae huno ateʼniye. Ani agimo aepaʼamo anukiliʼneʼana lusi kava huʼana anayamukiki huʼnaʼapatiʼmo alino havaeno ateʼniye.

^9-10 Liyaʼmo agenoʼaeʼmo magoʼe mafaʼne aliʼna noʼatove, huno agetenoʼaeʼmo aliʼyaʼamo neʼaliya a kanomo Silipana avaleno Yekopuʼmo amiʼnigeno Yekopuʼeʼmo magokepi lokaeno havaeteno ve mafaʼnemo alino ateʼniye.

¹¹ Liyaʼa hunoʼaeʼmo, asole vayaʼmo neʼae, huno huteno agiʼamo Gatiʼae huno ateʼniye. Ani agimo aepaʼamo asole vayaʼmae.

¹² Liya aliʼyaʼamo neʼaliya a kanomo Silipaʼmo Yekopu mafaʼnemo magoʼe huno alino ateʼniye.

¹³ Liyaʼa hunoʼaeʼmo, Hemenimo namogaga neʼauvanageʼa muki aʼne anagaʼmogimo huʼapaeʼmo, alino auleno ateʼniya ane, huʼa hugae, huno huteno agiʼamo Asoʼae huno ateʼniye. Ani agimo aepaʼamo amogaga neʼaiya kavane.

¹⁴ Inagi vitimo nehatagaya afinaʼmo Lumeniʼa hoyalegamo uno ageyana mago kahaumoʼmo ause heʼnigeno ageteno ani kahauʼe auseʼaʼeʼmo alinineno itaʼamo Liyaʼmo amiʼniye. Lesoʼa agetenoʼaeʼmo Liyafeʼmo, mafaʼnekamoʼmo alinineno kamiʼniya lusa kahaumo mago namiyo, huno afi geʼniye.

¹⁵ Liyaʼa hunoʼaeʼmo, Anauʼnimoʼmo alika kagaeʼekeʼmo neʼmaiya kavafeʼmo kagesamo afikaeʼmo, aise yane, huka nehapiye. Hutekaeʼmo kagaemo mafaʼneʼnimoʼmo alinino eʼniya kahauʼeʼmo namiyo, huka hapiye, huno huʼnigeno Lesoʼa hunoʼaeʼmo, Inagi ani yaʼmo namisanana Yekopuʼeʼmo hemeni haniʼilagamo magokepi lokaeka havaegane, huno ha paiʼniye.

¹⁶ Uneʼmo Yekopuʼa hoyalegatiʼmo neʼegeno Liyaʼmo neʼvigeʼana fotu huteʼana ha painoʼaeʼmo, Hemenimo kagaemo nagaeʼeʼmo magokepi lokaeka havaegane. Mafaʼneʼnimoʼmo alinino eʼniya lusa kahauletiʼmo kagaemo Lesotegatiʼmo ago miya faiʼnove, huno ha paitegeʼana magokepi lokaeʼana havaeʼnaʼae.

¹⁷ Gotiʼa Liyaʼmo nunumu huʼniya gemo afitenoʼaeʼmo ha maeʼnigeno aipaguʼeʼmo maiteno napa faefu mafaʼnemo alino ateʼniye.

¹⁸ Liyaʼa hunoʼaeʼmo, Nagaemo aliʼyaʼnimo neʼaliya aʼmo avaleʼna anauʼnimoʼmo amiʼnovaʼmofeʼmo Gotiʼa miyaʼnimo ago namiʼniye, huno huteno agiʼamo Isakaʼae huno ateʼniye. Ani agimo aepaʼamo miyaʼnimae.

¹⁹ Henagaʼamo Liyaʼa halate aipaguʼeʼmo maiteno Yekopu napa sigisi ve mafaʼneʼamo alino ateʼniye.

²⁰ Alino atetenoʼaeʼmo, Gotiʼa alagepa yaʼmo fiku naha maeno namiʼniyaʼmofeʼmo anauʼnimoʼmo ala nagimo namigiye, huno huteno agiʼamo Semuluniʼae huno ateʼniye. Ani agimo aepaʼamo ala agiʼamae.

²¹ Henagaʼamo halate aipaguʼeʼmo maiteno a mafaʼnemo alino atetenoʼaeʼmo agiʼamo Ninaʼae huno ateʼniye.

^22-24 Gotiʼa Lesofeʼmo age kanino oʼataleʼnifa agesa afiʼniye. Nunumu huʼniya geʼamo afitenoʼaeʼmo ha maeno aipamo alino akaka vaeʼnigeno aipaguʼeʼmo maiteno mago mafaʼnemo alino ateʼniye. Alino atetenoʼaeʼmo, Gotiʼa huʼa faipa huʼa neʼnataya gemo alino ataleʼniye, huno huʼniye. Agaemo hunoʼaeʼmo, Ala kava neʼmoʼa magoʼe huno mafaʼnemo namigiye, huno huteno agiʼamo Yosefeʼae huno ateʼniye Ani agimo aepaʼamo magoʼmae.

Yekopuʼa Lepani aliʼyateʼmo maiʼniya kavafeʼmo ge huge afige huʼnaʼa gemae

²⁵ Lesoʼa Yosefeʼmo alino atetegenoʼaeʼmo Yekopuʼa Lepanifeʼmo hunoʼaeʼmo, inagi koʼnilegamo alika nategeʼna vino, huno huʼniye.

²⁶ Nagaemo aʼnilatefenagi mafaʼne anagaʼnilefenagi huʼna ago aliʼyakamo aliʼnove. Aʼnilaʼe mafaʼne anagaʼniʼeʼmo apavaleka namigeʼna ago apavaleliʼna vino. Nagaemo aliʼyakamo alagepa huʼna aliʼnogeka nageʼnanaʼmofeʼmae, huno ha paiʼniye.

²⁷ Lepaniʼa geʼaleʼmo aeno atagaina huno ha painoʼaeʼmo, kahaoke hove, nagaemo kaulagaleʼmo fiku naha maeka namiʼnana kavakamo kahauya huʼna agesuvana nagaeʼeʼmo magokepi lokaeka maigane. Nagaemo ago ageʼnovana kagaemo nagaeʼeʼmo lokaeka maiʼnanaʼmofeʼmo Ala kava neʼmoʼa kagaetefeʼmo alino auleno nateʼnigeʼna ageʼnove.

²⁸ Na magi miyaʼmo aliguve, huka husapigi naha paigeʼna kamino, huno huʼniye.

²⁹ Yekopuʼa hunoʼaeʼmo, kagaemo ago nageʼnanageʼna aliʼyakamo aliʼnogeʼapaeʼmo sipisipi anagakaʼe pulumaka anagakaʼeʼmo alagepa huʼa maiʼnae.

³⁰ Hogoteno asole yakamo ohaneʼniyaʼmonanafa nagaemo eʼna kagaeʼeʼmo lokaeʼna maiʼnova afinatetiʼmo Ala kava neʼmoʼa alino auleno kateʼnigeno muki yaʼakamoʼmo aino atagu faeno magoʼe yaʼmo afole aiʼniye. Hemenimo nagaemo maiʼneʼnaeʼmo hainu afinaʼmo nagaiʼni afamo anagaʼnimo hapa maegauve, huno afi geʼniye.

³¹ Na agufa yaʼmo kamisuve, huno ge huno afi geʼnigenoʼaeʼmo Yekopuʼa hunoʼaeʼmo, kagaemo mago yaʼmo oʼnamigane. Oʼnamiganaʼmonanafa hisuva kavafeʼmo kaha paisugekaeʼmo he kanalene, hisanageʼnaeʼmo halate uʼna sipisipikaleʼmo yagaiguve.

³² Nagaemo hemenimo uʼna sipisipi anagakaʼe meme anagakaʼeʼmo apakeliʼna uʼneʼna huguve. Apaketeʼnaeʼmo falupa sipisipiʼe memeʼenagi lopale tapale sipisipiʼe memeʼenagi huʼna nagaemo miyaʼnimo aliguve.

³³ Henagaʼamo miyaʼniyeʼmo kagesa afitekaeʼmo apakesanana muki lopale tapale meme anagatenagi falupa sipisipi anagatenagi huʼna yagaiʼnisugekaeʼmo kumaya aliʼniye, huka afaʼa osugane. Henagaʼamo ani afinaʼmo fatago kavaʼnimoʼmo naha maeno kaha paigiye, huno ha paiʼniye.

³⁴ Lepaniʼa, kagae gemo akame huguʼae, huno huʼniye.

^35-36 Inagi Lepaniʼa uno muki lopale tapale a memegi ve memegi falupa aikeli sipisipi anaganagi huno apavaleno mafaʼne anagaʼamogi yagaiʼa apatesayafeʼmo apamiʼnigeʼa Yekopuʼa alu sipisipiʼalenagi memeʼalenagi huno yagaino apateʼniya kotetiʼmo ataleʼa apavaleliʼuʼa loleʼe magoʼe felugamo yagaiʼa apateʼnae.

³⁷ Inagi Yekopuʼa alu yosa alu yosamo hegafa akopamoʼyageno mago folagaʼaletiʼmo akafuʼnaʼamo akauno ataleʼnigeno yaveyave huʼnigeno lopale tapale yaʼmo hamaleʼniye.

³⁸ Alininuno aniʼmo hefiʼa neʼapamiya yateʼmo aeno he ti maleʼniye. Eʼa ani yateʼmo ageteʼa moko aliteʼapa apaipaguʼeʼmo maisayafeʼmae.

³⁹ Aliteʼapaeʼmo a mememogiʼe a sipisipimogiʼeʼmo apaipaguʼeʼmo maiteʼa lopale tapale apanaʼaumo maleʼnae.

⁴⁰ Inagi Yekopuʼa aikeli sipisipiʼamo alino fako huno apaoteʼmo apateʼniye. Apateteno muki sipisipi anagaʼai apaulagaleʼmo Lepani sipisipifatiʼmo lopale tapale sipisipiʼe falupa sipisipiʼeʼmo afaʼa apateʼniyaʼmonanafa agaiʼa sipisipi anagaʼamo Lepani sipisipiʼeʼmo alino magokepi lokaeno oʼapateno alino fako huno apaote apateʼniye.

⁴¹ Inagi Yekopuʼa lokiyaʼapimo haneʼniya alagepa memeʼe sipisipiʼeʼmo moko alisayafeʼmo nehagenoʼaeʼmo heno akau maleʼniya yosa akopamo ani neʼnaya yateʼmo aeno he ti maleʼnigeʼa ageteʼa apaipaguʼeʼmo maiʼnae.

⁴² Lokiyaʼapimo ohaneno apakufamoʼmo alagepa osuʼniya meme anagaʼmogi sipisipi anagaʼmogi huʼa moko alisayafeʼmo nehagenoʼaeʼmo ani yosa akopamo ago akaino maleʼniye. Ani kavaʼmo huʼniya kavatetiʼmo apayamufa ovaleʼnaya sipisipigi memegi huʼa Lepani sipisipiʼe memeʼeʼmo maiʼnae. Apayamufa valeʼnaya sipisipigi memegi huʼa Yekopu sipisipiʼe memeʼeʼmo maiʼnae.

⁴³ Ani kava huʼniya kavatetiʼmo Yekopuʼa magoʼe huno asole sipisipi anagaʼamo maige meme anagaʼamo maige aliʼyaʼamo neʼaliya ve aʼnemo maige kamoluʼamo maige nokiʼamo maige huʼniye.